১০. চূল়পুণ্ণমসুত্তং

৯১. এৰং মে সুতং – একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে. তেন খো পন সমযেন ভগৰা তদহুপোসথে পন্নরসে পুণ্ণায পুণ্ণমায রত্তিযা ভিক্খুসঙ্ঘপরিৰুতো অব্ভোকাসে নিসিন্নো হোতি. অথ খো ভগৰা তুণ্হীভূতং তুণ্হীভূতং ভিক্খুসঙ্ঘং অনুৰিলোকেত্ৰা ভিক্খূ আমন্তেসি – ‘‘জানেয্য নু খো, ভিক্খৰে, অসপ্পুরিসো অসপ্পুরিসং – ‘অসপ্পুরিসো অযং ভৰ’’’ন্তি? ‘‘নো হেতং, ভন্তে’’. ‘‘সাধু, ভিক্খৰে; অট্ঠানমেতং, ভিক্খৰে, অনৰকাসো যং অসপ্পুরিসো অসপ্পুরিসং জানেয্য – ‘অসপ্পুরিসো অযং ভৰ’ন্তি. জানেয্য পন, ভিক্খৰে, অসপ্পুরিসো সপ্পুরিসং – ‘সপ্পুরিসো অযং ভৰ’’’ন্তি? ‘‘নো হেতং, ভন্তে’’. ‘‘সাধু, ভিক্খৰে; এতম্পি খো, ভিক্খৰে, অট্ঠানং অনৰকাসো যং অসপ্পুরিসো সপ্পুরিসং জানেয্য – ‘সপ্পুরিসো অযং ভৰ’ন্তি. অসপ্পুরিসো, ভিক্খৰে, অস্সদ্ধম্মসমন্নাগতো হোতি, অসপ্পুরিসভত্তি [অসপ্পুরিসভত্তী (সব্বত্থ)] হোতি, অসপ্পুরিসচিন্তী হোতি, অসপ্পুরিসমন্তী হোতি, অসপ্পুরিসৰাচো হোতি, অসপ্পুরিসকম্মন্তো হোতি, অসপ্পুরিসদিট্ঠি [অসপ্পুরিসদিট্ঠী (সব্বত্থ)] হোতি; অসপ্পুরিসদানং দেতি’’.

‘‘কথঞ্চ, ভিক্খৰে, অসপ্পুরিসো অস্সদ্ধম্মসমন্নাগতো হোতি? ইধ, ভিক্খৰে, অসপ্পুরিসো অস্সদ্ধো হোতি, অহিরিকো হোতি, অনোত্তপ্পী হোতি, অপ্পস্সুতো হোতি, কুসীতো হোতি, মুট্ঠস্সতি হোতি, দুপ্পঞ্ঞো হোতি. এৰং খো, ভিক্খৰে, অসপ্পুরিসো অস্সদ্ধম্মসমন্নাগতো হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসভত্তি হোতি? ইধ, ভিক্খৰে, অসপ্পুরিসস্স যে তে সমণব্রাহ্মণা অস্সদ্ধা অহিরিকা অনোত্তপ্পিনো অপ্পস্সুতা কুসীতা মুট্ঠস্সতিনো দুপ্পঞ্ঞা ত্যাস্স মিত্তা হোন্তি তে সহাযা. এৰং খো, ভিক্খৰে, অসপ্পুরিসো অসপ্পুরিসভত্তি হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসচিন্তী হোতি? ইধ, ভিক্খৰে, অসপ্পুরিসো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি. এৰং খো, ভিক্খৰে, অসপ্পুরিসো অসপ্পুরিসচিন্তী হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসমন্তী হোতি? ইধ, ভিক্খৰে, অসপ্পুরিসো অত্তব্যাবাধাযপি মন্তেতি, পরব্যাবাধাযপি মন্তেতি, উভযব্যাবাধাযপি মন্তেতি. এৰং খো, ভিক্খৰে, অসপ্পুরিসো অসপ্পুরিসমন্তী হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসৰাচো হোতি? ইধ, ভিক্খৰে, অসপ্পুরিসো মুসাৰাদী হোতি, পিসুণৰাচো হোতি, ফরুসৰাচো হোতি, সম্ফপ্পলাপী হোতি. এৰং খো, ভিক্খৰে, অসপ্পুরিসো অসপ্পুরিসৰাচো হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসকম্মন্তো হোতি? ইধ, ভিক্খৰে, অসপ্পুরিসো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি. এৰং খো, ভিক্খৰে, অসপ্পুরিসো অসপ্পুরিসকম্মন্তো হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসদিট্ঠি হোতি? ইধ, ভিক্খৰে, অসপ্পুরিসো এৰংদিট্ঠি [এৰংদিট্ঠী (সী. পী.), এৰংদিট্ঠিকো (স্যা. কং.)] হোতি – ‘নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং [সুক্কটদুক্কটানং (সী. পী.)] কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা [সমগ্গতা (ক.)] সম্মাপটিপন্না, যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি. এৰং খো, ভিক্খৰে, অসপ্পুরিসো অসপ্পুরিসদিট্ঠি হোতি.

‘‘কথঞ্চ, ভিক্খৰে, অসপ্পুরিসো অসপ্পুরিসদানং দেতি? ইধ, ভিক্খৰে, অসপ্পুরিসো অসক্কচ্চং দানং দেতি, অসহত্থা দানং দেতি, অচিত্তীকত্ৰা দানং দেতি, অপৰিট্ঠং দানং দেতি অনাগমনদিট্ঠিকো দানং দেতি. এৰং খো, ভিক্খৰে, অসপ্পুরিসো অসপ্পুরিসদানং দেতি.

‘‘সো, ভিক্খৰে, অসপ্পুরিসো এৰং অস্সদ্ধম্মসমন্নাগতো, এৰং অসপ্পুরিসভত্তি, এৰং অসপ্পুরিসচিন্তী, এৰং অসপ্পুরিসমন্তী, এৰং অসপ্পুরিসৰাচো, এৰং অসপ্পুরিসকম্মন্তো, এৰং অসপ্পুরিসদিট্ঠি; এৰং অসপ্পুরিসদানং দত্ৰা কাযস্স ভেদা পরং মরণা যা অসপ্পুরিসানং গতি তত্থ উপপজ্জতি. কা চ, ভিক্খৰে, অসপ্পুরিসানং গতি? নিরযো ৰা তিরচ্ছানযোনি ৰা.

৯২. ‘‘জানেয্য নু খো, ভিক্খৰে, সপ্পুরিসো সপ্পুরিসং – ‘সপ্পুরিসো অযং ভৰ’’’ন্তি? ‘‘এৰং, ভন্তে’’. ‘‘সাধু, ভিক্খৰে; ঠানমেতং, ভিক্খৰে, ৰিজ্জতি যং সপ্পুরিসো সপ্পুরিসং জানেয্য – ‘সপ্পুরিসো অযং ভৰ’ন্তি. জানেয্য পন, ভিক্খৰে, সপ্পুরিসো অসপ্পুরিসং – ‘অসপ্পুরিসো অযং ভৰ’’’ন্তি? ‘‘এৰং, ভন্তে’’. ‘‘সাধু, ভিক্খৰে; এতম্পি খো, ভিক্খৰে, ঠানং ৰিজ্জতি যং সপ্পুরিসো অসপ্পুরিসং জানেয্য – ‘অসপ্পুরিসো অযং ভৰ’ন্তি. সপ্পুরিসো, ভিক্খৰে, সদ্ধম্মসমন্নাগতো হোতি, সপ্পুরিসভত্তি হোতি, সপ্পুরিসচিন্তী হোতি, সপ্পুরিসমন্তী হোতি, সপ্পুরিসৰাচো হোতি, সপ্পুরিসকম্মন্তো হোতি, সপ্পুরিসদিট্ঠি হোতি; সপ্পুরিসদানং দেতি’’.

‘‘কথঞ্চ, ভিক্খৰে, সপ্পুরিসো সদ্ধম্মসমন্নাগতো হোতি? ইধ, ভিক্খৰে, সপ্পুরিসো সদ্ধো হোতি, হিরিমা হোতি, ওত্তপ্পী হোতি, বহুস্সুতো হোতি, আরদ্ধৰীরিযো হোতি, উপট্ঠিতস্সতি হোতি, পঞ্ঞৰা হোতি. এৰং খো, ভিক্খৰে, সপ্পুরিসো সদ্ধম্মসমন্নাগতো হোতি.

‘‘কথঞ্চ, ভিক্খৰে, সপ্পুরিসো সপ্পুরিসভত্তি হোতি? ইধ, ভিক্খৰে, সপ্পুরিসস্স যে তে সমণব্রাহ্মণা সদ্ধা হিরিমন্তো ওত্তপ্পিনো বহুস্সুতা আরদ্ধৰীরিযা উপট্ঠিতস্সতিনো পঞ্ঞৰন্তো ত্যাস্স মিত্তা হোন্তি, তে সহাযা. এৰং খো, ভিক্খৰে, সপ্পুরিসো সপ্পুরিসভত্তি হোতি.

‘‘কথঞ্চ, ভিক্খৰে, সপ্পুরিসো সপ্পুরিসচিন্তী হোতি? ইধ, ভিক্খৰে, সপ্পুরিসো নেৰত্তব্যাবাধায চেতেতি, ন পরব্যাবাধায চেতেতি, ন উভযব্যাবাধায চেতেতি. এৰং খো, ভিক্খৰে, সপ্পুরিসো সপ্পুরিসচিন্তী হোতি.

‘‘কথঞ্চ, ভিক্খৰে, সপ্পুরিসো সপ্পুরিসমন্তী হোতি? ইধ, ভিক্খৰে, সপ্পুরিসো নেৰত্তব্যাবাধায মন্তেতি, ন পরব্যাবাধায মন্তেতি, ন উভযব্যাবাধায মন্তেতি. এৰং খো, ভিক্খৰে, সপ্পুরিসো সপ্পুরিসমন্তী হোতি.

‘‘কথঞ্চ, ভিক্খৰে, সপ্পুরিসো সপ্পুরিসৰাচো হোতি? ইধ, ভিক্খৰে, সপ্পুরিসো মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি. এৰং খো, ভিক্খৰে, সপ্পুরিসো সপ্পুরিসৰাচো হোতি.

‘‘কথঞ্চ, ভিক্খৰে, সপ্পুরিসো সপ্পুরিসকম্মন্তো হোতি? ইধ, ভিক্খৰে, সপ্পুরিসো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি. এৰং খো, ভিক্খৰে, সপ্পুরিসো সপ্পুরিসকম্মন্তো হোতি.

‘‘কথঞ্চ, ভিক্খৰে, সপ্পুরিসো সপ্পুরিসদিট্ঠি হোতি? ইধ, ভিক্খৰে, সপ্পুরিসো এৰংদিট্ঠি হোতি – ‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি. এৰং খো, ভিক্খৰে, সপ্পুরিসো সপ্পুরিসদিট্ঠি হোতি.

‘‘কথঞ্চ, ভিক্খৰে, সপ্পুরিসো সপ্পুরিসদানং দেতি? ইধ, ভিক্খৰে, সপ্পুরিসো সক্কচ্চং দানং দেতি, সহত্থা দানং দেতি, চিত্তীকত্ৰা দানং দেতি, অনপৰিট্ঠং দানং দেতি, আগমনদিট্ঠিকো দানং দেতি. এৰং খো, ভিক্খৰে, সপ্পুরিসো সপ্পুরিসদানং দেতি.

‘‘সো, ভিক্খৰে, সপ্পুরিসো এৰং সদ্ধম্মসমন্নাগতো, এৰং সপ্পুরিসভত্তি, এৰং সপ্পুরিসচিন্তী, এৰং সপ্পুরিসমন্তী, এৰং সপ্পুরিসৰাচো, এৰং সপ্পুরিসকম্মন্তো, এৰং সপ্পুরিসদিট্ঠি; এৰং সপ্পুরিসদানং দত্ৰা কাযস্স ভেদা পরং মরণা যা সপ্পুরিসানং গতি তত্থ উপপজ্জতি. কা চ, ভিক্খৰে, সপ্পুরিসানং গতি? দেৰমহত্ততা ৰা মনুস্সমহত্ততা ৰা’’তি.

ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

চূল়পুণ্ণমসুত্তং নিট্ঠিতং দসমং.

দেৰদহৰগ্গো নিট্ঠিতো পঠমো.