৫. দন্তভূমিসুত্তং

২১৩. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন অচিরৰতো সমণুদ্দেসো অরঞ্ঞকুটিকাযং ৰিহরতি. অথ খো জযসেনো রাজকুমারো জঙ্ঘাৰিহারং অনুচঙ্কমমানো অনুৰিচরমানো যেন অচিরৰতো সমণুদ্দেসো তেনুপসঙ্কমি; উপসঙ্কমিত্ৰা অচিরৰতেন সমণুদ্দেসেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো জযসেনো রাজকুমারো অচিরৰতং সমণুদ্দেসং এতদৰোচ –

‘‘সুতং মেতং, ভো অগ্গিৰেস্সন – ‘ইধ ভিক্খু অপ্পমত্তো আতাপী পহিতত্তো ৰিহরন্তো ফুসেয্য চিত্তস্স একগ্গত’ন্তি. ‘এৰমেতং, রাজকুমার, এৰমেতং, রাজকুমার. ইধ ভিক্খু অপ্পমত্তো আতাপী পহিতত্তো ৰিহরন্তো ফুসেয্য চিত্তস্স একগ্গত’ন্তি. ‘সাধু মে ভৰং অগ্গিৰেস্সনো যথাসুতং যথাপরিযত্তং ধম্মং দেসেতূ’তি. ‘ন খো তে অহং, রাজকুমার, সক্কোমি যথাসুতং যথাপরিযত্তং ধম্মং দেসেতুং. অহঞ্চ হি তে, রাজকুমার, যথাসুতং যথাপরিযত্তং ধম্মং দেসেয্যং, ত্ৰঞ্চ মে ভাসিতস্স অত্থং ন আজানেয্যাসি; সো মমস্স কিলমথো, সা মমস্স ৰিহেসা’তি. ‘দেসেতু মে ভৰং অগ্গিৰেস্সনো যথাসুতং যথাপরিযত্তং ধম্মং. অপ্পেৰনামাহং ভোতো অগ্গিৰেস্সনস্স ভাসিতস্স অত্থং আজানেয্য’ন্তি. ‘দেসেয্যং খো তে অহং, রাজকুমার, যথাসুতং যথাপরিযত্তং ধম্মং. সচে মে ত্ৰং ভাসিতস্স অত্থং আজানেয্যাসি, ইচ্চেতং কুসলং; নো চে মে ত্ৰং ভাসিতস্স অত্থং আজানেয্যাসি, যথাসকে তিট্ঠেয্যাসি, ন মং তত্থ উত্তরিং পটিপুচ্ছেয্যাসী’তি. ‘দেসেতু মে ভৰং অগ্গিৰেস্সনো যথাসুতং যথাপরিযত্তং ধম্মং. সচে অহং ভোতো অগ্গিৰেস্সনস্স ভাসিতস্স অত্থং আজানিস্সামি [আজানেয্যামি (ক.)], ইচ্চেতং কুসলং; নো চে অহং ভোতো অগ্গিৰেস্সনস্স ভাসিতস্স অত্থং আজানিস্সামি, যথাসকে তিট্ঠিস্সামি [তিট্ঠেয্যামি (ক.)], নাহং তত্থ ভৰন্তং অগ্গিৰেস্সনং উত্তরিং পটিপুচ্ছিস্সামী’’’তি.

২১৪. অথ খো অচিরৰতো সমণুদ্দেসো জযসেনস্স রাজকুমারস্স যথাসুতং যথাপরিযত্তং ধম্মং দেসেসি. এৰং ৰুত্তে, জযসেনো রাজকুমারো অচিরৰতং সমণুদ্দেসং এতদৰোচ – ‘‘অট্ঠানমেতং, ভো অগ্গিৰেস্সন, অনৰকাসো যং ভিক্খু অপ্পমত্তো আতাপী পহিতত্তো ৰিহরন্তো ফুসেয্য চিত্তস্স একগ্গত’’ন্তি. অথ খো জযসেনো রাজকুমারো অচিরৰতস্স সমণুদ্দেসস্স অট্ঠানতঞ্চ অনৰকাসতঞ্চ পৰেদেত্ৰা উট্ঠাযাসনা পক্কামি.

অথ খো অচিরৰতো সমণুদ্দেসো অচিরপক্কন্তে জযসেনে রাজকুমারে যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো অচিরৰতো সমণুদ্দেসো যাৰতকো অহোসি জযসেনেন রাজকুমারেন সদ্ধিং কথাসল্লাপো তং সব্বং ভগৰতো আরোচেসি.

এৰং ৰুত্তে, ভগৰা অচিরৰতং সমণুদ্দেসং এতদৰোচ – ‘‘তং কুতেত্থ, অগ্গিৰেস্সন, লব্ভা. যং তং নেক্খম্মেন ঞাতব্বং নেক্খম্মেন দট্ঠব্বং নেক্খম্মেন পত্তব্বং নেক্খম্মেন সচ্ছিকাতব্বং তং ৰত জযসেনো রাজকুমারো কামমজ্ঝে ৰসন্তো কামে পরিভুঞ্জন্তো কামৰিতক্কেহি খজ্জমানো কামপরিল়াহেন পরিডয্হমানো কামপরিযেসনায উস্সুকো [উস্সুক্কো (সব্বত্থ)] ঞস্সতি ৰা দক্খতি ৰা সচ্ছি ৰা করিস্সতী’’তি – নেতং ঠানং ৰিজ্জতি.

২১৫. ‘‘সেয্যথাপিস্সু, অগ্গিৰেস্সন, দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা, দ্ৰে হত্থিদম্মা ৰা অস্সদম্মা ৰা গোদম্মা ৰা অদন্তা অৰিনীতা. তং কিং মঞ্ঞসি, অগ্গিৰেস্সন, যে তে দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা, অপি নু তে দন্তাৰ দন্তকারণং গচ্ছেয্যুং, দন্তাৰ দন্তভূমিং সম্পাপুণেয্যু’’ন্তি? ‘‘এৰং, ভন্তে’’. ‘‘যে পন তে দ্ৰে হত্থিদম্মা ৰা অস্সদম্মা ৰা গোদম্মা ৰা অদন্তা অৰিনীতা, অপি নু তে অদন্তাৰ দন্তকারণং গচ্ছেয্যুং, অদন্তাৰ দন্তভূমিং সম্পাপুণেয্যুং, সেয্যথাপি তে দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা’’তি? ‘‘নো হেতং, ভন্তে’’. ‘‘এৰমেৰ খো, অগ্গিৰেস্সন, যং তং নেক্খম্মেন ঞাতব্বং নেক্খম্মেন দট্ঠব্বং নেক্খম্মেন পত্তব্বং নেক্খম্মেন সচ্ছিকাতব্বং তং ৰত জযসেনো রাজকুমারো কামমজ্ঝে ৰসন্তো কামে পরিভুঞ্জন্তো কামৰিতক্কেহি খজ্জমানো কামপরিল়াহেন পরিডয্হমানো কামপরিযেসনায উস্সুকো ঞস্সতি ৰা দক্খতি ৰা সচ্ছি ৰা করিস্সতী’’তি – নেতং ঠানং ৰিজ্জতি.

২১৬. ‘‘সেয্যথাপি, অগ্গিৰেস্সন, গামস্স ৰা নিগমস্স ৰা অৰিদূরে মহাপব্বতো. তমেনং দ্ৰে সহাযকা তম্হা গামা ৰা নিগমা ৰা নিক্খমিত্ৰা হত্থৰিলঙ্ঘকেন যেন সো পব্বতো তেনুপসঙ্কমেয্যুং; উপসঙ্কমিত্ৰা একো সহাযকো হেট্ঠা পব্বতপাদে তিট্ঠেয্য, একো সহাযকো উপরিপব্বতং আরোহেয্য. তমেনং হেট্ঠা পব্বতপাদে ঠিতো সহাযকো উপরিপব্বতে ঠিতং সহাযকং এৰং ৰেদয্য – ‘যং, সম্ম, কিং ত্ৰং পস্সসি উপরিপব্বতে ঠিতো’তি? সো এৰং ৰদেয্য – ‘পস্সামি খো অহং, সম্ম, উপরিপব্বতে ঠিতো আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’’’ন্তি.

‘‘সো এৰং ৰদেয্য – ‘অট্ঠানং খো এতং, সম্ম, অনৰকাসো যং ত্ৰং উপরিপব্বতে ঠিতো পস্সেয্যাসি আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’ন্তি. তমেনং উপরিপব্বতে ঠিতো সহাযকো হেট্ঠিমপব্বতপাদং ওরোহিত্ৰা তং সহাযকং বাহাযং গহেত্ৰা উপরিপব্বতং আরোপেত্ৰা মুহুত্তং অস্সাসেত্ৰা এৰং ৰদেয্য – ‘যং, সম্ম, কিং ত্ৰং পস্সসি উপরিপব্বতে ঠিতো’তি? সো এৰং ৰদেয্য – ‘পস্সামি খো অহং, সম্ম, উপরিপব্বতে ঠিতো আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’’’ন্তি.

‘‘সো এৰং ৰদেয্য – ‘ইদানেৰ খো তে, সম্ম, ভাসিতং – মযং এৰং আজানাম – অট্ঠানং খো এতং সম্ম, অনৰকাসো যং ত্ৰং উপরিপব্বতে ঠিতো পস্সেয্যাসি আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’ন্তি. ইদানেৰ চ পন তে ভাসিতং মযং এৰং আজানাম – ‘পস্সামি খো অহং, সম্ম, উপরিপব্বতে ঠিতো আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’ন্তি. সো এৰং ৰদেয্য – ‘তথা হি পনাহং, সম্ম, ইমিনা মহতা পব্বতেন আৰুতো [আৰটো (সী. অট্ঠ. পী.), আৰুটো (স্যা. কং. ক.)] দট্ঠেয্যং নাদ্দস’’’ন্তি.

‘‘অতো মহন্ততরেন, অগ্গিৰেস্সন, অৰিজ্জাখন্ধেন জযসেনো রাজকুমারো আৰুতো নিৰুতো [নিৰুটো (স্যা. কং. পী. ক.)] ওফুটো [ওৰুতো (সী.), ওৰুটো (স্যা. কং. পী.)] পরিযোনদ্ধো. সো ৰত যং তং নেক্খম্মেন ঞাতব্বং নেক্খম্মেন দট্ঠব্বং নেক্খম্মেন পত্তব্বং নেক্খম্মেন সচ্ছিকাতব্বং তং ৰত জযসেনো রাজকুমারো কামমজ্ঝে ৰসন্তো কামে পরিভুঞ্জন্তো কামৰিতক্কেহি খজ্জমানো কামপরিল়াহেন পরিডয্হমানো কামপরিযেসনায উস্সুকো ঞস্সতি ৰা দক্খতি ৰা সচ্ছি ৰা করিস্সতীতি – নেতং ঠানং ৰিজ্জতি. সচে খো তং, অগ্গিৰেস্সন, জযসেনস্স রাজকুমারস্স ইমা দ্ৰে উপমা পটিভাযেয্যুং [পটিভাসেয্যুং (সী. স্যা. কং. পী.)], অনচ্ছরিযং তে জযসেনো রাজকুমারো পসীদেয্য, পসন্নো চ তে পসন্নাকারং করেয্যা’’তি. ‘‘কুতো পন মং, ভন্তে, জযসেনস্স রাজকুমারস্স ইমা দ্ৰে উপমা পটিভাযিস্সন্তি [পটিভাসিস্সন্তি (সী. স্যা. কং. পী.)] অনচ্ছরিযা পুব্বে অস্সুতপুব্বা, সেয্যথাপি ভগৰন্ত’’ন্তি?

২১৭. ‘‘সেয্যথাপি, অগ্গিৰেস্সন, রাজা খত্তিযো মুদ্ধাৰসিত্তো নাগৰনিকং আমন্তেতি – ‘এহি ত্ৰং, সম্ম নাগৰনিক, রঞ্ঞো নাগং অভিরুহিত্ৰা নাগৰনং পৰিসিত্ৰা আরঞ্ঞকং নাগং অতিপস্সিত্ৰা রঞ্ঞো নাগস্স গীৰাযং উপনিবন্ধাহী’তি. ‘এৰং, দেৰা’তি খো, অগ্গিৰেস্সন, নাগৰনিকো রঞ্ঞো খত্তিযস্স মুদ্ধাৰসিত্তস্স পটিস্সুত্ৰা রঞ্ঞো নাগং অভিরুহিত্ৰা নাগৰনং পৰিসিত্ৰা আরঞ্ঞকং নাগং অতিপস্সিত্ৰা রঞ্ঞো নাগস্স গীৰাযং উপনিবন্ধতি. তমেনং রঞ্ঞো নাগো অব্ভোকাসং নীহরতি. এত্তাৰতা খো, অগ্গিৰেস্সন, আরঞ্ঞকো নাগো অব্ভোকাসং গতো হোতি. এত্থগেধা [এতগেধা (সী. পী.)] হি, অগ্গিৰেস্সন, আরঞ্ঞকা নাগা যদিদং – নাগৰনং. তমেনং নাগৰনিকো রঞ্ঞো খত্তিযস্স মুদ্ধাৰসিত্তস্স আরোচেসি – ‘অব্ভোকাসগতো খো [খো তে (স্যা. কং. ক.)], দেৰ, আরঞ্ঞকো নাগো’তি. অথ খো অগ্গিৰেস্সন, তমেনং রাজা খত্তিযো মুদ্ধাৰসিত্তো হত্থিদমকং আমন্তেসি – ‘এহি ত্ৰং, সম্ম হত্থিদমক, আরঞ্ঞকং নাগং দমযাহি আরঞ্ঞকানঞ্চেৰ সীলানং অভিনিম্মদনায আরঞ্ঞকানঞ্চেৰ সরসঙ্কপ্পানং অভিনিম্মদনায আরঞ্ঞকানঞ্চেৰ দরথকিলমথপরিল়াহানং অভিনিম্মদনায গামন্তে অভিরমাপনায মনুস্সকন্তেসু সীলেসু সমাদপনাযা’’’তি [সমাদাপনাযাতি (?)].

‘‘‘এৰং, দেৰা’তি খো, অগ্গিৰেস্সন, হত্থিদমকো রঞ্ঞো খত্তিযস্স মুদ্ধাৰসিত্তস্স পটিস্সুত্ৰা মহন্তং থম্ভং পথৰিযং নিখণিত্ৰা আরঞ্ঞকস্স নাগস্স গীৰাযং উপনিবন্ধতি আরঞ্ঞকানঞ্চেৰ সীলানং অভিনিম্মদনায আরঞ্ঞকানঞ্চেৰ সরসঙ্কপ্পানং অভিনিম্মদনায আরঞ্ঞকানঞ্চেৰ দরথকিলমথপরিল়াহানং অভিনিম্মদনায গামন্তে অভিরমাপনায মনুস্সকন্তেসু সীলেসু সমাদপনায. তমেনং হত্থিদমকো যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপাহি ৰাচাহি সমুদাচরতি. যতো খো, অগ্গিৰেস্সন, আরঞ্ঞকো নাগো হত্থিদমকস্স যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপাহি ৰাচাহি সমুদাচরিযমানো সুস্সূসতি, সোতং ওদহতি, অঞ্ঞা চিত্তং উপট্ঠাপেতি; তমেনং হত্থিদমকো উত্তরি তিণঘাসোদকং অনুপ্পৰেচ্ছতি.

‘‘যতো খো, অগ্গিৰেস্সন, আরঞ্ঞকো নাগো হত্থিদমকস্স তিণঘাসোদকং পটিগ্গণ্হাতি, তত্র হত্থিদমকস্স এৰং হোতি – ‘জীৰিস্সতি খো [নু খো (সী. ক.)] দানি আরঞ্ঞকো [রঞ্ঞো (সী. পী.)] নাগো’তি. তমেনং হত্থিদমকো উত্তরি কারণং কারেতি – ‘আদিয, ভো, নিক্খিপ, ভো’তি. যতো খো, অগ্গিৰেস্সন, আরঞ্ঞকো নাগো হত্থিদমকস্স আদাননিক্খেপে ৰচনকরো হোতি ওৰাদপ্পটিকরো, তমেনং হত্থিদমকো উত্তরি কারণং কারেতি – ‘অভিক্কম, ভো, পটিক্কম, ভো’তি. যতো খো, অগ্গিৰেস্সন, আরঞ্ঞকো নাগো হত্থিদমকস্স অভিক্কমপটিক্কমৰচনকরো হোতি ওৰাদপ্পটিকরো, তমেনং হত্থিদমকো উত্তরি কারণং কারেতি – ‘উট্ঠহ, ভো, নিসীদ, ভো’তি. যতো খো, অগ্গিৰেস্সন, আরঞ্ঞকো নাগো হত্থিদমকস্স উট্ঠাননিসজ্জায ৰচনকরো হোতি ওৰাদপ্পটিকরো, তমেনং হত্থিদমকো উত্তরি আনেঞ্জং নাম কারণং কারেতি, মহন্তস্স ফলকং সোণ্ডায উপনিবন্ধতি, তোমরহত্থো চ পুরিসো উপরিগীৰায নিসিন্নো হোতি, সমন্ততো চ তোমরহত্থা পুরিসা পরিৰারেত্ৰা ঠিতা হোন্তি, হত্থিদমকো চ দীঘতোমরযট্ঠিং গহেত্ৰা পুরতো ঠিতো হোতি. সো আনেঞ্জং কারণং কারিযমানো নেৰ পুরিমে পাদে চোপেতি ন পচ্ছিমে পাদে চোপেতি, ন পুরিমকাযং চোপেতি ন পচ্ছিমকাযং চোপেতি, ন সীসং চোপেতি, ন কণ্ণে চোপেতি, ন দন্তে চোপেতি, ন নঙ্গুট্ঠং চোপেতি, ন সোণ্ডং চোপেতি. সো হোতি আরঞ্ঞকো নাগো খমো সত্তিপ্পহারানং অসিপ্পহারানং উসুপ্পহারানং সরপত্তপ্পহারানং [পরসত্থপ্পহারানং (সী.), পরসত্তুপ্পহারানং (স্যা. কং. পী.)] ভেরিপণৰৰংসসঙ্খডিণ্ডিমনিন্নাদসদ্দানং [ভেরিপণৰসঙ্খতিণৰনিন্নাদসদ্দানং (পী.)] সব্বৰঙ্কদোসনিহিতনিন্নীতকসাৰো রাজারহো রাজভোগ্গো রঞ্ঞো অঙ্গন্তেৰ সঙ্খং গচ্ছতি.

২১৮. ‘‘এৰমেৰ খো, অগ্গিৰেস্সন, ইধ তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা. সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি. সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. তং ধম্মং সুণাতি গহপতি ৰা গহপতিপুত্তো ৰা অঞ্ঞতরস্মিং ৰা কুলে পচ্চাজাতো. সো তং ধম্মং সুত্ৰা তথাগতে সদ্ধং পটিলভতি. সো তেন সদ্ধাপটিলাভেন সমন্নাগতো ইতি পটিসঞ্চিক্খতি – ‘সম্বাধো ঘরাৰাসো রজাপথো, অব্ভোকাসো পব্বজ্জা. নযিদং সুকরং অগারং অজ্ঝাৰসতা একন্তপরিপুণ্ণং একন্তপরিসুদ্ধং সঙ্খলিখিতং ব্রহ্মচরিযং চরিতুং. যংনূনাহং কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজেয্য’ন্তি.

‘‘সো অপরেন সমযেন অপ্পং ৰা ভোগক্খন্ধং পহায মহন্তং ৰা ভোগক্খন্ধং পহায অপ্পং ৰা ঞাতিপরিৰট্টং পহায মহন্তং ৰা ঞাতিপরিৰট্টং পহায কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি. এত্তাৰতা খো, অগ্গিৰেস্সন, অরিযসাৰকো অব্ভোকাসগতো হোতি. এত্থগেধা হি, অগ্গিৰেস্সন, দেৰমনুস্সা যদিদং – পঞ্চ কামগুণা. তমেনং তথাগতো উত্তরিং ৰিনেতি – ‘এহি ত্ৰং, ভিক্খু, সীলৰা হোহি, পাতিমোক্খসংৰরসংৰুতো ৰিহরাহি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খস্সু সিক্খাপদেসূ’’’তি.

‘‘যতো খো, অগ্গিৰেস্সন, অরিযসাৰকো সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, তমেনং তথাগতো উত্তরিং ৰিনেতি – ‘এহি ত্ৰং, ভিক্খু, ইন্দ্রিযেসু গুত্তদ্ৰারো হোহি, চক্খুনা রূপং দিস্ৰা মা নিমিত্তগ্গাহী…পে… (যথা গণকমোগ্গল্লানসুত্তন্তে, এৰং ৰিত্থারেতব্বানি.)

২১৯. ‘‘সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. ৰেদনাসু…পে… চিত্তে…পে… ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. সেয্যথাপি, অগ্গিৰেস্সন, হত্থিদমকো মহন্তং থম্ভং পথৰিযং নিখণিত্ৰা আরঞ্ঞকস্স নাগস্স গীৰাযং উপনিবন্ধতি আরঞ্ঞকানঞ্চেৰ সীলানং অভিনিম্মদনায আরঞ্ঞকানঞ্চেৰ সরসঙ্কপ্পানং অভিনিম্মদনায আরঞ্ঞকানঞ্চেৰ দরথকিলমথপরিল়াহানং অভিনিম্মদনায গামন্তে অভিরমাপনায মনুস্সকন্তেসু সীলেসু সমাদপনায; এৰমেৰ খো, অগ্গিৰেস্সন, অরিযসাৰকস্স ইমে চত্তারো সতিপট্ঠানা চেতসো উপনিবন্ধনা হোন্তি গেহসিতানঞ্চেৰ সীলানং অভিনিম্মদনায গেহসিতানঞ্চেৰ সরসঙ্কপ্পানং অভিনিম্মদনায গেহসিতানঞ্চেৰ দরথকিলমথপরিল়াহানং অভিনিম্মদনায ঞাযস্স অধিগমায নিব্বানস্স সচ্ছিকিরিযায.

২২০. ‘‘তমেনং তথাগতো উত্তরিং ৰিনেতি – ‘এহি ত্ৰং, ভিক্খু, কাযে কাযানুপস্সী ৰিহরাহি, মা চ কামূপসংহিতং ৰিতক্কং ৰিতক্কেসি. ৰেদনাসু… চিত্তে… ধম্মেসু ধম্মানুপস্সী ৰিহরাহি, মা চ কামূপসংহিতং ৰিতক্কং ৰিতক্কেসী’’’তি.

‘‘সো ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং…পে… ততিযং ঝানং… চতুত্থং ঝানং উপসম্পজ্জ ৰিহরতি. সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি. সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি.

২২১. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি. সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে…পে… যথাকম্মূপগে সত্তে পজানাতি.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি; ‘ইমে আসৰা’তি যথাভূতং পজানাতি, ‘অযং আসৰসমুদযো’তি যথাভূতং পজানাতি, ‘অযং আসৰনিরোধো’তি যথাভূতং পজানাতি, ‘অযং আসৰনিরোধগামিনী পটিপদা’তি যথাভূতং পজানাতি. তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি. ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি.

‘‘সো হোতি ভিক্খু খমো সীতস্স উণ্হস্স জিঘচ্ছায পিপাসায ডংসমকসৰাতাতপসরীসপসম্ফস্সানং দুরুত্তানং দুরাগতানং ৰচনপথানং, উপ্পন্নানং সারীরিকানং ৰেদনানং দুক্খানং তিব্বানং খরানং কটুকানং অসাতানং অমনাপানং পাণহরানং অধিৰাসকজাতিকো হোতি সব্বরাগদোসমোহনিহিতনিন্নীতকসাৰো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স.

২২২. ‘‘মহল্লকো চেপি, অগ্গিৰেস্সন, রঞ্ঞো নাগো অদন্তো অৰিনীতো কালঙ্করোতি, ‘অদন্তমরণং [অদন্তং মরণং (ক.)] মহল্লকো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, রঞ্ঞো নাগো. দহরো চেপি, অগ্গিৰেস্সন, রঞ্ঞো নাগো অদন্তো অৰিনীতো কালঙ্করোতি, ‘অদন্তমরণং দহরো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; এৰমেৰ খো, অগ্গিৰেস্সন, থেরো চেপি ভিক্খু অখীণাসৰো কালঙ্করোতি, ‘অদন্তমরণং থেরো ভিক্খু কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, ভিক্খু. নৰো চেপি, অগ্গিৰেস্সন, ভিক্খু অখীণাসৰো কালঙ্করোতি, ‘অদন্তমরণং নৰো ভিক্খু কালঙ্কতো’ত্ৰেৰ সঙ্খং গচ্ছতি.

‘‘মহল্লকো চেপি, অগ্গিৰেস্সন, রঞ্ঞো নাগো সুদন্তো সুৰিনীতো কালঙ্করোতি, ‘দন্তমরণং মহল্লকো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, রঞ্ঞো নাগো… দহরো চেপি, অগ্গিৰেস্সন, রঞ্ঞো নাগো সুদন্তো সুৰিনীতো কালঙ্করোতি, ‘দন্তমরণং দহরো রঞ্ঞো নাগো কালঙ্কতো’ত্ৰেৰ সঙ্খং গচ্ছতি; এৰমেৰ খো, অগ্গিৰেস্সন, থেরো চেপি ভিক্খু খীণাসৰো কালঙ্করোতি, ‘দন্তমরণং থেরো ভিক্খু কালঙ্কতো’ত্ৰেৰ সঙ্খং গচ্ছতি; মজ্ঝিমো চেপি, অগ্গিৰেস্সন, ভিক্খু. নৰো চেপি, অগ্গিৰেস্সন, ভিক্খু খীণাসৰো কালঙ্করোতি, ‘দন্তমরণং নৰো ভিক্খু কালঙ্কতো’ত্ৰেৰ সঙ্খং গচ্ছতী’’তি.

ইদমৰোচ ভগৰা. অত্তমনো অচিরৰতো সমণুদ্দেসো ভগৰতো ভাসিতং অভিনন্দীতি.

দন্তভূমিসুত্তং নিট্ঠিতং পঞ্চমং.