৯. বালপণ্ডিতসুত্তং

২৪৬. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘তীণিমানি, ভিক্খৰে, বালস্স বাললক্খণানি বালনিমিত্তানি বালাপদানানি. কতমানি তীণি? ইধ, ভিক্খৰে, বালো দুচ্চিন্তিতচিন্তী চ হোতি দুব্ভাসিতভাসী চ দুক্কটকম্মকারী চ. নো চেতং [নো চেদং (সং. নি. ৩.২৭-২৮)], ভিক্খৰে, বালো দুচ্চিন্তিতচিন্তী চ অভৰিস্স দুব্ভাসিতভাসী চ দুক্কটকম্মকারী চ কেন নং [ন তেন নং (ক.), ন নং (?)] পণ্ডিতা জানেয্যুং – ‘বালো অযং ভৰং অসপ্পুরিসো’তি? যস্মা চ খো, ভিক্খৰে, বালো দুচ্চিন্তিতচিন্তী চ হোতি দুব্ভাসিতভাসী চ দুক্কটকম্মকারী চ তস্মা নং পণ্ডিতা জানন্তি – ‘বালো অযং ভৰং অসপ্পুরিসো’তি. স খো সো, ভিক্খৰে, বালো তিৰিধং দিট্ঠেৰ ধম্মে দুক্খং দোমনস্সং পটিসংৰেদেতি. সচে, ভিক্খৰে, বালো সভাযং ৰা নিসিন্নো হোতি, রথিকায [রথিযায (বহূসু)] ৰা নিসিন্নো হোতি, সিঙ্ঘাটকে ৰা নিসিন্নো হোতি; তত্র চে জনো তজ্জং তস্সারুপ্পং কথং মন্তেতি. সচে, ভিক্খৰে, বালো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, সুরামেরযমজ্জপমাদট্ঠাযী হোতি, তত্র, ভিক্খৰে, বালস্স এৰং হোতি – ‘যং খো জনো তজ্জং তস্সারুপ্পং কথং মন্তেতি, সংৰিজ্জন্তেৰ তে [সংৰিজ্জন্তে তে চ (সী. স্যা. কং. পী.)] ধম্মা মযি, অহঞ্চ তেসু ধম্মেসু সন্দিস্সামী’তি. ইদং, ভিক্খৰে, বালো পঠমং দিট্ঠেৰ ধম্মে দুক্খং দোমনস্সং পটিসংৰেদেতি.

২৪৭. ‘‘পুন চপরং, ভিক্খৰে, বালো পস্সতি রাজানো চোরং আগুচারিং গহেত্ৰা ৰিৰিধা কম্মকারণা কারেন্তে – কসাহিপি তাল়েন্তে ৰেত্তেহিপি তাল়েন্তে অদ্ধদণ্ডকেহিপি তাল়েন্তে হত্থম্পি ছিন্দন্তে পাদম্পি ছিন্দন্তে হত্থপাদম্পি ছিন্দন্তে কণ্ণম্পি ছিন্দন্তে নাসম্পি ছিন্দন্তে কণ্ণনাসম্পি ছিন্দন্তে বিলঙ্গথালিকম্পি করোন্তে সঙ্খমুণ্ডিকম্পি করোন্তে রাহুমুখম্পি করোন্তে জোতিমালিকম্পি করোন্তে হত্থপজ্জোতিকম্পি করোন্তে এরকৰত্তিকম্পি করোন্তে চীরকৰাসিকম্পি করোন্তে এণেয্যকম্পি করোন্তে বল়িসমংসিকম্পি করোন্তে কহাপণিকম্পি করোন্তে খারাপতচ্ছিকম্পি [খারাপটিচ্ছকম্পি (ক.)] করোন্তে পলিঘপরিৰত্তিকম্পি করোন্তে পলালপীঠকম্পি [পলালপিট্ঠকম্পি (পী.)] করোন্তে তত্তেনপি তেলেন ওসিঞ্চন্তে সুনখেহিপি খাদাপেন্তে জীৰন্তম্পি সূলে উত্তাসেন্তে অসিনাপি সীসং ছিন্দন্তে. তত্র, ভিক্খৰে, বালস্স এৰং হোতি – ‘যথারূপানং খো পাপকানং কম্মানং হেতু রাজানো চোরং আগুচারিং গহেত্ৰা ৰিৰিধা কম্মকারণা কারেন্তি – কসাহিপি তাল়েন্তি…পে… অসিনাপি সীসং ছিন্দন্তি; সংৰিজ্জন্তেৰ তে ধম্মা মযি, অহঞ্চ তেসু ধম্মেসু সন্দিস্সামি. মং চেপি রাজানো [সচে মম্পি (ক.)] জানেয্যুং, মম্পি রাজানো গহেত্ৰা ৰিৰিধা কম্মকারণা কারেয্যুং – কসাহিপি তাল়েয্যুং…পে… জীৰন্তম্পি সূলে উত্তাসেয্যুং, অসিনাপি সীসং ছিন্দেয্যু’ন্তি. ইদম্পি, ভিক্খৰে, বালো দুতিযং দিট্ঠেৰ ধম্মে দুক্খং দোমনস্সং পটিসংৰেদেতি.

২৪৮. ‘‘পুন চপরং, ভিক্খৰে, বালং পীঠসমারূল়্হং ৰা মঞ্চসমারূল়্হং ৰা ছমাযং [ছমায (সী. পী.)] ৰা সেমানং, যানিস্স পুব্বে পাপকানি কম্মানি কতানি কাযেন দুচ্চরিতানি ৰাচায দুচ্চরিতানি মনসা দুচ্চরিতানি তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি. সেয্যথাপি, ভিক্খৰে, মহতং পব্বতকূটানং ছাযা সাযন্হসমযং পথৰিযা ওলম্বন্তি অজ্ঝোলম্বন্তি অভিপ্পলম্বন্তি; এৰমেৰ খো, ভিক্খৰে, বালং পীঠসমারূল়্হং ৰা মঞ্চসমারূল়্হং ৰা ছমাযং ৰা সেমানং, যানিস্স পুব্বে পাপকানি কম্মানি কতানি কাযেন দুচ্চরিতানি ৰাচায দুচ্চরিতানি মনসা দুচ্চরিতানি তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি. তত্র, ভিক্খৰে, বালস্স এৰং হোতি – ‘অকতং ৰত মে কল্যাণং, অকতং কুসলং, অকতং ভীরুত্তাণং; কতং পাপং, কতং লুদ্দং, কতং কিব্বিসং. যাৰতা, ভো, অকতকল্যাণানং অকতকুসলানং অকতভীরুত্তাণানং কতপাপানং কতলুদ্দানং কতকিব্বিসানং গতি তং গতিং পেচ্চ গচ্ছামী’তি. সো সোচতি কিলমতি পরিদেৰতি উরত্তাল়িং কন্দতি সম্মোহং আপজ্জতি. ইদম্পি, ভিক্খৰে, বালো ততিযং দিট্ঠেৰ ধম্মে দুক্খং দোমনস্সং পটিসংৰেদেতি.

‘‘স খো সো, ভিক্খৰে, বালো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. যং খো তং, ভিক্খৰে, সম্মা ৰদমানো ৰদেয্য – ‘একন্তং অনিট্ঠং একন্তং অকন্তং একন্তং অমনাপ’ন্তি, নিরযমেৰ তং সম্মা ৰদমানো ৰদেয্য – ‘একন্তং অনিট্ঠং একন্তং অকন্তং একন্তং অমনাপ’ন্তি. যাৰঞ্চিদং, ভিক্খৰে, উপমাপি [উপমাহিপি (সী.)] ন সুকরা যাৰ দুক্খা নিরযা’’তি.

২৪৯. এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘সক্কা পন, ভন্তে, উপমং কাতু’’ন্তি? ‘‘সক্কা ভিক্খূ’’তি ভগৰা অৰোচ. সেয্যথাপি, ভিক্খু, চোরং আগুচারিং গহেত্ৰা রঞ্ঞো দস্সেয্যুং – ‘অযং খো, দেৰ, চোরো আগুচারী, ইমস্স যং ইচ্ছসি তং দণ্ডং পণেহী’তি. তমেনং রাজা এৰং ৰদেয্য – ‘গচ্ছথ, ভো, ইমং পুরিসং পুব্বণ্হসমযং সত্তিসতেন হনথা’তি. তমেনং পুব্বণ্হসমযং সত্তিসতেন হনেয্যুং. অথ রাজা মজ্ঝন্হিকসমযং [মজ্ঝন্তিকসমযং (সী. স্যা. কং. ক.), মজ্ঝন্তিকং সমযং (পী.)] এৰং ৰদেয্য – ‘অম্ভো, কথং সো পুরিসো’তি? ‘‘‘তথেৰ, দেৰ, জীৰতী’তি. তমেনং রাজা এৰং ৰদেয্য – ‘গচ্ছথ, ভো, তং পুরিসং মজ্ঝন্হিকসমযং সত্তিসতেন হনথা’তি. তমেনং মজ্ঝন্হিকসমযং সত্তিসতেন হনেয্যুং. অথ রাজা সাযন্হসমযং এৰং ৰদেয্য – ‘অম্ভো, কথং সো পুরিসো’তি? ‘তথেৰ, দেৰ, জীৰতী’তি. তমেনং রাজা এৰং ৰদেয্য – ‘গচ্ছথ, ভো, তং পুরিসং সাযন্হসমযং সত্তিসতেন হনথা’তি. তমেনং সাযন্হসমযং সত্তিসতেন হনেয্যুং. তং কিং মঞ্ঞথ, ভিক্খৰে, অপি নু সো পুরিসো তীহি সত্তিসতেহি হঞ্ঞমানো ততোনিদানং দুক্খং দোমনস্সং পটিসংৰেদিযেথা’’তি? ‘‘একিস্সাপি, ভন্তে, সত্তিযা হঞ্ঞমানো সো পুরিসো ততোনিদানং দুক্খং দোমনস্সং পটিসংৰেদিযেথ, কো পন ৰাদো তীহি সত্তিসতেহী’’তি?

২৫০. অথ খো ভগৰা পরিত্তং পাণিমত্তং পাসাণং গহেত্ৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমো নু খো মহন্ততরো – যো চাযং মযা পরিত্তো পাণিমত্তো পাসাণো গহিতো, যো চ হিমৰা পব্বতরাজা’’তি? ‘‘অপ্পমত্তকো অযং, ভন্তে, ভগৰতা পরিত্তো পাণিমত্তো পাসাণো গহিতো, হিমৰন্তং পব্বতরাজানং উপনিধায সঙ্খম্পি ন উপেতি, কলভাগম্পি ন উপেতি, উপনিধম্পি [উপনিধিম্পি (সী. পী.)] ন উপেতি’’. ‘‘এৰমেৰ খো, ভিক্খৰে, যং সো পুরিসো তীহি সত্তিসতেহি হঞ্ঞমানো ততোনিদানং দুক্খং দোমনস্সং পটিসংৰেদেতি তং নিরযকস্স দুক্খস্স উপনিধায সঙ্খম্পি ন উপেতি, কলভাগম্পি ন উপেতি, উপনিধম্পি ন উপেতি’’.

‘‘তমেনং, ভিক্খৰে, নিরযপালা পঞ্চৰিধবন্ধনং নাম কম্মকারণং করোন্তি – তত্তং অযোখিলং [অযোখীলং (সী. স্যা. কং. পী.)] হত্থে গমেন্তি, তত্তং অযোখিলং দুতিযে হত্থে গমেন্তি, তত্তং অযোখিলং পাদে গমেন্তি, তত্তং অযোখিলং দুতিযে পাদে গমেন্তি, তত্তং অযোখিলং মজ্ঝে উরস্মিং গমেন্তি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালং করোতি যাৰ ন তং পাপকম্মং ব্যন্তীহোতি [ব্যন্তিহোতি (পী. ক.)]. তমেনং, ভিক্খৰে, নিরযপালা সংৰেসেত্ৰা কুঠারীহি [কুধারীহি (ক.)] তচ্ছন্তি. সো তত্থ দুক্খা তিব্বা…পে… ব্যন্তীহোতি. তমেনং, ভিক্খৰে, নিরযপালা উদ্ধংপাদং অধোসিরং গহেত্ৰা ৰাসীহি তচ্ছন্তি. সো তত্থ দুক্খা তিব্বা…পে… ব্যন্তীহোতি. তমেনং, ভিক্খৰে, নিরযপালা রথে যোজেত্ৰা আদিত্তায পথৰিযা সম্পজ্জলিতায সজোতিভূতায [সঞ্জোতিভূতায (স্যা. কং. পী.)] সারেন্তিপি পচ্চাসারেন্তিপি. সো তত্থ দুক্খা তিব্বা…পে… ব্যন্তীহোতি. তমেনং, ভিক্খৰে, নিরযপালা মহন্তং অঙ্গারপব্বতং আদিত্তং সম্পজ্জলিতং সজোতিভূতং আরোপেন্তিপি ওরোপেন্তিপি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালং করোতি যাৰ ন তং পাপকম্মং ব্যন্তীহোতি. তমেনং, ভিক্খৰে, নিরযপালা উদ্ধংপাদং অধোসিরং গহেত্ৰা তত্তায লোহকুম্ভিযা পক্খিপন্তি আদিত্তায সম্পজ্জলিতায সজোতিভূতায. সো তত্থ ফেণুদ্দেহকং পচ্চতি. সো তত্থ ফেণুদ্দেহকং পচ্চমানো সকিম্পি উদ্ধং গচ্ছতি, সকিম্পি অধো গচ্ছতি, সকিম্পি তিরিযং গচ্ছতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি. তমেনং, ভিক্খৰে, নিরযপালা [নিরযপালা পুনপ্পুনং (ক.)] মহানিরযে পক্খিপন্তি. সো খো পন, ভিক্খৰে, মহানিরযো –

‘‘চতুক্কণ্ণো চতুদ্ৰারো, ৰিভত্তো ভাগসো মিতো;

অযোপাকারপরিযন্তো, অযসা পটিকুজ্জিতো.

‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফরিত্ৰা তিট্ঠতি সব্বদা’’.

‘‘অনেকপরিযাযেনপি খো অহং, ভিক্খৰে, নিরযকথং কথেয্যং; যাৰঞ্চিদং, ভিক্খৰে, ন সুকরা অক্খানেন পাপুণিতুং যাৰ দুক্খা নিরযা.

২৫১. ‘‘সন্তি, ভিক্খৰে, তিরচ্ছানগতা পাণা তিণভক্খা. তে অল্লানিপি তিণানি সুক্খানিপি তিণানি দন্তুল্লেহকং খাদন্তি. কতমে চ, ভিক্খৰে, তিরচ্ছানগতা পাণা তিণভক্খা? হত্থী অস্সা গোণা গদ্রভা অজা মিগা, যে ৰা পনঞ্ঞেপি কেচি তিরচ্ছানগতা পাণা তিণভক্খা. স খো সো, ভিক্খৰে, বালো ইধ পুব্বে রসাদো ইধ পাপানি কম্মানি করিত্ৰা কাযস্স ভেদা পরং মরণা তেসং সত্তানং সহব্যতং উপপজ্জতি যে তে সত্তা তিণভক্খা.

‘‘সন্তি, ভিক্খৰে, তিরচ্ছানগতা পাণা গূথভক্খা. তে দূরতোৰ গূথগন্ধং ঘাযিত্ৰা ধাৰন্তি – ‘এত্থ ভুঞ্জিস্সাম, এত্থ ভুঞ্জিস্সামা’তি. সেয্যথাপি নাম ব্রাহ্মণা আহুতিগন্ধেন ধাৰন্তি – ‘এত্থ ভুঞ্জিস্সাম, এত্থ ভুঞ্জিস্সামা’তি; এৰমেৰ খো, ভিক্খৰে, সন্তি তিরচ্ছানগতা পাণা গূথভক্খা, তে দূরতোৰ গূথগন্ধং ঘাযিত্ৰা ধাৰন্তি – ‘এত্থ ভুঞ্জিস্সাম, এত্থ ভুঞ্জিস্সামা’তি. কতমে চ, ভিক্খৰে, তিরচ্ছানগতা পাণা গূথভক্খা? কুক্কুটা সূকরা সোণা সিঙ্গালা, যে ৰা পনঞ্ঞেপি কেচি তিরচ্ছানগতা পাণা গূথভক্খা. স খো সো, ভিক্খৰে, বালো ইধ পুব্বে রসাদো ইধ পাপানি কম্মানি করিত্ৰা কাযস্স ভেদা পরং মরণা তেসং সত্তানং সহব্যতং উপপজ্জতি যে তে সত্তা গূথভক্খা.

‘‘সন্তি, ভিক্খৰে, তিরচ্ছানগতা পাণা অন্ধকারে জাযন্তি অন্ধকারে জীযন্তি [জিয্যন্তি (ক.)] অন্ধকারে মীযন্তি [মিয্যন্তি (ক.)]. কতমে চ, ভিক্খৰে, তিরচ্ছানগতা পাণা অন্ধকারে জাযন্তি অন্ধকারে জীযন্তি অন্ধকারে মীযন্তি? কীটা পুল়ৰা [পটঙ্গা (স্যা. কং. ক.)] গণ্ডুপ্পাদা, যে ৰা পনঞ্ঞেপি কেচি তিরচ্ছানগতা পাণা অন্ধকারে জাযন্তি অন্ধকারে জীযন্তি অন্ধকারে মীযন্তি. স খো সো, ভিক্খৰে, বালো ইধ পুব্বে রসাদো, ইধ পাপানি কম্মানি করিত্ৰা কাযস্স ভেদা পরং মরণা তেসং সত্তানং সহব্যতং উপপজ্জতি যে তে সত্তা অন্ধকারে জাযন্তি অন্ধকারে জীযন্তি অন্ধকারে মীযন্তি.

‘‘সন্তি, ভিক্খৰে, তিরচ্ছানগতা পাণা উদকস্মিং জাযন্তি উদকস্মিং জীযন্তি উদকস্মিং মীযন্তি. কতমে চ, ভিক্খৰে, তিরচ্ছানগতা পাণা উদকস্মিং জাযন্তি উদকস্মিং জীযন্তি উদকস্মিং মীযন্তি? মচ্ছা কচ্ছপা সুসুমারা, যে ৰা পনঞ্ঞেপি কেচি তিরচ্ছানগতা পাণা উদকস্মিং জাযন্তি উদকস্মিং জীযন্তি উদকস্মিং মীযন্তি. স খো সো, ভিক্খৰে, বালো ইধ পুব্বে রসাদো ইধ পাপানি কম্মানি করিত্ৰা কাযস্স ভেদা পরং মরণা তেসং সত্তানং সহব্যতং উপপজ্জতি যে তে সত্তা উদকস্মিং জাযন্তি উদকস্মিং জীযন্তি উদকস্মিং মীযন্তি.

‘‘সন্তি, ভিক্খৰে, তিরচ্ছানগতা পাণা অসুচিস্মিং জাযন্তি অসুচিস্মিং জীযন্তি অসুচিস্মিং মীযন্তি. কতমে চ, ভিক্খৰে, তিরচ্ছানগতা পাণা অসুচিস্মিং জাযন্তি অসুচিস্মিং জীযন্তি অসুচিস্মিং মীযন্তি? যে তে, ভিক্খৰে, সত্তা পূতিমচ্ছে ৰা জাযন্তি পূতিমচ্ছে ৰা জীযন্তি পূতিমচ্ছে ৰা মীযন্তি পূতিকুণপে ৰা…পে… পূতিকুম্মাসে ৰা… চন্দনিকায ৰা… ওলিগল্লে ৰা জাযন্তি, (যে ৰা পনঞ্ঞেপি কেচি তিরচ্ছানগতা পাণা অসুচিস্মিং জাযন্তি অসুচিস্মিং জীযন্তি অসুচিস্মিং মীযন্তি.) [( ) নত্থি সী. স্যা. কং. পী. পোত্থকেসু] স খো সো, ভিক্খৰে, বালো ইধ পুব্বে রসাদো ইধ পাপানি কম্মানি করিত্ৰা কাযস্স ভেদা পরং মরণা তেসং সত্তানং সহব্যতং উপপজ্জতি যে তে সত্তা অসুচিস্মিং জাযন্তি অসুচিস্মিং জীযন্তি অসুচিস্মিং মীযন্তি.

‘‘অনেকপরিযাযেনপি খো অহং, ভিক্খৰে, তিরচ্ছানযোনিকথং কথেয্যং; যাৰঞ্চিদং, ভিক্খৰে, ন সুকরং অক্খানেন পাপুণিতুং যাৰ দুক্খা তিরচ্ছানযোনি.

২৫২. ‘‘সেয্যথাপি, ভিক্খৰে, পুরিসো একচ্ছিগ্গলং যুগং মহাসমুদ্দে পক্খিপেয্য. তমেনং পুরত্থিমো ৰাতো পচ্ছিমেন সংহরেয্য, পচ্ছিমো ৰাতো পুরত্থিমেন সংহরেয্য, উত্তরো ৰাতো দক্খিণেন সংহরেয্য, দক্খিণো ৰাতো উত্তরেন সংহরেয্য. তত্রাস্স কাণো কচ্ছপো, সো ৰস্সসতস্স ৰস্সসতস্স [ৰস্সসতস্স ৰস্সসহস্সস্স ৰস্সসতসহস্সস্স (সী.), ৰস্সসতস্স (স্যা. কং. পী.)] অচ্চযেন সকিং উম্মুজ্জেয্য. তং কিং মঞ্ঞথ, ভিক্খৰে, অপি নু সো কাণো কচ্ছপো অমুস্মিং একচ্ছিগ্গলে যুগে গীৰং পৰেসেয্যা’’তি? (‘‘নো হেতং, ভন্তে’’.) [( ) নত্থি সী. পী. পোত্থকেসু] ‘‘যদি পন [যদি নূন (সী. স্যা. কং. পী.)], ভন্তে, কদাচি করহচি দীঘস্স অদ্ধুনো অচ্চযেনা’’তি. ‘‘খিপ্পতরং খো সো, ভিক্খৰে, কাণো কচ্ছপো অমুস্মিং একচ্ছিগ্গলে যুগে গীৰং পৰেসেয্য, অতো দুল্লভতরাহং, ভিক্খৰে, মনুস্সত্তং ৰদামি সকিং ৰিনিপাতগতেন বালেন. তং কিস্স হেতু? ন হেত্থ, ভিক্খৰে, অত্থি ধম্মচরিযা সমচরিযা কুসলকিরিযা পুঞ্ঞকিরিযা. অঞ্ঞমঞ্ঞখাদিকা এত্থ, ভিক্খৰে, ৰত্ততি দুব্বলখাদিকা’’.

‘‘স খো সো, ভিক্খৰে, বালো সচে কদাচি করহচি দীঘস্স অদ্ধুনো অচ্চযেন মনুস্সত্তং আগচ্ছতি, যানি তানি নীচকুলানি – চণ্ডালকুলং ৰা নেসাদকুলং ৰা ৰেনকুলং [ৰেণকুলং (সী. পী.)] ৰা রথকারকুলং ৰা পুক্কুসকুলং ৰা. তথারূপে কুলে পচ্চাজাযতি দলিদ্দে অপ্পন্নপানভোজনে কসিরৰুত্তিকে, যত্থ কসিরেন ঘাসচ্ছাদো লব্ভতি. সো চ হোতি দুব্বণ্ণো দুদ্দসিকো ওকোটিমকো বৰ্হাবাধো [বহ্ৰাবাধো (ক.)] কাণো ৰা কুণী ৰা খুজ্জো ৰা পক্খহতো ৰা ন লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন দুচ্চরিতং চরতি ৰাচায দুচ্চরিতং চরতি মনসা দুচ্চরিতং চরতি. সো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি.

‘‘সেয্যথাপি, ভিক্খৰে, অক্খধুত্তো পঠমেনেৰ কলিগ্গহেন পুত্তম্পি জীযেথ, দারম্পি জীযেথ, সব্বং সাপতেয্যম্পি জীযেথ, উত্তরিপি অধিবন্ধং [অনুবন্ধং (সী. পী.), অদ্ধুবন্ধং (স্যা. কং.)] নিগচ্ছেয্য. অপ্পমত্তকো সো, ভিক্খৰে, কলিগ্গহো যং সো অক্খধুত্তো পঠমেনেৰ কলিগ্গহেন পুত্তম্পি জীযেথ, দারম্পি জীযেথ, সব্বং সাপতেয্যম্পি জীযেথ, উত্তরিপি অধিবন্ধং নিগচ্ছেয্য. অথ খো অযমেৰ ততো মহন্ততরো কলিগ্গহো যং সো বালো কাযেন দুচ্চরিতং চরিত্ৰা ৰাচায দুচ্চরিতং চরিত্ৰা মনসা দুচ্চরিতং চরিত্ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি. অযং, ভিক্খৰে, কেৰলা পরিপূরা [কেৰলপরিপূরা (সী. পী.) ম. নি. ১.২৪৪ পাল়িযা সংসন্দেতব্বা] বালভূমী’’তি.

২৫৩. ‘‘তীণিমানি, ভিক্খৰে, পণ্ডিতস্স পণ্ডিতলক্খণানি পণ্ডিতনিমিত্তানি পণ্ডিতাপদানানি. কতমানি তীণি? ইধ, ভিক্খৰে, পণ্ডিতো সুচিন্তিতচিন্তী চ হোতি সুভাসিতভাসী চ সুকতকম্মকারী চ. নো চেতং, ভিক্খৰে, পণ্ডিতো সুচিন্তিতচিন্তী চ অভৰিস্স সুভাসিতভাসী চ সুকতকম্মকারী চ, কেন নং [ন তেন নং (ক.), ন নং (?)] পণ্ডিতা জানেয্যুং – ‘পণ্ডিতো অযং ভৰং সপ্পুরিসো’তি? যস্মা চ খো, ভিক্খৰে, পণ্ডিতো সুচিন্তিতচিন্তী চ হোতি সুভাসিতভাসী চ সুকতকম্মকারী চ তস্মা নং পণ্ডিতা জানন্তি – ‘পণ্ডিতো অযং ভৰং সপ্পুরিসো’তি. স খো সো, ভিক্খৰে, পণ্ডিতো তিৰিধং দিট্ঠেৰ ধম্মে সুখং সোমনস্সং পটিসংৰেদেতি. সচে, ভিক্খৰে, পণ্ডিতো সভাযং ৰা নিসিন্নো হোতি, রথিকায ৰা নিসিন্নো হোতি, সিঙ্ঘাটকে ৰা নিসিন্নো হোতি; তত্র চে জনো তজ্জং তস্সারুপ্পং কথং মন্তেতি. সচে, ভিক্খৰে, পণ্ডিতো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, সুরামেরযমজ্জপ্পমাদট্ঠানা পটিৰিরতো হোতি; তত্র, ভিক্খৰে, পণ্ডিতস্স এৰং হোতি – ‘যং খো জনো তজ্জং তস্সারুপ্পং কথং মন্তেতি; সংৰিজ্জন্তেৰ তে ধম্মা মযি, অহঞ্চ তেসু ধম্মেসু সন্দিস্সামী’তি. ইদং, ভিক্খৰে, পণ্ডিতো পঠমং দিট্ঠেৰ ধম্মে সুখং সোমনস্সং পটিসংৰেদেতি.

২৫৪. ‘‘পুন চপরং, ভিক্খৰে, পণ্ডিতো পস্সতি রাজানো চোরং আগুচারিং গহেত্ৰা ৰিৰিধা কম্মকারণা কারেন্তে – কসাহিপি তাল়েন্তে ৰেত্তেহিপি তাল়েন্তে অদ্ধদণ্ডকেহিপি তাল়েন্তে হত্থম্পি ছিন্দন্তে পাদম্পি ছিন্দন্তে হত্থপাদম্পি ছিন্দন্তে কণ্ণম্পি ছিন্দন্তে নাসম্পি ছিন্দন্তে কণ্ণনাসম্পি ছিন্দন্তে বিলঙ্গথালিকম্পি করোন্তে সঙ্খমুণ্ডিকম্পি করোন্তে রাহুমুখম্পি করোন্তে জোতিমালিকম্পি করোন্তে হত্থপজ্জোতিকম্পি করোন্তে এরকৰত্তিকম্পি করোন্তে চীরকৰাসিকম্পি করোন্তে এণেয্যকম্পি করোন্তে বলিসমংসিকম্পি করোন্তে কহাপণিকম্পি করোন্তে খারাপতচ্ছিকম্পি করোন্তে পলিঘপরিৰত্তিকম্পি করোন্তে পলালপীঠকম্পি করোন্তে তত্তেনপি তেলেন ওসিঞ্চন্তে সুনখেহিপি খাদাপেন্তে জীৰন্তম্পি সূলে উত্তাসেন্তে অসিনাপি সীসং ছিন্দন্তে. তত্র, ভিক্খৰে, পণ্ডিতস্স এৰং হোতি – ‘যথারূপানং খো পাপকানং কম্মানং হেতু রাজানো চোরং আগুচারিং গহেত্ৰা ৰিৰিধা কম্মকারণা কারেন্তি কসাহিপি তাল়েন্তি, ৰেত্তেহিপি তাল়েন্তি, অদ্ধদণ্ডকেহিপি তাল়েন্তি, হত্থম্পি ছিন্দন্তি, পাদম্পি ছিন্দন্তি, হত্থপাদম্পি ছিন্দন্তি, কণ্ণম্পি ছিন্দন্তি, নাসম্পি ছিন্দন্তি, কণ্ণনাসম্পি ছিন্দন্তি, বিলঙ্গথালিকম্পি করোন্তি, সঙ্খমুণ্ডিকম্পি করোন্তি, রাহুমুখম্পি করোন্তি, জোতিমালিকম্পি করোন্তি, হত্থপজ্জোতিকম্পি করোন্তি, এরকৰত্তিকম্পি করোন্তি, চীরকৰাসিকম্পি করোন্তি, এণেয্যকম্পি করোন্তি, বলিসমংসিকম্পি করোন্তি, কহাপণিকম্পি করোন্তি, খারাপতচ্ছিকম্পি করোন্তি, পলিঘপরিৰত্তিকম্পি করোন্তি, পলালপীঠকম্পি করোন্তি, তত্তেনপি তেলেন ওসিঞ্চন্তি, সুনখেহিপি খাদাপেন্তি, জীৰন্তম্পি সূলে উত্তাসেন্তি, অসিনাপি সীসং ছিন্দন্তি, ন তে ধম্মা মযি সংৰিজ্জন্তি, অহঞ্চ ন তেসু ধম্মেসু সন্দিস্সামী’তি. ইদম্পি, ভিক্খৰে, পণ্ডিতো দুতিযং দিট্ঠেৰ ধম্মে সুখং সোমনস্সং পটিসংৰেদেতি.

২৫৫. ‘‘পুন চপরং, ভিক্খৰে, পণ্ডিতং পীঠসমারূল়্হং ৰা মঞ্চসমারূল়্হং ৰা ছমাযং ৰা সেমানং, যানিস্স পুব্বে কল্যাণানি কম্মানি কতানি কাযেন সুচরিতানি ৰাচায সুচরিতানি মনসা সুচরিতানি তানিস্স তম্হি সমযে ওলম্বন্তি…পে… সেয্যথাপি, ভিক্খৰে, মহতং পব্বতকূটানং ছাযা সাযন্হসমযং পথৰিযা ওলম্বন্তি অজ্ঝোলম্বন্তি অভিপ্পলম্বন্তি; এৰমেৰ খো, ভিক্খৰে, পণ্ডিতং পীঠসমারূল়্হং ৰা মঞ্চসমারূল়্হং ৰা ছমাযং ৰা সেমানং যানিস্স পুব্বে কল্যাণানি কম্মানি কতানি কাযেন সুচরিতানি ৰাচায সুচরিতানি মনসা সুচরিতানি তানিস্স তম্হি সমযে ওলম্বন্তি অজ্ঝোলম্বন্তি অভিপ্পলম্বন্তি. তত্র, ভিক্খৰে, পণ্ডিতস্স এৰং হোতি – ‘অকতং ৰত মে পাপং, অকতং লুদ্দং, অকতং কিব্বিসং; কতং কল্যাণং, কতং কুসলং, কতং ভীরুত্তাণং. যাৰতা, ভো, অকতপাপানং অকতলুদ্দানং অকতকিব্বিসানং কতকল্যাণানং কতকুসলানং কতভীরুত্তাণানং গতি তং গতিং পেচ্চ গচ্ছামী’তি. সো ন সোচতি, ন কিলমতি, ন পরিদেৰতি, ন উরত্তাল়িং কন্দতি, ন সম্মোহং আপজ্জতি. ইদম্পি, ভিক্খৰে, পণ্ডিতো ততিযং দিট্ঠেৰ ধম্মে সুখং সোমনস্সং পটিসংৰেদেতি.

‘‘স খো সো, ভিক্খৰে, পণ্ডিতো কাযেন সুচরিতং চরিত্ৰা ৰাচায সুচরিতং চরিত্ৰা মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি. যং খো তং, ভিক্খৰে, সম্মা ৰদমানো ৰদেয্য – ‘একন্তং ইট্ঠং একন্তং কন্তং একন্তং মনাপ’ন্তি, সগ্গমেৰ তং সম্মা ৰদমানো ৰদেয্য – ‘একন্তং ইট্ঠং একন্তং কন্তং একন্তং মনাপ’ন্তি. যাৰঞ্চিদং, ভিক্খৰে, উপমাপি ন সুকরা যাৰ সুখা সগ্গা’’তি.

২৫৬. এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘সক্কা পন, ভন্তে, উপমং কাতু’’ন্তি? ‘‘সক্কা ভিক্খূ’’তি ভগৰা অৰোচ. ‘‘সেয্যথাপি, ভিক্খৰে, রাজা চক্কৰত্তী সত্তহি রতনেহি সমন্নাগতো চতূহি চ ইদ্ধীহি ততোনিদানং সুখং সোমনস্সং পটিসংৰেদেতি. কতমেহি সত্তহি? ইধ, ভিক্খৰে, রঞ্ঞো খত্তিযস্স মুদ্ধাৰসিত্তস্স তদহুপোসথে পন্নরসে সীসংন্হাতস্স উপোসথিকস্স উপরিপাসাদৰরগতস্স দিব্বং চক্করতনং পাতুভৰতি সহস্সারং সনেমিকং সনাভিকং সব্বাকারপরিপূরং. তং দিস্ৰান রঞ্ঞো খত্তিযস্স মুদ্ধাৰসিত্তস্স এৰং হোতি [এতদহোসি (স্যা. কং. ক.)] – ‘সুতং খো পন মেতং যস্স রঞ্ঞো খত্তিযস্স মুদ্ধাৰসিত্তস্স তদহুপোসথে পন্নরসে সীসংন্হাতস্স উপোসথিকস্স উপরিপাসাদৰরগতস্স দিব্বং চক্করতনং পাতুভৰতি সহস্সারং সনেমিকং সনাভিকং সব্বাকারপরিপূরং, সো হোতি রাজা চক্কৰত্তীতি. অস্সং নু খো অহং রাজা চক্কৰত্তী’’’তি?

‘‘অথ খো, ভিক্খৰে, রাজা খত্তিযো মুদ্ধাৰসিত্তো ৰামেন হত্থেন ভিঙ্কারং গহেত্ৰা দক্খিণেন হত্থেন চক্করতনং অব্ভুক্কিরতি – ‘পৰত্ততু ভৰং চক্করতনং, অভিৰিজিনাতু ভৰং চক্করতন’ন্তি. অথ খো তং, ভিক্খৰে, চক্করতনং পুরত্থিমং দিসং পৰত্ততি. অন্ৰদেৰ রাজা চক্কৰত্তী সদ্ধিং চতুরঙ্গিনিযা সেনায. যস্মিং খো পন, ভিক্খৰে, পদেসে চক্করতনং পতিট্ঠাতি তত্থ রাজা চক্কৰত্তী ৰাসং উপেতি সদ্ধিং চতুরঙ্গিনিযা সেনায. যে খো পন, ভিক্খৰে, পুরত্থিমায দিসায পটিরাজানো তে রাজানং চক্কৰত্তিং উপসঙ্কমিত্ৰা এৰমাহংসু – ‘এহি খো, মহারাজ! স্ৰাগতং তে, মহারাজ [স্ৰাগতং মহারাজ (সী. স্যা. কং. পী.)]! সকং তে, মহারাজ! অনুসাস, মহারাজা’তি. রাজা চক্কৰত্তী এৰমাহ – ‘পাণো ন হন্তব্বো, অদিন্নং নাদাতব্বং, কামেসুমিচ্ছা ন চরিতব্বা, মুসা ন ভাসিতব্বা, মজ্জং ন পাতব্বং, যথাভুত্তঞ্চ ভুঞ্জথা’তি. যে খো পন, ভিক্খৰে, পুরত্থিমায দিসায পটিরাজানো তে রঞ্ঞো চক্কৰত্তিস্স অনুযন্তা [অনুযুত্তা (সী. স্যা. কং. পী.)] ভৰন্তি [অহেসুং (স্যা. কং. ক.)].

২৫৭. ‘‘অথ খো তং, ভিক্খৰে, চক্করতনং পুরত্থিমং সমুদ্দং অজ্ঝোগাহেত্ৰা [অজ্ঝোগহেত্ৰা (সী. স্যা. কং. পী.)] পচ্চুত্তরিত্ৰা দক্খিণং দিসং পৰত্ততি…পে… দক্খিণং সমুদ্দং অজ্ঝোগাহেত্ৰা পচ্চুত্তরিত্ৰা পচ্ছিমং দিসং পৰত্ততি… পচ্ছিমং সমুদ্দং অজ্ঝোগাহেত্ৰা পচ্চুত্তরিত্ৰা উত্তরং দিসং পৰত্ততি অন্ৰদেৰ রাজা চক্কৰত্তী সদ্ধিং চতুরঙ্গিনিযা সেনায. যস্মিং খো পন, ভিক্খৰে, পদেসে চক্করতনং পতিট্ঠাতি তত্থ রাজা চক্কৰত্তী ৰাসং উপেতি সদ্ধিং চতুরঙ্গিনিযা সেনায.

‘‘যে খো পন, ভিক্খৰে, উত্তরায দিসায পটিরাজানো তে রাজানং চক্কৰত্তিং উপসঙ্কমিত্ৰা এৰমাহংসু – ‘এহি খো, মহারাজ! স্ৰাগতং তে, মহারাজ! সকং তে, মহারাজ! অনুসাস, মহারাজা’তি. রাজা চক্কৰত্তী এৰমাহ – ‘পাণো ন হন্তব্বো, অদিন্নং নাদাতব্বং, কামেসুমিচ্ছা ন চরিতব্বা, মুসা ন ভাসিতব্বা, মজ্জং ন পাতব্বং; যথাভুত্তঞ্চ ভুঞ্জথা’তি. যে খো পন, ভিক্খৰে, উত্তরায দিসায পটিরাজানো তে রঞ্ঞো চক্কৰত্তিস্স অনুযন্তা ভৰন্তি.

‘‘অথ খো তং, ভিক্খৰে, চক্করতনং সমুদ্দপরিযন্তং পথৰিং অভিৰিজিনিত্ৰা তমেৰ রাজধানিং পচ্চাগন্ত্ৰা রঞ্ঞো চক্কৰত্তিস্স অন্তেপুরদ্ৰারে অক্খাহতং মঞ্ঞে তিট্ঠতি রঞ্ঞো চক্কৰত্তিস্স অন্তেপুরদ্ৰারং উপসোভযমানং. রঞ্ঞো, ভিক্খৰে, চক্কৰত্তিস্স এৰরূপং চক্করতনং পাতুভৰতি.

২৫৮. ‘‘পুন চপরং, ভিক্খৰে, রঞ্ঞো চক্কৰত্তিস্স হত্থিরতনং পাতুভৰতি – সব্বসেতো সত্তপ্পতিট্ঠো ইদ্ধিমা ৰেহাসঙ্গমো উপোসথো নাম নাগরাজা. তং দিস্ৰান রঞ্ঞো চক্কৰত্তিস্স চিত্তং পসীদতি – ‘ভদ্দকং ৰত, ভো, হত্থিযানং, সচে দমথং উপেয্যা’তি. অথ খো তং, ভিক্খৰে, হত্থিরতনং সেয্যথাপি নাম ভদ্দো হত্থাজানীযো দীঘরত্তং সুপরিদন্তো এৰমেৰ দমথং উপেতি. ভূতপুব্বং, ভিক্খৰে, রাজা চক্কৰত্তী তমেৰ হত্থিরতনং ৰীমংসমানো পুব্বণ্হসমযং অভিরুহিত্ৰা সমুদ্দপরিযন্তং পথৰিং অনুসংযাযিত্ৰা তমেৰ রাজধানিং পচ্চাগন্ত্ৰা পাতরাসমকাসি. রঞ্ঞো, ভিক্খৰে, চক্কৰত্তিস্স এৰরূপং হত্থিরতনং পাতুভৰতি.

‘‘পুন চপরং, ভিক্খৰে, রঞ্ঞো চক্কৰত্তিস্স অস্সরতনং পাতুভৰতি – সব্বসেতো কাল়সীসো মুঞ্জকেসো ইদ্ধিমা ৰেহাসঙ্গমো ৰলাহকো নাম অস্সরাজা. তং দিস্ৰান রঞ্ঞো চক্কৰত্তিস্স চিত্তং পসীদতি – ‘ভদ্দকং ৰত, ভো, অস্সযানং, সচে দমথং উপেয্যা’তি. অথ খো তং, ভিক্খৰে, অস্সরতনং সেয্যথাপি নাম ভদ্দো অস্সাজানীযো দীঘরত্তং সুপরিদন্তো এৰমেৰ দমথং উপেতি. ভূতপুব্বং, ভিক্খৰে, রাজা চক্কৰত্তী তমেৰ অস্সরতনং ৰীমংসমানো পুব্বণ্হসমযং অভিরুহিত্ৰা সমুদ্দপরিযন্তং পথৰিং অনুসংযাযিত্ৰা তমেৰ রাজধানিং পচ্চাগন্ত্ৰা পাতরাসমকাসি. রঞ্ঞো, ভিক্খৰে, চক্কৰত্তিস্স এৰরূপং অস্সরতনং পাতুভৰতি.

‘‘পুন চপরং, ভিক্খৰে, রঞ্ঞো চক্কৰত্তিস্স মণিরতনং পাতুভৰতি. সো হোতি মণি ৰেল়ুরিযো সুভো জাতিমা অট্ঠংসো সুপরিকম্মকতো. তস্স খো পন, ভিক্খৰে, মণিরতনস্স আভা সমন্তা যোজনং ফুটা হোতি. ভূতপুব্বং, ভিক্খৰে, রাজা চক্কৰত্তী তমেৰ মণিরতনং ৰীমংসমানো চতুরঙ্গিনিং সেনং সন্নয্হিত্ৰা মণিং ধজগ্গং আরোপেত্ৰা রত্তন্ধকারতিমিসায পাযাসি. যে খো পন, ভিক্খৰে, সমন্তা গামা অহেসুং তে তেনোভাসেন কম্মন্তে পযোজেসুং ‘দিৰা’তি মঞ্ঞমানা. রঞ্ঞো, ভিক্খৰে, চক্কৰত্তিস্স এৰরূপং মণিরতনং পাতুভৰতি.

‘‘পুন চপরং, ভিক্খৰে, রঞ্ঞো চক্কৰত্তিস্স ইত্থিরতনং পাতুভৰতি. সা অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা নাতিদীঘা নাতিরস্সা নাতিকিসা নাতিথূলা নাতিকাল়িকা [নাতিকাল়ী (সী. পী.)] নাচ্চোদাতা, অতিক্কন্তা মানুসং ৰণ্ণং, অপ্পত্তা দিব্বং ৰণ্ণং. তস্স খো পন, ভিক্খৰে, ইত্থিরতনস্স এৰরূপো কাযসম্ফস্সো হোতি সেয্যথাপি নাম তূলপিচুনো ৰা কপ্পাসপিচুনো ৰা. তস্স খো পন, ভিক্খৰে, ইত্থিরতনস্স সীতে উণ্হানি গত্তানি হোন্তি, উণ্হে সীতানি গত্তানি হোন্তি. তস্স খো পন, ভিক্খৰে, ইত্থিরতনস্স কাযতো চন্দনগন্ধো ৰাযতি, মুখতো উপ্পলগন্ধো ৰাযতি. তং খো পন, ভিক্খৰে, ইত্থিরতনং রঞ্ঞো চক্কৰত্তিস্স পুব্বুট্ঠাযিনী হোতি পচ্ছানিপাতিনী কিংকারপটিস্সাৰিনী মনাপচারিনী পিযৰাদিনী. তং খো পন, ভিক্খৰে, ইত্থিরতনং রাজানং চক্কৰত্তিং মনসাপি নো অতিচরতি, কুতো পন কাযেন? রঞ্ঞো, ভিক্খৰে, চক্কৰত্তিস্স এৰরূপং ইত্থিরতনং পাতুভৰতি.

‘‘পুন চপরং, ভিক্খৰে, রঞ্ঞো চক্কৰত্তিস্স গহপতিরতনং পাতুভৰতি. তস্স কম্মৰিপাকজং দিব্বচক্খু পাতুভৰতি, যেন নিধিং পস্সতি সস্সামিকম্পি অস্সামিকম্পি. সো রাজানং চক্কৰত্তিং উপসঙ্কমিত্ৰা এৰমাহ – ‘অপ্পোস্সুক্কো ত্ৰং, দেৰ, হোহি. অহং তে ধনেন ধনকরণীযং [ধনেন করণীযং (ক.)] করিস্সামী’তি. ভূতপুব্বং, ভিক্খৰে, রাজা চক্কৰত্তী তমেৰ গহপতিরতনং ৰীমংসমানো নাৰং অভিরুহিত্ৰা মজ্ঝে গঙ্গায নদিযা সোতং ওগাহিত্ৰা [ওগহেত্ৰা (সী. পী.)] গহপতিরতনং এতদৰোচ – ‘অত্থো মে, গহপতি, হিরঞ্ঞসুৰণ্ণেনা’তি. ‘তেন হি, মহারাজ, একং তীরং নাৰা উপেতূ’তি. ‘ইধেৰ মে, গহপতি, অত্থো হিরঞ্ঞসুৰণ্ণেনা’তি. অথ খো তং, ভিক্খৰে, গহপতিরতনং উভোহি হত্থেহি উদকে ওমসিত্ৰা পূরং হিরঞ্ঞসুৰণ্ণস্স কুম্ভিং উদ্ধরিত্ৰা রাজানং চক্কৰত্তিং এতদৰোচ – ‘অলমেত্তাৰতা, মহারাজ! কতমেত্তাৰতা, মহারাজ! পূজিতমেত্তাৰতা, মহারাজা’তি. রাজা চক্কৰত্তী এৰমাহ – ‘অলমেত্তাৰতা, গহপতি! কতমেত্তাৰতা, গহপতি! পূজিতমেত্তাৰতা, গহপতী’তি. রঞ্ঞো, ভিক্খৰে, চক্কৰত্তিস্স এৰরূপং গহপতিরতনং পাতুভৰতি.

‘‘পুন চপরং, ভিক্খৰে, রঞ্ঞো চক্কৰত্তিস্স পরিণাযকরতনং পাতুভৰতি – পণ্ডিতো ব্যত্তো মেধাৰী পটিবলো রাজানং চক্কৰত্তিং উপযাপেতব্বং উপযাপেতুং [উপট্ঠপেতব্বং উপট্ঠপেতুং (সী. স্যা. কং. পী.)] অপযাপেতব্বং অপযাপেতুং ঠপেতব্বং ঠপেতুং. সো রাজানং চক্কৰত্তিং উপসঙ্কমিত্ৰা এৰমাহ – ‘অপ্পোস্সুক্কো ত্ৰং, দেৰ, হোহি. অহমনুসাসিস্সামী’তি. রঞ্ঞো, ভিক্খৰে, চক্কৰত্তিস্স এৰরূপং পরিণাযকরতনং পাতুভৰতি. রাজা, ভিক্খৰে, চক্কৰত্তী ইমেহি সত্তহি রতনেহি সমন্নাগতো হোতি.

২৫৯. ‘‘কতমাহি চতূহি ইদ্ধীহি? ইধ, ভিক্খৰে, রাজা চক্কৰত্তী অভিরূপো হোতি দস্সনীযো পাসাদিকো পরমায ৰণ্ণপোক্খরতায সমন্নাগতো অতিৰিয অঞ্ঞেহি মনুস্সেহি. রাজা, ভিক্খৰে, চক্কৰত্তী ইমায পঠমায ইদ্ধিযা সমন্নাগতো হোতি.

‘‘পুন চপরং, ভিক্খৰে, রাজা চক্কৰত্তী দীঘাযুকো হোতি চিরট্ঠিতিকো অতিৰিয অঞ্ঞেহি মনুস্সেহি. রাজা, ভিক্খৰে, চক্কৰত্তী ইমায দুতিযায ইদ্ধিযা সমন্নাগতো হোতি.

‘‘পুন চপরং, ভিক্খৰে, রাজা চক্কৰত্তী অপ্পাবাধো হোতি অপ্পাতঙ্কো সমৰেপাকিনিযা গহণিযা সমন্নাগতো নাতিসীতায নাচ্চুণ্হায অতিৰিয অঞ্ঞেহি মনুস্সেহি. রাজা, ভিক্খৰে, চক্কৰত্তী ইমায ততিযায ইদ্ধিযা সমন্নাগতো হোতি.

‘‘পুন চপরং, ভিক্খৰে, রাজা চক্কৰত্তী ব্রাহ্মণগহপতিকানং পিযো হোতি মনাপো. সেয্যথাপি, ভিক্খৰে, পিতা পুত্তানং পিযো হোতি মনাপো, এৰমেৰ খো, ভিক্খৰে, রাজা চক্কৰত্তী ব্রাহ্মণগহপতিকানং পিযো হোতি মনাপো. রঞ্ঞোপি, ভিক্খৰে, চক্কৰত্তিস্স ব্রাহ্মণগহপতিকা পিযা হোন্তি মনাপা. সেয্যথাপি, ভিক্খৰে, পিতু পুত্তা পিযা হোন্তি মনাপা, এৰমেৰ খো, ভিক্খৰে, রঞ্ঞোপি চক্কৰত্তিস্স ব্রাহ্মণগহপতিকা পিযা হোন্তি মনাপা.

‘‘ভূতপুব্বং, ভিক্খৰে, রাজা চক্কৰত্তী চতুরঙ্গিনিযা সেনায উয্যানভূমিং নিয্যাসি. অথ খো, ভিক্খৰে, ব্রাহ্মণগহপতিকা রাজানং চক্কৰত্তিং উপসঙ্কমিত্ৰা এৰমাহংসু – ‘অতরমানো, দেৰ, যাহি যথা তং মযং চিরতরং পস্সেয্যামা’তি. রাজাপি, ভিক্খৰে, চক্কৰত্তী সারথিং আমন্তেসি – ‘অতরমানো, সারথি, পেসেহি যথা মং ব্রাহ্মণগহপতিকা চিরতরং পস্সেয্যু’ন্তি. রাজা, ভিক্খৰে, চক্কৰত্তী ইমায চতুত্থায ইদ্ধিযা সমন্নাগতো হোতি. রাজা, ভিক্খৰে, চক্কৰত্তী ইমাহি চতূহি ইদ্ধীহি সমন্নাগতো হোতি.

‘‘তং কিং মঞ্ঞথ, ভিক্খৰে, অপি নু খো রাজা চক্কৰত্তী ইমেহি সত্তহি রতনেহি সমন্নাগতো ইমাহি চতূহি চ ইদ্ধীহি ততোনিদানং সুখং সোমনস্সং পটিসংৰেদিযেথা’’তি? ‘‘একমেকেনপি, ভন্তে, রতনেন [তেন রতনেন (সী.)] সমন্নাগতো রাজা চক্কৰত্তী ততোনিদানং সুখং সোমনস্সং পটিসংৰেদিযেথ, কো পন ৰাদো সত্তহি রতনেহি চতূহি চ ইদ্ধীহী’’তি?

২৬০. অথ খো ভগৰা পরিত্তং পাণিমত্তং পাসাণং গহেত্ৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমো নু খো মহন্ততরো – যো চাযং মযা পরিত্তো পাণিমত্তো পাসাণো গহিতো যো চ হিমৰা পব্বতরাজা’’তি? ‘‘অপ্পমত্তকো অযং, ভন্তে, ভগৰতা পরিত্তো পাণিমত্তো পাসাণো গহিতো; হিমৰন্তং পব্বতরাজানং উপনিধায সঙ্খম্পি ন উপেতি; কলভাগম্পি ন উপেতি; উপনিধম্পি ন উপেতী’’তি. ‘‘এৰমেৰ খো, ভিক্খৰে, যং রাজা চক্কৰত্তী সত্তহি রতনেহি সমন্নাগতো চতূহি চ ইদ্ধীহি ততোনিদানং সুখং সোমনস্সং পটিসংৰেদেতি তং দিব্বস্স সুখস্স উপনিধায সঙ্খম্পি ন উপেতি; কলভাগম্পি ন উপেতি; উপনিধম্পি ন উপেতি’’.

‘‘স খো সো, ভিক্খৰে, পণ্ডিতো সচে কদাচি করহচি দীঘস্স অদ্ধুনো অচ্চযেন মনুস্সত্তং আগচ্ছতি, যানি তানি উচ্চাকুলানি – খত্তিযমহাসালকুলং ৰা ব্রাহ্মণমহাসালকুলং ৰা গহপতিমহাসালকুলং ৰা তথারূপে কুলে পচ্চাজাযতি অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে. সো চ হোতি অভিরূপো দস্সনীযো পাসাদিকো পরমায ৰণ্ণপোক্খরতায সমন্নাগতো, লাভী অন্নস্স পানস্স ৰত্থস্স যানস্স মালাগন্ধৰিলেপনস্স সেয্যাৰসথপদীপেয্যস্স. সো কাযেন সুচরিতং চরতি, ৰাচায সুচরিতং চরতি, মনসা সুচরিতং চরতি. সো কাযেন সুচরিতং চরিত্ৰা, ৰাচায সুচরিতং চরিত্ৰা, মনসা সুচরিতং চরিত্ৰা, কাযস্স ভেদা পরং মরণা সুগতিং সগ্গং লোকং উপপজ্জতি. সেয্যথাপি, ভিক্খৰে, অক্খধুত্তো পঠমেনেৰ কটগ্গহেন মহন্তং ভোগক্খন্ধং অধিগচ্ছেয্য; অপ্পমত্তকো সো, ভিক্খৰে, কটগ্গহো যং সো অক্খধুত্তো পঠমেনেৰ কটগ্গহেন মহন্তং ভোগক্খন্ধং অধিগচ্ছেয্য. অথ খো অযমেৰ ততো মহন্ততরো কটগ্গহো যং সো পণ্ডিতো কাযেন সুচরিতং চরিত্ৰা, ৰাচায সুচরিতং চরিত্ৰা, মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জতি. অযং, ভিক্খৰে, কেৰলা পরিপূরা পণ্ডিতভূমী’’তি.

ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

বালপণ্ডিতসুত্তং নিট্ঠিতং নৰমং.