৬. ভূমিজসুত্তং

২২৩. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো আযস্মা ভূমিজো পুব্বণ্হসমযং নিৰাসেত্ৰা পত্তচীৰরমাদায যেন জযসেনস্স রাজকুমারস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো জযসেনো রাজকুমারো যেনাযস্মা ভূমিজো তেনুপসঙ্কমি; উপসঙ্কমিত্ৰা আযস্মতা ভূমিজেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো জযসেনো রাজকুমারো আযস্মন্তং ভূমিজং এতদৰোচ – ‘‘সন্তি, ভো ভূমিজ, একে সমণব্রাহ্মণা এৰংৰাদিনো এৰংদিট্ঠিনো – ‘আসঞ্চেপি করিত্ৰা ব্রহ্মচরিযং চরন্তি, অভব্বা [চরতি, অভব্বো (সী. পী.) এৰমুপরিপি একৰচনেনেৰ দিস্সতি] ফলস্স অধিগমায; অনাসঞ্চেপি [আসঞ্চ অনাসঞ্চ চেপি (অট্ঠ.)] করিত্ৰা ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমাযা’তি. ইধ ভোতো ভূমিজস্স সত্থা কিংৰাদী [কিংৰাদী কিংদিট্ঠী (স্যা. কং. ক.)] কিমক্খাযী’’তি? ‘‘ন খো মেতং, রাজকুমার, ভগৰতো সম্মুখা সুতং, সম্মুখা পটিগ্গহিতং. ঠানঞ্চ খো এতং ৰিজ্জতি যং ভগৰা এৰং ব্যাকরেয্য – ‘আসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায. আসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; আসঞ্চ অনাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; নেৰাসং নানাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমাযা’তি. ন খো মে তং, রাজকুমার, ভগৰতো সম্মুখা সুতং, সম্মুখা পটিগ্গহিতং. ঠানঞ্চ খো এতং ৰিজ্জতি যং ভগৰা এৰং ব্যাকরেয্যা’’তি. ‘‘সচে খো ভোতো ভূমিজস্স সত্থা এৰংৰাদী [এৰংৰাদী এৰংদিট্ঠী (স্যা. কং. ক.)] এৰমক্খাযী, অদ্ধা ভোতো ভূমিজস্স সত্থা সব্বেসংযেৰ পুথুসমণব্রাহ্মণানং মুদ্ধানং [বুদ্ধানং (ক.) মুদ্ধানন্তিমুদ্ধং, মত্থকন্তি অত্থো] মঞ্ঞে আহচ্চ তিট্ঠতী’’তি. অথ খো জযসেনো রাজকুমারো আযস্মন্তং ভূমিজং সকেনেৰ থালিপাকেন পরিৰিসি.

২২৪. অথ খো আযস্মা ভূমিজো পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা ভূমিজো ভগৰন্তং এতদৰোচ – ‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায যেন জযসেনস্স রাজকুমারস্স নিৰেসনং তেনুপসঙ্কমিং; উপসঙ্কমিত্ৰা পঞ্ঞত্তে আসনে নিসীদিং. অথ খো, ভন্তে, জযসেনো রাজকুমারো যেনাহং তেনুপসঙ্কমি; উপসঙ্কমিত্ৰা মযা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো, ভন্তে, জযসেনো রাজকুমারো মং এতদৰোচ – ‘সন্তি, ভো ভূমিজ, একে সমণব্রাহ্মণা এৰংৰাদিনো এৰংদিট্ঠিনো – আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমাযা’তি. ‘ইধ ভোতো ভূমিজস্স সত্থা কিংৰাদী কিমক্খাযী’তি? এৰং ৰুত্তে অহং, ভন্তে, জযসেনং রাজকুমারং এতদৰোচং – ‘ন খো মে তং, রাজকুমার, ভগৰতো সম্মুখা সুতং, সম্মুখা পটিগ্গহিতং. ঠানঞ্চ খো এতং ৰিজ্জতি যং ভগৰা এৰং ব্যাকরেয্য – আসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায. আসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমাযাতি. ন খো মে তং, রাজকুমার, ভগৰতো সম্মুখা সুতং, সম্মুখা পটিগ্গহিতং. ঠানঞ্চ খো এতং ৰিজ্জতি যং ভগৰা এৰং ব্যাকরেয্যা’তি. ‘সচে ভোতো ভূমিজস্স সত্থা এৰংৰাদী এৰমক্খাযী, অদ্ধা ভোতো ভূমিজস্স সত্থা সব্বেসংযেৰ পুথুসমণব্রাহ্মণানং মুদ্ধানং মঞ্ঞে আহচ্চ তিট্ঠতী’তি. ‘কচ্চাহং, ভন্তে, এৰং পুট্ঠো এৰং ব্যাকরমানো ৰুত্তৰাদী চেৰ ভগৰতো হোমি, ন চ ভগৰন্তং অভূতেন অব্ভাচিক্খামি, ধম্মস্স চানুধম্মং ব্যাকরোমি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’’তি?

‘‘তগ্ঘ ত্ৰং, ভূমিজ, এৰং পুট্ঠো এৰং ব্যাকরমানো ৰুত্তৰাদী চেৰ মে হোসি, ন চ মং অভূতেন অব্ভাচিক্খসি, ধম্মস্স চানুধম্মং ব্যাকরোসি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতি. যে হি কেচি, ভূমিজ, সমণা ৰা ব্রাহ্মণা ৰা মিচ্ছাদিট্ঠিনো মিচ্ছাসঙ্কপ্পা মিচ্ছাৰাচা মিচ্ছাকম্মন্তা মিচ্ছাআজীৰা মিচ্ছাৰাযামা মিচ্ছাসতী মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায. তং কিস্স হেতু? অযোনি হেসা, ভূমিজ, ফলস্স অধিগমায.

২২৫. ‘‘সেয্যথাপি, ভূমিজ, পুরিসো তেলত্থিকো তেলগৰেসী তেলপরিযেসনং চরমানো ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য. আসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায; অনাসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায; আসঞ্চ অনাসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায; নেৰাসং নানাসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায. তং কিস্স হেতু? অযোনি হেসা, ভূমিজ, তেলস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো মিচ্ছাসঙ্কপ্পা মিচ্ছাৰাচা মিচ্ছাকম্মন্তা মিচ্ছাআজীৰা মিচ্ছাৰাযামা মিচ্ছাসতী মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায. তং কিস্স হেতু? অযোনি হেসা, ভূমিজ, ফলস্স অধিগমায.

‘‘সেয্যথাপি, ভূমিজ, পুরিসো খীরত্থিকো খীরগৰেসী খীরপরিযেসনং চরমানো গাৰিং তরুণৰচ্ছং ৰিসাণতো আৰিঞ্ছেয্য [আৰিঞ্জেয্য (সী. স্যা. কং. পী.)]. আসঞ্চেপি করিত্ৰা গাৰিং তরুণৰচ্ছং ৰিসাণতো আৰিঞ্ছেয্য, অভব্বো খীরস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা গাৰিং তরুণৰচ্ছং ৰিসাণতো আৰিঞ্ছেয্য, অভব্বো খীরস্স অধিগমায. তং কিস্স হেতু? অযোনি হেসা, ভূমিজ, খীরস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো…পে… মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায. তং কিস্স হেতু? অযোনি হেসা, ভূমিজ, ফলস্স অধিগমায.

২২৬. ‘‘সেয্যথাপি, ভূমিজ, পুরিসো নৰনীতত্থিকো নৰনীতগৰেসী নৰনীতপরিযেসনং চরমানো উদকং কলসে আসিঞ্চিত্ৰা মত্থেন [মন্থেন (সী.), মত্তেন (ক.)] আৰিঞ্ছেয্য. আসঞ্চেপি করিত্ৰা উদকং কলসে আসিঞ্চিত্ৰা মত্থেন আৰিঞ্ছেয্য, অভব্বো নৰনীতস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা উদকং কলসে আসিঞ্চিত্ৰা মত্থেন আৰিঞ্ছেয্য, অভব্বো নৰনীতস্স অধিগমায. তং কিস্স হেতু? অযোনি হেসা, ভূমিজ, নৰনীতস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো…পে… মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায. তং কিস্স হেতু? অযোনি হেসা, ভূমিজ, ফলস্স অধিগমায.

‘‘সেয্যথাপি, ভূমিজ, পুরিসো অগ্গিত্থিকো [অগ্গত্থিকো (সী.)] অগ্গিগৰেসী অগ্গিপরিযেসনং চরমানো অল্লং কট্ঠং সস্নেহং উত্তরারণিং আদায অভিমন্থেয্য [অভিমত্থেয্য (স্যা. কং. পী. ক.)]. আসঞ্চেপি করিত্ৰা অল্লং কট্ঠং সস্নেহং উত্তরারণিং আদায অভিমন্থেয্য, অভব্বো অগ্গিস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা অল্লং কট্ঠং সস্নেহং উত্তরারণিং আদায অভিমন্থেয্য, অভব্বো অগ্গিস্স অধিগমায. তং কিস্স হেতু? অযোনি হেসা, ভূমিজ, অগ্গিস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো…পে… মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে…আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায. তং কিস্স হেতু? অযোনি হেসা, ভূমিজ, ফলস্স অধিগমায. যে হি কেচি, ভূমিজ, সমণা ৰা ব্রাহ্মণা ৰা সম্মাদিট্ঠিনো সম্মাসঙ্কপ্পা সম্মাৰাচা সম্মাকম্মন্তা সম্মাআজীৰা সম্মাৰাযামা সম্মাসতী সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায. তং কিস্স হেতু? যোনি হেসা, ভূমিজ, ফলস্স অধিগমায.

২২৭. ‘‘সেয্যথাপি, ভূমিজ, পুরিসো তেলত্থিকো তেলগৰেসী তেলপরিযেসনং চরমানো তিলপিট্ঠং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য. আসঞ্চেপি করিত্ৰা তিলপিট্ঠং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, ভব্বো তেলস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা তিলপিট্ঠং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, ভব্বো তেলস্স অধিগমায. তং কিস্স হেতু? যোনি হেসা, ভূমিজ, তেলস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে… সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায. তং কিস্স হেতু? যোনি হেসা, ভূমিজ, ফলস্স অধিগমায.

‘‘সেয্যথাপি, ভূমিজ, পুরিসো খীরত্থিকো খীরগৰেসী খীরপরিযেসনং চরমানো গাৰিং তরুণৰচ্ছং থনতো আৰিঞ্ছেয্য. আসঞ্চেপি করিত্ৰা গাৰিং তরুণৰচ্ছং থনতো আৰিঞ্ছেয্য, ভব্বো খীরস্স অধিগমায; অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা গাৰিং তরুণৰচ্ছং থনতো আৰিঞ্ছেয্য, ভব্বো খীরস্স অধিগমায. তং কিস্স হেতু? যোনি হেসা, ভূমিজ, খীরস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে… সম্মাসমাধিনো তে আসঞ্চেপি করিত্ৰা…পে… অনাসঞ্চেপি করিত্ৰা…পে… আসঞ্চ অনাসঞ্চেপি করিত্ৰা…পে… নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায. তং কিস্স হেতু? যোনি হেসা, ভূমিজ, ফলস্স অধিগমায.

২২৮. ‘‘সেয্যথাপি, ভূমিজ, পুরিসো নৰনীতত্থিকো নৰনীতগৰেসী নৰনীতপরিযেসনং চরমানো দধিং কলসে আসিঞ্চিত্ৰা মত্থেন আৰিঞ্ছেয্য. আসঞ্চেপি করিত্ৰা দধিং কলসে আসিঞ্চিত্ৰা মত্থেন আৰিঞ্ছেয্য, ভব্বো নৰনীতস্স অধিগমায; অনাসঞ্চেপি করিত্ৰা… আসঞ্চ অনাসঞ্চেপি করিত্ৰা… নেৰাসং নানাসঞ্চেপি করিত্ৰা দধিং কলসে আসিঞ্চিত্ৰা মত্থেন আৰিঞ্ছেয্য, ভব্বো নৰনীতস্স অধিগমায. তং কিস্স হেতু? যোনি হেসা, ভূমিজ, নৰনীতস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে… সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা… আসঞ্চ অনাসঞ্চেপি করিত্ৰা … নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায. তং কিস্স হেতু? যোনি হেসা, ভূমিজ, ফলস্স অধিগমায.

‘‘সেয্যথাপি, ভূমিজ, পুরিসো অগ্গিত্থিকো অগ্গিগৰেসী অগ্গিপরিযেসনং চরমানো সুক্খং কট্ঠং কোল়াপং উত্তরারণিং আদায অভিমন্থেয্য; ( ) [(ভব্বো অগ্গিস্স অধিগমায) (সব্বত্থ)] আসঞ্চেপি করিত্ৰা… অনাসঞ্চেপি করিত্ৰা.. আসঞ্চ অনাসঞ্চেপি করিত্ৰা… নেৰাসং নানাসঞ্চেপি করিত্ৰা সুক্খ কট্ঠং কোল়াপং উত্তরারণিং আদায অভিমন্থেয্য, ভব্বো অগ্গিস্স অধিগমায. তং কিস্স হেতু? যোনি হেসা, ভূমিজ, অগ্গিস্স অধিগমায. এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে… সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায. তং কিস্স হেতু? যোনি হেসা, ভূমিজ, ফলস্স অধিগমায.

‘‘সচে খো তং, ভূমিজ, জযসেনস্স রাজকুমারস্স ইমা চতস্সো উপমা পটিভাযেয্যুং অনচ্ছরিযং তে জযসেনো রাজকুমারো পসীদেয্য, পসন্নো চ তে পসন্নাকারং করেয্যা’’তি. ‘‘কুতো পন মং, ভন্তে, জযসেনস্স রাজকুমারস্স ইমা চতস্সো উপমা পটিভাযিস্সন্তি অনচ্ছরিযা পুব্বে অস্সুতপুব্বা, সেয্যথাপি ভগৰন্ত’’ন্তি?

ইদমৰোচ ভগৰা. অত্তমনো আযস্মা ভূমিজো ভগৰতো ভাসিতং অভিনন্দীতি.

ভূমিজসুত্তং নিট্ঠিতং ছট্ঠং.