৫. বহুধাতুকসুত্তং

১২৪. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘যানি কানিচি, ভিক্খৰে, ভযানি উপ্পজ্জন্তি সব্বানি তানি বালতো উপ্পজ্জন্তি, নো পণ্ডিততো; যে কেচি উপদ্দৰা উপ্পজ্জন্তি সব্বে তে বালতো উপ্পজ্জন্তি, নো পণ্ডিততো; যে কেচি উপসগ্গা উপ্পজ্জন্তি সব্বে তে বালতো উপ্পজ্জন্তি, নো পণ্ডিততো. সেয্যথাপি, ভিক্খৰে, নল়াগারা ৰা তিণাগারা ৰা অগ্গি মুত্তো [অগ্গিমুক্কো (সী. পী.)] কূটাগারানিপি দহতি উল্লিত্তাৰলিত্তানি নিৰাতানি ফুসিতগ্গল়ানি পিহিতৰাতপানানি; এৰমেৰ খো, ভিক্খৰে, যানি কানিচি ভযানি উপ্পজ্জন্তি সব্বানি তানি বালতো উপ্পজ্জন্তি, নো পণ্ডিততো; যে কেচি উপদ্দৰা উপ্পজ্জন্তি সব্বে তে বালতো উপ্পজ্জন্তি, নো পণ্ডিততো; যে কেচি উপসগ্গা উপ্পজ্জন্তি সব্বে তে বালতো উপ্পজ্জন্তি, নো পণ্ডিততো. ইতি খো, ভিক্খৰে, সপ্পটিভযো বালো, অপ্পটিভযো পণ্ডিতো; সউপদ্দৰো বালো, অনুপদ্দৰো পণ্ডিতো; সউপসগ্গো বালো, অনুপসগ্গো পণ্ডিতো. নত্থি, ভিক্খৰে, পণ্ডিততো ভযং, নত্থি পণ্ডিততো উপদ্দৰো, নত্থি পণ্ডিততো উপসগ্গো. তস্মাতিহ, ভিক্খৰে, ‘পণ্ডিতা ভৰিস্সাম ৰীমংসকা’তি – এৰঞ্হি ৰো, ভিক্খৰে, সিক্খিতব্ব’’ন্তি.

এৰং ৰুত্তে, আযস্মা আনন্দো ভগৰন্তং এতদৰোচ – ‘‘কিত্তাৰতা নু খো, ভন্তে, পণ্ডিতো ভিক্খু ‘ৰীমংসকো’তি অলং ৰচনাযা’’তি? ‘‘যতো খো, আনন্দ, ভিক্খু ধাতুকুসলো চ হোতি, আযতনকুসলো চ হোতি, পটিচ্চসমুপ্পাদকুসলো চ হোতি, ঠানাঠানকুসলো চ হোতি – এত্তাৰতা খো, আনন্দ, পণ্ডিতো ভিক্খু ‘ৰীমংসকো’তি অলং ৰচনাযা’’তি.

১২৫. ‘‘কিত্তাৰতা পন, ভন্তে, ‘ধাতুকুসলো ভিক্খূ’তি অলং ৰচনাযা’’তি? ‘‘অট্ঠারস খো ইমা, আনন্দ, ধাতুযো – চক্খুধাতু, রূপধাতু, চক্খুৰিঞ্ঞাণধাতু; সোতধাতু, সদ্দধাতু, সোতৰিঞ্ঞাণধাতু; ঘানধাতু, গন্ধধাতু, ঘানৰিঞ্ঞাণধাতু; জিৰ্হাধাতু, রসধাতু, জিৰ্হাৰিঞ্ঞাণধাতু; কাযধাতু, ফোট্ঠব্বধাতু, কাযৰিঞ্ঞাণধাতু; মনোধাতু, ধম্মধাতু, মনোৰিঞ্ঞাণধাতু. ইমা খো, আনন্দ, অট্ঠারস ধাতুযো যতো জানাতি পস্সতি – এত্তাৰতাপি খো, আনন্দ, ‘ধাতুকুসলো ভিক্খূ’তি অলং ৰচনাযা’’তি.

‘‘সিযা পন, ভন্তে, অঞ্ঞোপি পরিযাযো, যথা ‘ধাতুকুসলো ভিক্খূ’তি অলং ৰচনাযা’’তি? ‘‘সিযা, আনন্দ. ছযিমা, আনন্দ, ধাতুযো – পথৰীধাতু, আপোধাতু, তেজোধাতু, ৰাযোধাতু, আকাসধাতু, ৰিঞ্ঞাণধাতু. ইমা খো, আনন্দ, ছ ধাতুযো যতো জানাতি পস্সতি – এত্তাৰতাপি খো, আনন্দ, ‘ধাতুকুসলো ভিক্খূ’তি অলং ৰচনাযা’’তি.

‘‘সিযা পন, ভন্তে, অঞ্ঞোপি পরিযাযো, যথা ‘ধাতুকুসলো ভিক্খূ’তি অলং ৰচনাযা’’তি? ‘‘সিযা, আনন্দ. ছযিমা, আনন্দ, ধাতুযো – সুখধাতু, দুক্খধাতু, সোমনস্সধাতু, দোমনস্সধাতু, উপেক্খাধাতু, অৰিজ্জাধাতু. ইমা খো, আনন্দ, ছ ধাতুযো যতো জানাতি পস্সতি – এত্তাৰতাপি খো, আনন্দ, ‘ধাতুকুসলো ভিক্খূ’তি অলং ৰচনাযা’’তি.

‘‘সিযা পন, ভন্তে, অঞ্ঞোপি পরিযাযো, যথা ‘ধাতুকুসলো ভিক্খূ’তি অলং ৰচনাযা’’তি? ‘‘সিযা, আনন্দ. ছযিমা, আনন্দ, ধাতুযো – কামধাতু, নেক্খম্মধাতু, ব্যাপাদধাতু, অব্যাপাদধাতু, ৰিহিংসাধাতু, অৰিহিংসাধাতু. ইমা খো, আনন্দ, ছ ধাতুযো যতো জানাতি পস্সতি – এত্তাৰতাপি খো, আনন্দ, ‘ধাতুকুসলো ভিক্খূ’তি অলং ৰচনাযা’’তি.

‘‘সিযা পন, ভন্তে, অঞ্ঞোপি পরিযাযো, যথা ‘ধাতুকুসলো ভিক্খূ’তি অলং ৰচনাযা’’তি? ‘‘সিযা, আনন্দ. তিস্সো ইমা, আনন্দ, ধাতুযো – কামধাতু, রূপধাতু, অরূপধাতু. ইমা খো, আনন্দ, তিস্সো ধাতুযো যতো জানাতি পস্সতি – এত্তাৰতাপি খো, আনন্দ, ‘ধাতুকুসলো ভিক্খূ’তি অলং ৰচনাযা’’তি.

‘‘সিযা পন, ভন্তে, অঞ্ঞোপি পরিযাযো, যথা ‘ধাতুকুসলো ভিক্খূ’তি অলং ৰচনাযা’’তি? ‘‘সিযা, আনন্দ. দ্ৰে ইমা, আনন্দ, ধাতুযো – সঙ্খতাধাতু, অসঙ্খতাধাতু. ইমা খো, আনন্দ, দ্ৰে ধাতুযো যতো জানাতি পস্সতি – এত্তাৰতাপি খো, আনন্দ, ‘ধাতুকুসলো ভিক্খূ’তি অলং ৰচনাযা’’তি.

১২৬. ‘‘কিত্তাৰতা পন, ভন্তে, ‘আযতনকুসলো ভিক্খূ’তি অলং ৰচনাযা’’তি? ‘‘ছ খো পনিমানি, আনন্দ, অজ্ঝত্তিকবাহিরানি আযতনানি – চক্খুচেৰ রূপা চ সোতঞ্চ সদ্দা চ ঘানঞ্চ গন্ধা চ জিৰ্হা চ রসা চ কাযো চ ফোট্ঠব্বা চ মনো চ ধম্মা চ. ইমানি খো, আনন্দ, ছ অজ্ঝত্তিকবাহিরানি আযতনানি যতো জানাতি পস্সতি – এত্তাৰতা খো, আনন্দ, ‘আযতনকুসলো ভিক্খূ’তি অলং ৰচনাযা’’তি.

‘‘কিত্তাৰতা পন, ভন্তে, ‘পটিচ্চসমুপ্পাদকুসলো ভিক্খূ’তি অলং ৰচনাযা’’তি? ‘‘ইধানন্দ, ভিক্খু এৰং পজানাতি – ‘ইমস্মিং সতি ইদং হোতি, ইমস্সুপ্পাদা ইদং উপ্পজ্জতি, ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতি, যদিদং – অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সূপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জাযত্ৰেৰ অসেসৰিরাগনিরোধা সঙ্খারনিরোধো, সঙ্খারনিরোধা ৰিঞ্ঞাণনিরোধো, ৰিঞ্ঞাণনিরোধা নামরূপনিরোধো, নামরূপনিরোধা সল়াযতননিরোধো, সল়াযতননিরোধা ফস্সনিরোধো, ফস্সনিরোধা ৰেদনানিরোধো, ৰেদনানিরোধা তণ্হানিরোধো, তণ্হানিরোধা উপাদাননিরোধো, উপাদাননিরোধা ভৰনিরোধো, ভৰনিরোধা জাতিনিরোধো, জাতিনিরোধা জরামরণং সোকপরিদেৰদুক্খদোমনস্সূপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি’. এত্তাৰতা খো, আনন্দ, ‘পটিচ্চসমুপ্পাদকুসলো ভিক্খূ’তি অলং ৰচনাযা’’তি.

১২৭. ‘‘কিত্তাৰতা পন, ভন্তে, ‘ঠানাঠানকুসলো ভিক্খূ’তি অলং ৰচনাযা’’তি? ‘‘ইধানন্দ, ভিক্খু ‘অট্ঠানমেতং অনৰকাসো যং দিট্ঠিসম্পন্নো পুগ্গলো কঞ্চি [কিঞ্চি (স্যা. কং. ক.)] সঙ্খারং নিচ্চতো উপগচ্ছেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুথুজ্জনো কঞ্চি সঙ্খারং নিচ্চতো উপগচ্ছেয্য, ঠানমেতং ৰিজ্জতী’তি পজানাতি; ‘অট্ঠানমেতং অনৰকাসো যং দিট্ঠিসম্পন্নো পুগ্গলো কঞ্চি সঙ্খারং সুখতো উপগচ্ছেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুথুজ্জনো কঞ্চি সঙ্খারং সুখতো উপগচ্ছেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং দিট্ঠিসম্পন্নো পুগ্গলো কঞ্চি ধম্মং অত্ততো উপগচ্ছেয্য, নেতং ঠানং ৰিজ্জতী’তি পজানাতি, ‘ঠানঞ্চ খো এতং ৰিজ্জতি যং পুথুজ্জনো কঞ্চি ধম্মং অত্ততো উপগচ্ছেয্য, ঠানমেতং ৰিজ্জতী’তি পজানাতি.

১২৮. ‘‘‘অট্ঠানমেতং অনৰকাসো যং দিট্ঠিসম্পন্নো পুগ্গলো মাতরং জীৰিতা ৰোরোপেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুথুজ্জনো মাতরং জীৰিতা ৰোরোপেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং দিট্ঠিসম্পন্নো পুগ্গলো পিতরং জীৰিতা ৰোরোপেয্য…পে… অরহন্তং জীৰিতা ৰোরোপেয্য, ঠানমেতং ৰিজ্জতী’তি পজানাতি; ‘অট্ঠানমেতং অনৰকাসো যং দিট্ঠিসম্পন্নো পুগ্গলো দুট্ঠচিত্তো তথাগতস্স লোহিতং উপ্পাদেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুথুজ্জনো দুট্ঠচিত্তো তথাগতস্স লোহিতং উপ্পাদেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং দিট্ঠিসম্পন্নো পুগ্গলো সঙ্ঘং ভিন্দেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুথুজ্জনো সঙ্ঘং ভিন্দেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং দিট্ঠিসম্পন্নো পুগ্গলো অঞ্ঞং সত্থারং উদ্দিসেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুথুজ্জনো অঞ্ঞং সত্থারং উদ্দিসেয্য, ঠানমেতং ৰিজ্জতী’তি পজানাতি.

১২৯. ‘‘‘অট্ঠানমেতং অনৰকাসো যং একিস্সা লোকধাতুযা দ্ৰে অরহন্তো সম্মাসম্বুদ্ধা অপুব্বং অচরিমং উপ্পজ্জেয্যুং, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং একিস্সা লোকধাতুযা একো অরহং সম্মাসম্বুদ্ধো উপ্পজ্জেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং একিস্সা লোকধাতুযা দ্ৰে রাজানো চক্কৰত্তিনো অপুব্বং অচরিমং উপ্পজ্জেয্যুং, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং একিস্সা লোকধাতুযা একো রাজা চক্কৰত্তী উপ্পজ্জেয্য, ঠানমেতং ৰিজ্জতী’তি পজানাতি.

১৩০. ‘‘‘অট্ঠানমেতং অনৰকাসো যং ইত্থী অরহং অস্স সম্মাসম্বুদ্ধো, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুরিসো অরহং অস্স সম্মাসম্বুদ্ধো, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং ইত্থী রাজা অস্স চক্কৰত্তী, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুরিসো রাজা অস্স চক্কৰত্তী, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং ইত্থী সক্কত্তং করেয্য … মারত্তং করেয্য… ব্রহ্মত্তং করেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং পুরিসো সক্কত্তং করেয্য… মারত্তং করেয্য… ব্রহ্মত্তং করেয্য, ঠানমেতং ৰিজ্জতী’তি পজানাতি.

১৩১. ‘‘‘অট্ঠানমেতং অনৰকাসো যং কাযদুচ্চরিতস্স ইট্ঠো কন্তো মনাপো ৰিপাকো নিব্বত্তেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং কাযদুচ্চরিতস্স অনিট্ঠো অকন্তো অমনাপো ৰিপাকো নিব্বত্তেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং ৰচীদুচ্চরিতস্স…পে… যং মনোদুচ্চরিতস্স ইট্ঠো কন্তো মনাপো ৰিপাকো নিব্বত্তেয্য, নেতং ঠানং ৰিজ্জতী’তি পজানাতি; ঠানঞ্চ খো এতং ৰিজ্জতি যং ৰচীদুচ্চরিতস্স…পে… যং মনোদুচ্চরিতস্স অনিট্ঠো অকন্তো অমনাপো ৰিপাকো নিব্বত্তেয্য, ঠানমেতং ৰিজ্জতীতি পজানাতি. ‘অট্ঠানমেতং অনৰকাসো যং কাযসুচরিতস্স অনিট্ঠো অকন্তো অমনাপো ৰিপাকো নিব্বত্তেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং কাযসুচরিতস্স ইট্ঠো কন্তো মনাপো ৰিপাকো নিব্বত্তেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং ৰচীসুচরিতস্স…পে… যং মনোসুচরিতস্স অনিট্ঠো অকন্তো অমনাপো ৰিপাকো নিব্বত্তেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং ৰচীসুচরিতস্স…পে… যং মনোসুচরিতস্স ইট্ঠো কন্তো মনাপো ৰিপাকো নিব্বত্তেয্য, ঠানমেতং ৰিজ্জতী’তি পজানাতি.

‘‘‘অট্ঠানমেতং অনৰকাসো যং কাযদুচ্চরিতসমঙ্গী তংনিদানা তপ্পচ্চযা কাযস্স ভেদা পরং মরণা সুগতিং সগ্গং লোকং উপপজ্জেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং কাযদুচ্চরিতসমঙ্গী তংনিদানা তপ্পচ্চযা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং ৰচীদুচ্চরিতসমঙ্গী…পে… যং মনোদুচ্চরিতসমঙ্গী তংনিদানা তপ্পচ্চযা কাযস্স ভেদা পরং মরণা সুগতিং সগ্গং লোকং উপপজ্জেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং ৰচীদুচ্চরিতসমঙ্গী…পে… যং মনোদুচ্চরিতসমঙ্গী তংনিদানা তপ্পচ্চযা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং কাযসুচরিতসমঙ্গী তংনিদানা তপ্পচ্চযা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং কাযসুচরিতসমঙ্গী তংনিদানা তপ্পচ্চযা কাযস্স ভেদা পরং মরণা সুগতিং সগ্গং লোকং উপপজ্জেয্য, ঠানমেতং ৰিজ্জতী’তি পজানাতি. ‘অট্ঠানমেতং অনৰকাসো যং ৰচীসুচরিতসমঙ্গী…পে… যং মনোসুচরিতসমঙ্গী তংনিদানা তপ্পচ্চযা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য, নেতং ঠানং ৰিজ্জতী’তি পজানাতি; ‘ঠানঞ্চ খো এতং ৰিজ্জতি যং ৰচীসুচরিতসমঙ্গী…পে… যং মনোসুচরিতসমঙ্গী তংনিদানা তপ্পচ্চযা কাযস্স ভেদা পরং মরণা সুগতিং সগ্গং লোকং উপপজ্জেয্য, ঠানমেতং ৰিজ্জতী’তি পজানাতি. এত্তাৰতা খো, আনন্দ, ‘ঠানাঠানকুসলো ভিক্খূ’তি অলং ৰচনাযা’’তি.

১৩২. এৰং ৰুত্তে আযস্মা আনন্দো ভগৰন্তং এতদৰোচ – ‘‘অচ্ছরিযং, ভন্তে, অব্ভুতং, ভন্তে! কোনামো অযং, ভন্তে, ধম্মপরিযাযো’’তি? ‘‘তস্মাতিহ ত্ৰং, আনন্দ, ইমং ধম্মপরিযাযং ‘বহুধাতুকো’তিপি নং ধারেহি, ‘চতুপরিৰট্টো’তিপি নং ধারেহি, ‘ধম্মাদাসো’তিপি নং ধারেহি, ‘অমতদুন্দুভী’তিপি [দুদ্রভীতিপি (ক.)] নং ধারেহি, ‘অনুত্তরো সঙ্গামৰিজযো’তিপি নং ধারেহী’’তি.

ইদমৰোচ ভগৰা. অত্তমনো আযস্মা আনন্দো ভগৰতো ভাসিতং অভিনন্দীতি.

বহুধাতুকসুত্তং নিট্ঠিতং পঞ্চমং.