৮. ৰাসেট্ঠসুত্তং

৪৫৪. এৰং মে সুতং – একং সমযং ভগৰা ইচ্ছানঙ্গলে [ইচ্ছানঙ্কলে (সী. পী.)] ৰিহরতি ইচ্ছানঙ্গলৰনসণ্ডে. তেন খো পন সমযেন সম্বহুলা অভিঞ্ঞাতা অভিঞ্ঞাতা ব্রাহ্মণমহাসালা ইচ্ছানঙ্গলে পটিৰসন্তি, সেয্যথিদং – চঙ্কী ব্রাহ্মণো, তারুক্খো ব্রাহ্মণো, পোক্খরসাতি ব্রাহ্মণো, জাণুস্সোণি [জাণুস্সোণী (পী.), জাণুসোণী (ক.)] ব্রাহ্মণো, তোদেয্যো ব্রাহ্মণো, অঞ্ঞে চ অভিঞ্ঞাতা অভিঞ্ঞাতা ব্রাহ্মণমহাসালা. অথ খো ৰাসেট্ঠভারদ্ৰাজানং মাণৰানং জঙ্ঘাৰিহারং অনুচঙ্কমন্তানং অনুৰিচরন্তানং [অনুচঙ্কমমানানং অনুৰিচরমানানং (সী. পী.)] অযমন্তরাকথা উদপাদি – ‘‘কথং, ভো, ব্রাহ্মণো হোতী’’তি? ভারদ্ৰাজো মাণৰো এৰমাহ – ‘‘যতো খো, ভো, উভতো সুজাতো মাতিতো চ পিতিতো চ সংসুদ্ধগহণিকো যাৰ সত্তমা পিতামহযুগা অক্খিত্তো অনুপক্কুট্ঠো জাতিৰাদেন – এত্তাৰতা খো, ভো, ব্রাহ্মণো হোতী’’তি. ৰাসেট্ঠো মাণৰো এৰমাহ – ‘‘যতো খো, ভো, সীলৰা চ হোতি ৰত্তসম্পন্নো [ৰতসম্পন্নো (পী.)] চ – এত্তাৰতা খো, ভো, ব্রাহ্মণো হোতী’’তি. নেৰ খো অসক্খি ভারদ্ৰাজো মাণৰো ৰাসেট্ঠং মাণৰং সঞ্ঞাপেতুং, ন পন অসক্খি ৰাসেট্ঠো মাণৰো ভারদ্ৰাজং মাণৰং সঞ্ঞাপেতুং. অথ খো ৰাসেট্ঠো মাণৰো ভারদ্ৰাজং মাণৰং আমন্তেসি – ‘‘অযং খো, ভো ভারদ্ৰাজ, সমণো গোতমো সক্যপুত্তো সক্যকুলা পব্বজিতো ইচ্ছানঙ্গলে ৰিহরতি ইচ্ছানঙ্গলৰনসণ্ডে. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি. আযাম, ভো ভারদ্ৰাজ, যেন সমণো গোতমো তেনুপসঙ্কমিস্সাম; উপসঙ্কমিত্ৰা সমণং গোতমং এতমত্থং পুচ্ছিস্সাম. যথা নো সমণো গোতমো ব্যাকরিস্সতি তথা নং ধারেস্সামা’’তি. ‘‘এৰং, ভো’’তি খো ভারদ্ৰাজো মাণৰো ৰাসেট্ঠস্স মাণৰস্স পচ্চস্সোসি.

৪৫৫. অথ খো ৰাসেট্ঠভারদ্ৰাজা মাণৰা যেন ভগৰা তেনুপসঙ্কমিংসু; উপসঙ্কমিত্ৰা ভগৰতা সদ্ধিং সম্মোদিংসু. সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্নো খো ৰাসেট্ঠো মাণৰো ভগৰন্তং গাথাহি অজ্ঝভাসি –

‘‘অনুঞ্ঞাতপটিঞ্ঞাতা, তেৰিজ্জা মযমস্মুভো;

অহং পোক্খরসাতিস্স, তারুক্খস্সাযং মাণৰো.

‘‘তেৰিজ্জানং যদক্খাতং, তত্র কেৰলিনোস্মসে;

পদকস্মা ৰেয্যাকরণা [নো ব্যাকরণা (স্যা. কং. ক.)], জপ্পে আচরিযসাদিসা;

তেসং নো জাতিৰাদস্মিং, ৰিৰাদো অত্থি গোতম.

‘‘জাতিযা ব্রাহ্মণো হোতি, ভারদ্ৰাজো ইতি ভাসতি;

অহঞ্চ কম্মুনা [কম্মনা (সী. পী.)] ব্রূমি, এৰং জানাহি চক্খুম.

‘‘তে ন সক্কোম ঞাপেতুং [সঞ্ঞত্তুং (পী.), সঞ্ঞাপেতুং (ক.)], অঞ্ঞমঞ্ঞং মযং উভো;

ভৰন্তং পুট্ঠুমাগমা, সম্বুদ্ধং ইতি ৰিস্সুতং.

‘‘চন্দং যথা খযাতীতং, পেচ্চ পঞ্জলিকা জনা;

ৰন্দমানা নমস্সন্তি, লোকস্মিং গোতমং.

‘‘চক্খুং লোকে সমুপ্পন্নং, মযং পুচ্ছাম গোতমং;

জাতিযা ব্রাহ্মণো হোতি, উদাহু ভৰতি কম্মুনা [কম্মনা (সী. পী.)];

অজানতং নো পব্রূহি, যথা জানেমু ব্রাহ্মণ’’ন্তি.

৪৫৬. ‘‘তেসং ৰো অহং ব্যক্খিস্সং, (ৰাসেট্ঠাতি ভগৰা)

অনুপুব্বং যথাতথং;

জাতিৰিভঙ্গং পাণানং, অঞ্ঞমঞ্ঞাহি জাতিযো.

‘‘তিণরুক্খেপি জানাথ, ন চাপি পটিজানরে;