৭. ধনঞ্জানিসুত্তং

৪৪৫. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আযস্মা সারিপুত্তো দক্খিণাগিরিস্মিং চারিকং চরতি মহতা ভিক্খুসঙ্ঘেন সদ্ধিং. অথ খো অঞ্ঞতরো ভিক্খু রাজগহে ৰস্সংৰুট্ঠো [ৰস্সংৰুত্থো (সী. স্যা. কং. পী.)] যেন দক্খিণাগিরি যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো তং ভিক্খুং আযস্মা সারিপুত্তো এতদৰোচ – ‘‘কচ্চাৰুসো, ভগৰা অরোগো চ বলৰা চা’’তি? ‘‘অরোগো চাৰুসো, ভগৰা বলৰা চা’’তি. ‘‘কচ্চি পনাৰুসো, ভিক্খুসঙ্ঘো অরোগো চ বলৰা চা’’তি? ‘‘ভিক্খুসঙ্ঘোপি খো, আৰুসো, অরোগো চ বলৰা চা’’তি. ‘‘এত্থ, আৰুসো, তণ্ডুলপালিদ্ৰারায ধনঞ্জানি [ধানঞ্জানি (সী. পী.)] নাম ব্রাহ্মণো অত্থি. কচ্চাৰুসো, ধনঞ্জানি ব্রাহ্মণো অরোগো চ বলৰা চা’’তি? ‘‘ধনঞ্জানিপি খো, আৰুসো, ব্রাহ্মণো অরোগো চ বলৰা চা’’তি. ‘‘কচ্চি পনাৰুসো, ধনঞ্জানি ব্রাহ্মণো অপ্পমত্তো’’তি? ‘‘কুতো পনাৰুসো, ধনঞ্জানিস্স ব্রাহ্মণস্স অপ্পমাদো? ধনঞ্জানি, আৰুসো, ব্রাহ্মণো রাজানং নিস্সায ব্রাহ্মণগহপতিকে ৰিলুম্পতি, ব্রাহ্মণগহপতিকে নিস্সায রাজানং ৰিলুম্পতি. যাপিস্স ভরিযা সদ্ধা সদ্ধকুলা আনীতা সাপি কালঙ্কতা; অঞ্ঞাস্স ভরিযা অস্সদ্ধা অস্সদ্ধকুলা আনীতা’’. ‘‘দুস্সুতং ৰতাৰুসো, অস্সুম্হ, দুস্সুতং ৰতাৰুসো, অস্সুম্হ; যে মযং ধনঞ্জানিং ব্রাহ্মণং পমত্তং অস্সুম্হ. অপ্পেৰ চ নাম মযং কদাচি করহচি ধনঞ্জানিনা ব্রাহ্মণেন সদ্ধিং সমাগচ্ছেয্যাম, অপ্পেৰ নাম সিযা কোচিদেৰ কথাসল্লাপো’’তি?

৪৪৬. অথ খো আযস্মা সারিপুত্তো দক্খিণাগিরিস্মিং যথাভিরন্তং ৰিহরিত্ৰা যেন রাজগহং তেন চারিকং পক্কামি. অনুপুব্বেন চারিকং চরমানো যেন রাজগহং তদৰসরি. তত্র সুদং আযস্মা সারিপুত্তো রাজগহে ৰিহরতি ৰেল়ুৰনে কলন্দকনিৰাপে. অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি. তেন খো পন সমযেন ধনঞ্জানি ব্রাহ্মণো বহিনগরে গাৰো গোট্ঠে দুহাপেতি. অথ খো আযস্মা সারিপুত্তো রাজগহে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন ধনঞ্জানি ব্রাহ্মণো তেনুপসঙ্কমি. অদ্দসা খো ধনঞ্জানি ব্রাহ্মণো আযস্মন্তং সারিপুত্তং দূরতোৰ আগচ্ছন্তং. দিস্ৰান যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং এতদৰোচ – ‘‘ইতো, ভো সারিপুত্ত, পযো, পীযতং তাৰ ভত্তস্স কালো ভৰিস্সতী’’তি. ‘‘অলং, ব্রাহ্মণ. কতং মে অজ্জ ভত্তকিচ্চং. অমুকস্মিং মে রুক্খমূলে দিৰাৰিহারো ভৰিস্সতি. তত্থ আগচ্ছেয্যাসী’’তি. ‘‘এৰং, ভো’’তি খো ধনঞ্জানি ব্রাহ্মণো আযস্মতো সারিপুত্তস্স পচ্চস্সোসি. অথ খো ধনঞ্জানি ব্রাহ্মণো পচ্ছাভত্তং ভুত্তপাতরাসো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো ধনঞ্জানিং ব্রাহ্মণং আযস্মা সারিপুত্তো এতদৰোচ – ‘‘কচ্চাসি, ধনঞ্জানি, অপ্পমত্তো’’তি? ‘‘কুতো, ভো সারিপুত্ত, অম্হাকং অপ্পমাদো যেসং নো মাতাপিতরো পোসেতব্বা, পুত্তদারো পোসেতব্বো, দাসকম্মকরা পোসেতব্বা, মিত্তামচ্চানং মিত্তামচ্চকরণীযং কাতব্বং, ঞাতিসালোহিতানং ঞাতিসালোহিতকরণীযং কাতব্বং, অতিথীনং অতিথিকরণীযং কাতব্বং, পুব্বপেতানং পুব্বপেতকরণীযং কাতব্বং, দেৰতানং দেৰতাকরণীযং কাতব্বং, রঞ্ঞো রাজকরণীযং কাতব্বং, অযম্পি কাযো পীণেতব্বো ব্রূহেতব্বো’’তি?

৪৪৭. ‘‘তং কিং মঞ্ঞসি, ধনঞ্জানি, ইধেকচ্চো মাতাপিতূনং হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো মাতাপিতূনং হেতু অধম্মচারী ৰিসমচারী অহোসিং, মা মং নিরযং নিরযপালা’তি, মাতাপিতরো ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো পুত্তদারস্স হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো পুত্তদারস্স হেতু অধম্মচারী ৰিসমচারী অহোসিং, মা মং নিরযং নিরযপালা’তি, পুত্তদারো ৰা পনস্স লভেয্য ‘এসো খো অম্হাকং হেতু অধম্মচারী ৰিসমচারী অহোসি মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো দাসকম্মকরপোরিসস্স হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো দাসকম্মকরপোরিসস্স হেতু অধম্মচারী ৰিসমচারী অহোসিং, মা মং নিরযং নিরযপালা’তি, দাসকম্মকরপোরিসা ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো মিত্তামচ্চানং হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো মিত্তামচ্চানং হেতু অধম্মচারী ৰিসমচারী অহোসিং, মা মং নিরযং নিরযপালা’তি, মিত্তামচ্চা ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো ঞাতিসালোহিতানং হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো ঞাতিসালোহিতানং হেতু অধম্মচারী ৰিসমচারী অহোসিং, মা মং নিরযং নিরযপালা’তি, ঞাতিসালোহিতা ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো অতিথীনং হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো অতিথীনং হেতু অধম্মচারী ৰিসমচারী অহোসিং, মা মং নিরযং নিরযপালা’তি, অতিথী ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো পুব্বপেতানং হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো পুব্বপেতানং হেতু অধম্মচারী ৰিসমচারী অহোসিং, মা মং নিরযং নিরযপালা’তি, পুব্বপেতা ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো দেৰতানং হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো দেৰতানং হেতু অধম্মচারী ৰিসমচারী অহোসিং, মা মং নিরযং নিরযপালা’তি, দেৰতা ৰা পনস্স লভেয্যুং ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো রঞ্ঞো হেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো রঞ্ঞো হেতু অধম্মচারী ৰিসমচারী অহোসিং, মা মং নিরযং নিরযপালা’তি, রাজা ৰা পনস্স লভেয্য ‘এসো খো অম্হাকং হেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

‘‘তং কিং মঞ্ঞসি, ধনঞ্জানি, ইধেকচ্চো কাযস্স পীণনাহেতু ব্রূহনাহেতু অধম্মচারী ৰিসমচারী অস্স, তমেনং অধম্মচরিযাৰিসমচরিযাহেতু নিরযং নিরযপালা উপকড্ঢেয্যুং. লভেয্য নু খো সো ‘অহং খো কাযস্স পীণনাহেতু ব্রূহনাহেতু অধম্মচারী ৰিসমচারী অহোসিং, মা মং নিরযং নিরযপালা’তি, পরে ৰা পনস্স লভেয্যুং ‘এসো খো কাযস্স পীণনাহেতু ব্রূহনাহেতু অধম্মচারী ৰিসমচারী অহোসি, মা নং নিরযং নিরযপালা’’’তি? ‘‘নো হিদং, ভো সারিপুত্ত. অথ খো নং ৰিক্কন্দন্তংযেৰ নিরযে নিরযপালা পক্খিপেয্যুং’’.

৪৪৮. ‘‘তং কিং মঞ্ঞসি, ধনঞ্জানি, যো ৰা মাতাপিতূনং হেতু অধম্মচারী ৰিসমচারী অস্স, যো ৰা মাতাপিতূনং হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, মাতাপিতূনং হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, মাতাপিতূনং হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা মাতাপিতরো চেৰ পোসেতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা পুত্তদারস্স হেতু অধম্মচারী ৰিসমচারী অস্স, যো ৰা পুত্তদারস্স হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, পুত্তদারস্স হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, পুত্তদারস্স হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা যেহি সক্কা পুত্তদারঞ্চেৰ পোসেতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা দাসকম্মকরপোরিসস্স হেতু অধম্মচারী ৰিসমচারী অস্স, যো ৰা দাসকম্মকরপোরিসস্স হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, দাসকম্মকরপোরিসস্স হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, দাসকম্মকরপোরিসস্স হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা দাসকম্মকরপোরিসে চেৰ পোসেতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা মিত্তামচ্চানং হেতু অধম্মচারী ৰিসমচারী অস্স, যো ৰা মিত্তামচ্চানং হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, মিত্তামচ্চানং হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, মিত্তামচ্চানং হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা মিত্তামচ্চানঞ্চেৰ মিত্তামচ্চকরণীযং কাতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা ঞাতিসালোহিতানং হেতু অধম্মচারী ৰিসমচারী অস্স, যো ৰা ঞাতিসালোহিতানং হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, ঞাতিসালোহিতানং হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, ঞাতিসালোহিতানং হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা ঞাতিসালোহিতানঞ্চেৰ ঞাতিসালোহিতকরণীযং কাতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা অতিথীনং হেতু অধম্মচারী ৰিসমচারী অস্স, যো ৰা অতিথীনং হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, অতিথীনং হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, অতিথীনং হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা অতিথীনঞ্চেৰ অতিথিকরণীযং কাতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা পুব্বপেতানং হেতু অধম্মচারী ৰিসমচারী অস্স, যো ৰা পুব্বপেতানং হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, পুব্বপেতানং হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, পুব্বপেতানং হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা পুব্বপেতানঞ্চেৰ পুব্বপেতকরণীযং কাতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা দেৰতানং হেতু অধম্মচারী ৰিসমচারী অস্স, যো ৰা দেৰতানং হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, দেৰতানং হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, দেৰতানং হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা দেৰতানঞ্চেৰ দেৰতাকরণীযং কাতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা রঞ্ঞো হেতু অধম্মচারী ৰিসমচারী অস্স, যো ৰা রঞ্ঞো হেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, রঞ্ঞো হেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, রঞ্ঞো হেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা রঞ্ঞো চেৰ রাজকরণীযং কাতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতুং.

‘‘তং কিং মঞ্ঞসি, ধনঞ্জানি, যো ৰা কাযস্স পীণনাহেতু ব্রূহনাহেতু অধম্মচারী ৰিসমচারী অস্স, যো ৰা কাযস্স পীণনাহেতু ব্রূহনাহেতু ধম্মচারী সমচারী অস্স; কতমং সেয্যো’’তি? ‘‘যো হি, ভো সারিপুত্ত, কাযস্স পীণনাহেতু ব্রূহনাহেতু অধম্মচারী ৰিসমচারী অস্স, ন তং সেয্যো; যো চ খো, ভো সারিপুত্ত, কাযস্স পীণনাহেতু ব্রূহনাহেতু ধম্মচারী সমচারী অস্স, তদেৰেত্থ সেয্যো. অধম্মচরিযাৰিসমচরিযাহি, ভো সারিপুত্ত, ধম্মচরিযাসমচরিযা সেয্যো’’তি. ‘‘অত্থি খো, ধনঞ্জানি, অঞ্ঞেসং হেতুকা ধম্মিকা কম্মন্তা, যেহি সক্কা কাযঞ্চেৰ পীণেতুং ব্রূহেতুং, ন চ পাপকম্মং কাতুং, পুঞ্ঞঞ্চ পটিপদং পটিপজ্জিতু’’ন্তি.

৪৪৯. অথ খো ধনঞ্জানি ব্রাহ্মণো আযস্মতো সারিপুত্তস্স ভাসিতং অভিনন্দিত্ৰা অনুমোদিত্ৰা উট্ঠাযাসনা পক্কামি. অথ খো ধনঞ্জানি ব্রাহ্মণো অপরেন সমযেন আবাধিকো অহোসি দুক্খিতো বাল়্হগিলানো. অথ খো ধনঞ্জানি ব্রাহ্মণো অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস, যেন ভগৰা তেনুপসঙ্কম; উপসঙ্কমিত্ৰা মম ৰচনেন ভগৰতো পাদে সিরসা ৰন্দাহি – ‘ধনঞ্জানি, ভন্তে, ব্রাহ্মণো আবাধিকো দুক্খিতো বাল়্হগিলানো. সো ভগৰতো পাদে সিরসা ৰন্দতী’তি. যেন চাযস্মা সারিপুত্তো তেনুপসঙ্কম; উপসঙ্কমিত্ৰা মম ৰচনেন আযস্মতো সারিপুত্তস্স পাদে সিরসা ৰন্দাহি – ‘ধনঞ্জানি, ভন্তে, ব্রাহ্মণো আবাধিকো দুক্খিতো বাল়্হগিলানো. সো আযস্মতো সারিপুত্তস্স পাদে সিরসা ৰন্দতী’তি. এৰঞ্চ ৰদেহি – ‘সাধু কির, ভন্তে, আযস্মা সারিপুত্তো যেন ধনঞ্জানিস্স ব্রাহ্মণস্স নিৰেসনং তেনুপসঙ্কমতু অনুকম্পং উপাদাযা’’’তি. ‘‘এৰং, ভন্তে’’তি খো সো পুরিসো ধনঞ্জানিস্স ব্রাহ্মণস্স পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো পুরিসো ভগৰন্তং এতদৰোচ – ‘‘ধনঞ্জানি, ভন্তে, ব্রাহ্মণো আবাধিকো দুক্খিতো বাল়্হগিলানো. সো ভগৰতো পাদে সিরসা ৰন্দতী’’তি. যেন চাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং অভিৰাদেত্ৰা একমন্তং নিসীদি. একমন্তং নিসিন্নো খো সো পুরিসো আযস্মন্তং সারিপুত্তং এতদৰোচ – ‘‘ধনঞ্জানি, ভন্তে, ব্রাহ্মণো আবাধিকো দুক্খিতো বাল়্হগিলানো. সো আযস্মতো সারিপুত্তস্স পাদে সিরসা ৰন্দতি, এৰঞ্চ ৰদেতি – ‘সাধু কির, ভন্তে, আযস্মা সারিপুত্তো যেন ধনঞ্জানিস্স ব্রাহ্মণস্স নিৰেসনং তেনুপসঙ্কমতু অনুকম্পং উপাদাযা’’’তি. অধিৰাসেসি খো আযস্মা সারিপুত্তো তুণ্হীভাৰেন.

৪৫০. অথ খো আযস্মা সারিপুত্তো নিৰাসেত্ৰা পত্তচীৰরমাদায যেন ধনঞ্জানিস্স ব্রাহ্মণস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো আযস্মা সারিপুত্তো ধনঞ্জানিং ব্রাহ্মণং এতদৰোচ – ‘‘কচ্চি তে, ধনঞ্জানি, খমনীযং, কচ্চি যাপনীযং? কচ্চি দুক্খা ৰেদনা পটিক্কমন্তি, নো অভিক্কমন্তি? পটিক্কমোসানং পঞ্ঞাযতি, নো অভিক্কমো’’তি? ‘‘ন মে, ভো সারিপুত্ত, খমনীযং ন যাপনীযং. বাল়্হা মে দুক্খা ৰেদনা অভিক্কমন্তি, নো পটিক্কমন্তি. অভিক্কমোসানং পঞ্ঞাযতি, নো পটিক্কমো. সেয্যথাপি, ভো সারিপুত্ত, বলৰা পুরিসো তিণ্হেন সিখরেন মুদ্ধনি [মুদ্ধানং (সী. স্যা. কং. পী.)] অভিমত্থেয্য; এৰমেৰ খো, ভো সারিপুত্ত, অধিমত্তা ৰাতা মুদ্ধনি চ ঊহনন্তি. ন মে, ভো সারিপুত্ত, খমনীযং, ন যাপনীযং. বাল়্হা মে দুক্খা ৰেদনা অভিক্কমন্তি, নো পটিক্কমন্তি. অভিক্কমোসানং পঞ্ঞাযতি, নো পটিক্কমো. সেয্যথাপি, ভো সারিপুত্ত, বলৰা পুরিসো দল়্হেন ৰরত্তক্খণ্ডেন [ৰরত্তবন্ধনেন (সী. পী.)] সীসে সীসৰেঠং দদেয্য; এৰমেৰ খো, ভো সারিপুত্ত, অধিমত্তা সীসে সীসৰেদনা. ন মে, ভো সারিপুত্ত, খমনীযং ন যাপনীযং. বাল়্হা মে দুক্খা ৰেদনা অভিক্কমন্তি, নো পটিক্কমন্তি. অভিক্কমোসানং পঞ্ঞাযতি, নো পটিক্কমো. সেয্যথাপি, ভো সারিপুত্ত, দক্খো গোঘাতকো ৰা গোঘাতকন্তেৰাসী ৰা তিণ্হেন গোৰিকন্তনেন কুচ্ছিং পরিকন্তেয্য; এৰমেৰ খো, ভো সারিপুত্ত, অধিমত্তা ৰাতা কুচ্ছিং পরিকন্তন্তি. ন মে, ভো সারিপুত্ত, খমনীযং, ন যাপনীযং. বাল়্হা মে দুক্খা ৰেদনা অভিক্কমন্তি, নো পটিক্কমন্তি. অভিক্কমোসানং পঞ্ঞাযতি, নো পটিক্কমো. সেয্যথাপি, ভো সারিপুত্ত, দ্ৰে বলৰন্তো পুরিসা দুব্বলতরং পুরিসং নানাবাহাসু গহেত্ৰা অঙ্গারকাসুযা সন্তাপেয্যুং সম্পরিতাপেয্যুং; এৰমেৰ খো, ভো সারিপুত্ত, অধিমত্তো কাযস্মিং ডাহো. ন মে, ভো সারিপুত্ত, খমনীযং ন যাপনীযং. বাল়্হা মে দুক্খা ৰেদনা অভিক্কমন্তি, নো পটিক্কমন্তি. অভিক্কমোসানং পঞ্ঞাযতি, নো পটিক্কমো’’তি.

৪৫১. ‘‘তং কিং মঞ্ঞসি, ধনঞ্জানি, কতমং সেয্যো – নিরযো ৰা তিরচ্ছানযোনি ৰা’’তি? ‘‘নিরযা, ভো সারিপুত্ত, তিরচ্ছানযোনি সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – তিরচ্ছানযোনি ৰা পেত্তিৰিসযো ৰা’’তি? ‘‘তিরচ্ছানযোনিযা, ভো সারিপুত্ত, পেত্তিৰিসযো সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – পেত্তিৰিসযো ৰা মনুস্সা ৰা’’তি? ‘‘পেত্তিৰিসযা, ভো সারিপুত্ত, মনুস্সা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – মনুস্সা ৰা চাতুমহারাজিকা [চাতুম্মহারাজিকা (সী. স্যা. কং. পী.)] ৰা দেৰা’’তি? ‘‘মনুস্সেহি, ভো সারিপুত্ত, চাতুমহারাজিকা দেৰা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – চাতুমহারাজিকা ৰা দেৰা তাৰতিংসা ৰা দেৰা’’তি? ‘‘চাতুমহারাজিকেহি, ভো সারিপুত্ত, দেৰেহি তাৰতিংসা দেৰা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – তাৰতিংসা ৰা দেৰা যামা ৰা দেৰা’’তি? ‘‘তাৰতিংসেহি, ভো সারিপুত্ত, দেৰেহি যামা দেৰা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – যামা ৰা দেৰা তুসিতা ৰা দেৰা’’তি? ‘‘যামেহি, ভো সারিপুত্ত, দেৰেহি তুসিতা দেৰা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – তুসিতা ৰা দেৰা নিম্মানরতী ৰা দেৰা’’তি? ‘‘তুসিতেহি, ভো সারিপুত্ত, দেৰেহি নিম্মানরতী দেৰা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো – নিম্মানরতী ৰা দেৰা পরনিম্মিতৰসৰত্তী ৰা দেৰা’’তি? ‘‘নিম্মানরতীহি, ভো সারিপুত্ত, দেৰেহি পরনিম্মিতৰসৰত্তী দেৰা সেয্যো’’তি. ‘‘তং কিং মঞ্ঞসি, ধনঞ্জানি, কতমং সেয্যো পরনিম্মিতৰসৰত্তী ৰা দেৰা ব্রহ্মলোকো ৰা’’তি? ‘‘‘ব্রহ্মলোকো’তি [ভৰং সারিপুত্তো আহাতি, কতমং সারিপুত্তো আহ ব্রহ্মলোকোতি. (ক.)] – ভৰং সারিপুত্তো আহ; ‘ব্রহ্মলোকো’তি – ভৰং সারিপুত্তো আহা’’তি [ভৰং সারিপুত্তো আহাতি, কতমং সারিপুত্তো আহ ব্রহ্মলোকোতি. (ক.)].

অথ খো আযস্মতো সারিপুত্তস্স এতদহোসি – ‘‘ইমে খো ব্রাহ্মণা ব্রহ্মলোকাধিমুত্তা. যংনূনাহং ধনঞ্জানিস্স ব্রাহ্মণস্স ব্রহ্মানং সহব্যতায মগ্গং দেসেয্য’’ন্তি. ‘‘ব্রহ্মানং তে, ধনঞ্জানি, সহব্যতায মগ্গং দেসেস্সামি; তং সুণাহি, সাধুকং মনসি করোহি, ভাসিস্সামী’’তি. ‘‘এৰং, ভো’’তি খো ধনঞ্জানি ব্রাহ্মণো আযস্মতো সারিপুত্তস্স পচ্চস্সোসি. আযস্মা সারিপুত্তো এতদৰোচ – ‘‘কতমো চ, ধনঞ্জানি, ব্রহ্মানং সহব্যতায মগ্গো? ইধ, ধনঞ্জানি, ভিক্খু মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরতি. অযং খো, ধনঞ্জানি, ব্রহ্মানং সহব্যতায মগ্গো’’.

৪৫২. ‘‘পুন চপরং, ধনঞ্জানি, ভিক্খু করুণাসহগতেন চেতসা…পে… মুদিতাসহগতেন চেতসা… উপেক্খাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং; ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরতি. অযং খো, ধনঞ্জানি, ব্রহ্মানং সহব্যতায মগ্গো’’তি. তেন হি, ভো সারিপুত্ত, মম ৰচনেন ভগৰতো পাদে সিরসা ৰন্দাহি – ‘ধনঞ্জানি, ভন্তে, ব্রাহ্মণো আবাধিকো দুক্খিতো বাল়্হগিলানো. সো ভগৰতো পাদে সিরসা ৰন্দতী’তি. অথ খো আযস্মা সারিপুত্তো ধনঞ্জানিং ব্রাহ্মণং সতি উত্তরিকরণীযে হীনে ব্রহ্মলোকে পতিট্ঠাপেত্ৰা উট্ঠাযাসনা পক্কামি. অথ খো ধনঞ্জানি ব্রাহ্মণো অচিরপক্কন্তে আযস্মন্তে সারিপুত্তে কালমকাসি, ব্রহ্মলোকঞ্চ উপপজ্জি.

৪৫৩. অথ খো ভগৰা ভিক্খূ আমন্তেসি – ‘‘এসো, ভিক্খৰে, সারিপুত্তো ধনঞ্জানিং ব্রাহ্মণং সতি উত্তরিকরণীযে হীনে ব্রহ্মলোকে পতিট্ঠাপেত্ৰা উট্ঠাযাসনা পক্কন্তো’’তি. অথ খো আযস্মা সারিপুত্তো যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি, একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘ধনঞ্জানি, ভন্তে, ব্রাহ্মণো আবাধিকো দুক্খিতো বাল়্হগিলানো, সো ভগৰতো পাদে সিরসা ৰন্দতী’’তি. ‘‘কিং পন ত্ৰং সারিপুত্ত ধনঞ্জানিং ব্রাহ্মণং সতি উত্তরিকরণীযে হীনে ব্রহ্মলোকে পতিট্ঠাপেত্ৰা উট্ঠাযাসনা পক্কন্তো’’তি? ‘‘ময্হং খো, ভন্তে, এৰং অহোসি – ‘ইমে খো ব্রাহ্মণা ব্রহ্মলোকাধিমুত্তা, যংনূনাহং ধনঞ্জানিস্স ব্রাহ্মণস্স ব্রহ্মানং সহব্যতায মগ্গং দেসেয্য’ন্তি. ‘‘কালঙ্কতোচ [কালঙ্কতোৰ (স্যা. কং. ক.)], সারিপুত্ত, ধনঞ্জানি ব্রাহ্মণো, ব্রহ্মলোকঞ্চ উপপন্নো’’তি.

ধনঞ্জানিসুত্তং নিট্ঠিতং সত্তমং.