১০. কণ্ণকত্থলসুত্তং

৩৭৫. এৰং মে সুতং – একং সমযং ভগৰা উরুঞ্ঞাযং [উজুঞ্ঞাযং (সী. পী.), উদঞ্ঞাযং (স্যা. কং.)] ৰিহরতি কণ্ণকত্থলে মিগদাযে. তেন খো পন সমযেন রাজা পসেনদি কোসলো উরুঞ্ঞং অনুপ্পত্তো হোতি কেনচিদেৰ করণীযেন. অথ খো রাজা পসেনদি কোসলো অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস, যেন ভগৰা তেনুপসঙ্কম; উপসঙ্কমিত্ৰা মম ৰচনেন ভগৰতো পাদে সিরসা ৰন্দাহি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – ‘রাজা, ভন্তে, পসেনদি কোসলো ভগৰতো পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’তি. এৰঞ্চ ৰদেহি – ‘অজ্জ কির, ভন্তে, রাজা পসেনদি কোসলো পচ্ছাভত্তং ভুত্তপাতরাসো ভগৰন্তং দস্সনায উপসঙ্কমিস্সতী’’’তি. ‘‘এৰং, দেৰা’’তি খো সো পুরিসো রঞ্ঞো পসেনদিস্স কোসলস্স পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো পুরিসো ভগৰন্তং এতদৰোচ – ‘‘রাজা, ভন্তে, পসেনদি কোসলো ভগৰতো পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি; এৰঞ্চ ৰদেতি – ‘অজ্জ কির ভন্তে, রাজা পসেনদি কোসলো পচ্ছাভত্তং ভুত্তপাতরাসো ভগৰন্তং দস্সনায উপসঙ্কমিস্সতী’’’তি. অস্সোসুং খো সোমা চ ভগিনী সকুলা চ ভগিনী – ‘‘অজ্জ কির রাজা পসেনদি কোসলো পচ্ছাভত্তং ভুত্তপাতরাসো ভগৰন্তং দস্সনায উপসঙ্কমিস্সতী’’তি. অথ খো সোমা চ ভগিনী সকুলা চ ভগিনী রাজানং পসেনদিং কোসলং ভত্তাভিহারে উপসঙ্কমিত্ৰা এতদৰোচুং – ‘‘তেন হি, মহারাজ, অম্হাকম্পি ৰচনেন ভগৰতো পাদে সিরসা ৰন্দাহি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – ‘সোমা চ, ভন্তে, ভগিনী সকুলা চ ভগিনী ভগৰতো পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’’’তি.

৩৭৬. অথ খো রাজা পসেনদি কোসলো পচ্ছাভত্তং ভুত্তপাতরাসো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘সোমা চ, ভন্তে, ভগিনী সকুলা চ ভগিনী ভগৰতো পাদে সিরসা ৰন্দতি [ৰন্দন্তি (সী. স্যা. কং. পী.)], অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’’তি [পুচ্ছন্তীতি (সী. স্যা. কং. পী.)]. ‘‘কিং পন, মহারাজ, সোমা চ ভগিনী সকুলা চ ভগিনী অঞ্ঞং দূতং নালত্থু’’ন্তি? ‘‘অস্সোসুং খো, ভন্তে, সোমা চ ভগিনী সকুলা চ ভগিনী – ‘অজ্জ কির রাজা পসেনদি কোসলো পচ্ছাভত্তং ভুত্তপাতরাসো ভগৰন্তং দস্সনায উপসঙ্কমিস্সতী’তি. অথ খো, ভন্তে, সোমা চ ভগিনী সকুলা চ ভগিনী মং ভত্তাভিহারে উপসঙ্কমিত্ৰা এতদৰোচুং – ‘তেন হি, মহারাজ, অম্হাকম্পি ৰচনেন ভগৰতো পাদে সিরসা ৰন্দাহি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – সোমা চ ভগিনী সকুলা চ ভগিনী ভগৰতো পাদে সিরসা ৰন্দতি, অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’’’তি. ‘‘সুখিনিযো হোন্তু তা, মহারাজ, সোমা চ ভগিনী সকুলা চ ভগিনী’’তি.

৩৭৭. অথ খো রাজা পসেনদি কোসলো ভগৰন্তং এতদৰোচ – ‘‘সুতং মেতং, ভন্তে, সমণো গোতমো এৰমাহ – ‘নত্থি সো সমণো ৰা ব্রাহ্মণো ৰা যো সব্বঞ্ঞূ সব্বদস্সাৰী অপরিসেসং ঞাণদস্সনং পটিজানিস্সতি, নেতং ঠানং ৰিজ্জতী’তি. যে তে, ভন্তে, এৰমাহংসু – ‘সমণো গোতমো এৰমাহ – নত্থি সো সমণো ৰা ব্রাহ্মণো ৰা যো সব্বঞ্ঞূ সব্বদস্সাৰী অপরিসেসং ঞাণদস্সনং পটিজানিস্সতি, নেতং ঠানং ৰিজ্জতী’তি; কচ্চি তে, ভন্তে, ভগৰতো ৰুত্তৰাদিনো, ন চ ভগৰন্তং অভূতেন অব্ভাচিক্খন্তি, ধম্মস্স চানুধম্মং ব্যাকরোন্তি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’তি? ‘‘যে তে, মহারাজ, এৰমাহংসু – ‘সমণো গোতমো এৰমাহ – নত্থি সো সমণো ৰা ব্রাহ্মণো ৰা যো সব্বঞ্ঞূ সব্বদস্সাৰী অপরিসেসং ঞাণদস্সনং পটিজানিস্সতি, নেতং ঠানং ৰিজ্জতী’তি; ন মে তে ৰুত্তৰাদিনো, অব্ভাচিক্খন্তি চ পন মং তে অসতা অভূতেনা’’তি.

৩৭৮. অথ খো রাজা পসেনদি কোসলো ৰিটটূভং সেনাপতিং আমন্তেসি – ‘‘কো নু খো, সেনাপতি, ইমং কথাৰত্থুং রাজন্তেপুরে অব্ভুদাহাসী’’তি? ‘‘সঞ্জযো, মহারাজ, ব্রাহ্মণো আকাসগোত্তো’’তি. অথ খো রাজা পসেনদি কোসলো অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস, মম ৰচনেন সঞ্জযং ব্রাহ্মণং আকাসগোত্তং আমন্তেহি – ‘রাজা তং, ভন্তে, পসেনদি কোসলো আমন্তেতী’’’তি. ‘‘এৰং, দেৰা’’তি খো সো পুরিসো রঞ্ঞো পসেনদিস্স কোসলস্স পটিস্সুত্ৰা যেন সঞ্জযো ব্রাহ্মণো আকাসগোত্তো তেনুপসঙ্কমি; উপসঙ্কমিত্ৰা সঞ্জযং ব্রাহ্মণং আকাসগোত্তং এতদৰোচ – ‘‘রাজা তং, ভন্তে, পসেনদি কোসলো আমন্তেতী’’তি. অথ খো রাজা পসেনদি কোসলো ভগৰন্তং এতদৰোচ – ‘‘সিযা নু খো, ভন্তে, ভগৰতা অঞ্ঞদেৰ কিঞ্চি সন্ধায ভাসিতং, তঞ্চ জনো অঞ্ঞথাপি পচ্চাগচ্ছেয্য [পচ্চাগচ্ছেয্যাতি, অভিজানামি মহারাজ ৰাচং ভাসিতাতি (সী.)]. যথা কথং পন, ভন্তে, ভগৰা অভিজানাতি ৰাচং ভাসিতা’’তি? ‘‘এৰং খো অহং, মহারাজ, অভিজানামি ৰাচং ভাসিতা – ‘নত্থি সো সমণো ৰা ব্রাহ্মণো ৰা যো সকিদেৰ সব্বং ঞস্সতি, সব্বং দক্খিতি, নেতং ঠানং ৰিজ্জতী’’’তি. ‘‘হেতুরূপং, ভন্তে, ভগৰা আহ; সহেতুরূপং, ভন্তে, ভগৰা আহ – ‘নত্থি সো সমণো ৰা ব্রাহ্মণো ৰা যো সকিদেৰ সব্বং ঞস্সতি, সব্বং দক্খিতি, নেতং ঠানং ৰিজ্জতী’’’তি. ‘‘চত্তারোমে, ভন্তে, ৰণ্ণা – খত্তিযা, ব্রাহ্মণা, ৰেস্সা, সুদ্দা. ইমেসং নু খো, ভন্তে, চতুন্নং ৰণ্ণানং সিযা ৰিসেসো সিযা নানাকরণ’’ন্তি? ‘‘চত্তারোমে, মহারাজ, ৰণ্ণা – খত্তিযা, ব্রাহ্মণা, ৰেস্সা, সুদ্দা. ইমেসং খো, মহারাজ, চতুন্নং ৰণ্ণানং দ্ৰে ৰণ্ণা অগ্গমক্খাযন্তি – খত্তিযা চ ব্রাহ্মণা চ – যদিদং অভিৰাদনপচ্চুট্ঠানঅঞ্জলিকম্মসামীচিকম্মানী’’তি [সামিচিকম্মানন্তি (সী.)]. ‘‘নাহং, ভন্তে, ভগৰন্তং দিট্ঠধম্মিকং পুচ্ছামি; সম্পরাযিকাহং, ভন্তে, ভগৰন্তং পুচ্ছামি. চত্তারোমে, ভন্তে, ৰণ্ণা – খত্তিযা, ব্রাহ্মণা, ৰেস্সা, সুদ্দা. ইমেসং নু খো, ভন্তে, চতুন্নং ৰণ্ণানং সিযা ৰিসেসো সিযা নানাকরণ’’ন্তি?

৩৭৯. ‘‘পঞ্চিমানি, মহারাজ, পধানিযঙ্গানি. কতমানি পঞ্চ? ইধ, মহারাজ, ভিক্খু সদ্ধো হোতি, সদ্দহতি তথাগতস্স বোধিং – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি; অপ্পাবাধো হোতি অপ্পাতঙ্কো সমৰেপাকিনিযা গহণিযা সমন্নাগতো নাতিসীতায নাচ্চুণ্হায মজ্ঝিমায পধানক্খমায; অসঠো হোতি অমাযাৰী যথাভূতং অত্তানং আৰিকত্তা সত্থরি ৰা ৰিঞ্ঞূসু ৰা সব্রহ্মচারীসু; আরদ্ধৰীরিযো ৰিহরতি অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু; পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মাদুক্খক্খযগামিনিযা – ইমানি খো, মহারাজ, পঞ্চ পধানিযঙ্গানি. চত্তারোমে, মহারাজ, ৰণ্ণা – খত্তিযা, ব্রাহ্মণা, ৰেস্সা, সুদ্দা. তে চস্সু ইমেহি পঞ্চহি পধানিযঙ্গেহি সমন্নাগতা; এত্থ পন নেসং অস্স দীঘরত্তং হিতায সুখাযা’’তি. ‘‘চত্তারোমে, ভন্তে, ৰণ্ণা – খত্তিযা, ব্রাহ্মণা, ৰেস্সা, সুদ্দা. তে চস্সু ইমেহি পঞ্চহি পধানিযঙ্গেহি সমন্নাগতা; এত্থ পন নেসং, ভন্তে, সিযা ৰিসেসো সিযা নানাকরণ’’ন্তি? ‘‘এত্থ খো নেসাহং, মহারাজ, পধানৰেমত্ততং ৰদামি. সেয্যথাপিস্সু, মহারাজ, দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা, দ্ৰে হত্থিদম্মা ৰা অস্সদম্মা ৰা গোদম্মা ৰা অদন্তা অৰিনীতা. তং কিং মঞ্ঞসি, মহারাজ, যে তে দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা, অপি নু তে দন্তাৰ দন্তকারণং গচ্ছেয্যুং, দন্তাৰ দন্তভূমিং সম্পাপুণেয্যু’’ন্তি? ‘‘এৰং, ভন্তে’’. ‘‘যে পন তে দ্ৰে হত্থিদম্মা ৰা অস্সদম্মা ৰা গোদম্মা ৰা অদন্তা অৰিনীতা, অপি নু তে অদন্তাৰ দন্তকারণং গচ্ছেয্যুং, অদন্তাৰ দন্তভূমিং সম্পাপুণেয্যুং, সেয্যথাপি তে দ্ৰে হত্থিদম্মা ৰা অস্সদম্মা ৰা গোদম্মা ৰা সুদন্তা সুৰিনীতা’’তি? ‘‘নো হেতং, ভন্তে’’. ‘‘এৰমেৰ খো, মহারাজ, যং তং সদ্ধেন পত্তব্বং অপ্পাবাধেন অসঠেন অমাযাৰিনা আরদ্ধৰীরিযেন পঞ্ঞৰতা তং ৰত [তং তথা সো (ক.)] অস্সদ্ধো বহ্ৰাবাধো সঠো মাযাৰী কুসীতো দুপ্পঞ্ঞো পাপুণিস্সতীতি – নেতং ঠানং ৰিজ্জতী’’তি.

৩৮০. ‘‘হেতুরূপং, ভন্তে, ভগৰা আহ; সহেতুরূপং, ভন্তে, ভগৰা আহ. চত্তারোমে, ভন্তে, ৰণ্ণা – খত্তিযা, ব্রাহ্মণা, ৰেস্সা, সুদ্দা. তে চস্সু ইমেহি পঞ্চহি পধানিযঙ্গেহি সমন্নাগতা তে চস্সু সম্মপ্পধানা; এত্থ পন নেসং, ভন্তে, সিযা ৰিসেসো সিযা নানাকরণ’’ন্তি? ‘‘এত্থ খো [এত্থ খো পন (সী.)] নেসাহং, মহারাজ, ন কিঞ্চি নানাকরণং ৰদামি – যদিদং ৰিমুত্তিযা ৰিমুত্তিং. সেয্যথাপি, মহারাজ, পুরিসো সুক্খং সাককট্ঠং আদায অগ্গিং অভিনিব্বত্তেয্য, তেজো পাতুকরেয্য; অথাপরো পুরিসো সুক্খং সালকট্ঠং আদায অগ্গিং অভিনিব্বত্তেয্য, তেজো পাতুকরেয্য; অথাপরো পুরিসো সুক্খং অম্বকট্ঠং আদায অগ্গিং অভিনিব্বত্তেয্য, তেজো পাতুকরেয্য; অথাপরো পুরিসো সুক্খং উদুম্বরকট্ঠং আদায অগ্গিং অভিনিব্বত্তেয্য, তেজো পাতুকরেয্য. তং কিং মঞ্ঞসি, মহারাজ, সিযা নু খো তেসং অগ্গীনং নানাদারুতো অভিনিব্বত্তানং কিঞ্চি নানাকরণং অচ্চিযা ৰা অচ্চিং, ৰণ্ণেন ৰা ৰণ্ণং, আভায ৰা আভ’’ন্তি? ‘‘নো হেতং, ভন্তে’’. ‘‘এৰমেৰ খো, মহারাজ, যং তং তেজং ৰীরিযা নিম্মথিতং পধানাভিনিব্বত্তং [ৰিরিযং নিপ্ফরতি, তং পচ্ছাভিনিব্বত্তং (সী.)], নাহং তত্থ কিঞ্চি নানাকরণং ৰদামি – যদিদং ৰিমুত্তিযা ৰিমুত্তি’’ন্তি. ‘‘হেতুরূপং, ভন্তে, ভগৰা আহ; সহেতুরূপং, ভন্তে, ভগৰা আহ. কিং পন, ভন্তে, অত্থি দেৰা’’তি? ‘‘কিং পন ত্ৰং, মহারাজ, এৰং ৰদেসি – ‘কিং পন, ভন্তে, অত্থি দেৰা’’’তি? ‘‘যদি ৰা তে, ভন্তে, দেৰা আগন্তারো ইত্থত্তং যদি ৰা অনাগন্তারো ইত্থত্তং’’? ‘‘যে তে, মহারাজ, দেৰা সব্যাবজ্ঝা তে দেৰা আগন্তারো ইত্থত্তং, যে তে দেৰা অব্যাবজ্ঝা তে দেৰা অনাগন্তারো ইত্থত্ত’’ন্তি.

৩৮১. এৰং ৰুত্তে, ৰিট্টূভো সেনাপতি ভগৰন্তং এতদৰোচ – ‘‘যে তে, ভন্তে, দেৰা সব্যাবজ্ঝা আগন্তারো ইত্থত্তং তে দেৰা, যে তে দেৰা অব্যাবজ্ঝা অনাগন্তারো ইত্থত্তং তে দেৰে তম্হা ঠানা চাৰেস্সন্তি ৰা পব্বাজেস্সন্তি ৰা’’তি?

অথ খো আযস্মতো আনন্দস্স এতদহোসি – ‘‘অযং খো ৰিটটূভো সেনাপতি রঞ্ঞো পসেনদিস্স কোসলস্স পুত্তো; অহং ভগৰতো পুত্তো. অযং খো কালো যং পুত্তো পুত্তেন মন্তেয্যা’’তি. অথ খো আযস্মা আনন্দো ৰিটটূভং সেনাপতিং আমন্তেসি – ‘‘তেন হি, সেনাপতি, তং যেৰেত্থ পটিপুচ্ছিস্সামি; যথা তে খমেয্য তথা নং ব্যাকরেয্যাসি. তং কিং মঞ্ঞসি, সেনাপতি, যাৰতা রঞ্ঞো পসেনদিস্স কোসলস্স ৰিজিতং যত্থ চ রাজা পসেনদি কোসলো ইস্সরিযাধিপচ্চং রজ্জং কারেতি, পহোতি তত্থ রাজা পসেনদি কোসলো সমণং ৰা ব্রাহ্মণং ৰা পুঞ্ঞৰন্তং ৰা অপুঞ্ঞৰন্তং ৰা ব্রহ্মচরিযৰন্তং ৰা অব্রহ্মচরিযৰন্তং ৰা তম্হা ঠানা চাৰেতুং ৰা পব্বাজেতুং ৰা’’তি? ‘‘যাৰতা, ভো, রঞ্ঞো পসেনদিস্স কোসলস্স ৰিজিতং যত্থ চ রাজা পসেনদি কোসলো ইস্সরিযাধিপচ্চং রজ্জং কারেতি, পহোতি তত্থ রাজা পসেনদি কোসলো সমণং ৰা ব্রাহ্মণং ৰা পুঞ্ঞৰন্তং ৰা অপুঞ্ঞৰন্তং ৰা ব্রহ্মচরিযৰন্তং ৰা অব্রহ্মচরিযৰন্তং ৰা তম্হা ঠানা চাৰেতুং ৰা পব্বাজেতুং ৰা’’তি.

‘‘তং কিং মঞ্ঞসি, সেনাপতি, যাৰতা রঞ্ঞো পসেনদিস্স কোসলস্স অৰিজিতং যত্থ চ রাজা পসেনদি কোসলো ন ইস্সরিযাধিপচ্চং রজ্জং কারেতি, তত্থ পহোতি রাজা পসেনদি কোসলো সমণং ৰা ব্রাহ্মণং ৰা পুঞ্ঞৰন্তং ৰা অপুঞ্ঞৰন্তং ৰা ব্রহ্মচরিযৰন্তং ৰা অব্রহ্মচরিযৰন্তং ৰা তম্হা ঠানা চাৰেতুং ৰা পব্বাজেতুং ৰা’’তি? ‘‘যাৰতা, ভো, রঞ্ঞো পসেনদিস্স কোসলস্স অৰিজিতং যত্থ চ রাজা পসেনদি কোসলো ন ইস্সরিযাধিপচ্চং রজ্জং কারেতি, ন তত্থ পহোতি রাজা পসেনদি কোসলো সমণং ৰা ব্রাহ্মণং ৰা পুঞ্ঞৰন্তং ৰা অপুঞ্ঞৰন্তং ৰা ব্রহ্মচরিযৰন্তং ৰা অব্রহ্মচরিযৰন্তং ৰা তম্হা ঠানা চাৰেতুং ৰা পব্বাজেতুং ৰা’’তি.

‘‘তং কিং মঞ্ঞসি, সেনাপতি, সুতা তে দেৰা তাৰতিংসা’’তি? ‘‘এৰং, ভো. সুতা মে দেৰা তাৰতিংসা. ইধাপি ভোতা রঞ্ঞা পসেনদিনা কোসলেন সুতা দেৰা তাৰতিংসা’’তি. ‘‘তং কিং মঞ্ঞসি, সেনাপতি, পহোতি রাজা পসেনদি কোসলো দেৰে তাৰতিংসে তম্হা ঠানা চাৰেতুং ৰা পব্বাজেতুং ৰা’’তি? ‘‘দস্সনম্পি, ভো, রাজা পসেনদি কোসলো দেৰে তাৰতিংসে নপ্পহোতি, কুতো পন তম্হা ঠানা চাৰেস্সতি ৰা পব্বাজেস্সতি ৰা’’তি? ‘‘এৰমেৰ খো, সেনাপতি, যে তে দেৰা সব্যাবজ্ঝা আগন্তারো ইত্থত্তং তে দেৰা, যে তে দেৰা অব্যাবজ্ঝা অনাগন্তারো ইত্থত্তং তে দেৰে দস্সনাযপি নপ্পহোন্তি; কুতো পন তম্হা ঠানা চাৰেস্সন্তি ৰা পব্বাজেস্সন্তি ৰা’’তি?

৩৮২. অথ খো রাজা পসেনদি কোসলো ভগৰন্তং এতদৰোচ – ‘‘কোনামো অযং, ভন্তে, ভিক্খূ’’তি? ‘‘আনন্দো নাম, মহারাজা’’তি. ‘‘আনন্দো ৰত, ভো, আনন্দরূপো ৰত, ভো! হেতুরূপং, ভন্তে, আযস্মা আনন্দো আহ; সহেতুরূপং, ভন্তে, আযস্মা আনন্দো আহ. কিং পন, ভন্তে, অত্থি ব্রহ্মা’’তি? ‘‘কিং পন ত্ৰং, মহারাজ, এৰং ৰদেসি – ‘কিং পন, ভন্তে, অত্থি ব্রহ্মা’’’তি? ‘‘যদি ৰা সো, ভন্তে, ব্রহ্মা আগন্তা ইত্থত্তং, যদি ৰা অনাগন্তা ইত্থত্ত’’ন্তি? ‘‘যো সো, মহারাজ, ব্রহ্মা সব্যাবজ্ঝো সো ব্রহ্মা আগন্তা ইত্থত্তং, যো সো ব্রহ্মা অব্যাবজ্ঝো সো ব্রহ্মা অনাগন্তা ইত্থত্ত’’ন্তি. অথ খো অঞ্ঞতরো পুরিসো রাজানং পসেনদিং কোসলং এতদৰোচ – ‘‘সঞ্জযো, মহারাজ, ব্রাহ্মণো আকাসগোত্তো আগতো’’তি. অথ খো রাজা পসেনদি কোসলো সঞ্জযং ব্রাহ্মণং আকাসগোত্তং এতদৰোচ – ‘‘কো নু খো, ব্রাহ্মণ, ইমং কথাৰত্থুং রাজন্তেপুরে অব্ভুদাহাসী’’তি? ‘‘ৰিটটূভো, মহারাজ, সেনাপতী’’তি. ৰিটটূভো সেনাপতি এৰমাহ – ‘‘সঞ্জযো, মহারাজ, ব্রাহ্মণো আকাসগোত্তো’’তি. অথ খো অঞ্ঞতরো পুরিসো রাজানং পসেনদিং কোসলং এতদৰোচ – ‘‘যানকালো, মহারাজা’’তি.

অথ খো রাজা পসেনদি কোসলো ভগৰন্তং এতদৰোচ – ‘‘সব্বঞ্ঞুতং মযং, ভন্তে, ভগৰন্তং অপুচ্ছিম্হা, সব্বঞ্ঞুতং ভগৰা ব্যাকাসি; তঞ্চ পনম্হাকং রুচ্চতি চেৰ খমতি চ, তেন চম্হা অত্তমনা. চাতুৰণ্ণিসুদ্ধিং মযং, ভন্তে, ভগৰন্তং অপুচ্ছিম্হা, চাতুৰণ্ণিসুদ্ধিং ভগৰা ব্যাকাসি; তঞ্চ পনম্হাকং রুচ্চতি চেৰ খমতি চ, তেন চম্হা অত্তমনা. অধিদেৰে মযং, ভন্তে, ভগৰন্তং অপুচ্ছিম্হা, অধিদেৰে ভগৰা ব্যাকাসি; তঞ্চ পনম্হাকং রুচ্চতি চেৰ খমতি চ, তেন চম্হা অত্তমনা. অধিব্রহ্মানং মযং, ভন্তে, ভগৰন্তং অপুচ্ছিম্হা, অধিব্রহ্মানং ভগৰা ব্যাকাসি; তঞ্চ পনম্হাকং রুচ্চতি চেৰ খমতি চ, তেন চম্হা অত্তমনা. যং যদেৰ চ মযং ভগৰন্তং অপুচ্ছিম্হা তং তদেৰ ভগৰা ব্যাকাসি; তঞ্চ পনম্হাকং রুচ্চতি চেৰ খমতি চ, তেন চম্হা অত্তমনা. হন্দ, চ দানি মযং, ভন্তে, গচ্ছাম; বহুকিচ্চা মযং বহুকরণীযা’’তি. ‘‘যস্সদানি ত্ৰং, মহারাজ, কালং মঞ্ঞসী’’তি. অথ খো রাজা পসেনদি কোসলো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামীতি.

কণ্ণকত্থলসুত্তং নিট্ঠিতং দসমং.

রাজৰগ্গো নিট্ঠিতো চতুত্থো.