৫. সুনক্খত্তসুত্তং

৫৫. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং. তেন খো পন সমযেন সম্বহুলেহি ভিক্খূহি ভগৰতো সন্তিকে অঞ্ঞা ব্যাকতা হোতি – ‘‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি. অস্সোসি খো সুনক্খত্তো লিচ্ছৰিপুত্তো – ‘‘সম্বহুলেহি কির ভিক্খূহি ভগৰতো সন্তিকে অঞ্ঞা ব্যাকতা হোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি. অথ খো সুনক্খত্তো লিচ্ছৰিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সুনক্খত্তো লিচ্ছৰিপুত্তো ভগৰন্তং এতদৰোচ – ‘‘সুতং মেতং, ভন্তে – ‘সম্বহুলেহি কির ভিক্খূহি ভগৰতো সন্তিকে অঞ্ঞা ব্যাকতা – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি. ‘‘যে তে, ভন্তে, ভিক্খূ ভগৰতো সন্তিকে অঞ্ঞং ব্যাকংসু – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি, কচ্চি তে, ভন্তে, ভিক্খূ সম্মদেৰ অঞ্ঞং ব্যাকংসু উদাহু সন্তেত্থেকচ্চে ভিক্খূ অধিমানেন অঞ্ঞং ব্যাকংসূতি?

৫৬. ‘‘যে তে, সুনক্খত্ত, ভিক্খূ মম সন্তিকে অঞ্ঞং ব্যাকংসু – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি. ‘‘সন্তেত্থেকচ্চে ভিক্খূ সম্মদেৰ অঞ্ঞং ব্যাকংসু, সন্তি পনিধেকচ্চে ভিক্খূ অধিমানেনপি [অধিমানেন (?)] অঞ্ঞং ব্যাকংসু. তত্র, সুনক্খত্ত, যে তে ভিক্খূ সম্মদেৰ অঞ্ঞং ব্যাকংসু তেসং তং তথেৰ হোতি; যে পন তে ভিক্খূ অধিমানেন অঞ্ঞং ব্যাকংসু তত্র, সুনক্খত্ত, তথাগতস্স এৰং হোতি – ‘ধম্মং নেসং দেসেস্স’ন্তি [দেসেয্যন্তি (পী. ক.)]. এৰঞ্চেত্থ, সুনক্খত্ত, তথাগতস্স হোতি – ‘ধম্মং নেসং দেসেস্স’ন্তি. অথ চ পনিধেকচ্চে মোঘপুরিসা পঞ্হং অভিসঙ্খরিত্ৰা অভিসঙ্খরিত্ৰা তথাগতং উপসঙ্কমিত্ৰা পুচ্ছন্তি. তত্র, সুনক্খত্ত, যম্পি তথাগতস্স এৰং হোতি – ‘ধম্মং নেসং দেসেস্স’ন্তি তস্সপি হোতি অঞ্ঞথত্ত’’ন্তি. ‘‘এতস্স ভগৰা কালো, এতস্স সুগত কালো, যং ভগৰা ধম্মং দেসেয্য. ভগৰতো সুত্ৰা ভিক্খূ ধারেস্সন্তী’’তি. ‘‘তেন হি, সুনক্খত্ত সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো সুনক্খত্তো লিচ্ছৰিপুত্তো ভগৰতো পচ্চস্সোসি. ভগৰা এতদৰোচ –

৫৭. ‘‘পঞ্চ খো ইমে, সুনক্খত্ত, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, সুনক্খত্ত, পঞ্চ কামগুণা.

৫৮. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চো পুরিসপুগ্গলো লোকামিসাধিমুত্তো অস্স. লোকামিসাধিমুত্তস্স খো, সুনক্খত্ত, পুরিসপুগ্গলস্স তপ্পতিরূপী চেৰ কথা সণ্ঠাতি, তদনুধম্মঞ্চ অনুৰিতক্কেতি, অনুৰিচারেতি, তঞ্চ পুরিসং ভজতি, তেন চ ৰিত্তিং আপজ্জতি; আনেঞ্জপটিসংযুত্তায চ পন কথায কচ্ছমানায ন সুস্সূসতি, ন সোতং ওদহতি, ন অঞ্ঞা চিত্তং উপট্ঠাপেতি [উপট্ঠপেতি (সী. স্যা. কং. পী.)], ন চ তং পুরিসং ভজতি, ন চ তেন ৰিত্তিং আপজ্জতি. সেয্যথাপি, সুনক্খত্ত, পুরিসো সকম্হা গামা ৰা নিগমা ৰা চিরৰিপ্পৰুত্থো অস্স. সো অঞ্ঞতরং পুরিসং পস্সেয্য তম্হা গামা ৰা নিগমা ৰা অচিরপক্কন্তং. সো তং পুরিসং তস্স গামস্স ৰা নিগমস্স ৰা খেমতঞ্চ সুভিক্খতঞ্চ অপ্পাবাধতঞ্চ পুচ্ছেয্য; তস্স সো পুরিসো তস্স গামস্স ৰা নিগমস্স ৰা খেমতঞ্চ সুভিক্খতঞ্চ অপ্পাবাধতঞ্চ সংসেয্য. তং কিং মঞ্ঞসি, সুনক্খত্ত, অপি নু সো পুরিসো তস্স পুরিসস্স সুস্সূসেয্য, সোতং ওদহেয্য, অঞ্ঞা চিত্তং উপট্ঠাপেয্য, তঞ্চ পুরিসং ভজেয্য, তেন চ ৰিত্তিং আপজ্জেয্যা’’তি? ‘‘এৰং, ভন্তে’’. ‘‘এৰমেৰ খো, সুনক্খত্ত, ঠানমেতং ৰিজ্জতি যং ইধেকচ্চো পুরিসপুগ্গলো লোকামিসাধিমুত্তো অস্স. লোকামিসাধিমুত্তস্স খো, সুনক্খত্ত, পুরিসপুগ্গলস্স তপ্পতিরূপী চেৰ কথা সণ্ঠাতি, তদনুধম্মঞ্চ অনুৰিতক্কেতি, অনুৰিচারেতি, তঞ্চ পুরিসং ভজতি, তেন চ ৰিত্তিং আপজ্জতি; আনেঞ্জপটিসংযুত্তায চ পন কথায কচ্ছমানায ন সুস্সূসতি, ন সোতং ওদহতি, ন অঞ্ঞা চিত্তং উপট্ঠাপেতি, ন চ তং পুরিসং ভজতি, ন চ তেন ৰিত্তিং আপজ্জতি. সো এৰমস্স ৰেদিতব্বো – ‘আনেঞ্জসংযোজনেন হি খো ৰিসংযুত্তো [আনেঞ্জসংযোজনেন হি খো ৰিসংযুত্তো-ইতি পাঠো সী. স্যা. কং. পী. পোত্থকেসু নত্থি, অট্ঠকথাসু পন তব্বণ্ণনা দিস্সতিযেৰ] লোকামিসাধিমুত্তো পুরিসপুগ্গলো’’’তি.

৫৯. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চো পুরিসপুগ্গলো আনেঞ্জাধিমুত্তো অস্স. আনেঞ্জাধিমুত্তস্স খো, সুনক্খত্ত, পুরিসপুগ্গলস্স তপ্পতিরূপী চেৰ কথা সণ্ঠাতি, তদনুধম্মঞ্চ অনুৰিতক্কেতি, অনুৰিচারেতি, তঞ্চ পুরিসং ভজতি, তেন চ ৰিত্তিং আপজ্জতি; লোকামিসপটিসংযুত্তায চ পন কথায কচ্ছমানায ন সুস্সূসতি, ন সোতং ওদহতি, ন অঞ্ঞা চিত্তং উপট্ঠাপেতি, ন চ তং পুরিসং ভজতি, ন চ তেন ৰিত্তিং আপজ্জতি. সেয্যথাপি, সুনক্খত্ত, পণ্ডুপলাসো বন্ধনা পৰুত্তো অভব্বো হরিতত্তায; এৰমেৰ খো, সুনক্খত্ত, আনেঞ্জাধিমুত্তস্স পুরিসপুগ্গলস্স যে লোকামিসসংযোজনে সে পৰুত্তে. সো এৰমস্স ৰেদিতব্বো – ‘লোকামিসসংযোজনেন হি খো ৰিসংযুত্তো আনেঞ্জাধিমুত্তো পুরিসপুগ্গলো’’’তি.

৬০. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চো পুরিসপুগ্গলো আকিঞ্চঞ্ঞাযতনাধিমুত্তো অস্স. আকিঞ্চঞ্ঞাযতনাধিমুত্তস্স খো, সুনক্খত্ত, পুরিসপুগ্গলস্স তপ্পতিরূপী চেৰ কথা সণ্ঠাতি, তদনুধম্মঞ্চ অনুৰিতক্কেতি, অনুৰিচারেতি, তঞ্চ পুরিসং ভজতি, তেন চ ৰিত্তিং আপজ্জতি; আনেঞ্জপটিসংযুত্তায চ পন কথায কচ্ছমানায ন সুস্সূসতি, ন সোতং ওদহতি, ন অঞ্ঞা চিত্তং উপট্ঠাপেতি, ন চ তং পুরিসং ভজতি, ন চ তেন ৰিত্তিং আপজ্জতি. সেয্যথাপি, সুনক্খত্ত, পুথুসিলা দ্ৰেধাভিন্না অপ্পটিসন্ধিকা হোতি; এৰমেৰ খো, সুনক্খত্ত, আকিঞ্চঞ্ঞাযতনাধিমুত্তস্স পুরিসপুগ্গলস্স যে আনেঞ্জসংযোজনে সে ভিন্নে. সো এৰমস্স ৰেদিতব্বো – ‘আনেঞ্জসংযোজনেন হি খো ৰিসংযুত্তো আকিঞ্চঞ্ঞাযতনাধিমুত্তো পুরিসপুগ্গলো’’’তি.

৬১. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চো পুরিসপুগ্গলো নেৰসঞ্ঞানাসঞ্ঞাযতনাধিমুত্তো অস্স. নেৰসঞ্ঞানাসঞ্ঞাযতনাধিমুত্তস্স খো, সুনক্খত্ত, পুরিসপুগ্গলস্স তপ্পতিরূপী চেৰ কথা সণ্ঠাতি, তদনুধম্মঞ্চ অনুৰিতক্কেতি, অনুৰিচারেতি, তঞ্চ পুরিসং ভজতি, তেন চ ৰিত্তিং আপজ্জতি; আকিঞ্চঞ্ঞাযতনপটিসংযুত্তায চ পন কথায কচ্ছমানায ন সুস্সূসতি, ন সোতং ওদহতি, ন অঞ্ঞা চিত্তং উপট্ঠাপেতি, ন চ তং পুরিসং ভজতি, ন চ তেন ৰিত্তিং আপজ্জতি. সেয্যথাপি, সুনক্খত্ত, পুরিসো মনুঞ্ঞভোজনং ভুত্তাৰী ছড্ডেয্য [ছদ্দেয্য (?)]. তং কিং মঞ্ঞসি, সুনক্খত্ত, অপি নু তস্স পুরিসস্স তস্মিং ভত্তে [ৰন্তে (ক. সী.), ভুত্তে (ক. সী. ক.)] পুন ভোত্তুকম্যতা অস্সা’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘অদুঞ্হি, ভন্তে, ভত্তং [ৰন্তং (সী.)] পটিকূলসম্মত’’ন্তি. ‘‘এৰমেৰ খো, সুনক্খত্ত, নেৰসঞ্ঞানাসঞ্ঞাযতনাধিমুত্তস্স পুরিসপুগ্গলস্স যে আকিঞ্চঞ্ঞাযতনসংযোজনে সে ৰন্তে. সো এৰমস্স ৰেদিতব্বো – ‘আকিঞ্চঞ্ঞাযতনসংযোজনেন হি খো ৰিসংযুত্তো নেৰসঞ্ঞানাসঞ্ঞাযতনাধিমুত্তো পুরিসপুগ্গলো’তি.

৬২. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চো পুরিসপুগ্গলো সম্মা নিব্বানাধিমুত্তো অস্স. সম্মা নিব্বানাধিমুত্তস্স খো, সুনক্খত্ত, পুরিসপুগ্গলস্স তপ্পতিরূপী চেৰ কথা সণ্ঠাতি, তদনুধম্মঞ্চ অনুৰিতক্কেতি, অনুৰিচারেতি, তঞ্চ পুরিসং ভজতি, তেন চ ৰিত্তিং আপজ্জতি; নেৰসঞ্ঞানাসঞ্ঞাযতনপটিসংযুত্তায চ পন কথায কচ্ছমানায ন সুস্সূসতি, ন সোতং ওদহতি, ন অঞ্ঞা চিত্তং উপট্ঠাপেতি, ন চ তং পুরিসং ভজতি, ন চ তেন ৰিত্তিং আপজ্জতি. সেয্যথাপি, সুনক্খত্ত, তালো মত্থকচ্ছিন্নো অভব্বো পুন ৰিরুল়্হিযা; এৰমেৰ খো, সুনক্খত্ত, সম্মা নিব্বানাধিমুত্তস্স পুরিসপুগ্গলস্স যে নেৰসঞ্ঞানাসঞ্ঞাযতনসংযোজনে সে উচ্ছিন্নমূলে তালাৰত্থুকতে অনভাৰংকতে [অনভাৰকতে (সী. পী.), অনভাৰঙ্গতে (স্যা. কং.)] আযতিং অনুপ্পাদধম্মে. সো এৰমস্স ৰেদিতব্বো – ‘নেৰসঞ্ঞানাসঞ্ঞাযতনসংযোজনেন হি খো ৰিসংযুত্তো সম্মা নিব্বানাধিমুত্তো পুরিসপুগ্গলো’’’তি.

৬৩. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চস্স ভিক্খুনো এৰমস্স – ‘তণ্হা খো সল্লং সমণেন ৰুত্তং, অৰিজ্জাৰিসদোসো, ছন্দরাগব্যাপাদেন রুপ্পতি. তং মে তণ্হাসল্লং পহীনং, অপনীতো অৰিজ্জাৰিসদোসো, সম্মা নিব্বানাধিমুত্তোহমস্মী’তি. এৰংমানি [এৰংমানী (সী. পী. ক.), এৰমাদি (স্যা. কং.)] অস্স অতথং সমানং [অত্থং সমানং (স্যা. কং. পী.), অত্থসমানং (সী.)]. সো যানি সম্মা নিব্বানাধিমুত্তস্স অসপ্পাযানি তানি অনুযুঞ্জেয্য; অসপ্পাযং চক্খুনা রূপদস্সনং অনুযুঞ্জেয্য, অসপ্পাযং সোতেন সদ্দং অনুযুঞ্জেয্য, অসপ্পাযং ঘানেন গন্ধং অনুযুঞ্জেয্য, অসপ্পাযং জিৰ্হায রসং অনুযুঞ্জেয্য, অসপ্পাযং কাযেন ফোট্ঠব্বং অনুযুঞ্জেয্য, অসপ্পাযং মনসা ধম্মং অনুযুঞ্জেয্য. তস্স অসপ্পাযং চক্খুনা রূপদস্সনং অনুযুত্তস্স, অসপ্পাযং সোতেন সদ্দং অনুযুত্তস্স, অসপ্পাযং ঘানেন গন্ধং অনুযুত্তস্স, অসপ্পাযং জিৰ্হায রসং অনুযুত্তস্স, অসপ্পাযং কাযেন ফোট্ঠব্বং অনুযুত্তস্স, অসপ্পাযং মনসা ধম্মং অনুযুত্তস্স রাগো চিত্তং অনুদ্ধংসেয্য. সো রাগানুদ্ধংসিতেন চিত্তেন মরণং ৰা নিগচ্ছেয্য মরণমত্তং ৰা দুক্খং.

‘‘সেয্যথাপি, সুনক্খত্ত, পুরিসো সল্লেন ৰিদ্ধো অস্স সৰিসেন গাল়্হূপলেপনেন. তস্স মিত্তামচ্চা ঞাতিসালোহিতা ভিসক্কং সল্লকত্তং উপট্ঠাপেয্যুং. তস্স সো ভিসক্কো সল্লকত্তো সত্থেন ৰণমুখং পরিকন্তেয্য. সত্থেন ৰণমুখং পরিকন্তিত্ৰা এসনিযা সল্লং এসেয্য. এসনিযা সল্লং এসিত্ৰা সল্লং অব্বুহেয্য, অপনেয্য ৰিসদোসং সউপাদিসেসং. সউপাদিসেসোতি [অনুপাদিসেসোতি (সব্বত্থ) অযং হি তথাগতস্স ৰিসযো] জানমানো সো এৰং ৰদেয্য – ‘অম্ভো পুরিস, উব্ভতং খো তে সল্লং, অপনীতো ৰিসদোসো সউপাদিসেসো [অনুপাদিসেসো (সব্বত্থ) অযম্পি তথাগতস্স ৰিসযো]. অনলঞ্চ তে অন্তরাযায. সপ্পাযানি চেৰ ভোজনানি ভুঞ্জেয্যাসি, মা তে অসপ্পাযানি ভোজনানি ভুঞ্জতো ৰণো অস্সাৰী অস্স. কালেন কালঞ্চ ৰণং ধোৰেয্যাসি, কালেন কালং ৰণমুখং আলিম্পেয্যাসি, মা তে ন কালেন কালং ৰণং ধোৰতো ন কালেন কালং ৰণমুখং আলিম্পতো পুব্বলোহিতং ৰণমুখং পরিযোনন্ধি. মা চ ৰাতাতপে চারিত্তং অনুযুঞ্জি, মা তে ৰাতাতপে চারিত্তং অনুযুত্তস্স রজোসূকং ৰণমুখং অনুদ্ধংসেসি. ৰণানুরক্খী চ, অম্ভো পুরিস, ৰিহরেয্যাসি ৰণসারোপী’তি [ৰণস্সারোপীতি (ক.) ৰণ + সং + রোপী = ৰণসারোপী-ইতি পদৰিভাগো]. তস্স এৰমস্স – ‘উব্ভতং খো মে সল্লং, অপনীতো ৰিসদোসো অনুপাদিসেসো. অনলঞ্চ মে অন্তরাযাযা’তি. সো অসপ্পাযানি চেৰ ভোজনানি ভুঞ্জেয্য. তস্স অসপ্পাযানি ভোজনানি ভুঞ্জতো ৰণো অস্সাৰী অস্স. ন চ কালেন কালং ৰণং ধোৰেয্য, ন চ কালেন কালং ৰণমুখং আলিম্পেয্য. তস্স ন কালেন কালং ৰণং ধোৰতো, ন কালেন কালং ৰণমুখং আলিম্পতো পুব্বলোহিতং ৰণমুখং পরিযোনন্ধেয্য. ৰাতাতপে চ চারিত্তং অনুযুঞ্জেয্য. তস্স ৰাতাতপে চারিত্তং অনুযুত্তস্স রজোসূকং ৰণমুখং অনুদ্ধংসেয্য. ন চ ৰণানুরক্খী ৰিহরেয্য ন ৰণসারোপী. তস্স ইমিস্সা চ অসপ্পাযকিরিযায, অসুচি ৰিসদোসো অপনীতো সউপাদিসেসো তদুভযেন ৰণো পুথুত্তং গচ্ছেয্য. সো পুথুত্তং গতেন ৰণেন মরণং ৰা নিগচ্ছেয্য মরণমত্তং ৰা দুক্খং.

‘‘এৰমেৰ খো, সুনক্খত্ত, ঠানমেতং ৰিজ্জতি যং ইধেকচ্চস্স ভিক্খুনো এৰমস্স – ‘তণ্হা খো সল্লং সমণেন ৰুত্তং, অৰিজ্জাৰিসদোসো ছন্দরাগব্যাপাদেন রুপ্পতি. তং মে তণ্হাসল্লং পহীনং, অপনীতো অৰিজ্জাৰিসদোসো, সম্মা নিব্বানাধিমুত্তোহমস্মী’তি. এৰংমানি অস্স অতথং সমানং. সো যানি সম্মা নিব্বানাধিমুত্তস্স অসপ্পাযানি তানি অনুযুঞ্জেয্য, অসপ্পাযং চক্খুনা রূপদস্সনং অনুযুঞ্জেয্য, অসপ্পাযং সোতেন সদ্দং অনুযুঞ্জেয্য, অসপ্পাযং ঘানেন গন্ধং অনুযুঞ্জেয্য, অসপ্পাযং জিৰ্হায রসং অনুযুঞ্জেয্য, অসপ্পাযং কাযেন ফোট্ঠব্বং অনুযুঞ্জেয্য, অসপ্পাযং মনসা ধম্মং অনুযুঞ্জেয্য. তস্স অসপ্পাযং চক্খুনা রূপদস্সনং অনুযুত্তস্স, অসপ্পাযং সোতেন সদ্দং অনুযুত্তস্স, অসপ্পাযং ঘানেন গন্ধং অনুযুত্তস্স, অসপ্পাযং জিৰ্হায রসং অনুযুত্তস্স, অসপ্পাযং কাযেন ফোট্ঠব্বং অনুযুত্তস্স, অসপ্পাযং মনসা ধম্মং অনুযুত্তস্স রাগো চিত্তং অনুদ্ধংসেয্য. সো রাগানুদ্ধংসিতেন চিত্তেন মরণং ৰা নিগচ্ছেয্য মরণমত্তং ৰা দুক্খং. মরণঞ্হেতং, সুনক্খত্ত, অরিযস্স ৰিনযে যো সিক্খং পচ্চক্খায হীনাযাৰত্ততি; মরণমত্তঞ্হেতং, সুনক্খত্ত, দুক্খং যং অঞ্ঞতরং সংকিলিট্ঠং আপত্তিং আপজ্জতি.

৬৪. ‘‘ঠানং খো পনেতং, সুনক্খত্ত, ৰিজ্জতি যং ইধেকচ্চস্স ভিক্খুনো এৰমস্স – ‘তণ্হা খো সল্লং সমণেন ৰুত্তং, অৰিজ্জাৰিসদোসো ছন্দরাগব্যাপাদেন রুপ্পতি. তং মে তণ্হাসল্লং পহীনং, অপনীতো অৰিজ্জাৰিসদোসো, সম্মা নিব্বানাধিমুত্তোহমস্মী’তি. সম্মা নিব্বানাধিমুত্তস্সেৰ সতো সো যানি সম্মা নিব্বানাধিমুত্তস্স অসপ্পাযানি তানি নানুযুঞ্জেয্য, অসপ্পাযং চক্খুনা রূপদস্সনং নানুযুঞ্জেয্য, অসপ্পাযং সোতেন সদ্দং নানুযুঞ্জেয্য, অসপ্পাযং ঘানেন গন্ধং নানুযুঞ্জেয্য, অসপ্পাযং জিৰ্হায রসং নানুযুঞ্জেয্য, অসপ্পাযং কাযেন ফোট্ঠব্বং নানুযুঞ্জেয্য, অসপ্পাযং মনসা ধম্মং নানুযুঞ্জেয্য. তস্স অসপ্পাযং চক্খুনা রূপদস্সনং নানুযুত্তস্স, অসপ্পাযং সোতেন সদ্দং নানুযুত্তস্স, অসপ্পাযং ঘানেন গন্ধং নানুযুত্তস্স, অসপ্পাযং জিৰ্হায রসং নানুযুত্তস্স, অসপ্পাযং কাযেন ফোট্ঠব্বং নানুযুত্তস্স, অসপ্পাযং মনসা ধম্মং নানুযুত্তস্স রাগো চিত্তং নানুদ্ধংসেয্য. সো ন রাগানুদ্ধংসিতেন চিত্তেন নেৰ মরণং ৰা নিগচ্ছেয্য ন মরণমত্তং ৰা দুক্খং.

‘‘সেয্যথাপি, সুনক্খত্ত, পুরিসো সল্লেন ৰিদ্ধো অস্স সৰিসেন গাল়্হূপলেপনেন. তস্স মিত্তামচ্চা ঞাতিসালোহিতা ভিসক্কং সল্লকত্তং উপট্ঠাপেয্যুং. তস্স সো ভিসক্কো সল্লকত্তো সত্থেন ৰণমুখং পরিকন্তেয্য. সত্থেন ৰণমুখং পরিকন্তিত্ৰা এসনিযা সল্লং এসেয্য. এসনিযা সল্লং এসিত্ৰা সল্লং অব্বুহেয্য, অপনেয্য ৰিসদোসং অনুপাদিসেসং. অনুপাদিসেসোতি জানমানো সো এৰং ৰদেয্য – ‘অম্ভো পুরিস, উব্ভতং খো তে সল্লং, অপনীতো ৰিসদোসো অনুপাদিসেসো. অনলঞ্চ তে অন্তরাযায. সপ্পাযানি চেৰ ভোজনানি ভুঞ্জেয্যাসি, মা তে অসপ্পাযানি ভোজনানি ভুঞ্জতো ৰণো অস্সাৰী অস্স. কালেন কালঞ্চ ৰণং ধোৰেয্যাসি, কালেন কালং ৰণমুখং আলিম্পেয্যাসি. মা তে ন কালেন কালং ৰণং ধোৰতো ন কালেন কালং ৰণমুখং আলিম্পতো পুব্বলোহিতং ৰণমুখং পরিযোনন্ধি. মা চ ৰাতাতপে চারিত্তং অনুযুঞ্জি, মা তে ৰাতাতপে চারিত্তং অনুযুত্তস্স রজোসূকং ৰণমুখং অনুদ্ধংসেসি. ৰণানুরক্খী চ, অম্ভো পুরিস, ৰিহরেয্যাসি ৰণসারোপী’তি. তস্স এৰমস্স – ‘উব্ভতং খো মে সল্লং, অপনীতো ৰিসদোসো অনুপাদিসেসো. অনলঞ্চ মে অন্তরাযাযা’তি. সো সপ্পাযানি চেৰ ভোজনানি ভুঞ্জেয্য. তস্স সপ্পাযানি ভোজনানি ভুঞ্জতো ৰণো ন অস্সাৰী অস্স. কালেন কালঞ্চ ৰণং ধোৰেয্য, কালেন কালং ৰণমুখং আলিম্পেয্য. তস্স কালেন কালং ৰণং ধোৰতো কালেন কালং ৰণমুখং আলিম্পতো ন পুব্বলোহিতং ৰণমুখং পরিযোনন্ধেয্য. ন চ ৰাতাতপে চারিত্তং অনুযুঞ্জেয্য. তস্স ৰাতাতপে চারিত্তং অননুযুত্তস্স রজোসূকং ৰণমুখং নানুদ্ধংসেয্য. ৰণানুরক্খী চ ৰিহরেয্য ৰণসারোপী. তস্স ইমিস্সা চ সপ্পাযকিরিযায অসু চ [অসুচি (সব্বত্থ) সোচাতি তব্বণ্ণনা মনসিকাতব্বা] ৰিসদোসো অপনীতো অনুপাদিসেসো তদুভযেন ৰণো ৰিরুহেয্য. সো রুল়্হেন ৰণেন সঞ্ছৰিনা নেৰ মরণং ৰা নিগচ্ছেয্য ন মরণমত্তং ৰা দুক্খং.

‘‘এৰমেৰ খো, সুনক্খত্ত, ঠানমেতং ৰিজ্জতি যং ইধেকচ্চস্স ভিক্খুনো এৰমস্স – ‘তণ্হা খো সল্লং সমণেন ৰুত্তং, অৰিজ্জাৰিসদোসো ছন্দরাগব্যাপাদেন রুপ্পতি. তং মে তণ্হাসল্লং পহীনং, অপনীতো অৰিজ্জাৰিসদোসো, সম্মা নিব্বানাধিমুত্তোহমস্মী’তি. সম্মা নিব্বানাধিমুত্তস্সেৰ সতো সো যানি সম্মা নিব্বানাধিমুত্তস্স অসপ্পাযানি তানি নানুযুঞ্জেয্য, অসপ্পাযং চক্খুনা রূপদস্সনং নানুযুঞ্জেয্য, অসপ্পাযং সোতেন সদ্দং নানুযুঞ্জেয্য, অসপ্পাযং ঘানেন গন্ধং নানুযুঞ্জেয্য, অসপ্পাযং জিৰ্হায রসং নানুযুঞ্জেয্য, অসপ্পাযং কাযেন ফোট্ঠব্বং নানুযুঞ্জেয্য, অসপ্পাযং মনসা ধম্মং নানুযুঞ্জেয্য. তস্স অসপ্পাযং চক্খুনা রূপদস্সনং নানুযুত্তস্স, অসপ্পাযং সোতেন সদ্দং নানুযুত্তস্স, অসপ্পাযং ঘানেন গন্ধং নানুযুত্তস্স, অসপ্পাযং জিৰ্হায রসং নানুযুত্তস্স, অসপ্পাযং কাযেন ফোট্ঠব্বং নানুযুত্তস্স, অসপ্পাযং মনসা ধম্মং নানুযুত্তস্স, রাগো চিত্তং নানুদ্ধংসেয্য. সো ন রাগানুদ্ধংসিতেন চিত্তেন নেৰ মরণং ৰা নিগচ্ছেয্য ন মরণমত্তং ৰা দুক্খং.

৬৫. ‘‘উপমা খো মে অযং, সুনক্খত্ত, কতা অত্থস্স ৰিঞ্ঞাপনায. অযংযেৰেত্থ অত্থো – ৰণোতি খো, সুনক্খত্ত, ছন্নেতং অজ্ঝত্তিকানং আযতনানং অধিৰচনং; ৰিসদোসোতি খো, সুনক্খত্ত, অৰিজ্জাযেতং অধিৰচনং; সল্লন্তি খো, সুনক্খত্ত, তণ্হাযেতং অধিৰচনং; এসনীতি খো, সুনক্খত্ত, সতিযাযেতং অধিৰচনং; সত্থন্তি খো, সুনক্খত্ত, অরিযাযেতং পঞ্ঞায অধিৰচনং; ভিসক্কো সল্লকত্তোতি খো, সুনক্খত্ত, তথাগতস্সেতং অধিৰচনং অরহতো সম্মাসম্বুদ্ধস্স.

‘‘সো ৰত, সুনক্খত্ত, ভিক্খু ছসু ফস্সাযতনেসু সংৰুতকারী ‘উপধি দুক্খস্স মূল’ন্তি – ইতি ৰিদিত্ৰা নিরুপধি উপধিসঙ্খযে ৰিমুত্তো উপধিস্মিং ৰা কাযং উপসংহরিস্সতি চিত্তং ৰা উপ্পাদেস্সতীতি – নেতং ঠানং ৰিজ্জতি. সেয্যথাপি, সুনক্খত্ত, আপানীযকংসো ৰণ্ণসম্পন্নো গন্ধসম্পন্নো রসসম্পন্নো; সো চ খো ৰিসেন সংসট্ঠো. অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপটিকূলো. তং কিং মঞ্ঞসি, সুনক্খত্ত, অপি নু সো পুরিসো অমুং আপানীযকংসং পিৰেয্য যং জঞ্ঞা – ‘ইমাহং পিৰিত্ৰা মরণং ৰা নিগচ্ছামি মরণমত্তং ৰা দুক্খ’’’ন্তি? ‘‘নো হেতং, ভন্তে’’. ‘‘এৰমেৰ খো, সুনক্খত্ত, সো ৰত ভিক্খু ছসু ফস্সাযতনেসু সংৰুতকারী ‘উপধি দুক্খস্স মূল’ন্তি – ইতি ৰিদিত্ৰা নিরুপধি উপধিসঙ্খযে ৰিমুত্তো উপধিস্মিং ৰা কাযং উপসংহরিস্সতি চিত্তং ৰা উপ্পাদেস্সতীতি – নেতং ঠানং ৰিজ্জতি. সেয্যথাপি, সুনক্খত্ত, আসীৰিসো [আসিৰিসো (ক.)] ঘোরৰিসো. অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপটিকূলো. তং কিং মঞ্ঞসি, সুনক্খত্ত, অপি নু সো পুরিসো অমুস্স আসীৰিসস্স ঘোরৰিসস্স হত্থং ৰা অঙ্গুট্ঠং ৰা দজ্জা [যুঞ্জেয্য (ক.)] যং জঞ্ঞা – ‘ইমিনাহং দট্ঠো মরণং ৰা নিগচ্ছামি মরণমত্তং ৰা দুক্খ’’’ন্তি? ‘‘নো হেতং, ভন্তে’’. ‘‘এৰমেৰ খো, সুনক্খত্ত, সো ৰত ভিক্খু ছসু ফস্সাযতনেসু সংৰুতকারী ‘উপধি দুক্খস্স মূল’ন্তি – ইতি ৰিদিত্ৰা নিরুপধি উপধিসঙ্খযে ৰিমুত্তো উপধিস্মিং ৰা কাযং উপসংহরিস্সতি চিত্তং ৰা উপ্পাদেস্সতীতি – নেতং ঠানং ৰিজ্জতী’’তি.

ইদমৰোচ ভগৰা. অত্তমনো সুনক্খত্তো লিচ্ছৰিপুত্তো ভগৰতো ভাসিতং অভিনন্দীতি.

সুনক্খত্তসুত্তং নিট্ঠিতং পঞ্চমং.