১০. দেৰদূতসুত্তং

২৬১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘সেয্যথাপি, ভিক্খৰে, দ্ৰে অগারা সদ্ৰারা [সন্ধিদ্ৰারা (ক.)], তত্থ চক্খুমা পুরিসো মজ্ঝে ঠিতো পস্সেয্য মনুস্সে গেহং পৰিসন্তেপি নিক্খমন্তেপি অনুচঙ্কমন্তেপি অনুৰিচরন্তেপি; এৰমেৰ খো অহং, ভিক্খৰে, দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সামি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানামি – ‘ইমে ৰত ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা; তে কাযস্স ভেদা পরং মরণা সুগতিং সগ্গং লোকং উপপন্না. ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা; তে কাযস্স ভেদা পরং মরণা মনুস্সেসু উপপন্না. ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা; তে কাযস্স ভেদা পরং মরণা পেত্তিৰিসযং উপপন্না. ইমে ৰা পন ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা; তে কাযস্স ভেদা পরং মরণা তিরচ্ছানযোনিং উপপন্না. ইমে ৰা পন ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা; তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না’’’তি.

২৬২. ‘‘তমেনং, ভিক্খৰে, নিরযপালা নানাবাহাসু গহেত্ৰা যমস্স রঞ্ঞো দস্সেন্তি – ‘অযং, দেৰ, পুরিসো অমত্তেয্যো অপেত্তেয্যো অসামঞ্ঞো অব্রাহ্মঞ্ঞো, ন কুলে জেট্ঠাপচাযী. ইমস্স দেৰো দণ্ডং পণেতূ’তি. তমেনং, ভিক্খৰে, যমো রাজা পঠমং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু পঠমং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু দহরং কুমারং মন্দং উত্তানসেয্যকং সকে মুত্তকরীসে পলিপন্নং সেমান’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি জাতিধম্মো, জাতিং অনতীতো. হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে, পমাদস্সং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, পমাদৰতায ন কল্যাণমকাসি কাযেন ৰাচায মনসা. তগ্ঘ ত্ৰং, অম্ভো পুরিস, তথা করিস্সন্তি যথা তং পমত্তং. তং খো পন তে এতং পাপকম্মং [পাপং কম্মং (সী. পী.)] নেৰ মাতরা কতং ন পিতরা কতং ন ভাতরা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্রাহ্মণেহি কতং ন দেৰতাহি কতং, তযাৰেতং পাপকম্মং [পাপং কম্মং (সী. পী.)] কতং, ত্ৰঞ্ঞেৰেতস্স ৰিপাকং পটিসংৰেদিস্সসী’’’তি.

২৬৩. ‘‘তমেনং, ভিক্খৰে, যমো রাজা পঠমং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা দুতিযং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু দুতিযং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু ইত্থিং ৰা পুরিসং ৰা ( ) [(আসীতিকং ৰা নাৰুতিকং ৰা ৰস্সসতিকং ৰা জাতিযা) (ক. সী. স্যা. কং. পী.) তিকঙ্গুত্তরেপি] জিণ্ণং গোপানসিৰঙ্কং ভোগ্গং দণ্ডপরাযনং পৰেধমানং গচ্ছন্তং আতুরং গতযোব্বনং খণ্ডদন্তং পলিতকেসং ৰিলূনং খলিতসিরং [খলিতংসিরো (সী.), খলিতংসিরং (স্যা. কং. পী.)] ৰলিনং তিলকাহতগত্ত’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি জরাধম্মো, জরং অনতীতো. হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে, পমাদস্সং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, পমাদৰতায ন কল্যাণমকাসি কাযেন ৰাচায মনসা. তগ্ঘ ত্ৰং, অম্ভো পুরিস, তথা করিস্সন্তি যথা তং পমত্তং. তং খো পন তে এতং পাপকম্মং নেৰ মাতরা কতং ন পিতরা কতং ন ভাতরা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্রাহ্মণেহি কতং ন দেৰতাহি কতং, তযাৰেতং পাপকম্মং কতং, ত্ৰঞ্ঞেৰেতস্স ৰিপাকং পটিসংৰেদিস্সসী’’’তি.

২৬৪. ‘‘তমেনং, ভিক্খৰে, যমো রাজা দুতিযং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা ততিযং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু ততিযং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু ইত্থিং ৰা পুরিসং ৰা আবাধিকং দুক্খিতং বাল়্হগিলানং সকে মুত্তকরীসে পলিপন্নং সেমানং অঞ্ঞেহি ৰুট্ঠাপিযমানং অঞ্ঞেহি সংৰেসিযমান’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি ব্যাধিধম্মো, ব্যাধিং অনতীতো. হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে, পমাদস্সং, ভন্তে’’’তি.

২৬৫. ‘‘তমেনং, ভিক্খৰে, যমো রাজা ততিযং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা চতুত্থং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু চতুত্থং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু রাজানো চোরং আগুচারিং গহেত্ৰা ৰিৰিধা কম্মকারণা কারেন্তে – কসাহিপি তাল়েন্তে ৰেত্তেহিপি তাল়েন্তে অদ্ধদণ্ডকেহিপি তাল়েন্তে হত্থম্পি ছিন্দন্তে পাদম্পি ছিন্দন্তে হত্থপাদম্পি ছিন্দন্তে কণ্ণম্পি ছিন্দন্তে নাসম্পি ছিন্দন্তে কণ্ণনাসম্পি ছিন্দন্তে বিলঙ্গথালিকম্পি করোন্তে সঙ্খমুণ্ডিকম্পি করোন্তে রাহুমুখম্পি করোন্তে জোতিমালিকম্পি করোন্তে হত্থপজ্জোতিকম্পি করোন্তে এরকৰত্তিকম্পি করোন্তে চীরকৰাসিকম্পি করোন্তে এণেয্যকম্পি করোন্তে বল়িসমংসিকম্পি করোন্তে কহাপণিকম্পি করোন্তে খারাপতচ্ছিকম্পি করোন্তে পলিঘপরিৰত্তিকম্পি করোন্তে পলালপীঠকম্পি করোন্তে তত্তেনপি তেলেন ওসিঞ্চন্তে সুনখেহিপি খাদাপেন্তে জীৰন্তম্পি সূলে উত্তাসেন্তে অসিনাপি সীসং ছিন্দন্তে’তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – যে কির, ভো, পাপকানি কম্মানি করোন্তি তে দিট্ঠেৰ ধম্মে এৰরূপা ৰিৰিধা কম্মকারণা করীযন্তি, কিমঙ্গং [কিমঙ্গ (সী. পী.)] পন পরত্থ! হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে, পমাদস্সং, ভন্তে’’’তি.

২৬৬. ‘‘তমেনং, ভিক্খৰে, যমো রাজা চতুত্থং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা পঞ্চমং দেৰদূতং সমনুযুঞ্জতি সমনুগাহতি সমনুভাসতি – ‘অম্ভো পুরিস, ন ত্ৰং অদ্দস মনুস্সেসু পঞ্চমং দেৰদূতং পাতুভূত’ন্তি? সো এৰমাহ – ‘নাদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, ন ত্ৰং অদ্দস মনুস্সেসু ইত্থিং ৰা পুরিসং ৰা একাহমতং ৰা দ্ৰীহমতং ৰা তীহমতং ৰা উদ্ধুমাতকং ৰিনীলকং ৰিপুব্বকজাত’ন্তি? সো এৰমাহ – ‘অদ্দসং, ভন্তে’’’তি.

‘‘তমেনং, ভিক্খৰে, যমো রাজা এৰমাহ – ‘অম্ভো পুরিস, তস্স তে ৰিঞ্ঞুস্স সতো মহল্লকস্স ন এতদহোসি – অহম্পি খোম্হি মরণধম্মো, মরণং অনতীতো. হন্দাহং কল্যাণং করোমি কাযেন ৰাচায মনসা’তি? সো এৰমাহ – ‘নাসক্খিস্সং, ভন্তে, পমাদস্সং, ভন্তে’’’তি.

২৬৭. ‘‘তমেনং, ভিক্খৰে, যমো রাজা পঞ্চমং দেৰদূতং সমনুযুঞ্জিত্ৰা সমনুগাহিত্ৰা সমনুভাসিত্ৰা তুণ্হী হোতি. তমেনং, ভিক্খৰে, নিরযপালা পঞ্চৰিধবন্ধনং নাম কম্মকারণং করোন্তি – তত্তং অযোখিলং হত্থে গমেন্তি, তত্তং অযোখিলং দুতিযে হত্থে গমেন্তি, তত্তং অযোখিলং পাদে গমেন্তি, তত্তং অযোখিলং দুতিযে পাদে গমেন্তি, তত্তং অযোখিলং মজ্ঝেউরস্মিং গমেন্তি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালং করোতি যাৰ ন তং পাপকম্মং ব্যন্তীহোতি. তমেনং, ভিক্খৰে, নিরযপালা সংৰেসেত্ৰা কুঠারীহি তচ্ছন্তি…পে… তমেনং, ভিক্খৰে, নিরযপালা উদ্ধংপাদং অধোসিরং গহেত্ৰা ৰাসীহি তচ্ছন্তি…পে… তমেনং, ভিক্খৰে, নিরযপালা রথে যোজেত্ৰা আদিত্তায পথৰিযা সম্পজ্জলিতায সজোতিভূতায সারেন্তিপি, পচ্চাসারেন্তিপি…পে… তমেনং, ভিক্খৰে, নিরযপালা মহন্তং অঙ্গারপব্বতং আদিত্তং সম্পজ্জলিতং সজোতিভূতং আরোপেন্তিপি ওরোপেন্তিপি…পে… তমেনং, ভিক্খৰে, নিরযপালা উদ্ধংপাদং অধোসিরং গহেত্ৰা তত্তায লোহকুম্ভিযা পক্খিপন্তি আদিত্তায সম্পজ্জলিতায সজোতিভূতায. সো তত্থ ফেণুদ্দেহকং পচ্চতি. সো তত্থ ফেণুদ্দেহকং পচ্চমানো সকিম্পি উদ্ধং গচ্ছতি, সকিম্পি অধো গচ্ছতি, সকিম্পি তিরিযং গচ্ছতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি. তমেনং, ভিক্খৰে, নিরযপালা মহানিরযে পক্খিপন্তি. সো খো পন, ভিক্খৰে, মহানিরযো –

‘‘চতুক্কণ্ণো চতুদ্ৰারো, ৰিভত্তো ভাগসো মিতো;

অযোপাকারপরিযন্তো, অযসা পটিকুজ্জিতো.

‘‘তস্স অযোমযা ভূমি, জলিতা তেজসাযুতা;

সমন্তা যোজনসতং, ফরিত্ৰা তিট্ঠতি সব্বদা’’.

২৬৮. ‘‘তস্স খো পন, ভিক্খৰে, মহানিরযস্স পুরত্থিমায ভিত্তিযা অচ্চি উট্ঠহিত্ৰা পচ্ছিমায ভিত্তিযা পটিহঞ্ঞতি, পচ্ছিমায ভিত্তিযা অচ্চি উট্ঠহিত্ৰা পুরত্থিমায ভিত্তিযা পটিহঞ্ঞতি, উত্তরায ভিত্তিযা অচ্চি উট্ঠহিত্ৰা দক্খিণায ভিত্তিযা পটিহঞ্ঞতি, দক্খিণায ভিত্তিযা অচ্চি উট্ঠহিত্ৰা উত্তরায ভিত্তিযা পটিহঞ্ঞতি, হেট্ঠা অচ্চি উট্ঠহিত্ৰা উপরি পটিহঞ্ঞতি, উপরিতো অচ্চি উট্ঠহিত্ৰা হেট্ঠা পটিহঞ্ঞতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘হোতি খো সো, ভিক্খৰে, সমযো যং কদাচি করহচি দীঘস্স অদ্ধুনো অচ্চযেন তস্স মহানিরযস্স পুরত্থিমং দ্ৰারং অপাপুরীযতি [অৰাপুরীযতি (সী.)]. সো তত্থ সীঘেন জৰেন ধাৰতি. তস্স সীঘেন জৰেন ধাৰতো ছৰিম্পি ডয্হতি, চম্মম্পি ডয্হতি, মংসম্পি ডয্হতি, ন্হারুম্পি ডয্হতি, অট্ঠীনিপি সম্পধূপাযন্তি, উব্ভতং তাদিসমেৰ হোতি. যতো চ খো সো, ভিক্খৰে, বহুসম্পত্তো হোতি, অথ তং দ্ৰারং পিধীযতি [পিথীযতি (সী. স্যা. কং. পী.)]. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘হোতি খো সো, ভিক্খৰে, সমযো যং কদাচি করহচি দীঘস্স অদ্ধুনো অচ্চযেন তস্স মহানিরযস্স পচ্ছিমং দ্ৰারং অপাপুরীযতি…পে… উত্তরং দ্ৰারং অপাপুরীযতি…পে… দক্খিণং দ্ৰারং অপাপুরীযতি. সো তত্থ সীঘেন জৰেন ধাৰতি. তস্স সীঘেন জৰেন ধাৰতো ছৰিম্পি ডয্হতি, চম্মম্পি ডয্হতি, মংসম্পি ডয্হতি, ন্হারুম্পি ডয্হতি, অট্ঠীনিপি সম্পধূপাযন্তি, উব্ভতং তাদিসমেৰ হোতি. যতো চ খো সো, ভিক্খৰে, বহুসম্পত্তো হোতি, অথ তং দ্ৰারং পিধীযতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘হোতি খো সো, ভিক্খৰে, সমযো যং কদাচি করহচি দীঘস্স অদ্ধুনো অচ্চযেন তস্স মহানিরযস্স পুরত্থিমং দ্ৰারং অপাপুরীযতি. সো তত্থ সীঘেন জৰেন ধাৰতি. তস্স সীঘেন জৰেন ধাৰতো ছৰিম্পি ডয্হতি, চম্মম্পি ডয্হতি, মংসম্পি ডয্হতি, ন্হারুম্পি ডয্হতি, অট্ঠীনিপি সম্পধূপাযন্তি, উব্ভতং তাদিসমেৰ হোতি. সো তেন দ্ৰারেন নিক্খমতি.

২৬৯. ‘‘তস্স খো পন, ভিক্খৰে, মহানিরযস্স সমনন্তরা সহিতমেৰ মহন্তো গূথনিরযো. সো তত্থ পততি. তস্মিং খো পন, ভিক্খৰে, গূথনিরযে সূচিমুখা পাণা ছৰিং ছিন্দন্তি, ছৰিং ছেত্ৰা চম্মং ছিন্দন্তি, চম্মং ছেত্ৰা মংসং ছিন্দন্তি, মংসং ছেত্ৰা ন্হারুং ছিন্দন্তি, ন্হারুং ছেত্ৰা অট্ঠিং ছিন্দন্তি, অট্ঠিং ছেত্ৰা অট্ঠিমিঞ্জং খাদন্তি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তস্স খো পন, ভিক্খৰে, গূথনিরযস্স সমনন্তরা সহিতমেৰ মহন্তো কুক্কুলনিরযো. সো তত্থ পততি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তস্স খো পন, ভিক্খৰে, কুক্কুলনিরযস্স সমনন্তরা সহিতমেৰ মহন্তং সিম্বলিৰনং উদ্ধং [উচ্চং (স্যা. কং.), উব্ভতো (ক.)] যোজনমুগ্গতং সোল়সঙ্গুলকণ্টকং [সোল়সঙ্গুলকণ্ডকং (সী.)] আদিত্তং সম্পজ্জলিতং সজোতিভূতং. তত্থ আরোপেন্তিপি ওরোপেন্তিপি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তস্স খো পন, ভিক্খৰে, সিম্বলিৰনস্স সমনন্তরা সহিতমেৰ মহন্তং অসিপত্তৰনং. সো তত্থ পৰিসতি. তস্স ৰাতেরিতানি পত্তানি পতিতানি হত্থম্পি ছিন্দন্তি, পাদম্পি ছিন্দন্তি, হত্থপাদম্পি ছিন্দন্তি, কণ্ণম্পি ছিন্দন্তি, নাসম্পি ছিন্দন্তি, কণ্ণনাসম্পি ছিন্দন্তি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তস্স খো পন, ভিক্খৰে, অসিপত্তৰনস্স সমনন্তরা সহিতমেৰ মহতী খারোদকা নদী [খারোদিকা নদী (সী.)]. সো তত্থ পততি. সো তত্থ অনুসোতম্পি ৰুয্হতি, পটিসোতম্পি ৰুয্হতি, অনুসোতপটিসোতম্পি ৰুয্হতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

২৭০. ‘‘তমেনং, ভিক্খৰে, নিরযপালা বলিসেন উদ্ধরিত্ৰা থলে পতিট্ঠাপেত্ৰা এৰমাহংসু – ‘অম্ভো পুরিস, কিং ইচ্ছসী’তি? সো এৰমাহ – ‘জিঘচ্ছিতোস্মি, ভন্তে’তি. তমেনং, ভিক্খৰে, নিরযপালা তত্তেন অযোসঙ্কুনা মুখং ৰিৰরিত্ৰা আদিত্তেন সম্পজ্জলিতেন সজোতিভূতেন তত্তং লোহগুল়ং মুখে পক্খিপন্তি আদিত্তং সম্পজ্জলিতং সজোতিভূতং. সো তস্স [তং তস্স (ক.), তস্স (সী. পী.)] ওট্ঠম্পি দহতি [ডয্হতি (সী. স্যা. কং. পী.)], মুখম্পি দহতি, কণ্ঠম্পি দহতি, উরম্পি [উদরম্পি (সী. স্যা. কং.)] দহতি, অন্তম্পি অন্তগুণম্পি আদায অধোভাগা নিক্খমতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি যাৰ ন তং পাপকম্মং ব্যন্তীহোতি.

‘‘তমেনং, ভিক্খৰে, নিরযপালা এৰমাহংসু – ‘অম্ভো পুরিস, কিং ইচ্ছসী’তি? সো এৰমাহ – ‘পিপাসিতোস্মি, ভন্তে’তি. তমেনং, ভিক্খৰে, নিরযপালা তত্তেন অযোসঙ্কুনা মুখং ৰিৰরিত্ৰা আদিত্তেন সম্পজ্জলিতেন সজোতিভূতেন তত্তং তম্বলোহং মুখে আসিঞ্চন্তি আদিত্তং সম্পজ্জলিতং সজোতিভূতং. তং তস্স [এত্থ পন পাঠভেদো নত্থি] ওট্ঠম্পি দহতি, মুখম্পি দহতি, কণ্ঠম্পি দহতি, উরম্পি দহতি, অন্তম্পি অন্তগুণম্পি আদায অধোভাগা নিক্খমতি. সো তত্থ দুক্খা তিব্বা খরা কটুকা ৰেদনা ৰেদেতি, ন চ তাৰ কালঙ্করোতি, যাৰ ন তং পাপকম্মং ব্যন্তীহোতি. তমেনং, ভিক্খৰে, নিরযপালা পুন মহানিরযে পক্খিপন্তি.

‘‘ভূতপুব্বং, ভিক্খৰে, যমস্স রঞ্ঞো এতদহোসি – ‘যে কির, ভো, লোকে পাপকানি অকুসলানি কম্মানি করোন্তি তে এৰরূপা ৰিৰিধা কম্মকারণা করীযন্তি. অহো ৰতাহং মনুস্সত্তং লভেয্যং. তথাগতো চ লোকে উপ্পজ্জেয্য অরহং সম্মাসম্বুদ্ধো. তঞ্চাহং ভগৰন্তং পযিরুপাসেয্যং. সো চ মে ভগৰা ধম্মং দেসেয্য. তস্স চাহং ভগৰতো ধম্মং আজানেয্য’ন্তি. তং খো পনাহং, ভিক্খৰে, নাঞ্ঞস্স সমণস্স ৰা ব্রাহ্মণস্স ৰা সুত্ৰা ৰদামি, অপি চ যদেৰ সামং ঞাতং সামং দিট্ঠং সামং ৰিদিতং তদেৰাহং ৰদামী’’তি.

২৭১. ইদমৰোচ ভগৰা. ইদং ৰত্ৰান [ইদং ৰত্ৰা (সী. পী.) এৰমীদিসেসু ঠানেসু] সুগতো অথাপরং এতদৰোচ সত্থা –

‘‘চোদিতা দেৰদূতেহি, যে পমজ্জন্তি মাণৰা;

তে দীঘরত্তং সোচন্তি, হীনকাযূপগা নরা.

‘‘যে চ খো দেৰদূতেহি, সন্তো সপ্পুরিসা ইধ;

চোদিতা নপ্পমজ্জন্তি, অরিযধম্মে কুদাচনং.

‘‘উপাদানে ভযং দিস্ৰা, জাতিমরণসম্ভৰে;

অনুপাদা ৰিমুচ্চন্তি, জাতিমরণসঙ্খযে.

‘‘তে খেমপ্পত্তা সুখিনো, দিট্ঠধম্মাভিনিব্বুতা;

সব্বৰেরভযাতীতা, সব্বদুক্খং [সব্বদুক্খা (ক.)] উপচ্চগু’’ন্তি.

দেৰদূতসুত্তং নিট্ঠিতং দসমং.

সুঞ্ঞতৰগ্গো নিট্ঠিতো ততিযো.