৮. গোপকমোগ্গল্লানসুত্তং

৭৯. এৰং মে সুতং – একং সমযং আযস্মা আনন্দো রাজগহে ৰিহরতি ৰেল়ুৰনে কলন্দকনিৰাপে অচিরপরিনিব্বুতে ভগৰতি. তেন খো পন সমযেন রাজা মাগধো অজাতসত্তু ৰেদেহিপুত্তো রাজগহং পটিসঙ্খারাপেতি রঞ্ঞো পজ্জোতস্স আসঙ্কমানো. অথ খো আযস্মা আনন্দো পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি. অথ খো আযস্মতো আনন্দস্স এতদহোসি – ‘‘অতিপ্পগো খো তাৰ রাজগহে পিণ্ডায চরিতুং. যংনূনাহং যেন গোপকমোগ্গল্লানস্স ব্রাহ্মণস্স কম্মন্তো, যেন গোপকমোগ্গল্লানো ব্রাহ্মণো তেনুপসঙ্কমেয্য’’ন্তি.

অথ খো আযস্মা আনন্দো যেন গোপকমোগ্গল্লানস্স ব্রাহ্মণস্স কম্মন্তো, যেন গোপকমোগ্গল্লানো ব্রাহ্মণো তেনুপসঙ্কমি. অদ্দসা খো গোপকমোগ্গল্লানো ব্রাহ্মণো আযস্মন্তং আনন্দং দূরতোৰ আগচ্ছন্তং. দিস্ৰান আযস্মন্তং আনন্দং এতদৰোচ – ‘‘এতু খো ভৰং আনন্দো. স্ৰাগতং ভোতো আনন্দস্স. চিরস্সং খো ভৰং আনন্দো ইমং পরিযাযমকাসি যদিদং ইধাগমনায. নিসীদতু ভৰং আনন্দো, ইদমাসনং পঞ্ঞত্ত’’ন্তি. নিসীদি খো আযস্মা আনন্দো পঞ্ঞত্তে আসনে. গোপকমোগ্গল্লানোপি খো ব্রাহ্মণো অঞ্ঞতরং নীচং আসনং গহেত্ৰা একমন্তং নিসীদি. একমন্তং নিসিন্নো খো গোপকমোগ্গল্লানো ব্রাহ্মণো আযস্মন্তং আনন্দং এতদৰোচ – ‘‘অত্থি নু খো, ভো আনন্দ, একভিক্খুপি তেহি ধম্মেহি সব্বেনসব্বং সব্বথাসব্বং সমন্নাগতো যেহি ধম্মেহি সমন্নাগতো সো ভৰং গোতমো অহোসি অরহং সম্মাসম্বুদ্ধো’’তি? ‘‘নত্থি খো, ব্রাহ্মণ, একভিক্খুপি তেহি ধম্মেহি সব্বেনসব্বং সব্বথাসব্বং সমন্নাগতো যেহি ধম্মেহি সমন্নাগতো সো ভগৰা অহোসি অরহং সম্মাসম্বুদ্ধো. সো হি, ব্রাহ্মণ, ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ, মগ্গৰিদূ, মগ্গকোৰিদো; মগ্গানুগা চ পন এতরহি সাৰকা ৰিহরন্তি পচ্ছা সমন্নাগতা’’তি. অযঞ্চ হিদং আযস্মতো আনন্দস্স গোপকমোগ্গল্লানেন ব্রাহ্মণেন সদ্ধিং অন্তরাকথা ৰিপ্পকতা অহোসি.

অথ খো ৰস্সকারো ব্রাহ্মণো মগধমহামত্তো রাজগহে কম্মন্তে অনুসঞ্ঞাযমানো যেন গোপকমোগ্গল্লানস্স ব্রাহ্মণস্স কম্মন্তো, যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰস্সকারো ব্রাহ্মণো মগধমহামত্তো আযস্মন্তং আনন্দং এতদৰোচ – ‘‘কাযনুত্থ, ভো আনন্দ, এতরহি কথায সন্নিসিন্না, কা চ পন ৰো অন্তরাকথা ৰিপ্পকতা’’তি? ‘‘ইধ মং, ব্রাহ্মণ, গোপকমোগ্গল্লানো ব্রাহ্মণো এৰমাহ – ‘অত্থি নু খো, ভো আনন্দ, একভিক্খুপি তেহি ধম্মেহি সব্বেনসব্বং সব্বথাসব্বং সমন্নাগতো যেহি ধম্মেহি সমন্নাগতো সো ভৰং গোতমো অহোসি অরহং সম্মাসম্বুদ্ধো’তি. এৰং ৰুত্তে অহং, ব্রাহ্মণ, গোপকমোগ্গল্লানং ব্রাহ্মণং এতদৰোচং – ‘নত্থি খো, ব্রাহ্মণ, একভিক্খুপি তেহি ধম্মেহি সব্বেনসব্বং সব্বথাসব্বং সমন্নাগতো যেহি ধম্মেহি সমন্নাগতো সো ভগৰা অহোসি অরহং সম্মাসম্বুদ্ধো. সো হি, ব্রাহ্মণ, ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ, মগ্গৰিদূ, মগ্গকোৰিদো; মগ্গানুগা চ পন এতরহি সাৰকা ৰিহরন্তি পচ্ছা সমন্নাগতা’তি. অযং খো নো, ব্রাহ্মণ, গোপকমোগ্গল্লানেন ব্রাহ্মণেন সদ্ধিং অন্তরাকথা ৰিপ্পকতা. অথ ত্ৰং অনুপ্পত্তো’’তি.

৮০. ‘‘অত্থি নু খো, ভো আনন্দ, একভিক্খুপি তেন ভোতা গোতমেন ঠপিতো – ‘অযং ৰো মমচ্চযেন পটিসরণং ভৰিস্সতী’তি, যং তুম্হে এতরহি পটিপাদেয্যাথা’’তি [পটিধাৰেয্যাথাতি (সী. স্যা. কং. পী.)]? ‘‘নত্থি খো, ব্রাহ্মণ, একভিক্খুপি তেন ভগৰতা জানতা পস্সতা অরহতা সম্মাসম্বুদ্ধেন ঠপিতো – ‘অযং ৰো মমচ্চযেন পটিসরণং ভৰিস্সতী’তি, যং মযং এতরহি পটিপাদেয্যামা’’তি. ‘‘অত্থি পন, ভো আনন্দ, একভিক্খুপি সঙ্ঘেন সম্মতো, সম্বহুলেহি থেরেহি ভিক্খূহি ঠপিতো – ‘অযং নো ভগৰতো অচ্চযেন পটিসরণং ভৰিস্সতী’তি, যং তুম্হে এতরহি পটিপাদেয্যাথা’’তি? ‘‘নত্থি খো, ব্রাহ্মণ, একভিক্খুপি সঙ্ঘেন সম্মতো, সম্বহুলেহি থেরেহি ভিক্খূহি ঠপিতো – ‘অযং নো ভগৰতো অচ্চযেন পটিসরণং ভৰিস্সতী’তি, যং মযং এতরহি পটিপাদেয্যামা’’তি. ‘‘এৰং অপ্পটিসরণে চ পন, ভো আনন্দ, কো হেতু সামগ্গিযা’’তি? ‘‘ন খো মযং, ব্রাহ্মণ, অপ্পটিসরণা; সপ্পটিসরণা মযং, ব্রাহ্মণ; ধম্মপ্পটিসরণা’’তি.

‘‘‘অত্থি নু খো, ভো আনন্দ, একভিক্খুপি তেন ভোতা গোতমেন ঠপিতো – অযং ৰো মমচ্চযেন পটিসরণং ভৰিস্সতীতি, যং তুম্হে এতরহি পটিপাদেয্যাথা’তি – ইতি পুট্ঠো সমানো ‘নত্থি খো, ব্রাহ্মণ, একভিক্খুপি তেন ভগৰতা জানতা পস্সতা অরহতা সম্মাসম্বুদ্ধেন ঠপিতো – অযং ৰো মমচ্চযেন পটিসরণং ভৰিস্সতীতি, যং মযং এতরহি পটিপাদেয্যামা’তি ৰদেসি; ‘অত্থি পন, ভো আনন্দ, একভিক্খুপি সঙ্ঘেন সম্মতো, সম্বহুলেহি থেরেহি ভিক্খূহি ঠপিতো – অযং নো ভগৰতো অচ্চযেন পটিসরণং ভৰিস্সতীতি, যং তুম্হে এতরহি পটিপাদেয্যাথা’তি – ইতি পুট্ঠো সমানো ‘নত্থি খো, ব্রাহ্মণ, একভিক্খুপি সঙ্ঘেন সম্মতো, সম্বহুলেহি থেরেহি ভিক্খূহি ঠপিতো – অযং নো ভগৰতো অচ্চযেন পটিসরণং ভৰিস্সতীতি, যং মযং এতরহি পটিপাদেয্যামা’তি – ৰদেসি; ‘এৰং অপ্পটিসরণে চ পন, ভো আনন্দ, কো হেতু সামগ্গিযা’তি ইতি পুট্ঠো সমানো ‘ন খো মযং, ব্রাহ্মণ, অপ্পটিসরণা; সপ্পটিসরণা মযং, ব্রাহ্মণ; ধম্মপ্পটিসরণা’তি ৰদেসি. ইমস্স পন, ভো আনন্দ, ভাসিতস্স কথং অত্থো দট্ঠব্বো’’তি?

৮১. ‘‘অত্থি খো, ব্রাহ্মণ, তেন ভগৰতা জানতা পস্সতা অরহতা সম্মাসম্বুদ্ধেন ভিক্খূনং সিক্খাপদং পঞ্ঞত্তং, পাতিমোক্খং উদ্দিট্ঠং. তে মযং তদহুপোসথে যাৰতিকা একং গামখেত্তং উপনিস্সায ৰিহরাম তে সব্বে একজ্ঝং সন্নিপতাম; সন্নিপতিত্ৰা যস্স তং পৰত্ততি তং অজ্ঝেসাম. তস্মিং চে ভঞ্ঞমানে হোতি ভিক্খুস্স আপত্তি হোতি ৰীতিক্কমো তং মযং যথাধম্মং যথানুসিট্ঠং কারেমাতি.

‘‘ন কির নো ভৰন্তো কারেন্তি; ধম্মো নো কারেতি’’. ‘‘অত্থি নু খো, ভো আনন্দ, একভিক্খুপি যং তুম্হে এতরহি সক্করোথ গরুং করোথ [গরুকরোথ (সী. স্যা. কং. পী.)] মানেথ পূজেথ; সক্কত্ৰা গরুং কত্ৰা [গরুকত্ৰা (সী. স্যা. কং. পী.)] উপনিস্সায ৰিহরথা’’তি? ‘‘নত্থি খো, ব্রাহ্মণ, একভিক্খুপি যং মযং এতরহি সক্করোম গরুং করোম মানেম পূজেম; সক্কত্ৰা গরুং কত্ৰা উপনিস্সায ৰিহরামা’’তি.

‘‘‘অত্থি নু খো, ভো আনন্দ, একভিক্খুপি তেন ভোতা গোতমেন ঠপিতো – অযং ৰো মমচ্চযেন পটিসরণং ভৰিস্সতীতি যং তুম্হে এতরহি পটিপাদেয্যাথা’তি – ইতি পুট্ঠো সমানো ‘নত্থি খো, ব্রাহ্মণ, একভিক্খুপি তেন ভগৰতা জানতা পস্সতা অরহতা সম্মাসম্বুদ্ধেন ঠপিতো – অযং ৰো মমচ্চযেন পটিসরণং ভৰিস্সতীতি যং মযং এতরহি পটিপাদেয্যামা’তি ৰদেসি; ‘অত্থি পন, ভো আনন্দ, একভিক্খুপি সঙ্ঘেন সম্মতো, সম্বহুলেহি থেরেহি ভিক্খূহি ঠপিতো – অযং নো ভগৰতো অচ্চযেন পটিসরণং ভৰিস্সতীতি যং তুম্হে এতরহি পটিপাদেয্যাথা’তি – ইতি পুট্ঠো সমানো ‘নত্থি খো, ব্রাহ্মণ, একভিক্খুপি সঙ্ঘেন সম্মতো, সম্বহুলেহি থেরেহি ভিক্খূহি ঠপিতো – অযং নো ভগৰতো অচ্চযেন পটিসরণং ভৰিস্সতীতি যং মযং এতরহি পটিপাদেয্যামা’তি ৰদেসি; ‘অত্থি নু খো, ভো আনন্দ, একভিক্খুপি যং তুম্হে এতরহি সক্করোথ গরুং করোথ মানেথ পূজেথ; সক্কত্ৰা গরুং কত্ৰা উপনিস্সায ৰিহরথা’তি – ইতি পুট্ঠো সমানো ‘নত্থি খো, ব্রাহ্মণ, একভিক্খুপি যং মযং এতরহি সক্করোম গরুং করোম মানেম পূজেম; সক্কত্ৰা গরুং কত্ৰা উপনিস্সায ৰিহরামা’তি ৰদেসি. ইমস্স পন, ভো আনন্দ, ভাসিতস্স কথং অত্থো দট্ঠব্বো’’তি?

৮২. ‘‘অত্থি খো, ব্রাহ্মণ, তেন ভগৰতা জানতা পস্সতা অরহতা সম্মাসম্বুদ্ধেন দস পসাদনীযা ধম্মা অক্খাতা. যস্মিং নো ইমে ধম্মা সংৰিজ্জন্তি তং মযং এতরহি সক্করোম গরুং করোম মানেম পূজেম; সক্কত্ৰা গরুং কত্ৰা উপনিস্সায ৰিহরাম. কতমে দস?

‘‘ইধ, ব্রাহ্মণ, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো, অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু.

‘‘বহুস্সুতো হোতি সুতধরো সুতসন্নিচযো. যে তে ধম্মা আদিকল্যাণা, মজ্ঝেকল্যাণা, পরিযোসানকল্যাণা, সাত্থং, সব্যঞ্জনং [সাত্থা সব্যঞ্জনা (সী. স্যা. কং.)], কেৰলপরিপুণ্ণং পরিসুদ্ধং ব্রহ্মচরিযং অভিৰদন্তি তথারূপাস্স ধম্মা বহুস্সুতা হোন্তি ধাতা [ধতা (সী. স্যা. কং. পী.)] ৰচসা পরিচিতা মনসানুপেক্খিতা দিট্ঠিযা সুপ্পটিৰিদ্ধা.

‘‘সন্তুট্ঠো হোতি ( ) [(ইতরীতরেহি) দী. নি. ৩.৩৪৫] চীৰরপিণ্ডপাতসেনাসনগিলানপ্পচ্চযভেসজ্জপরিক্খারেহি.

‘‘চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী.

‘‘অনেকৰিহিতং ইদ্ধিৰিধং পচ্চনুভোতি – একোপি হুত্ৰা বহুধা হোতি, বহুধাপি হুত্ৰা একো হোতি; আৰিভাৰং তিরোভাৰং; তিরোকুট্টং [তিরোকুড্ডং (সী. স্যা. কং. পী.)] তিরোপাকারং তিরোপব্বতং অসজ্জমানো গচ্ছতি, সেয্যথাপি আকাসে; পথৰিযাপি উম্মুজ্জনিমুজ্জং করোতি, সেয্যথাপি উদকে; উদকেপি অভিজ্জমানে গচ্ছতি, সেয্যথাপি পথৰিযং; আকাসেপি পল্লঙ্কেন কমতি, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসতি [পরামসতি (ক.)] পরিমজ্জতি, যাৰ ব্রহ্মলোকাপি কাযেন ৰসং ৰত্তেতি.

‘‘দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাতি – দিব্বে চ মানুসে চ, যে দূরে সন্তিকে চ.

‘‘পরসত্তানং পরপুগ্গলানং চেতসা চেতো পরিচ্চ পজানাতি. সরাগং ৰা চিত্তং ‘সরাগং চিত্ত’ন্তি পজানাতি, ৰীতরাগং ৰা চিত্তং ‘ৰীতরাগং চিত্ত’ন্তি পজানাতি, সদোসং ৰা চিত্তং ‘সদোসং চিত্ত’ন্তি পজানাতি, ৰীতদোসং ৰা চিত্তং ‘ৰীতদোসং চিত্ত’ন্তি পজানাতি, সমোহং ৰা চিত্তং ‘সমোহং চিত্ত’ন্তি পজানাতি, ৰীতমোহং ৰা চিত্তং ‘ৰীতমোহং চিত্ত’ন্তি পজানাতি, সংখিত্তং ৰা চিত্তং ‘সংখিত্তং চিত্ত’ন্তি পজানাতি, ৰিক্খিত্তং ৰা চিত্তং ‘ৰিক্খিত্তং চিত্ত’ন্তি পজানাতি, মহগ্গতং ৰা চিত্তং ‘মহগ্গতং চিত্ত’ন্তি পজানাতি, অমহগ্গতং ৰা চিত্তং ‘অমহগ্গতং চিত্ত’ন্তি পজানাতি, সউত্তরং ৰা চিত্তং ‘সউত্তরং চিত্ত’ন্তি পজানাতি, অনুত্তরং ৰা চিত্তং ‘অনুত্তরং চিত্ত’ন্তি পজানাতি, সমাহিতং ৰা চিত্তং ‘সমাহিতং চিত্ত’ন্তি পজানাতি, অসমাহিতং ৰা চিত্তং ‘অসমাহিতং চিত্ত’ন্তি পজানাতি, ৰিমুত্তং ৰা চিত্তং ‘ৰিমুত্তং চিত্ত’ন্তি পজানাতি, অৰিমুত্তং ৰা চিত্তং ‘অৰিমুত্তং চিত্ত’ন্তি পজানাতি.

‘‘অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তারীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো ইধূপপন্নো’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি.

‘‘দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাতি.

‘‘আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি.

‘‘ইমে খো, ব্রাহ্মণ, তেন ভগৰতা জানতা পস্সতা অরহতা সম্মাসম্বুদ্ধেন দস পসাদনীযা ধম্মা অক্খাতা. যস্মিং নো ইমে ধম্মা সংৰিজ্জন্তি তং মযং এতরহি সক্করোম গরুং করোম মানেম পূজেম; সক্কত্ৰা গরুং কত্ৰা উপনিস্সায ৰিহরামা’’তি.

৮৩. এৰং ৰুত্তে ৰস্সকারো ব্রাহ্মণো মগধমহামত্তো উপনন্দং সেনাপতিং আমন্তেসি – ‘‘তং কিং মঞ্ঞতি ভৰং সেনাপতি [মঞ্ঞসি এৰং সেনাপতি (স্যা. কং. পী.), মঞ্ঞসি সেনাপতি (সী.), মঞ্ঞসি ভৰং সেনাপতি (ক.)] যদিমে ভোন্তো সক্কাতব্বং সক্করোন্তি, গরুং কাতব্বং গরুং করোন্তি, মানেতব্বং মানেন্তি, পূজেতব্বং পূজেন্তি’’? ‘‘তগ্ঘিমে [তগ্ঘ মে (ক.)] ভোন্তো সক্কাতব্বং সক্করোন্তি, গরুং কাতব্বং গরুং করোন্তি, মানেতব্বং মানেন্তি, পূজেতব্বং পূজেন্তি. ইমঞ্চ হি তে ভোন্তো ন সক্করেয্যুং ন গরুং করেয্যুং ন মানেয্যুং ন পূজেয্যুং; অথ কিঞ্চরহি তে ভোন্তো সক্করেয্যুং গরুং করেয্যুং মানেয্যুং পূজেয্যুং, সক্কত্ৰা গরুং কত্ৰা মানেত্ৰা পূজেত্ৰা উপনিস্সায ৰিহরেয্যু’’ন্তি? অথ খো ৰস্সকারো ব্রাহ্মণো মগধমহামত্তো আযস্মন্তং আনন্দং এতদৰোচ – ‘‘কহং পন ভৰং আনন্দো এতরহি ৰিহরতী’’তি? ‘‘ৰেল়ুৰনে খোহং, ব্রাহ্মণ, এতরহি ৰিহরামী’’তি. ‘‘কচ্চি পন, ভো আনন্দ, ৰেল়ুৰনং রমণীযঞ্চেৰ অপ্পসদ্দঞ্চ অপ্পনিগ্ঘোসঞ্চ ৰিজনৰাতং মনুস্সরাহস্সেয্যকং [মনুস্সরাহসেয্যকং (সী. স্যা. কং. পী.)] পটিসল্লানসারুপ্প’’ন্তি? ‘‘তগ্ঘ, ব্রাহ্মণ, ৰেল়ুৰনং রমণীযঞ্চেৰ অপ্পসদ্দঞ্চ অপ্পনিগ্ঘোসঞ্চ ৰিজনৰাতং মনুস্সরাহস্সেয্যকং পটিসল্লানসারুপ্পং, যথা তং তুম্হাদিসেহি রক্খকেহি গোপকেহী’’তি. ‘‘তগ্ঘ, ভো আনন্দ, ৰেল়ুৰনং রমণীযঞ্চেৰ অপ্পসদ্দঞ্চ অপ্পনিগ্ঘোসঞ্চ ৰিজনৰাতং মনুস্সরাহস্সেয্যকং পটিসল্লানসারুপ্পং, যথা তং ভৰন্তেহি ঝাযীহি ঝানসীলীহি. ঝাযিনো চেৰ ভৰন্তো ঝানসীলিনো চ’’.

‘‘একমিদাহং, ভো আনন্দ, সমযং সো ভৰং গোতমো ৰেসালিযং ৰিহরতি মহাৰনে কূটাগারসালাযং. অথ খ্ৰাহং, ভো আনন্দ, যেন মহাৰনং কূটাগারসালা যেন সো ভৰং গোতমো তেনুপসঙ্কমিং. তত্র চ পন সো [তত্র চ সো (সী. পী.)] ভৰং গোতমো অনেকপরিযাযেন ঝানকথং কথেসি. ঝাযী চেৰ সো ভৰং গোতমো অহোসি ঝানসীলী চ. সব্বঞ্চ পন সো ভৰং গোতমো ঝানং ৰণ্ণেসী’’তি.

৮৪. ‘‘ন চ খো, ব্রাহ্মণ, সো ভগৰা সব্বং ঝানং ৰণ্ণেসি, নপি সো ভগৰা সব্বং ঝানং ন ৰণ্ণেসীতি. কথং রূপঞ্চ, ব্রাহ্মণ, সো ভগৰা ঝানং ন ৰণ্ণেসি? ইধ, ব্রাহ্মণ, একচ্চো কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং নপ্পজানাতি; সো কামরাগংযেৰ অন্তরং করিত্ৰা ঝাযতি পজ্ঝাযতি নিজ্ঝাযতি অপজ্ঝাযতি. ব্যাপাদপরিযুট্ঠিতেন চেতসা ৰিহরতি ব্যাপাদপরেতেন, উপ্পন্নস্স চ ব্যাপাদস্স নিস্সরণং যথাভূতং নপ্পজানাতি; সো ব্যাপাদংযেৰ অন্তরং করিত্ৰা ঝাযতি পজ্ঝাযতি নিজ্ঝাযতি অপজ্ঝাযতি. থিনমিদ্ধপরিযুট্ঠিতেন চেতসা ৰিহরতি থিনমিদ্ধপরেতেন, উপ্পন্নস্স চ থিনমিদ্ধস্স নিস্সরণং যথাভূতং নপ্পজানাতি; সো থিনমিদ্ধংযেৰ অন্তরং করিত্ৰা ঝাযতি পজ্ঝাযতি নিজ্ঝাযতি অপজ্ঝাযতি. উদ্ধচ্চকুক্কুচ্চপরিযুট্ঠিতেন চেতসা ৰিহরতি উদ্ধচ্চকুক্কুচ্চপরেতেন, উপ্পন্নস্স চ উদ্ধচ্চকুক্কুচ্চস্স নিস্সরণং যথাভূতং নপ্পজানাতি; সো উদ্ধচ্চকুক্কুচ্চংযেৰ অন্তরং করিত্ৰা ঝাযতি পজ্ঝাযতি নিজ্ঝাযতি অপজ্ঝাযতি. ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং নপ্পজানাতি; সো ৰিচিকিচ্ছংযেৰ অন্তরং করিত্ৰা ঝাযতি পজ্ঝাযতি নিজ্ঝাযতি অপজ্ঝাযতি. এৰরূপং খো, ব্রাহ্মণ, সো ভগৰা ঝানং ন ৰণ্ণেসি.

‘‘কথং রূপঞ্চ, ব্রাহ্মণ, সো ভগৰা ঝানং ৰণ্ণেসি? ইধ, ব্রাহ্মণ, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং…পে… ততিযং ঝানং… চতুত্থং ঝানং উপসম্পজ্জ ৰিহরতি. এৰরূপং খো, ব্রাহ্মণ, সো ভগৰা ঝানং ৰণ্ণেসী’’তি.

‘‘গারয্হং কির, ভো আনন্দ, সো ভৰং গোতমো ঝানং গরহি, পাসংসং পসংসি. হন্দ, চ দানি মযং, ভো আনন্দ, গচ্ছাম; বহুকিচ্চা মযং বহুকরণীযা’’তি. ‘‘যস্সদানি ত্ৰং, ব্রাহ্মণ, কালং মঞ্ঞসী’’তি. অথ খো ৰস্সকারো ব্রাহ্মণো মগধমহামত্তো আযস্মতো আনন্দস্স ভাসিতং অভিনন্দিত্ৰা অনুমোদিত্ৰা উট্ঠাযাসনা পক্কামি.

অথ খো গোপকমোগ্গল্লানো ব্রাহ্মণো অচিরপক্কন্তে ৰস্সকারে ব্রাহ্মণে মগধমহামত্তে আযস্মন্তং আনন্দং এতদৰোচ – ‘‘যং নো মযং ভৰন্তং আনন্দং অপুচ্ছিম্হা তং নো ভৰং আনন্দো ন ব্যাকাসী’’তি. ‘‘ননু তে, ব্রাহ্মণ, অৰোচুম্হা – ‘নত্থি খো, ব্রাহ্মণ, একভিক্খুপি তেহি ধম্মেহি সব্বেনসব্বং সব্বথাসব্বং সমন্নাগতো যেহি ধম্মেহি সমন্নাগতো সো ভগৰা অহোসি অরহং সম্মাসম্বুদ্ধো. সো হি, ব্রাহ্মণ, ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ, মগ্গৰিদূ, মগ্গকোৰিদো. মগ্গানুগা চ পন এতরহি সাৰকা ৰিহরন্তি পচ্ছা সমন্নাগতা’’’তি.

গোপকমোগ্গল্লানসুত্তং নিট্ঠিতং অট্ঠমং.