৬. এসুকারীসুত্তং

৪৩৬. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো এসুকারী ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো এসুকারী ব্রাহ্মণো ভগৰন্তং এতদৰোচ – ‘‘ব্রাহ্মণা, ভো গোতম, চতস্সো পারিচরিযা পঞ্ঞপেন্তি – ব্রাহ্মণস্স পারিচরিযং পঞ্ঞপেন্তি, খত্তিযস্স পারিচরিযং পঞ্ঞপেন্তি, ৰেস্সস্স পারিচরিযং পঞ্ঞপেন্তি, সুদ্দস্স পারিচরিযং পঞ্ঞপেন্তি. তত্রিদং, ভো গোতম, ব্রাহ্মণা ব্রাহ্মণস্স পারিচরিযং পঞ্ঞপেন্তি – ‘ব্রাহ্মণো ৰা ব্রাহ্মণং পরিচরেয্য, খত্তিযো ৰা ব্রাহ্মণং পরিচরেয্য, ৰেস্সো ৰা ব্রাহ্মণং পরিচরেয্য, সুদ্দো ৰা ব্রাহ্মণং পরিচরেয্যা’তি. ইদং খো, ভো গোতম, ব্রাহ্মণা ব্রাহ্মণস্স পারিচরিযং পঞ্ঞপেন্তি. তত্রিদং, ভো গোতম, ব্রাহ্মণা খত্তিযস্স পারিচরিযং পঞ্ঞপেন্তি – ‘খত্তিযো ৰা খত্তিযং পরিচরেয্য, ৰেস্সো ৰা খত্তিযং পরিচরেয্য, সুদ্দো ৰা খত্তিযং পরিচরেয্যা’তি. ইদং খো, ভো গোতম, ব্রাহ্মণা খত্তিযস্স পারিচরিযং পঞ্ঞপেন্তি. তত্রিদং, ভো গোতম, ব্রাহ্মণা ৰেস্সস্স পারিচরিযং পঞ্ঞপেন্তি – ‘ৰেস্সো ৰা ৰেস্সং পরিচরেয্য, সুদ্দো ৰা ৰেস্সং পরিচরেয্যা’তি. ইদং খো, ভো গোতম, ব্রাহ্মণা ৰেস্সস্স পারিচরিযং পঞ্ঞপেন্তি. তত্রিদং, ভো গোতম, ব্রাহ্মণা সুদ্দস্স পারিচরিযং পঞ্ঞপেন্তি – ‘সুদ্দোৰ সুদ্দং পরিচরেয্য. কো পনঞ্ঞো সুদ্দং পরিচরিস্সতী’তি? ইদং খো, ভো গোতম, ব্রাহ্মণা সুদ্দস্স পারিচরিযং পঞ্ঞপেন্তি. ব্রাহ্মণা, ভো গোতম, ইমা চতস্সো পারিচরিযা পঞ্ঞপেন্তি. ইধ ভৰং গোতমো কিমাহা’’তি?

৪৩৭. ‘‘কিং পন, ব্রাহ্মণ, সব্বো লোকো ব্রাহ্মণানং এতদব্ভনুজানাতি – ‘ইমা চতস্সো পারিচরিযা পঞ্ঞপেন্তূ’’’তি [পঞ্ঞপেন্তীতি (সী. ক.)]? ‘‘নো হিদং, ভো গোতম’’. ‘‘সেয্যথাপি, ব্রাহ্মণ, পুরিসো দলিদ্দো [দল়িদ্দো (সী. স্যা. কং. পী.)] অস্সকো অনাল়্হিযো. তস্স অকামস্স বিলং ওলগ্গেয্যুং – ‘ইদং তে, অম্ভো পুরিস, মংসং খাদিতব্বং, মূলঞ্চ অনুপ্পদাতব্ব’ন্তি. এৰমেৰ খো, ব্রাহ্মণ, ব্রাহ্মণা অপ্পটিঞ্ঞায তেসং সমণব্রাহ্মণানং, অথ চ পনিমা চতস্সো পারিচরিযা পঞ্ঞপেন্তি. নাহং, ব্রাহ্মণ, ‘সব্বং পরিচরিতব্ব’ন্তি ৰদামি; নাহং, ব্রাহ্মণ, ‘সব্বং ন পরিচরিতব্ব’ন্তি ৰদামি. যং হিস্স, ব্রাহ্মণ, পরিচরতো পারিচরিযাহেতু পাপিযো অস্স ন সেয্যো, নাহং তং ‘পরিচরিতব্ব’ন্তি ৰদামি; যঞ্চ খ্ৰাস্স, ব্রাহ্মণ, পরিচরতো পারিচরিযাহেতু সেয্যো অস্স ন পাপিযো তমহং ‘পরিচরিতব্ব’ন্তি ৰদামি. খত্তিযং চেপি, ব্রাহ্মণ, এৰং পুচ্ছেয্যুং – ‘যং ৰা তে পরিচরতো পারিচরিযাহেতু পাপিযো অস্স ন সেয্যো, যং ৰা তে পরিচরতো পারিচরিযাহেতু সেয্যো অস্স ন পাপিযো; কমেত্থ পরিচরেয্যাসী’তি, খত্তিযোপি হি, ব্রাহ্মণ, সম্মা ব্যাকরমানো এৰং ব্যাকরেয্য – ‘যঞ্হি মে পরিচরতো পারিচরিযাহেতু পাপিযো অস্স ন সেয্যো, নাহং তং পরিচরেয্যং; যঞ্চ খো মে পরিচরতো পারিচরিযাহেতু সেয্যো অস্স ন পাপিযো তমহং পরিচরেয্য’ন্তি. ব্রাহ্মণং চেপি, ব্রাহ্মণ…পে… ৰেস্সং চেপি, ব্রাহ্মণ…পে… সুদ্দং চেপি, ব্রাহ্মণ, এৰং পুচ্ছেয্যুং – ‘যং ৰা তে পরিচরতো পারিচরিযাহেতু পাপিযো অস্স ন সেয্যো, যং ৰা তে পরিচরতো পারিচরিযাহেতু সেয্যো অস্স ন পাপিযো; কমেত্থ পরিচরেয্যাসী’তি, সুদ্দোপি হি, ব্রাহ্মণ, সম্মা ব্যাকরমানো এৰং ব্যাকরেয্য – ‘যঞ্হি মে পরিচরতো পারিচরিযাহেতু পাপিযো অস্স ন সেয্যো, নাহং তং পরিচরেয্যং; যঞ্চ খো মে পরিচরতো পারিচরিযাহেতু সেয্যো অস্স ন পাপিযো তমহং পরিচরেয্য’ন্তি. নাহং, ব্রাহ্মণ, ‘উচ্চাকুলীনতা সেয্যংসো’তি ৰদামি, ন পনাহং, ব্রাহ্মণ, ‘উচ্চাকুলীনতা পাপিযংসো’তি ৰদামি; নাহং, ব্রাহ্মণ, ‘উল়ারৰণ্ণতা সেয্যংসো’তি ৰদামি, ন পনাহং, ব্রাহ্মণ, ‘উল়ারৰণ্ণতা পাপিযংসো’তি ৰদামি; নাহং, ব্রাহ্মণ, ‘উল়ারভোগতা সেয্যংসো’তি ৰদামি, ন পনাহং, ব্রাহ্মণ, ‘উল়ারভোগতা পাপিযংসো’তি ৰদামি.

৪৩৮. ‘‘উচ্চাকুলীনোপি হি, ব্রাহ্মণ, ইধেকচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচারী হোতি, মুসাৰাদী হোতি, পিসুণাৰাচো হোতি, ফরুসাৰাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠি হোতি. তস্মা ‘ন উচ্চাকুলীনতা সেয্যংসো’তি ৰদামি. উচ্চাকুলীনোপি হি, ব্রাহ্মণ, ইধেকচ্চো পাণাতিপাতা পটিৰিরতো হোতি, অদিন্নাদানা পটিৰিরতো হোতি, কামেসুমিচ্ছাচারা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি হোতি. তস্মা ‘ন উচ্চাকুলীনতা পাপিযংসো’তি ৰদামি.

৪৩৯. ‘‘উল়ারৰণ্ণোপি হি, ব্রাহ্মণ…পে… উল়ারভোগোপি হি, ব্রাহ্মণ, ইধেকচ্চো পাণাতিপাতী হোতি…পে… মিচ্ছাদিট্ঠি হোতি. তস্মা ‘ন উল়ারভোগতা সেয্যংসো’তি ৰদামি. উল়ারভোগোপি হি, ব্রাহ্মণ, ইধেকচ্চো পাণাতিপাতা পটিৰিরতো হোতি…পে… সম্মাদিট্ঠি হোতি. তস্মা ‘ন উল়ারভোগতা পাপিযংসো’তি ৰদামি. নাহং, ব্রাহ্মণ, ‘সব্বং পরিচরিতব্ব’ন্তি ৰদামি, ন পনাহং, ব্রাহ্মণ, ‘সব্বং ন পরিচরিতব্ব’ন্তি ৰদামি. যং হিস্স, ব্রাহ্মণ, পরিচরতো পারিচরিযাহেতু সদ্ধা ৰড্ঢতি, সীলং ৰড্ঢতি, সুতং ৰড্ঢতি, চাগো ৰড্ঢতি, পঞ্ঞা ৰড্ঢতি, তমহং ‘পরিচরিতব্ব’ন্তি (ৰদামি. যং হিস্স, ব্রাহ্মণ, পরিচরতো পারিচরিযাহেতু ন সদ্ধা ৰড্ঢতি, ন সীলং ৰড্ঢতি, ন সুতং ৰড্ঢতি, ন চাগো ৰড্ঢতি, ন পঞ্ঞা ৰড্ঢতি, নাহং তং ‘পরিচরিতব্ব’ন্তি) [( ) এত্থন্তরে পাঠো সী. স্যা. কং. পী. পোত্থকেসু নত্থি] ৰদামী’’তি.

৪৪০. এৰং ৰুত্তে, এসুকারী ব্রাহ্মণো ভগৰন্তং এতদৰোচ – ‘‘ব্রাহ্মণা, ভো গোতম, চত্তারি ধনানি পঞ্ঞপেন্তি – ব্রাহ্মণস্স সন্ধনং পঞ্ঞপেন্তি, খত্তিযস্স সন্ধনং পঞ্ঞপেন্তি, ৰেস্সস্স সন্ধনং পঞ্ঞপেন্তি, সুদ্দস্স সন্ধনং পঞ্ঞপেন্তি. তত্রিদং, ভো গোতম, ব্রাহ্মণা ব্রাহ্মণস্স সন্ধনং পঞ্ঞপেন্তি ভিক্খাচরিযং; ভিক্খাচরিযঞ্চ পন ব্রাহ্মণো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি. ইদং খো, ভো গোতম, ব্রাহ্মণা ব্রাহ্মণস্স সন্ধনং পঞ্ঞপেন্তি. তত্রিদং, ভো গোতম, ব্রাহ্মণা খত্তিযস্স সন্ধনং পঞ্ঞপেন্তি ধনুকলাপং; ধনুকলাপঞ্চ পন খত্তিযো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি. ইদং খো, ভো গোতম, ব্রাহ্মণা খত্তিযস্স সন্ধনং পঞ্ঞপেন্তি. তত্রিদং, ভো গোতম, ব্রাহ্মণা ৰেস্সস্স সন্ধনং পঞ্ঞপেন্তি কসিগোরক্খং; কসিগোরক্খঞ্চ পন ৰেস্সো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি. ইদং খো, ভো গোতম, ব্রাহ্মণা ৰেস্সস্স সন্ধনং পঞ্ঞপেন্তি. তত্রিদং, ভো গোতম, ব্রাহ্মণা সুদ্দস্স সন্ধনং পঞ্ঞপেন্তি অসিতব্যাভঙ্গিং; অসিতব্যাভঙ্গিঞ্চ পন সুদ্দো সন্ধনং অতিমঞ্ঞমানো অকিচ্চকারী হোতি গোপোৰ অদিন্নং আদিযমানোতি. ইদং খো, ভো গোতম, ব্রাহ্মণা সুদ্দস্স সন্ধনং পঞ্ঞপেন্তি. ব্রাহ্মণা, ভো গোতম, ইমানি চত্তারি ধনানি পঞ্ঞপেন্তি. ইধ ভৰং গোতমো কিমাহা’’তি?

৪৪১. ‘‘কিং পন, ব্রাহ্মণ, সব্বো লোকো ব্রাহ্মণানং এতদব্ভনুজানাতি – ‘ইমানি চত্তারি ধনানি পঞ্ঞপেন্তূ’’’তি? ‘‘নো হিদং, ভো গোতম’’. ‘‘সেয্যথাপি, ব্রাহ্মণ, পুরিসো দলিদ্দো অস্সকো অনাল়্হিযো. তস্স অকামস্স বিলং ওলগ্গেয্যুং – ‘ইদং তে, অম্ভো পুরিস, মংসং খাদিতব্বং, মূলঞ্চ অনুপ্পদাতব্ব’ন্তি. এৰমেৰ খো, ব্রাহ্মণ, ব্রাহ্মণা অপ্পটিঞ্ঞায তেসং সমণব্রাহ্মণানং, অথ চ পনিমানি চত্তারি ধনানি পঞ্ঞপেন্তি. অরিযং খো অহং, ব্রাহ্মণ, লোকুত্তরং ধম্মং পুরিসস্স সন্ধনং পঞ্ঞপেমি. পোরাণং খো পনস্স মাতাপেত্তিকং কুলৰংসং অনুস্সরতো যত্থ যত্থেৰ অত্তভাৰস্স অভিনিব্বত্তি হোতি তেন তেনেৰ সঙ্খ্যং গচ্ছতি. খত্তিযকুলে চে অত্তভাৰস্স অভিনিব্বত্তি হোতি ‘খত্তিযো’ত্ৰেৰ সঙ্খ্যং গচ্ছতি; ব্রাহ্মণকুলে চে অত্তভাৰস্স অভিনিব্বত্তি হোতি ‘ব্রাহ্মণো’ত্ৰেৰ সঙ্খ্যং গচ্ছতি; ৰেস্সকুলে চে অত্তভাৰস্স অভিনিব্বত্তি হোতি ‘ৰেস্সো’ত্ৰেৰ সঙ্খ্যং গচ্ছতি; সুদ্দকুলে চে অত্তভাৰস্স অভিনিব্বত্তি হোতি ‘সুদ্দো’ত্ৰেৰ সঙ্খ্যং গচ্ছতি. সেয্যথাপি, ব্রাহ্মণ, যংযদেৰ পচ্চযং পটিচ্চ অগ্গি জলতি তেন তেনেৰ সঙ্খ্যং গচ্ছতি. কট্ঠঞ্চে পটিচ্চ অগ্গি জলতি ‘কট্ঠগ্গি’ত্ৰেৰ সঙ্খ্যং গচ্ছতি; সকলিকঞ্চে পটিচ্চ অগ্গি জলতি ‘সকলিকগ্গি’ত্ৰেৰ সঙ্খ্যং গচ্ছতি; তিণঞ্চে পটিচ্চ অগ্গি জলতি ‘তিণগ্গি’ত্ৰেৰ সঙ্খ্যং গচ্ছতি; গোমযঞ্চে পটিচ্চ অগ্গি জলতি ‘গোমযগ্গি’ত্ৰেৰ সঙ্খ্যং গচ্ছতি. এৰমেৰ খো অহং, ব্রাহ্মণ, অরিযং লোকুত্তরং ধম্মং পুরিসস্স সন্ধনং পঞ্ঞপেমি. পোরাণং খো পনস্স মাতাপেত্তিকং কুলৰংসং অনুস্সরতো যত্থ যত্থেৰ অত্তভাৰস্স অভিনিব্বত্তি হোতি তেন তেনেৰ সঙ্খ্যং গচ্ছতি.

‘‘খত্তিযকুলে চে অত্তভাৰস্স অভিনিব্বত্তি হোতি ‘খত্তিযো’ত্ৰেৰ সঙ্খ্যং গচ্ছতি; ব্রাহ্মণকুলে চে অত্তভাৰস্স অভিনিব্বত্তি হোতি ‘ব্রাহ্মণো’ত্ৰেৰ সঙ্খ্যং গচ্ছতি; ৰেস্সকুলে চে অত্তভাৰস্স অভিনিব্বত্তি হোতি ‘ৰেস্সো’ত্ৰেৰ সঙ্খ্যং গচ্ছতি; সুদ্দকুলে চে অত্তভাৰস্স অভিনিব্বত্তি হোতি ‘সুদ্দো’ত্ৰেৰ সঙ্খ্যং গচ্ছতি.

‘‘খত্তিযকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি, অদিন্নাদানা পটিৰিরতো হোতি, অব্রহ্মচরিযা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি হোতি, আরাধকো হোতি ঞাযং ধম্মং কুসলং.

‘‘ব্রাহ্মণকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

‘‘ৰেস্সকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

‘‘সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

৪৪২. ‘‘তং কিং মঞ্ঞসি, ব্রাহ্মণ, ব্রাহ্মণোৰ নু খো পহোতি অস্মিং পদেসে অৰেরং অব্যাবজ্ঝং মেত্তচিত্তং ভাৰেতুং, নো খত্তিযো নো ৰেস্সো নো সুদ্দো’’তি? ‘‘নো হিদং, ভো গোতম. খত্তিযোপি হি, ভো গোতম, পহোতি অস্মিং পদেসে অৰেরং অব্যাবজ্ঝং মেত্তচিত্তং ভাৰেতুং; ব্রাহ্মণোপি হি, ভো গোতম… ৰেস্সোপি হি, ভো গোতম… সুদ্দোপি হি, ভো গোতম… সব্বেপি হি, ভো গোতম, চত্তারো ৰণ্ণা পহোন্তি অস্মিং পদেসে অৰেরং অব্যাবজ্ঝং মেত্তচিত্তং ভাৰেতু’’ন্তি. ‘‘এৰমেৰ খো, ব্রাহ্মণ, খত্তিযকুলা চেপি অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

‘‘ব্রাহ্মণকুলা চেপি, ব্রাহ্মণ… ৰেস্সকুলা চেপি, ব্রাহ্মণ… সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

৪৪৩. ‘‘তং কিং মঞ্ঞসি, ব্রাহ্মণ, ব্রাহ্মণোৰ নু খো পহোতি সোত্তিসিনানিং আদায নদিং গন্ত্ৰা রজোজল্লং পৰাহেতুং, নো খত্তিযো নো ৰেস্সো নো সুদ্দো’’তি? ‘‘নো হিদং, ভো গোতম. খত্তিযোপি হি, ভো গোতম, পহোতি সোত্তিসিনানিং আদায নদিং গন্ত্ৰা রজোজল্লং পৰাহেতুং; ব্রাহ্মণোপি হি, ভো গোতম… ৰেস্সোপি হি, ভো গোতম … সুদ্দোপি হি, ভো গোতম… সব্বেপি হি, ভো গোতম, চত্তারো ৰণ্ণা পহোন্তি সোত্তিসিনানিং আদায নদিং গন্ত্ৰা রজোজল্লং পৰাহেতু’’ন্তি. ‘‘এৰমেৰ খো, ব্রাহ্মণ, খত্তিযকুলা চেপি অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

‘‘ব্রাহ্মণকুলা চেপি, ব্রাহ্মণ… ৰেস্সকুলা চেপি, ব্রাহ্মণ… সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং.

৪৪৪. ‘‘তং কিং মঞ্ঞসি, ব্রাহ্মণ, ইধ রাজা খত্তিযো মুদ্ধাৰসিত্তো নানাজচ্চানং পুরিসানং পুরিসসতং সন্নিপাতেয্য – ‘আযন্তু ভোন্তো যে তত্থ খত্তিযকুলা ব্রাহ্মণকুলা রাজঞ্ঞকুলা উপ্পন্না সাকস্স ৰা সালস্স ৰা সলল়স্স ৰা চন্দনস্স ৰা পদুমকস্স ৰা উত্তরারণিং আদায অগ্গিং অভিনিব্বত্তেন্তু, তেজো পাতুকরোন্তু; আযন্তু পন ভোন্তো যে তত্থ চণ্ডালকুলা নেসাদকুলা ৰেনকুলা রথকারকুলা পুক্কুসকুলা উপ্পন্না সাপানদোণিযা ৰা সূকরদোণিযা ৰা রজকদোণিযা ৰা এরণ্ডকট্ঠস্স ৰা উত্তরারণিং আদায অগ্গিং অভিনিব্বত্তেন্তু, তেজো পাতুকরোন্তূ’’’তি?

‘‘তং কিং মঞ্ঞসি, ব্রাহ্মণ, যো এৰং নু খো সো খত্তিযকুলা ব্রাহ্মণকুলা রাজঞ্ঞকুলা উপ্পন্নেহি সাকস্স ৰা সালস্স ৰা সলল়স্স ৰা চন্দনস্স ৰা পদুমকস্স ৰা উত্তরারণিং আদায অগ্গি অভিনিব্বত্তো তেজো পাতুকতো সো এৰ নু খ্ৰাস্স অগ্গি অচ্চিমা চেৰ ৰণ্ণৰা চ পভস্সরো চ তেন চ সক্কা অগ্গিনা অগ্গিকরণীযং কাতুং; যো পন সো চণ্ডালকুলা নেসাদকুলা ৰেনকুলা রথকারকুলা পুক্কুসকুলা উপ্পন্নেহি সাপানদোণিযা ৰা সূকরদোণিযা ৰা রজকদোণিযা ৰা এরণ্ডকট্ঠস্স ৰা উত্তরারণিং আদায অগ্গি অভিনিব্বত্তো তেজো পাতুকতো স্ৰাস্স অগ্গি ন চেৰ অচ্চিমা ন চ ৰণ্ণৰা ন চ পভস্সরো ন চ তেন সক্কা অগ্গিনা অগ্গিকরণীযং কাতু’’ন্তি? ‘‘নো হিদং, ভো গোতম. যোপি হি সো, ভো গোতম, খত্তিযকুলা ব্রাহ্মণকুলা রাজঞ্ঞকুলা উপ্পন্নেহি সাকস্স ৰা সালস্স ৰা সলল়স্স ৰা চন্দনস্স ৰা পদুমকস্স ৰা উত্তরারণিং আদায অগ্গি অভিনিব্বত্তো তেজো পাতুকতো স্ৰাস্স অগ্গি অচ্চিমা চেৰ ৰণ্ণৰা চ পভস্সরো চ তেন চ সক্কা অগ্গিনা অগ্গিকরণীযং কাতুং; যোপি সো চণ্ডালকুলা নেসাদকুলা ৰেনকুলা রথকারকুলা পুক্কুসকুলা উপ্পন্নেহি সাপানদোণিযা ৰা সূকরদোণিযা ৰা রজকদোণিযা ৰা এরণ্ডকট্ঠস্স ৰা উত্তরারণিং আদায অগ্গি অভিনিব্বত্তো তেজো পাতুকতো স্ৰাস্স অগ্গি অচ্চিমা চেৰ ৰণ্ণৰা চ পভস্সরো চ তেন চ সক্কা অগ্গিনা অগ্গিকরণীযং কাতুং. সব্বোপি হি, ভো গোতম, অগ্গি অচ্চিমা চেৰ ৰণ্ণৰা চ পভস্সরো চ সব্বেনপি সক্কা অগ্গিনা অগ্গিকরণীযং কাতু’’ন্তি.

‘‘এৰমেৰ খো, ব্রাহ্মণ, খত্তিযকুলা চেপি অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি…পে… সম্মাদিট্ঠি হোতি, আরাধকো হোতি ঞাযং ধম্মং কুসলং. ব্রাহ্মণকুলা চেপি, ব্রাহ্মণ… ৰেস্সকুলা চেপি, ব্রাহ্মণ… সুদ্দকুলা চেপি, ব্রাহ্মণ, অগারস্মা অনগারিযং পব্বজিতো হোতি, সো চ তথাগতপ্পৰেদিতং ধম্মৰিনযং আগম্ম পাণাতিপাতা পটিৰিরতো হোতি, অদিন্নাদানা পটিৰিরতো হোতি, অব্রহ্মচরিযা পটিৰিরতো হোতি, মুসাৰাদা পটিৰিরতো হোতি, পিসুণায ৰাচায পটিৰিরতো হোতি, ফরুসায ৰাচায পটিৰিরতো হোতি, সম্ফপ্পলাপা পটিৰিরতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠি হোতি, আরাধকো হোতি ঞাযং ধম্মং কুসল’’ন্তি.

এৰং ৰুত্তে, এসুকারী ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি.

এসুকারীসুত্তং নিট্ঠিতং ছট্ঠং.