৩. সপ্পুরিসসুত্তং

১০৫. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘সপ্পুরিসধম্মঞ্চ ৰো, ভিক্খৰে, দেসেস্সামি অসপ্পুরিসধম্মঞ্চ. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, অসপ্পুরিসধম্মো? ইধ, ভিক্খৰে, অসপ্পুরিসো উচ্চাকুলা পব্বজিতো হোতি. সো ইতি পটিসঞ্চিক্খতি – ‘অহং খোম্হি উচ্চাকুলা পব্বজিতো, ইমে পনঞ্ঞে ভিক্খূ ন উচ্চাকুলা পব্বজিতা’তি. সো তায উচ্চাকুলীনতায অত্তানুক্কংসেতি, পরং ৰম্ভেতি. অযং [অযম্পি (সী. পী.)], ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো উচ্চাকুলীনতায লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি উচ্চাকুলা পব্বজিতো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তায উচ্চাকুলীনতায নেৰত্তানুক্কংসেতি ন পরং ৰম্ভেতি. অযং, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো মহাকুলা পব্বজিতো হোতি…পে… [যথা উচ্চাকুলৰারে তথা ৰিত্থারেতব্বং] মহাভোগকুলা পব্বজিতো হোতি…পে… উল়ারভোগকুলা পব্বজিতো হোতি. সো ইতি পটিসঞ্চিক্খতি – ‘অহং খোম্হি উল়ারভোগকুলা পব্বজিতো, ইমে পনঞ্ঞে ভিক্খূ ন উল়ারভোগকুলা পব্বজিতা’তি. সো তায উল়ারভোগতায অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো উল়ারভোগতায লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি উল়ারভোগকুলা পব্বজিতো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তায উল়ারভোগতায নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

১০৬. ‘‘পুন চপরং, ভিক্খৰে, অসপ্পুরিসো ঞাতো হোতি যসস্সী. সো ইতি পটিসঞ্চিক্খতি – ‘অহং খোম্হি ঞাতো যসস্সী, ইমে পনঞ্ঞে ভিক্খূ অপ্পঞ্ঞাতা অপ্পেসক্খা’তি. সো তেন ঞত্তেন [ঞাতেন (সী. ক.), ঞাতত্তেন (স্যা. কং. পী.)] অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো ঞত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি ঞাতো হোতি যসস্সী; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন ঞত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো লাভী হোতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং. সো ইতি পটিসঞ্চিক্খতি – ‘অহং খোম্হি লাভী চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং, ইমে পনঞ্ঞে ভিক্খূ ন লাভিনো চীৰরপিণ্ডপাতসেনাসনগিলানপ্পচ্চযভেসজ্জপরিক্খারান’ন্তি. সো তেন লাভেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো লাভেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি লাভী হোতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন লাভেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো বহুস্সুতো হোতি. সো ইতি পটিসঞ্চিক্খতি – ‘অহং খোম্হি বহুস্সুতো, ইমে পনঞ্ঞে ভিক্খূ ন বহুস্সুতা’তি. সো তেন বাহুসচ্চেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো বাহুসচ্চেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি বহুস্সুতো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন বাহুসচ্চেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো ৰিনযধরো হোতি. সো ইতি পটিসঞ্চিক্খতি – ‘অহং খোম্হি ৰিনযধরো, ইমে পনঞ্ঞে ভিক্খূ ন ৰিনযধরা’তি. সো তেন ৰিনযধরত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো ৰিনযধরত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি ৰিনযধরো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন ৰিনযধরত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো ধম্মকথিকো হোতি. সো ইতি পটিসঞ্চিক্খতি – ‘অহং খোম্হি ধম্মকথিকো, ইমে পনঞ্ঞে ভিক্খূ ন ধম্মকথিকা’তি. সো তেন ধম্মকথিকত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো ধম্মকথিকত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি ধম্মকথিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন ধম্মকথিকত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

১০৭. ‘‘পুন চপরং, ভিক্খৰে, অসপ্পুরিসো আরঞ্ঞিকো হোতি. সো ইতি পটিসঞ্চিক্খতি – ‘অহং খোম্হি আরঞ্ঞিকো ইমে পনঞ্ঞে ভিক্খূ ন আরঞ্ঞিকা’তি. সো তেন আরঞ্ঞিকত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো আরঞ্ঞিকত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি আরঞ্ঞিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন আরঞ্ঞিকত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো পংসুকূলিকো হোতি. সো ইতি পটিসঞ্চিক্খতি – ‘অহং খোম্হি পংসুকূলিকো, ইমে পনঞ্ঞে ভিক্খূ ন পংসুকূলিকা’তি. সো তেন পংসুকূলিকত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো পংসুকূলিকত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি পংসুকূলিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন পংসুকূলিকত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো পিণ্ডপাতিকো হোতি. সো ইতি পটিসঞ্চিক্খতি – ‘অহং খোম্হি পিণ্ডপাতিকো, ইমে পনঞ্ঞে ভিক্খূ ন পিণ্ডপাতিকা’তি. সো তেন পিণ্ডপাতিকত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো পিণ্ডপাতিকত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি পিণ্ডপাতিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন পিণ্ডপাতিকত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো রুক্খমূলিকো হোতি. সো ইতি পটিসঞ্চিক্খতি – ‘অহং খোম্হি রুক্খমূলিকো, ইমে পনঞ্ঞে ভিক্খূ ন রুক্খমূলিকা’তি. সো তেন রুক্খমূলিকত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো রুক্খমূলিকত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি রুক্খমূলিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন রুক্খমূলিকত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো সোসানিকো হোতি…পে… অব্ভোকাসিকো হোতি… নেসজ্জিকো হোতি… যথাসন্থতিকো হোতি… একাসনিকো হোতি. সো ইতি পটিসঞ্চিক্খতি – ‘অহং খোম্হি একাসনিকো, ইমে পনঞ্ঞে ভিক্খূ ন একাসনিকা’তি. সো তেন একাসনিকত্তেন অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ন খো একাসনিকত্তেন লোভধম্মা ৰা পরিক্খযং গচ্ছন্তি, দোসধম্মা ৰা পরিক্খযং গচ্ছন্তি, মোহধম্মা ৰা পরিক্খযং গচ্ছন্তি. নো চেপি একাসনিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচারী, সো তত্থ পুজ্জো, সো তত্থ পাসংসো’তি. সো পটিপদংযেৰ অন্তরং করিত্ৰা তেন একাসনিকত্তেন নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

১০৮. ‘‘পুন চপরং, ভিক্খৰে, অসপ্পুরিসো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. সো ইতি পটিসঞ্চিক্খতি – ‘অহং খোম্হি পঠমজ্ঝানসমাপত্তিযা লাভী, ইমে পনঞ্ঞে ভিক্খূ পঠমজ্ঝানসমাপত্তিযা ন লাভিনো’তি. সো তায পঠমজ্ঝানসমাপত্তিযা অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘পঠমজ্ঝানসমাপত্তিযাপি খো অতম্মযতা ৰুত্তা ভগৰতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৰ অন্তরং করিত্ৰা তায পঠমজ্ঝানসমাপত্তিযা নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং…পে… ততিযং ঝানং… চতুত্থং ঝানং উপসম্পজ্জ ৰিহরতি. সো ইতি পটিসঞ্চিক্খতি – ‘অহং খোম্হি চতুত্থজ্ঝানসমাপত্তিযা লাভী, ইমে পনঞ্ঞে ভিক্খূ চতুত্থজ্ঝানসমাপত্তিযা ন লাভিনো’তি. সো তায চতুত্থজ্ঝানসমাপত্তিযা অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘চতুত্থজ্ঝানসমাপত্তিযাপি খো অতম্মযতা ৰুত্তা ভগৰতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৰ অন্তরং করিত্ৰা তায চতুত্থজ্ঝানসমাপত্তিযা নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. সো ইতি পটিসঞ্চিক্খতি – ‘অহং খোম্হি আকাসানঞ্চাযতনসমাপত্তিযা লাভী, ইমে পনঞ্ঞে ভিক্খূ আকাসানঞ্চাযতনসমাপত্তিযা ন লাভিনো’তি. সো তায আকাসানঞ্চাযতনসমাপত্তিযা অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘আকাসানঞ্চাযতনসমাপত্তিযাপি খো অতম্মযতা ৰুত্তা ভগৰতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৰ অন্তরং করিত্ৰা তায আকাসানঞ্চাযতনসমাপত্তিযা নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি. সো ইতি পটিসঞ্চিক্খতি – ‘অহং খোম্হি ৰিঞ্ঞাণঞ্চাযতনসমাপত্তিযা লাভী, ইমে পনঞ্ঞে ভিক্খূ ৰিঞ্ঞাণঞ্চাযতনসমাপত্তিযা ন লাভিনো’তি. সো তায ৰিঞ্ঞাণঞ্চাযতনসমাপত্তিযা অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘ৰিঞ্ঞাণঞ্চাযতনসমাপত্তিযাপি খো অতম্মযতা ৰুত্তা ভগৰতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৰ অন্তরং করিত্ৰা তায ৰিঞ্ঞাণঞ্চাযতনসমাপত্তিযা নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. সো ইতি পটিসঞ্চিক্খতি – ‘অহং খোম্হি আকিঞ্চঞ্ঞাযতনসমাপত্তিযা লাভী, ইমে পনঞ্ঞে ভিক্খূ আকিঞ্চঞ্ঞাযতনসমাপত্তিযা ন লাভিনো’তি. সো তায আকিঞ্চঞ্ঞাযতনসমাপত্তিযা অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘আকিঞ্চঞ্ঞাযতনসমাপত্তিযাপি খো অতম্মযতা ৰুত্তা ভগৰতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৰ অন্তরং করিত্ৰা তায আকিঞ্চঞ্ঞাযতনসমাপত্তিযা নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, অসপ্পুরিসো সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. সো ইতি পটিসঞ্চিক্খতি – ‘অহং খোম্হি নেৰসঞ্ঞানাসঞ্ঞাযতনসমাপত্তিযা লাভী, ইমে পনঞ্ঞে ভিক্খূ নেৰসঞ্ঞানাসঞ্ঞাযতনসমাপত্তিযা ন লাভিনো’তি. সো তায নেৰসঞ্ঞানাসঞ্ঞাযতনসমাপত্তিযা অত্তানুক্কংসেতি, পরং ৰম্ভেতি. অযম্পি, ভিক্খৰে, অসপ্পুরিসধম্মো. সপ্পুরিসো চ খো, ভিক্খৰে, ইতি পটিসঞ্চিক্খতি – ‘নেৰসঞ্ঞানাসঞ্ঞাযতনসমাপত্তিযাপি খো অতম্মযতা ৰুত্তা ভগৰতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৰ অন্তরং করিত্ৰা তায নেৰসঞ্ঞানাসঞ্ঞাযতনসমাপত্তিযা নেৰত্তানুক্কংসেতি, ন পরং ৰম্ভেতি. অযম্পি, ভিক্খৰে, সপ্পুরিসধম্মো.

‘‘পুন চপরং, ভিক্খৰে, সপ্পুরিসো সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি. পঞ্ঞায চস্স দিস্ৰা আসৰা [একচ্চে আসৰা (ক.)] পরিক্খীণা হোন্তি. অযং [অযং খো (স্যা. কং.)], ভিক্খৰে, ভিক্খু ন কিঞ্চি মঞ্ঞতি, ন কুহিঞ্চি মঞ্ঞতি, ন কেনচি মঞ্ঞতী’’তি.

ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

সপ্পুরিসসুত্তং নিট্ঠিতং ততিযং.