৩. পরিব্বাজকৰগ্গো

১. তেৰিজ্জৰচ্ছসুত্তং

১৮৫. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং. তেন খো পন সমযেন ৰচ্ছগোত্তো পরিব্বাজকো একপুণ্ডরীকে পরিব্বাজকারামে পটিৰসতি. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায ৰেসালিং পিণ্ডায পাৰিসি. অথ খো ভগৰতো এতদহোসি – ‘‘অতিপ্পগো খো তাৰ ৰেসালিযং পিণ্ডায চরিতুং; যংনূনাহং যেন একপুণ্ডরীকো পরিব্বাজকারামো যেন ৰচ্ছগোত্তো পরিব্বাজকো তেনুপসঙ্কমেয্য’’ন্তি. অথ খো ভগৰা যেন একপুণ্ডরীকো পরিব্বাজকারামো যেন ৰচ্ছগোত্তো পরিব্বাজকো তেনুপসঙ্কমি. অদ্দসা খো ৰচ্ছগোত্তো পরিব্বাজকো ভগৰন্তং দূরতোৰ আগচ্ছন্তং. দিস্ৰান ভগৰন্তং এতদৰোচ – ‘‘এতু খো, ভন্তে, ভগৰা. স্ৰাগতং [সাগতং (সী. পী.)], ভন্তে, ভগৰতো. চিরস্সং খো, ভন্তে, ভগৰা ইমং পরিযাযমকাসি যদিদং ইধাগমনায. নিসীদতু, ভন্তে, ভগৰা ইদমাসনং পঞ্ঞত্ত’’ন্তি. নিসীদি ভগৰা পঞ্ঞত্তে আসনে. ৰচ্ছগোত্তোপি খো পরিব্বাজকো অঞ্ঞতরং নীচং আসনং গহেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘সুতং মেতং, ভন্তে – ‘সমণো গোতমো সব্বঞ্ঞূ সব্বদস্সাৰী, অপরিসে+সং ঞাণদস্সনং পটিজানাতি, চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি. যে তে, ভন্তে, এৰমাহংসু – ‘সমণো গোতমো সব্বঞ্ঞূ সব্বদস্সাৰী, অপরিসেসং ঞাণদস্সনং পটিজানাতি, চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি, কচ্চি তে, ভন্তে, ভগৰতো ৰুত্তৰাদিনো, ন চ ভগৰন্তং অভূতেন অব্ভাচিক্খন্তি, ধম্মস্স চানুধম্মং ব্যাকরোন্তি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’তি? ‘‘যে তে, ৰচ্ছ, এৰমাহংসু – ‘সমণো গোতমো সব্বঞ্ঞূ সব্বদস্সাৰী, অপরিসেসং ঞাণদস্সনং পটিজানাতি, চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি, ন মে তে ৰুত্তৰাদিনো, অব্ভাচিক্খন্তি চ পন মং অসতা অভূতেনা’’তি.

১৮৬. ‘‘কথং ব্যাকরমানা পন মযং, ভন্তে, ৰুত্তৰাদিনো চেৰ ভগৰতো অস্সাম, ন চ ভগৰন্তং অভূতেন অব্ভাচিক্খেয্যাম, ধম্মস্স চানুধম্মং ব্যাকরেয্যাম, ন চ কোচি সহধম্মিকো ৰাদানুৰাদো গারয্হং ঠানং আগচ্ছেয্যা’’তি?

‘‘‘তেৰিজ্জো সমণো গোতমো’তি খো, ৰচ্ছ, ব্যাকরমানো ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুৰাদো গারয্হং ঠানং আগচ্ছেয্য. অহঞ্হি, ৰচ্ছ, যাৰদেৰ আকঙ্খামি অনেকৰিহিতং পুব্বেনিৰাসং অনুস্সরামি, সেয্যথিদং – একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরামি. অহঞ্হি, ৰচ্ছ, যাৰদেৰ আকঙ্খামি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সামি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে…পে… যথাকম্মূপগে সত্তে পজানামি. অহঞ্হি, ৰচ্ছ, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরামি.

‘‘‘তেৰিজ্জো সমণো গোতমো’তি খো, ৰচ্ছ, ব্যাকরমানো ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুৰাদো গারয্হং ঠানং আগচ্ছেয্যা’’তি.

এৰং ৰুত্তে, ৰচ্ছগোত্তো পরিব্বাজকো ভগৰন্তং এতদৰোচ – ‘‘অত্থি নু খো, ভো গোতম, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকরো’’তি? ‘‘নত্থি খো, ৰচ্ছ, কোচি গিহী গিহিসংযোজনং অপ্পহায কাযস্স ভেদা দুক্খস্সন্তকরো’’তি.

‘‘অত্থি পন, ভো গোতম, কোচি গিহী গিহিসংযোজনং অপ্পহায কাযস্স ভেদা সগ্গূপগো’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যে গিহী গিহিসংযোজনং অপ্পহায কাযস্স ভেদা সগ্গূপগা’’তি [‘‘অত্থি খো ৰচ্ছ কোচি গিহী গিহিসংযোজনং অপ্পহায কাযস্স ভেদা সগ্গূপগোতি’’. (ক.)].

‘‘অত্থি নু খো, ভো গোতম, কোচি আজীৰকো [আজীৰিকো (ক.)] কাযস্স ভেদা দুক্খস্সন্তকরো’’তি? ‘‘নত্থি খো, ৰচ্ছ, কোচি আজীৰকো কাযস্স ভেদা দুক্খস্সন্তকরো’’তি.

‘‘অত্থি পন, ভো গোতম, কোচি আজীৰকো কাযস্স ভেদা সগ্গূপগো’’তি? ‘‘ইতো খো সো, ৰচ্ছ, একনৰুতো কপ্পো [ইতো কো ৰচ্ছ একনৰুতে কপ্পে (ক.)] যমহং অনুস্সরামি, নাভিজানামি কঞ্চি আজীৰকং সগ্গূপগং অঞ্ঞত্র একেন; সোপাসি কম্মৰাদী কিরিযৰাদী’’তি. ‘‘এৰং সন্তে, ভো গোতম, সুঞ্ঞং অদুং তিত্থাযতনং অন্তমসো সগ্গূপগেনপী’’তি? ‘‘এৰং, ৰচ্ছ, সুঞ্ঞং অদুং তিত্থাযতনং অন্তমসো সগ্গূপগেনপী’’তি.

ইদমৰোচ ভগৰা. অত্তমনো ৰচ্ছগোত্তো পরিব্বাজকো ভগৰতো ভাসিতং অভিনন্দীতি.

তেৰিজ্জৰচ্ছসুত্তং নিট্ঠিতং পঠমং.

২. অগ্গিৰচ্ছসুত্তং

১৮৭. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ –

‘‘কিং নু খো, ভো গোতম, ‘সস্সতো লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি [এৰংদিট্ঠী (সী. স্যা. কং. ক.)] ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘সস্সতো লোকো, ইদমেৰ সচ্চং মোঘমঞ্ঞ’’’ন্তি.

‘‘কিং পন, ভো গোতম, ‘অসস্সতো লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অসস্সতো লোকো, ইদমেৰ সচ্চং মোঘমঞ্ঞ’’’ন্তি.

‘‘কিং নু খো, ভো গোতম, ‘অন্তৰা লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অন্তৰা লোকো, ইদমেৰ সচ্চং মোঘমঞ্ঞ’’’ন্তি.

‘‘কিং পন, ভো গোতম, ‘অনন্তৰা লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অনন্তৰা লোকো, ইদমেৰ সচ্চং মোঘমঞ্ঞ’’’ন্তি.

‘‘কিং নু খো, ভো গোতম, ‘তং জীৰং তং সরীরং, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘তং জীৰং তং সরীরং, ইদমেৰ সচ্চং মোঘমঞ্ঞ’’’ন্তি.

‘‘কিং পন, ভো গোতম, ‘অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞ’’’ন্তি.

‘‘কিং নু খো, ভো গোতম, ‘হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি.

‘‘কিং পন, ভো গোতম, ‘ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘ন হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি.

‘‘কিং নু খো, ভো গোতম, ‘হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি.

‘‘কিং পন, ভো গোতম, ‘নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি.

১৮৮. ‘‘‘কিং নু খো, ভো গোতম, সস্সতো লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – সস্সতো লোকো, ইদমেৰ সচ্চং মোঘমঞ্ঞ’ন্তি ৰদেসি [মোঘমঞ্ঞন্তীতি ৰদেসি (সী.), মোঘমঞ্ঞন্তি ইতি ৰদেসি (?)]. ‘কিং পন, ভো গোতম, অসস্সতো লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অসস্সতো লোকো, ইদমেৰ সচ্চং মোঘমঞ্ঞ’ন্তি ৰদেসি. ‘কিং নু খো, ভো গোতম, অন্তৰা লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অন্তৰা লোকো, ইদমেৰ সচ্চং মোঘমঞ্ঞ’ন্তি ৰদেসি. ‘কিং পন, ভো গোতম, অনন্তৰা লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অনন্তৰা লোকো, ইদমেৰ সচ্চং মোঘমঞ্ঞ’ন্তি ৰদেসি. ‘কিং নু খো, ভো গোতম, তং জীৰং তং সরীরং, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – তং জীৰং তং সরীরং, ইদমেৰ সচ্চং মোঘমঞ্ঞ’ন্তি ৰদেসি. ‘কিং পন, ভো গোতম, অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞ’ন্তি ৰদেসি. ‘কিং নু খো, ভো গোতম, হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি.

‘‘‘কিং পন, ভো গোতম, ন হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি. ‘কিং নু খো, ভো গোতম, হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি. ‘কিং পন, ভো গোতম, নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি.

‘‘কিং পন ভো গোতমো আদীনৰং সম্পস্সমানো এৰং ইমানি সব্বসো দিট্ঠিগতানি অনুপগতো’’তি?

১৮৯. ‘‘‘সস্সতো লোকো’তি খো, ৰচ্ছ, দিট্ঠিগতমেতং দিট্ঠিগহনং দিট্ঠিকন্তারো [দিট্ঠিকন্তারং (সী. পী.)] দিট্ঠিৰিসূকং দিট্ঠিৰিপ্ফন্দিতং দিট্ঠিসংযোজনং সদুক্খং সৰিঘাতং সউপাযাসং সপরিল়াহং, ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি. ‘অসস্সতো লোকো’তি খো, ৰচ্ছ…পে… ‘অন্তৰা লোকো’তি খো, ৰচ্ছ…পে… ‘অনন্তৰা লোকো’তি খো, ৰচ্ছ…পে… ‘তং জীৰং তং সরীর’ন্তি খো, ৰচ্ছ…পে… ‘অঞ্ঞং জীৰং অঞ্ঞং সরীর’ন্তি খো, ৰচ্ছ…পে… ‘হোতি তথাগতো পরং মরণা’তি খো, ৰচ্ছ …পে… ‘ন হোতি তথাগতো পরং মরণা’তি খো, ৰচ্ছ…পে… ‘হোতি চ ন চ হোতি তথাগতো পরং মরণা’তি খো, ৰচ্ছ…পে… ‘নেৰ হোতি ন ন হোতি তথাগতো পরং মরণা’তি খো, ৰচ্ছ, দিট্ঠিগতমেতং দিট্ঠিগহনং দিট্ঠিকন্তারো দিট্ঠিৰিসূকং দিট্ঠিৰিপ্ফন্দিতং দিট্ঠিসংযোজনং সদুক্খং সৰিঘাতং সউপাযাসং সপরিল়াহং, ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি. ইমং খো অহং, ৰচ্ছ, আদীনৰং সম্পস্সমানো এৰং ইমানি সব্বসো দিট্ঠিগতানি অনুপগতো’’তি.

‘‘অত্থি পন ভোতো গোতমস্স কিঞ্চি দিট্ঠিগত’’ন্তি? ‘‘দিট্ঠিগতন্তি খো, ৰচ্ছ, অপনীতমেতং তথাগতস্স. দিট্ঠঞ্হেতং, ৰচ্ছ, তথাগতেন – ‘ইতি রূপং, ইতি রূপস্স সমুদযো, ইতি রূপস্স অত্থঙ্গমো; ইতি ৰেদনা, ইতি ৰেদনায সমুদযো, ইতি ৰেদনায অত্থঙ্গমো; ইতি সঞ্ঞা, ইতি সঞ্ঞায সমুদযো, ইতি সঞ্ঞায অত্থঙ্গমো; ইতি সঙ্খারা, ইতি সঙ্খারানং সমুদযো, ইতি সঙ্খারানং অত্থঙ্গমো; ইতি ৰিঞ্ঞাণং, ইতি ৰিঞ্ঞাণস্স সমুদযো, ইতি ৰিঞ্ঞাণস্স অত্থঙ্গমো’তি. তস্মা তথাগতো সব্বমঞ্ঞিতানং সব্বমথিতানং সব্বঅহংকারমমংকারমানানুসযানং খযা ৰিরাগা নিরোধা চাগা পটিনিস্সগ্গা অনুপাদা ৰিমুত্তোতি ৰদামী’’তি.

১৯০. ‘‘এৰং ৰিমুত্তচিত্তো পন, ভো গোতম, ভিক্খু কুহিং উপপজ্জতী’’তি? ‘‘উপপজ্জতীতি খো, ৰচ্ছ, ন উপেতি’’. ‘‘তেন হি, ভো গোতম, ন উপপজ্জতী’’তি? ‘‘ন উপপজ্জতীতি খো, ৰচ্ছ, ন উপেতি’’. ‘‘তেন হি, ভো গোতম, উপপজ্জতি চ ন চ উপপজ্জতী’’তি? ‘‘উপপজ্জতি চ ন চ উপপজ্জতীতি খো, ৰচ্ছ, ন উপেতি’’. ‘‘তেন হি, ভো গোতম, নেৰ উপপজ্জতি ন ন উপপজ্জতী’’তি? ‘‘নেৰ উপপজ্জতি ন ন উপপজ্জতীতি খো, ৰচ্ছ, ন উপেতি’’.

‘‘‘এৰং ৰিমুত্তচিত্তো পন, ভো গোতম, ভিক্খু কুহিং উপপজ্জতী’তি ইতি পুট্ঠো সমানো ‘উপপজ্জতীতি খো, ৰচ্ছ, ন উপেতী’তি ৰদেসি. ‘তেন হি, ভো গোতম, ন উপপজ্জতী’তি ইতি পুট্ঠো সমানো ‘ন উপপজ্জতীতি খো, ৰচ্ছ, ন উপেতী’তি ৰদেসি. ‘তেন হি, ভো গোতম, উপপজ্জতি চ ন চ উপপজ্জতী’তি ইতি পুট্ঠো সমানো ‘উপপজ্জতি চ ন চ উপপজ্জতীতি খো, ৰচ্ছ, ন উপেতী’তি ৰদেসি. ‘তেন হি, ভো গোতম, নেৰ উপপজ্জতি ন ন উপপজ্জতী’তি ইতি পুট্ঠো সমানো ‘নেৰ উপপজ্জতি ন ন উপপজ্জতীতি খো, ৰচ্ছ, ন উপেতী’তি ৰদেসি. এত্থাহং, ভো গোতম, অঞ্ঞাণমাপাদিং, এত্থ সম্মোহমাপাদিং. যাপি মে এসা ভোতো গোতমস্স পুরিমেন কথাসল্লাপেন অহু পসাদমত্তা সাপি মে এতরহি অন্তরহিতা’’তি. ‘‘অলঞ্হি তে, ৰচ্ছ, অঞ্ঞাণায, অলং সম্মোহায. গম্ভীরো হাযং, ৰচ্ছ, ধম্মো দুদ্দসো দুরনুবোধো সন্তো পণীতো অতক্কাৰচরো নিপুণো পণ্ডিতৰেদনীযো. সো তযা দুজ্জানো অঞ্ঞদিট্ঠিকেন অঞ্ঞখন্তিকেন অঞ্ঞরুচিকেন অঞ্ঞত্রযোগেন [অঞ্ঞত্রাযোগেন (দী. নি. ১.৪২০)] অঞ্ঞত্রাচরিযকেন’’ [অঞ্ঞত্থাচরিযকেন (সী. স্যা. কং. পী.)].

১৯১. ‘‘তেন হি, ৰচ্ছ, তঞ্ঞেৰেত্থ পটিপুচ্ছিস্সামি; যথা তে খমেয্য তথা নং ব্যাকরেয্যাসি. তং কিং মঞ্ঞসি, ৰচ্ছ, সচে তে পুরতো অগ্গি জলেয্য, জানেয্যাসি ত্ৰং – ‘অযং মে পুরতো অগ্গি জলতী’’’তি? ‘‘সচে মে, ভো গোতম, পুরতো অগ্গি জলেয্য, জানেয্যাহং – ‘অযং মে পুরতো অগ্গি জলতী’’’তি.

‘‘সচে পন তং, ৰচ্ছ, এৰং পুচ্ছেয্য – ‘যো তে অযং পুরতো অগ্গি জলতি অযং অগ্গি কিং পটিচ্চ জলতী’তি, এৰং পুট্ঠো ত্ৰং, ৰচ্ছ, কিন্তি ব্যাকরেয্যাসী’’তি? ‘‘সচে মং, ভো গোতম, এৰং পুচ্ছেয্য – ‘যো তে অযং পুরতো অগ্গি জলতি অযং অগ্গি কিং পটিচ্চ জলতী’তি, এৰং পুট্ঠো অহং, ভো গোতম, এৰং ব্যাকরেয্যং – ‘যো মে অযং পুরতো অগ্গি জলতি অযং অগ্গি তিণকট্ঠুপাদানং পটিচ্চ জলতী’’’তি.

‘‘সচে তে, ৰচ্ছ, পুরতো সো অগ্গি নিব্বাযেয্য, জানেয্যাসি ত্ৰং – ‘অযং মে পুরতো অগ্গি নিব্বুতো’’’তি? ‘‘সচে মে, ভো গোতম, পুরতো সো অগ্গি নিব্বাযেয্য, জানেয্যাহং – ‘অযং মে পুরতো অগ্গি নিব্বুতো’’’তি.

‘‘সচে পন তং, ৰচ্ছ, এৰং পুচ্ছেয্য – ‘যো তে অযং পুরতো অগ্গি নিব্বুতো সো অগ্গি ইতো কতমং দিসং গতো – পুরত্থিমং ৰা দক্খিণং ৰা পচ্ছিমং ৰা উত্তরং ৰা’তি, এৰং পুট্ঠো ত্ৰং, ৰচ্ছ, কিন্তি ব্যাকরেয্যাসী’’তি? ‘‘ন উপেতি, ভো গোতম, যঞ্হি সো, ভো গোতম, অগ্গি তিণকট্ঠুপাদানং পটিচ্চ অজলি [জলতি (স্যা. কং. ক.)] তস্স চ পরিযাদানা অঞ্ঞস্স চ অনুপহারা অনাহারো নিব্বুতো ত্ৰেৰ সঙ্খ্যং গচ্ছতী’’তি.

১৯২. ‘‘এৰমেৰ খো, ৰচ্ছ, যেন রূপেন তথাগতং পঞ্ঞাপযমানো পঞ্ঞাপেয্য তং রূপং তথাগতস্স পহীনং উচ্ছিন্নমূলং তালাৰত্থুকতং অনভাৰংকতং আযতিং অনুপ্পাদধম্মং. রূপসঙ্খযৰিমুত্তো [রূপসঙ্খাৰিমুত্তো (সী. স্যা. কং. পী.) এৰং ৰেদনাসঙ্খযাদীসুপি] খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো. উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি.

‘‘যায ৰেদনায তথাগতং পঞ্ঞাপযমানো পঞ্ঞাপেয্য সা ৰেদনা তথাগতস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. ৰেদনাসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো. উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি.

‘‘যায সঞ্ঞায তথাগতং পঞ্ঞাপযমানো পঞ্ঞাপেয্য সা সঞ্ঞা তথাগতস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. সঞ্ঞাসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো. উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি.

‘‘যেহি সঙ্খারেহি তথাগতং পঞ্ঞাপযমানো পঞ্ঞাপেয্য তে সঙ্খারা তথাগতস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. সঙ্খারসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো. উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি.

‘‘যেন ৰিঞ্ঞাণেন তথাগতং পঞ্ঞাপযমানো পঞ্ঞাপেয্য তং ৰিঞ্ঞাণং তথাগতস্স পহীনং উচ্ছিন্নমূলং তালাৰত্থুকতং অনভাৰংকতং আযতিং অনুপ্পাদধম্মং. ৰিঞ্ঞাণসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো. উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি’’.

এৰং ৰুত্তে, ৰচ্ছগোত্তো পরিব্বাজকো ভগৰন্তং এতদৰোচ – ‘‘সেয্যথাপি, ভো গোতম, গামস্স ৰা নিগমস্স ৰা অৰিদূরে মহাসালরুক্খো. তস্স অনিচ্চতা সাখাপলাসা পলুজ্জেয্যুং [সাখাপলাসং পলুজ্জেয্য], তচপপটিকা পলুজ্জেয্যুং, ফেগ্গূ পলুজ্জেয্যুং [ফেগ্গু পলুজ্জেয্য (সী. স্যা. কং. পী.)]; সো অপরেন সমযেন অপগতসাখাপলাসো অপগততচপপটিকো অপগতফেগ্গুকো সুদ্ধো অস্স, সারে পতিট্ঠিতো; এৰমেৰ ভোতো গোতমস্স পাৰচনং অপগতসাখাপলাসং অপগততচপপটিকং অপগতফেগ্গুকং সুদ্ধং, সারে পতিট্ঠিতং. অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি.

অগ্গিৰচ্ছসুত্তং নিট্ঠিতং দুতিযং.

৩. মহাৰচ্ছসুত্তং

১৯৩. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘দীঘরত্তাহং ভোতা গোতমেন সহকথী. সাধু মে ভৰং গোতমো সংখিত্তেন কুসলাকুসলং দেসেতূ’’তি. ‘‘সংখিত্তেনপি খো তে অহং, ৰচ্ছ, কুসলাকুসলং দেসেয্যং, ৰিত্থারেনপি খো তে অহং, ৰচ্ছ, কুসলাকুসলং দেসেয্যং; অপি চ তে অহং, ৰচ্ছ, সংখিত্তেন কুসলাকুসলং দেসেস্সামি. তং সুণাহি, সাধুকং মনসি করোহি, ভাসিস্সামী’’তি. ‘‘এৰং, ভো’’তি খো ৰচ্ছগোত্তো পরিব্বাজকো ভগৰতো পচ্চস্সোসি. ভগৰা এতদৰোচ –

১৯৪. ‘‘লোভো খো, ৰচ্ছ, অকুসলং, অলোভো কুসলং; দোসো খো, ৰচ্ছ, অকুসলং, অদোসো কুসলং; মোহো খো, ৰচ্ছ, অকুসলং, অমোহো কুসলং. ইতি খো, ৰচ্ছ, ইমে তযো ধম্মা অকুসলা, তযো ধম্মা কুসলা.

‘‘পাণাতিপাতো খো, ৰচ্ছ, অকুসলং, পাণাতিপাতা ৰেরমণী কুসলং; অদিন্নাদানং খো, ৰচ্ছ, অকুসলং, অদিন্নাদানা ৰেরমণী কুসলং; কামেসুমিচ্ছাচারো খো, ৰচ্ছ, অকুসলং, কামেসুমিচ্ছাচারা ৰেরমণী কুসলং; মুসাৰাদো খো, ৰচ্ছ, অকুসলং, মুসাৰাদা ৰেরমণী কুসলং; পিসুণা ৰাচা খো, ৰচ্ছ, অকুসলং, পিসুণায ৰাচায ৰেরমণী কুসলং; ফরুসা ৰাচা খো, ৰচ্ছ, অকুসলং, ফরুসায ৰাচায ৰেরমণী কুসলং; সম্ফপ্পলাপো খো, ৰচ্ছ, অকুসলং, সম্ফপ্পলাপা ৰেরমণী কুসলং; অভিজ্ঝা খো, ৰচ্ছ, অকুসলং, অনভিজ্ঝা কুসলং; ব্যাপাদো খো, ৰচ্ছ, অকুসলং, অব্যাপাদো কুসলং; মিচ্ছাদিট্ঠি খো, ৰচ্ছ, অকুসলং সম্মাদিট্ঠি কুসলং. ইতি খো, ৰচ্ছ, ইমে দস ধম্মা অকুসলা, দস ধম্মা কুসলা.

‘‘যতো খো, ৰচ্ছ, ভিক্খুনো তণ্হা পহীনা হোতি উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা, সো হোতি ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো’’তি.

১৯৫. ‘‘তিট্ঠতু ভৰং গোতমো. অত্থি পন তে ভোতো গোতমস্স একভিক্খুপি সাৰকো যো আসৰানং খযা [সাৰকো আসৰানং খযা (সী. স্যা. কং. পী.) এৰমুপরিপি] অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যে ভিক্খূ মম সাৰকা আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি.

‘‘তিট্ঠতু ভৰং গোতমো, তিট্ঠন্তু ভিক্খূ. অত্থি পন ভোতো গোতমস্স একা ভিক্খুনীপি সাৰিকা যা আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যা ভিক্খুনিযো মম সাৰিকা আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি.

‘‘তিট্ঠতু ভৰং গোতমো, তিট্ঠন্তু ভিক্খূ, তিট্ঠন্তু ভিক্খুনিযো. অত্থি পন ভোতো গোতমস্স একুপাসকোপি সাৰকো গিহী ওদাতৰসনো ব্রহ্মচারী যো পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যে উপাসকা মম সাৰকা গিহী ওদাতৰসনা ব্রহ্মচারিনো পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনো অনাৰত্তিধম্মা তস্মা লোকা’’তি.

‘‘তিট্ঠতু ভৰং গোতমো, তিট্ঠন্তু ভিক্খূ, তিট্ঠন্তু ভিক্খুনিযো, তিট্ঠন্তু উপাসকা গিহী ওদাতৰসনা ব্রহ্মচারিনো. অত্থি পন ভোতো গোতমস্স একুপাসকোপি সাৰকো গিহী ওদাতৰসনো কামভোগী সাসনকরো ওৰাদপ্পটিকরো যো তিণ্ণৰিচিকিচ্ছো ৰিগতকথংকথো ৰেসারজ্জপ্পত্তো অপরপ্পচ্চযো সত্থুসাসনে ৰিহরতী’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যে উপাসকা মম সাৰকা গিহী ওদাতৰসনা কামভোগিনো সাসনকরা ওৰাদপ্পটিকরা তিণ্ণৰিচিকিচ্ছা ৰিগতকথংকথা ৰেসারজ্জপ্পত্তা অপরপ্পচ্চযা সত্থুসাসনে ৰিহরন্তী’’তি.

‘‘তিট্ঠতু ভৰং গোতমো, তিট্ঠন্তু ভিক্খূ, তিট্ঠন্তু ভিক্খুনিযো, তিট্ঠন্তু উপাসকা গিহী ওদাতৰসনা ব্রহ্মচারিনো, তিট্ঠন্তু উপাসকা গিহী ওদাতৰসনা কামভোগিনো. অত্থি পন ভোতো গোতমস্স একুপাসিকাপি সাৰিকা গিহিনী ওদাতৰসনা ব্রহ্মচারিনী যা পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনী অনাৰত্তিধম্মা তস্মা লোকা’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যা উপাসিকা মম সাৰিকা গিহিনিযো ওদাতৰসনা ব্রহ্মচারিনিযো পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনিযো অনাৰত্তিধম্মা তস্মা লোকা’’তি.

‘‘তিট্ঠতু ভৰং গোতমো, তিট্ঠন্তু ভিক্খূ, তিট্ঠন্তু ভিক্খুনিযো, তিট্ঠন্তু উপাসকা গিহী ওদাতৰসনা ব্রহ্মচারিনো, তিট্ঠন্তু উপাসকা গিহী ওদাতৰসনা কামভোগিনো, তিট্ঠন্তু উপাসিকা গিহিনিযো ওদাতৰসনা ব্রহ্মচারিনিযো. অত্থি পন ভোতো গোতমস্স একুপাসিকাপি সাৰিকা গিহিনী ওদাতৰসনা কামভোগিনী সাসনকরা ওৰাদপ্পটিকরা যা তিণ্ণৰিচিকিচ্ছা ৰিগতকথংকথা ৰেসারজ্জপ্পত্তা অপরপ্পচ্চযা সত্থুসাসনে ৰিহরতী’’তি? ‘‘ন খো, ৰচ্ছ, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যা উপাসিকা মম সাৰিকা গিহিনিযো ওদাতৰসনা কামভোগিনিযো সাসনকরা ওৰাদপ্পটিকরা তিণ্ণৰিচ্ছিকিচ্ছা ৰিগতকথংকথা ৰেসারজ্জপ্পত্তা অপরপ্পচ্চযা সত্থুসাসনে ৰিহরন্তী’’তি.

১৯৬. ‘‘সচে হি, ভো গোতম, ইমং ধম্মং ভৰংযেৰ গোতমো আরাধকো অভৰিস্স, নো চ খো ভিক্খূ আরাধকা অভৰিস্সংসু; এৰমিদং ব্রহ্মচরিযং অপরিপূরং অভৰিস্স তেনঙ্গেন. যস্মা চ খো, ভো গোতম, ইমং ধম্মং ভৰঞ্চেৰ গোতমো আরাধকো ভিক্খূ চ আরাধকা; এৰমিদং ব্রহ্মচরিযং পরিপূরং তেনঙ্গেন.

‘‘সচে হি, ভো গোতম, ইমং ধম্মং ভৰঞ্চেৰ গোতমো আরাধকো অভৰিস্স, ভিক্খূ চ আরাধকা অভৰিস্সংসু, নো চ খো ভিক্খুনিযো আরাধিকা অভৰিস্সংসু; এৰমিদং ব্রহ্মচরিযং অপরিপূরং অভৰিস্স তেনঙ্গেন. যস্মা চ খো, ভো গোতম, ইমং ধম্মং ভৰঞ্চেৰ গোতমো আরাধকো, ভিক্খূ চ আরাধকা, ভিক্খুনিযো চ আরাধিকা; এৰমিদং ব্রহ্মচরিযং পরিপূরং তেনঙ্গেন.

‘‘সচে হি, ভো গোতম, ইমং ধম্মং ভৰঞ্চেৰ গোতমো আরাধকো অভৰিস্স, ভিক্খূ চ আরাধকা অভৰিস্সংসু, ভিক্খুনিযো চ আরাধিকা অভৰিস্সংসু, নো চ খো উপাসকা গিহী ওদাতৰসনা ব্রহ্মচারিনো আরাধকা অভৰিস্সংসু; এৰমিদং ব্রহ্মচরিযং অপরিপূরং অভৰিস্স তেনঙ্গেন. যস্মা চ খো, ভো গোতম, ইমং ধম্মং ভৰঞ্চেৰ গোতমো আরাধকো, ভিক্খূ চ আরাধকা, ভিক্খুনিযো চ আরাধিকা, উপাসকা চ গিহী ওদাতৰসনা ব্রহ্মচারিনো আরাধকা; এৰমিদং ব্রহ্মচরিযং পরিপূরং তেনঙ্গেন.

‘‘সচে হি, ভো গোতম, ইমং ধম্মং ভৰঞ্চেৰ গোতমো আরাধকো অভৰিস্স, ভিক্খূ চ আরাধকা অভৰিস্সংসু, ভিক্খুনিযো চ আরাধিকা অভৰিস্সংসু, উপাসকা চ গিহী ওদাতৰসনা ব্রহ্মচারিনো আরাধকা অভৰিস্সংসু, নো চ খো উপাসকা গিহী ওদাতৰসনা কামভোগিনো আরাধকা অভৰিস্সংসু; এৰমিদং ব্রহ্মচরিযং অপরিপূরং অভৰিস্স তেনঙ্গেন. যস্মা চ খো, ভো গোতম, ইমং ধম্মং ভৰঞ্চেৰ গোতমো আরাধকো, ভিক্খূ চ আরাধকা, ভিক্খুনিযো চ আরাধিকা, উপাসকা চ গিহী ওদাতৰসনা ব্রহ্মচারিনো আরাধকা, উপাসকা চ গিহী ওদাতৰসনা কামভোগিনো আরাধকা; এৰমিদং ব্রহ্মচরিযং পরিপূরং তেনঙ্গেন.

‘‘সচে হি, ভো গোতম, ইমং ধম্মং ভৰঞ্চেৰ গোতমো আরাধকো অভৰিস্স, ভিক্খূ চ আরাধকা অভৰিস্সংসু, ভিক্খুনিযো চ আরাধিকা অভৰিস্সংসু, উপাসকা চ গিহী ওদাতৰসনা ব্রহ্মচারিনো আরাধকা অভৰিস্সংসু, উপাসকা চ গিহী ওদাতৰসনা কামভোগিনো আরাধকা অভৰিস্সংসু, নো চ খো উপাসিকা গিহিনিযো ওদাতৰসনা ব্রহ্মচারিনিযো আরাধিকা অভৰিস্সংসু; এৰমিদং ব্রহ্মচরিযং অপরিপূরং অভৰিস্স তেনঙ্গেন. যস্মা চ খো, ভো গোতম, ইমং ধম্মং ভৰঞ্চেৰ গোতমো আরাধকো, ভিক্খূ চ আরাধকা, ভিক্খুনিযো চ আরাধিকা, উপাসকা চ গিহী ওদাতৰসনা ব্রহ্মচারিনো আরাধকা, উপাসকা চ গিহী ওদাতৰসনা কামভোগিনো আরাধকা, উপাসিকা চ গিহিনিযো ওদাতৰসনা ব্রহ্মচারিনিযো আরাধিকা; এৰমিদং ব্রহ্মচরিযং পরিপূরং তেনঙ্গেন.

‘‘সচে হি, ভো গোতম, ইমং ধম্মং ভৰঞ্চেৰ গোতমো আরাধকো অভৰিস্স, ভিক্খূ চ আরাধকা অভৰিস্সংসু, ভিক্খুনিযো চ আরাধিকা অভৰিস্সংসু, উপাসকা চ গিহী ওদাতৰসনা ব্রহ্মচারিনো আরাধকা অভৰিস্সংসু, উপাসকা চ গিহী ওদাতৰসনা কামভোগিনো আরাধকা অভৰিস্সংসু, উপাসিকা চ গিহিনিযো ওদাতৰসনা ব্রহ্মচারিনিযো আরাধিকা অভৰিস্সংসু, নো চ খো উপাসিকা গিহিনিযো ওদাতৰসনা কামভোগিনিযো আরাধিকা অভৰিস্সংসু; এৰমিদং ব্রহ্মচরিযং অপরিপূরং অভৰিস্স তেনঙ্গেন. যস্মা চ খো, ভো গোতম, ইমং ধম্মং ভৰঞ্চেৰ গোতমো আরাধকো, ভিক্খূ চ আরাধকা, ভিক্খুনিযো চ আরাধিকা, উপাসকা চ গিহী ওদাতৰসনা ব্রহ্মচারিনো আরাধকা, উপাসকা চ গিহী ওদাতৰসনা কামভোগিনো আরাধকা, উপাসিকা চ গিহিনিযো ওদাতৰসনা ব্রহ্মচারিনিযো আরাধিকা, উপাসিকা চ গিহিনিযো ওদাতৰসনা কামভোগিনিযো আরাধিকা; এৰমিদং ব্রহ্মচরিযং পরিপূরং তেনঙ্গেন.

১৯৭. ‘‘সেয্যথাপি, ভো গোতম, গঙ্গা নদী সমুদ্দনিন্না সমুদ্দপোণা সমুদ্দপব্ভারা সমুদ্দং আহচ্চ তিট্ঠতি, এৰমেৰাযং ভোতো গোতমস্স পরিসা সগহট্ঠপব্বজিতা নিব্বাননিন্না নিব্বানপোণা নিব্বানপব্ভারা নিব্বানং আহচ্চ তিট্ঠতি. অভিক্কন্তং, ভো গোতম…পে… এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ. লভেয্যাহং ভোতো গোতমস্স সন্তিকে পব্বজ্জং, লভেয্যং উপসম্পদ’’ন্তি. ‘‘যো খো, ৰচ্ছ, অঞ্ঞতিত্থিযপুব্বো ইমস্মিং ধম্মৰিনযে আকঙ্খতি পব্বজ্জং, আকঙ্খতি উপসম্পদং, সো চত্তারো মাসে পরিৰসতি. চতুন্নং মাসানং অচ্চযেন আরদ্ধচিত্তা ভিক্খূ পব্বাজেন্তি উপসম্পাদেন্তি ভিক্খুভাৰায; অপি চ মেত্থ পুগ্গলৰেমত্ততা ৰিদিতা’’তি. ‘‘সচে, ভন্তে, অঞ্ঞতিত্থিযপুব্বা ইমস্মিং ধম্মৰিনযে আকঙ্খন্তা পব্বজ্জং, আকঙ্খন্তা উপসম্পদং চত্তারো মাসে পরিৰসন্তি, চতুন্নং মাসানং অচ্চযেন আরদ্ধচিত্তা ভিক্খূ পব্বাজেন্তি উপসম্পাদেন্তি ভিক্খুভাৰায; অহং চত্তারি ৰস্সানি পরিৰসিস্সামি. চতুন্নং ৰস্সানং অচ্চযেন আরদ্ধচিত্তা ভিক্খূ পব্বাজেন্তু উপসম্পাদেন্তু ভিক্খুভাৰাযা’’তি. অলত্থ খো ৰচ্ছগোত্তো পরিব্বাজকো ভগৰতো সন্তিকে পব্বজ্জং অলত্থ উপসম্পদং.

অচিরূপসম্পন্নো খো পনাযস্মা ৰচ্ছগোত্তো অদ্ধমাসূপসম্পন্নো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা ৰচ্ছগোত্তো ভগৰন্তং এতদৰোচ – ‘‘যাৰতকং, ভন্তে, সেখেন ঞাণেন সেখায ৰিজ্জায পত্তব্বং, অনুপ্পত্তং তং মযা; উত্তরি চ মে [উত্তরিং মে (সী. স্যা. কং. পী.)] ভগৰা ধম্মং দেসেতূ’’তি. ‘‘তেন হি ত্ৰং, ৰচ্ছ, দ্ৰে ধম্মে উত্তরি ভাৰেহি – সমথঞ্চ ৰিপস্সনঞ্চ. ইমে খো তে, ৰচ্ছ, দ্ৰে ধম্মা উত্তরি ভাৰিতা – সমথো চ ৰিপস্সনা চ – অনেকধাতুপটিৰেধায সংৰত্তিস্সন্তি.

১৯৮. ‘‘সো ত্ৰং, ৰচ্ছ, যাৰদেৰ [যাৰদে (পী.)] আকঙ্খিস্সসি – ‘অনেকৰিহিতং ইদ্ধিৰিধং পচ্চনুভৰেয্যং – একোপি হুত্ৰা বহুধা অস্সং, বহুধাপি হুত্ৰা একো অস্সং; আৰিভাৰং, তিরোভাৰং; তিরোকুট্টং তিরোপাকারং তিরোপব্বতং অসজ্জমানো গচ্ছেয্যং, সেয্যথাপি আকাসে; পথৰিযাপি উম্মুজ্জনিমুজ্জং করেয্যং, সেয্যথাপি উদকে; উদকেপি অভিজ্জমানে গচ্ছেয্যং, সেয্যথাপি পথৰিযং; আকাসেপি পল্লঙ্কেন কমেয্যং, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসেয্যং, পরিমজ্জেয্যং; যাৰব্রহ্মলোকাপি কাযেন ৰসং ৰত্তেয্য’ন্তি, তত্র তত্রেৰ সক্খিভব্বতং পাপুণিস্সসি, সতি সতিআযতনে.

‘‘সো ত্ৰং, ৰচ্ছ, যাৰদেৰ আকঙ্খিস্সসি – ‘দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণেয্যং – দিব্বে চ মানুসে চ, যে দূরে সন্তিকে চা’তি, তত্র তত্রেৰ সক্খিভব্বতং পাপুণিস্সসি, সতি সতিআযতনে.

‘‘সো ত্ৰং, ৰচ্ছ, যাৰদেৰ আকঙ্খিস্সসি – ‘পরসত্তানং পরপুগ্গলানং চেতসা চেতো পরিচ্চ পজানেয্যং – সরাগং ৰা চিত্তং সরাগং চিত্তন্তি পজানেয্যং, ৰীতরাগং ৰা চিত্তং ৰীতরাগং চিত্তন্তি পজানেয্যং; সদোসং ৰা চিত্তং সদোসং চিত্তন্তি পজানেয্যং, ৰীতদোসং ৰা চিত্তং ৰীতদোসং চিত্তন্তি পজানেয্যং; সমোহং ৰা চিত্তং সমোহং চিত্তন্তি পজানেয্যং, ৰীতমোহং ৰা চিত্তং ৰীতমোহং চিত্তন্তি পজানেয্যং; সংখিত্তং ৰা চিত্তং সংখিত্তং চিত্তন্তি পজানেয্যং, ৰিক্খিত্তং ৰা চিত্তং ৰিক্খিত্তং চিত্তন্তি পজানেয্যং; মহগ্গতং ৰা চিত্তং মহগ্গতং চিত্তন্তি পজানেয্যং, অমহগ্গতং ৰা চিত্তং অমহগ্গতং চিত্তন্তি পজানেয্যং; সউত্তরং ৰা চিত্তং সউত্তরং চিত্তন্তি পজানেয্যং, অনুত্তরং ৰা চিত্তং অনুত্তরং চিত্তন্তি পজানেয্যং; সমাহিতং ৰা চিত্তং সমাহিতং চিত্তন্তি পজানেয্যং, অসমাহিতং ৰা চিত্তং অসমাহিতং চিত্তন্তি পজানেয্যং; ৰিমুত্তং ৰা চিত্তং ৰিমুত্তং চিত্তন্তি পজানেয্যং, অৰিমুত্তং ৰা চিত্তং অৰিমুত্তং চিত্তন্তি পজানেয্য’ন্তি, তত্র তত্রেৰ সক্খিভব্বতং পাপুণিস্সসি, সতি সতিআযতনে.

‘‘সো ত্ৰং, ৰচ্ছ, যাৰদেৰ আকঙ্খিস্সসি – ‘অনেকৰিহিতং পুব্বেনিৰাসং অনুস্সরেয্যং, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি; অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো ইধূপপন্নোতি; ইতি সাকারং সউদ্দেসং অনেকৰিহিতং পুব্বেনিৰাসং অনুস্সরেয্য’ন্তি, তত্র তত্রেৰ সক্খিভব্বতং পাপুণিস্সসি, সতি সতিআযতনে.

‘‘সো ত্ৰং, ৰচ্ছ, যাৰদেৰ আকঙ্খিস্সসি – ‘দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সেয্যং চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানেয্যং – ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না; ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা, তে কাযস্স ভেদা পরং মরণা সুগতিং সগ্গং লোকং উপপন্নাতি; ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সেয্যং চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানেয্য’ন্তি, তত্র তত্রেৰ সক্খিভব্বতং পাপুণিস্সসি, সতি সতিআযতনে.

‘‘সো ত্ৰং, ৰচ্ছ, যাৰদেৰ আকঙ্খিস্সসি – ‘আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরেয্য’ন্তি, তত্র তত্রেৰ সক্খিভব্বতং পাপুণিস্সসি, সতি সতিআযতনে’’তি.

১৯৯. অথ খো আযস্মা ৰচ্ছগোত্তো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো আযস্মা ৰচ্ছগোত্তো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞাসি. অঞ্ঞতরো খো পনাযস্মা ৰচ্ছগোত্তো অরহতং অহোসি.

২০০. তেন খো পন সমযেন সম্বহুলা ভিক্খূ ভগৰন্তং দস্সনায গচ্ছন্তি. অদ্দসা খো আযস্মা ৰচ্ছগোত্তো তে ভিক্খূ দূরতোৰ আগচ্ছন্তে. দিস্ৰান যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ এতদৰোচ – ‘‘হন্দ! কহং পন তুম্হে আযস্মন্তো গচ্ছথা’’তি? ‘‘ভগৰন্তং খো মযং, আৰুসো, দস্সনায গচ্ছামা’’তি. ‘‘তেনহাযস্মন্তো মম ৰচনেন ভগৰতো পাদে সিরসা ৰন্দথ, এৰঞ্চ ৰদেথ – ‘ৰচ্ছগোত্তো, ভন্তে, ভিক্খু ভগৰতো পাদে সিরসা ৰন্দতি, এৰঞ্চ ৰদেতি – পরিচিণ্ণো মে ভগৰা, পরিচিণ্ণো মে সুগতো’’’তি. ‘‘এৰমাৰুসো’’তি খো তে ভিক্খূ আযস্মতো ৰচ্ছগোত্তস্স পচ্চস্সোসুং. অথ খো তে ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘আযস্মা, ভন্তে, ৰচ্ছগোত্তো ভগৰতো পাদে সিরসা ৰন্দতি, এৰঞ্চ ৰদেতি – ‘পরিচিণ্ণো মে ভগৰা, পরিচিণ্ণো মে সুগতো’’’তি. ‘‘পুব্বেৰ মে, ভিক্খৰে, ৰচ্ছগোত্তো ভিক্খু চেতসা চেতো পরিচ্চ ৰিদিতো – ‘তেৰিজ্জো ৰচ্ছগোত্তো ভিক্খু মহিদ্ধিকো মহানুভাৰো’তি. দেৰতাপি মে এতমত্থং আরোচেসুং – ‘তেৰিজ্জো, ভন্তে, ৰচ্ছগোত্তো ভিক্খু মহিদ্ধিকো মহানুভাৰো’’’তি.

ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

মহাৰচ্ছসুত্তং নিট্ঠিতং ততিযং.

৪. দীঘনখসুত্তং

২০১. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে সূকরখতাযং. অথ খো দীঘনখো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং অট্ঠাসি. একমন্তং ঠিতো খো দীঘনখো পরিব্বাজকো ভগৰন্তং এতদৰোচ – ‘‘অহঞ্হি, ভো গোতম, এৰংৰাদী এৰংদিট্ঠি – ‘সব্বং মে নক্খমতী’’’তি. ‘‘যাপি খো তে এসা, অগ্গিৰেস্সন, দিট্ঠি – ‘সব্বং মে নক্খমতী’তি, এসাপি তে দিট্ঠি নক্খমতী’’তি? ‘‘এসা চে [এসাপি (ক.)] মে, ভো গোতম, দিট্ঠি খমেয্য, তংপস্স তাদিসমেৰ, তংপস্স তাদিসমেৰা’’তি. ‘‘অতো খো তে, অগ্গিৰেস্সন, বহূ হি বহুতরা লোকস্মিং যে এৰমাহংসু – ‘তংপস্স তাদিসমেৰ, তংপস্স তাদিসমেৰা’তি. তে তঞ্চেৰ দিট্ঠিং নপ্পজহন্তি অঞ্ঞঞ্চ দিট্ঠিং উপাদিযন্তি. অতো খো তে, অগ্গিৰেস্সন, তনূ হি তনুতরা লোকস্মিং যে এৰমাহংসু – ‘তংপস্স তাদিসমেৰ, তংপস্স তাদিসমেৰা’তি. তে তঞ্চেৰ দিট্ঠিং পজহন্তি অঞ্ঞঞ্চ দিট্ঠিং ন উপাদিযন্তি. সন্তগ্গিৰেস্সন, একে সমণব্রাহ্মণা এৰংৰাদিনো এৰংদিট্ঠিনো – ‘সব্বং মে খমতী’তি; সন্তগ্গিৰেস্সন, একে সমণব্রাহ্মণা এৰংৰাদিনো এৰংদিট্ঠিনো – ‘সব্বং মে নক্খমতী’তি; সন্তগ্গিৰেস্সন, একে সমণব্রাহ্মণা এৰংৰাদিনো এৰংদিট্ঠিনো – ‘একচ্চং মে খমতি, একচ্চং মে নক্খমতী’তি. তত্রগ্গিৰেস্সন, যে তে সমণব্রাহ্মণা এৰংৰাদিনো এৰংদিট্ঠিনো – ‘সব্বং মে খমতী’তি তেসমযং দিট্ঠি সারাগায সন্তিকে, সঞ্ঞোগায সন্তিকে, অভিনন্দনায সন্তিকে অজ্ঝোসানায সন্তিকে উপাদানায সন্তিকে; তত্রগ্গিৰেস্সন যে তে সমণব্রাহ্মণা এৰংৰাদিনো এৰংদিট্ঠিনো – ‘সব্বং মে নক্খমতী’তি তেসমযং দিট্ঠি অসারাগায সন্তিকে, অসঞ্ঞোগায সন্তিকে, অনভিনন্দনায সন্তিকে, অনজ্ঝোসানায সন্তিকে, অনুপাদানায সন্তিকে’’তি.

২০২. এৰং ৰুত্তে, দীঘনখো পরিব্বাজকো ভগৰন্তং এতদৰোচ – ‘‘উক্কংসেতি [উক্কংসতি (সী. পী. ক.)] মে ভৰং গোতমো দিট্ঠিগতং, সমুক্কংসেতি [সম্পহংসতি (ক.)] মে ভৰং গোতমো দিট্ঠিগত’’ন্তি. ‘‘তত্রগ্গিৰেস্সন, যে তে সমণব্রাহ্মণা এৰংৰাদিনো এৰংদিট্ঠিনো – ‘একচ্চং মে খমতি, একচ্চং মে নক্খমতী’তি. যা হি তেসং খমতি সাযং দিট্ঠি সারাগায সন্তিকে, সঞ্ঞোগায সন্তিকে, অভিনন্দনায সন্তিকে, অজ্ঝোসানায সন্তিকে, উপাদানায সন্তিকে; যা হি তেসং নক্খমতি সাযং দিট্ঠি অসারাগায সন্তিকে, অসঞ্ঞোগায সন্তিকে, অনভিনন্দনায সন্তিকে, অনজ্ঝোসানায সন্তিকে, অনুপাদানায সন্তিকে. তত্রগ্গিৰেস্সন, যে তে সমণব্রাহ্মণা এৰংৰাদিনো এৰংদিট্ঠিনো – ‘সব্বং মে খমতী’তি তত্থ ৰিঞ্ঞূ পুরিসো ইতি পটিসঞ্চিক্খতি – ‘যা খো মে অযং দিট্ঠি – সব্বং মে খমতীতি, ইমঞ্চে অহং দিট্ঠিং থামসা পরামাসা অভিনিৰিস্স ৰোহরেয্যং – ইদমেৰ সচ্চং মোঘমঞ্ঞন্তি; দ্ৰীহি মে অস্স ৰিগ্গহো – যো চাযং সমণো ৰা ব্রাহ্মণো ৰা এৰংৰাদী এৰংদিট্ঠি – সব্বং মে নক্খমতীতি, যো চাযং সমণো ৰা ব্রাহ্মণো ৰা এৰংৰাদী এৰংদিট্ঠি – একচ্চং মে খমতি, একচ্চং মে নক্খমতীতি – ইমেহি অস্স দ্ৰীহি ৰিগ্গহো. ইতি ৰিগ্গহে সতি ৰিৰাদো, ৰিৰাদে সতি ৰিঘাতো, ৰিঘাতে সতি ৰিহেসা’. ইতি সো ৰিগ্গহঞ্চ ৰিৰাদঞ্চ ৰিঘাতঞ্চ ৰিহেসঞ্চ অত্তনি সম্পস্সমানো তঞ্চেৰ দিট্ঠিং পজহতি অঞ্ঞঞ্চ দিট্ঠিং ন উপাদিযতি. এৰমেতাসং দিট্ঠীনং পহানং হোতি, এৰমেতাসং দিট্ঠীনং পটিনিস্সগ্গো হোতি.

২০৩. ‘‘তত্রগ্গিৰেস্সন, যে তে সমণব্রাহ্মণা এৰংৰাদিনো এৰংদিট্ঠিনো – ‘সব্বং মে নক্খমতী’তি তত্থ ৰিঞ্ঞূ পুরিসো ইতি পটিসঞ্চিক্খতি – ‘যা খো মে অযং দিট্ঠি – সব্বং মে নক্খমতী’তি, ইমঞ্চে অহং দিট্ঠিং থামসা পরামাসা অভিনিৰিস্স ৰোহরেয্যং – ইদমেৰ সচ্চং মোঘমঞ্ঞন্তি; দ্ৰীহি মে অস্স ৰিগ্গহো – যো চাযং সমণো ৰা ব্রাহ্মণো ৰা এৰংৰাদী এৰংদিট্ঠি – সব্বং মে খমতীতি, যো চাযং সমণো ৰা ব্রাহ্মণো ৰা এৰংৰাদী এৰংদিট্ঠি – একচ্চং মে খমতি একচ্চং মে নক্খমতীতি – ইমেহি অস্স দ্ৰীহি ৰিগ্গহো. ইতি ৰিগ্গহে সতি ৰিৰাদো, ৰিৰাদে সতি ৰিঘাতো, ৰিঘাতে সতি ৰিহেসা’. ইতি সো ৰিগ্গহঞ্চ ৰিৰাদঞ্চ ৰিঘাতঞ্চ ৰিহেসঞ্চ অত্তনি সম্পস্সমানো তঞ্চেৰ দিট্ঠিং পজহতি অঞ্ঞঞ্চ দিট্ঠিং ন উপাদিযতি. এৰমেতাসং দিট্ঠীনং পহানং হোতি, এৰমেতাসং দিট্ঠীনং পটিনিস্সগ্গো হোতি.

২০৪. ‘‘তত্রগ্গিৰেস্সন, যে তে সমণব্রাহ্মণা এৰংৰাদিনো এৰংদিট্ঠিনো – ‘একচ্চং মে খমতি, একচ্চং মে নক্খমতী’তি তত্থ ৰিঞ্ঞূ পুরিসো ইতি পটিসঞ্চিক্খতি – ‘যা খো মে অযং দিট্ঠি – একচ্চং মে খমতি, একচ্চং মে নক্খমতীতি, ইমঞ্চে অহং দিট্ঠিং থামসা পরামাসা অভিনিৰিস্স ৰোহরেয্যং – ইদমেৰ সচ্চং মোঘমঞ্ঞন্তি; দ্ৰীহি মে অস্স ৰিগ্গহো – যো চাযং সমণো ৰা ব্রাহ্মণো ৰা এৰংৰাদী এৰংদিট্ঠি – সব্বং মে খমতীতি, যো চাযং সমণো ৰা ব্রাহ্মণো ৰা এৰংৰাদী এৰংদিট্ঠি – সব্বং মে নক্খমতীতি – ইমেহি অস্স দ্ৰীহি ৰিগ্গহো. ইতি ৰিগ্গহে সতি ৰিৰাদো, ৰিৰাদে সতি ৰিঘাতো, ৰিঘাতে সতি ৰিহেসা’. ইতি সো ৰিগ্গহঞ্চ ৰিৰাদঞ্চ ৰিঘাতঞ্চ ৰিহেসঞ্চ অত্তনি সম্পস্সমানো তঞ্চেৰ দিট্ঠিং পজহতি অঞ্ঞঞ্চ দিট্ঠিং ন উপাদিযতি. এৰমেতাসং দিট্ঠীনং পহানং হোতি, এৰমেতাসং দিট্ঠীনং পটিনিস্সগ্গো হোতি.

২০৫. ‘‘অযং খো পনগ্গিৰেস্সন, কাযো রূপী চাতুমহাভূতিকো [চাতুম্মহাভূতিকো (সী. স্যা.)] মাতাপেত্তিকসম্ভৰো ওদনকুম্মাসুপচযো অনিচ্চুচ্ছাদনপরিমদ্দনভেদনৰিদ্ধংসনধম্মো, অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সিতব্বো. তস্সিমং কাযং অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সতো যো কাযস্মিং কাযছন্দো কাযস্নেহো কাযন্ৰযতা সা পহীযতি.

‘‘তিস্সো খো ইমা, অগ্গিৰেস্সন, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা. যস্মিং, অগ্গিৰেস্সন, সমযে সুখং ৰেদনং ৰেদেতি, নেৰ তস্মিং সমযে দুক্খং ৰেদনং ৰেদেতি, ন অদুক্খমসুখং ৰেদনং ৰেদেতি; সুখংযেৰ তস্মিং সমযে ৰেদনং ৰেদেতি. যস্মিং, অগ্গিৰেস্সন, সমযে দুক্খং ৰেদনং ৰেদেতি, নেৰ তস্মিং সমযে সুখং ৰেদনং ৰেদেতি, ন অদুক্খমসুখং ৰেদনং ৰেদেতি; দুক্খংযেৰ তস্মিং সমযে ৰেদনং ৰেদেতি. যস্মিং, অগ্গিৰেস্সন, সমযে অদুক্খমসুখং ৰেদনং ৰেদেতি, নেৰ তস্মিং সমযে সুখং ৰেদনং ৰেদেতি, ন দুক্খং ৰেদনং ৰেদেতি; অদুক্খমসুখংযেৰ তস্মিং সমযে ৰেদনং ৰেদেতি. সুখাপি খো, অগ্গিৰেস্সন, ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা; দুক্খাপি খো, অগ্গিৰেস্সন, ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা; অদুক্খমসুখাপি খো, অগ্গিৰেস্সন, ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা. এৰং পস্সং, অগ্গিৰেস্সন, সুতৰা অরিযসাৰকো সুখাযপি ৰেদনায নিব্বিন্দতি, দুক্খাযপি ৰেদনায নিব্বিন্দতি, অদুক্খমসুখাযপি ৰেদনায নিব্বিন্দতি; নিব্বিন্দং ৰিরজ্জতি, ৰিরাগা ৰিমুচ্চতি. ৰিমুত্তস্মিং, ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. এৰং ৰিমুত্তচিত্তো খো, অগ্গিৰেস্সন, ভিক্খু ন কেনচি সংৰদতি, ন কেনচি ৰিৰদতি, যঞ্চ লোকে ৰুত্তং তেন ৰোহরতি, অপরামস’’ন্তি.

২০৬. তেন খো পন সমযেন আযস্মা সারিপুত্তো ভগৰতো পিট্ঠিতো ঠিতো হোতি ভগৰন্তং বীজযমানো [ৰীজযমানো (সী. পী.)]. অথ খো আযস্মতো সারিপুত্তস্স এতদহোসি – ‘‘তেসং তেসং কির নো ভগৰা ধম্মানং অভিঞ্ঞা পহানমাহ, তেসং তেসং কির নো সুগতো ধম্মানং অভিঞ্ঞা পটিনিস্সগ্গমাহা’’তি. ইতি হিদং আযস্মতো সারিপুত্তস্স পটিসঞ্চিক্খতো অনুপাদায আসৰেহি চিত্তং ৰিমুচ্চি. দীঘনখস্স পন পরিব্বাজকস্স ৰিরজং ৰীতমলং ধম্মচক্খুং উদপাদি – ‘‘যং কিঞ্চি সমুদযধম্মং সব্বং তং নিরোধধম্ম’’ন্তি. অথ খো দীঘনখো পরিব্বাজকো দিট্ঠধম্মো পত্তধম্মো ৰিদিতধম্মো পরিযোগাল়্হধম্মো তিণ্ণৰিচিকিচ্ছো ৰিগতকথংকথো ৰেসারজ্জপ্পত্তো অপরপ্পচ্চযো সত্থুসাসনে ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি – এৰমেৰ খো ভোতা গোতমেন অনেকপরিযাযেন ধম্মো পকাসিতো. এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ. উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি.

দীঘনখসুত্তং নিট্ঠিতং চতুত্থং.

৫. মাগণ্ডিযসুত্তং

২০৭. এৰং মে সুতং – একং সমযং ভগৰা কুরূসু ৰিহরতি কম্মাসধম্মং নাম কুরূনং নিগমো, ভারদ্ৰাজগোত্তস্স ব্রাহ্মণস্স অগ্যাগারে তিণসন্থারকে [তিণসন্থরকে (সী. স্যা. কং. পী.)]. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায কম্মাসধম্মং পিণ্ডায পাৰিসি. কম্মাসধম্মং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন অঞ্ঞতরো ৰনসণ্ডো তেনুপসঙ্কমি দিৰাৰিহারায. তং ৰনসণ্ডং অজ্ঝোগাহেত্ৰা অঞ্ঞতরস্মিং রুক্খমূলে দিৰাৰিহারং নিসীদি. অথ খো মাগণ্ডিযো [মাগন্দিযো (সী. পী.)] পরিব্বাজকো জঙ্ঘাৰিহারং অনুচঙ্কমমানো অনুৰিচরমানো যেন ভারদ্ৰাজগোত্তস্স ব্রাহ্মণস্স অগ্যাগারং তেনুপসঙ্কমি. অদ্দসা খো মাগণ্ডিযো পরিব্বাজকো ভারদ্ৰাজগোত্তস্স ব্রাহ্মণস্স অগ্যাগারে তিণসন্থারকং পঞ্ঞত্তং. দিস্ৰান ভারদ্ৰাজগোত্তং ব্রাহ্মণং এতদৰোচ – ‘‘কস্স ন্ৰযং ভোতো ভারদ্ৰাজস্স অগ্যাগারে তিণসন্থারকো পঞ্ঞত্তো, সমণসেয্যানুরূপং [সমণসেয্যারূপং (সী. পী.)] মঞ্ঞে’’তি? ‘‘অত্থি, ভো মাগণ্ডিয, সমণো গোতমো সক্যপুত্তো সক্যকুলা পব্বজিতো. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি. তস্সেসা ভোতো গোতমস্স সেয্যা পঞ্ঞত্তা’’তি. ‘‘দুদ্দিট্ঠং ৰত, ভো ভারদ্ৰাজ, অদ্দসাম; দুদ্দিট্ঠং ৰত, ভো ভারদ্ৰাজ, অদ্দসাম! যে মযং তস্স ভোতো গোতমস্স ভূনহুনো [ভূনহনস্স (স্যা. কং.)] সেয্যং অদ্দসামা’’তি. ‘‘রক্খস্সেতং, মাগণ্ডিয, ৰাচং; রক্খস্সেতং, মাগণ্ডিয, ৰাচং. বহূ হি তস্স ভোতো গোতমস্স খত্তিযপণ্ডিতাপি ব্রাহ্মণপণ্ডিতাপি গহপতিপণ্ডিতাপি সমণপণ্ডিতাপি অভিপ্পসন্না ৰিনীতা অরিযে ঞাযে ধম্মে কুসলে’’তি. ‘‘সম্মুখা চেপি মযং, ভো ভারদ্ৰাজ, তং ভৰন্তং গোতমং পস্সেয্যাম, সম্মুখাপি নং ৰদেয্যাম – ‘ভূনহু [ভূনহনো (স্যা. কং.)] সমণো গোতমো’তি. তং কিস্স হেতু? এৰঞ্হি নো সুত্তে ওচরতী’’তি. ‘‘সচে তং ভোতো মাগণ্ডিযস্স অগরু আরোচেয্যামি তং [আরোচেয্যমেতং (সী. পী.), আরোচেস্সামি তস্স (স্যা. কং.)] সমণস্স গোতমস্সা’’তি. ‘‘অপ্পোস্সুক্কো ভৰং ভারদ্ৰাজো ৰুত্তোৰ নং ৰদেয্যা’’তি.

২০৮. অস্সোসি খো ভগৰা দিব্বায সোতধাতুযা ৰিসুদ্ধায অতিক্কন্তমানুসিকায ভারদ্ৰাজগোত্তস্স ব্রাহ্মণস্স মাগণ্ডিযেন পরিব্বাজকেন সদ্ধিং ইমং কথাসল্লাপং. অথ খো ভগৰা সাযন্হসমযং পটিসল্লানা ৰুট্ঠিতো যেন ভারদ্ৰাজগোত্তস্স ব্রাহ্মণস্স অগ্যাগারং তেনুপসঙ্কমি; উপসঙ্কমিত্ৰা নিসীদি ভগৰা পঞ্ঞত্তে তিণসন্থারকে. অথ খো ভারদ্ৰাজগোত্তো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো ভারদ্ৰাজগোত্তং ব্রাহ্মণং ভগৰা এতদৰোচ – ‘‘অহু পন তে, ভারদ্ৰাজ, মাগণ্ডিযেন পরিব্বাজকেন সদ্ধিং ইমংযেৰ তিণসন্থারকং আরব্ভ কোচিদেৰ কথাসল্লাপো’’তি? এৰং ৰুত্তে, ভারদ্ৰাজগোত্তো ব্রাহ্মণো সংৰিগ্গো লোমহট্ঠজাতো ভগৰন্তং এতদৰোচ – ‘‘এতদেৰ খো পন মযং ভোতো গোতমস্স আরোচেতুকামা. অথ চ পন ভৰং গোতমো অনক্খাতংযেৰ অক্খাসী’’তি. অযঞ্চ হি [অযঞ্চ হিদং (সী. স্যা. কং. পী.)] ভগৰতো ভারদ্ৰাজগোত্তেন ব্রাহ্মণেন সদ্ধিং অন্তরাকথা ৰিপ্পকতা হোতি. অথ খো মাগণ্ডিযো পরিব্বাজকো জঙ্ঘাৰিহারং অনুচঙ্কমমানো অনুৰিচরমানো যেন ভারদ্ৰাজগোত্তস্স ব্রাহ্মণস্স অগ্যাগারং যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো মাগণ্ডিযং পরিব্বাজকং ভগৰা এতদৰোচ –

২০৯. ‘‘চক্খুং খো, মাগণ্ডিয, রূপারামং রূপরতং রূপসম্মুদিতং. তং তথাগতস্স দন্তং গুত্তং রক্খিতং সংৰুতং, তস্স চ সংৰরায ধম্মং দেসেতি. ইদং নু তে এতং, মাগণ্ডিয, সন্ধায ভাসিতং – ‘ভূনহু সমণো গোতমো’’’তি? ‘‘এতদেৰ খো পন মে, ভো গোতম, সন্ধায ভাসিতং – ‘ভূনহু সমণো গোতমো’তি. তং কিস্স হেতু? এৰঞ্হি নো সুত্তে ওচরতী’’তি. ‘‘সোতং খো, মাগণ্ডিয, সদ্দারামং…পে… ঘানং খো, মাগণ্ডিয গন্ধারামং… জিৰ্হা খো, মাগণ্ডিয, রসারামা রসরতা রসসম্মুদিতা. সা তথাগতস্স দন্তা গুত্তা রক্খিতা সংৰুতা, তস্সা চ সংৰরায ধম্মং দেসেতি. ইদং নু তে এতং, মাগণ্ডিয, সন্ধায ভাসিতং – ‘ভূনহু সমণো গোতমো’’’তি? ‘‘এতদেৰ খো পন মে, ভো গোতম, সন্ধায ভাসিতং – ‘ভূনহু সমণো গোতমো’তি. তং কিস্স হেতু? এৰঞ্হি নো সুত্তে ওচরতী’’তি. ‘‘কাযো খো, মাগণ্ডিয, ফোট্ঠব্বারামো ফোট্ঠব্বরতো…পে… মনো খো, মাগণ্ডিয, ধম্মারামো ধম্মরতো ধম্মসম্মুদিতো. সো তথাগতস্স দন্তো গুত্তো রক্খিতো সংৰুতো, তস্স চ সংৰরায ধম্মং দেসেতি. ইদং নু তে এতং, মাগণ্ডিয, সন্ধায ভাসিতং – ‘ভূনহু সমণো গোতমো’’’তি? ‘‘এতদেৰ খো পন মে, ভো গোতম, সন্ধায ভাসিতং – ‘ভূনহু সমণো গোতমো’তি. তং কিস্স হেতু? এৰঞ্হি নো সুত্তে ওচরতী’’তি.

২১০. ‘‘তং কিং মঞ্ঞসি, মাগণ্ডিয – ‘ইধেকচ্চো চক্খুৰিঞ্ঞেয্যেহি রূপেহি পরিচারিতপুব্বো অস্স ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি, সো অপরেন সমযেন রূপানংযেৰ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা রূপতণ্হং পহায রূপপরিল়াহং পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহরেয্য. ইমস্স পন তে, মাগণ্ডিয, কিমস্স ৰচনীয’’’ন্তি? ‘‘ন কিঞ্চি, ভো গোতম’’. ‘‘তং কিং মঞ্ঞসি, মাগণ্ডিয – ‘ইধেকচ্চো সোতৰিঞ্ঞেয্যেহি সদ্দেহি…পে… ঘানৰিঞ্ঞেয্যেহি গন্ধেহি… জিৰ্হাৰিঞ্ঞেয্যেহি রসেহি… কাযৰিঞ্ঞেয্যেহি ফোট্ঠব্বেহি পরিচারিতপুব্বো অস্স ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি, সো অপরেন সমযেন ফোট্ঠব্বানংযেৰ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা ফোট্ঠব্বতণ্হং পহায ফোট্ঠব্বপরিল়াহং পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহরেয্য. ইমস্স পন তে, মাগণ্ডিয, কিমস্স ৰচনীয’’’ন্তি? ‘‘ন কিঞ্চি, ভো গোতম’’.

২১১. ‘‘অহং খো পন, মাগণ্ডিয, পুব্বে অগারিযভূতো সমানো পঞ্চহি কামগুণেহি সমপ্পিতো সমঙ্গীভূতো পরিচারেসিং চক্খুৰিঞ্ঞেয্যেহি রূপেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি, সোতৰিঞ্ঞেয্যেহি সদ্দেহি…পে… ঘানৰিঞ্ঞেয্যেহি গন্ধেহি… জিৰ্হাৰিঞ্ঞেয্যেহি রসেহি… কাযৰিঞ্ঞেয্যেহি ফোট্ঠব্বেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি. তস্স ময্হং, মাগণ্ডিয, তযো পাসাদা অহেসুং – একো ৰস্সিকো, একো হেমন্তিকো, একো গিম্হিকো. সো খো অহং, মাগণ্ডিয, ৰস্সিকে পাসাদে ৰস্সিকে চত্তারো [ৰস্সিকে পাসাদে চত্তারো (স্যা. কং.)] মাসে নিপ্পুরিসেহি তূরিযেহি [তুরিযেহি (সী. স্যা. কং. পী.)] পরিচারযমানো [পরিচারিযমানো (সব্বত্থ)] ন হেট্ঠাপাসাদং ওরোহামি. সো অপরেন সমযেন কামানংযেৰ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা কামতণ্হং পহায কামপরিল়াহং পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহরামি. সো অঞ্ঞে সত্তে পস্সামি কামেসু অৰীতরাগে কামতণ্হাহি খজ্জমানে কামপরিল়াহেন পরিডয্হমানে কামে পটিসেৰন্তে. সো তেসং ন পিহেমি, ন তত্থ অভিরমামি. তং কিস্স হেতু? যাহযং, মাগণ্ডিয, রতি, অঞ্ঞত্রেৰ কামেহি অঞ্ঞত্র অকুসলেহি ধম্মেহি – অপি দিব্বং সুখং সমধিগয্হ তিট্ঠতি – তায রতিযা রমমানো হীনস্স ন পিহেমি, ন তত্থ অভিরমামি.

২১২. ‘‘সেয্যথাপি, মাগণ্ডিয, গহপতি ৰা গহপতিপুত্তো ৰা অড্ঢো মহদ্ধনো মহাভোগো পঞ্চহি কামগুণেহি সমপ্পিতো সমঙ্গীভূতো পরিচারেয্য চক্খুৰিঞ্ঞেয্যেহি রূপেহি…পে… ফোট্ঠব্বেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি. সো কাযেন সুচরিতং চরিত্ৰা ৰাচায সুচরিতং চরিত্ৰা মনসা সুচরিতং চরিত্ৰা কাযস্স ভেদা পরং মরণা সুগতিং সগ্গং লোকং উপপজ্জেয্য দেৰানং তাৰতিংসানং সহব্যতং. সো তত্থ নন্দনে ৰনে অচ্ছরাসঙ্ঘপরিৰুতো দিব্বেহি পঞ্চহি কামগুণেহি সমপ্পিতো সমঙ্গীভূতো পরিচারেয্য. সো পস্সেয্য গহপতিং ৰা গহপতিপুত্তং ৰা পঞ্চহি কামগুণেহি সমপ্পিতং সমঙ্গীভূতং পরিচারযমানং.

‘‘তং কিং মঞ্ঞসি, মাগণ্ডিয, অপি নু সো দেৰপুত্তো নন্দনে ৰনে অচ্ছরাসঙ্ঘপরিৰুতো দিব্বেহি পঞ্চহি কামগুণেহি সমপ্পিতো সমঙ্গীভূতো পরিচারযমানো অমুস্স গহপতিস্স ৰা গহপতিপুত্তস্স ৰা পিহেয্য, মানুসকানং ৰা পঞ্চন্নং কামগুণানং মানুসকেহি ৰা কামেহি আৰট্টেয্যা’’তি? ‘‘নো হিদং, ভো গোতম’’. তং কিস্স হেতু? মানুসকেহি, ভো গোতম, কামেহি দিব্বকামা অভিক্কন্ততরা চ পণীততরা চা’’তি. ‘‘এৰমেৰ খো অহং, মাগণ্ডিয, পুব্বে অগারিযভূতো সমানো পঞ্চহি কামগুণেহি সমপ্পিতো সমঙ্গীভূতো পরিচারেসিং চক্খুৰিঞ্ঞেয্যেহি রূপেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি, সোতৰিঞ্ঞেয্যেহি সদ্দেহি…পে… ঘানৰিঞ্ঞেয্যেহি গন্ধেহি… জিৰ্হাৰিঞ্ঞেয্যেহি রসেহি… কাযৰিঞ্ঞেয্যেহি ফোট্ঠব্বেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি. সো অপরেন সমযেন কামানংযেৰ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা কামতণ্হং পহায কামপরিল়াহং পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহরামি. সো অঞ্ঞে সত্তে পস্সামি কামেসু অৰীতরাগে কামতণ্হাহি খজ্জমানে কামপরিল়াহেন পরিডয্হমানে কামে পটিসেৰন্তে, সো তেসং ন পিহেমি, ন তত্থ অভিরমামি. তং কিস্স হেতু? যাহযং, মাগণ্ডিয, রতি অঞ্ঞত্রেৰ কামেহি অঞ্ঞত্র অকুসলেহি ধম্মেহি – অপি দিব্বং সুখং সমধিগয্হ তিট্ঠতি – তায রতিযা রমমানো হীনস্স ন পিহেমি, ন তত্থ অভিরমামি.

২১৩. ‘‘সেয্যথাপি, মাগণ্ডিয, কুট্ঠী পুরিসো অরুগত্তো পক্কগত্তো কিমীহি খজ্জমানো নখেহি ৰণমুখানি ৰিপ্পতচ্ছমানো অঙ্গারকাসুযা কাযং পরিতাপেয্য. তস্স মিত্তামচ্চা ঞাতিসালোহিতা ভিসক্কং সল্লকত্তং উপট্ঠাপেয্যুং. তস্স সো ভিসক্কো সল্লকত্তো ভেসজ্জং করেয্য. সো তং ভেসজ্জং আগম্ম কুট্ঠেহি পরিমুচ্চেয্য, অরোগো অস্স সুখী সেরী সযংৰসী যেন কামং গমো. সো অঞ্ঞং কুট্ঠিং পুরিসং পস্সেয্য অরুগত্তং পক্কগত্তং কিমীহি খজ্জমানং নখেহি ৰণমুখানি ৰিপ্পতচ্ছমানং অঙ্গারকাসুযা কাযং পরিতাপেন্তং.

‘‘তং কিং মঞ্ঞসি, মাগণ্ডিয, অপি নু সো পুরিসো অমুস্স কুট্ঠিস্স পুরিসস্স পিহেয্য অঙ্গারকাসুযা ৰা ভেসজ্জং পটিসেৰনায ৰা’’তি? ‘‘নো হিদং, ভো গোতম. তং কিস্স হেতু? রোগে হি, ভো গোতম, সতি ভেসজ্জেন করণীযং হোতি, রোগে অসতি ন ভেসজ্জেন করণীযং হোতী’’তি. ‘‘এৰমেৰ খো অহং, মাগণ্ডিয, পুব্বে অগারিযভূতো সমানো পঞ্চহি কামগুণেহি সমপ্পিতো সমঙ্গীভূতো পরিচারেসিং, চক্খুৰিঞ্ঞেয্যেহি রূপেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি, সোতৰিঞ্ঞেয্যেহি সদ্দেহি…পে… ঘানৰিঞ্ঞেয্যেহি গন্ধেহি… জিৰ্হাৰিঞ্ঞেয্যেহি রসেহি… কাযৰিঞ্ঞেয্যেহি ফোট্ঠব্বেহি ইট্ঠেহি কন্তেহি মনাপেহি পিযরূপেহি কামূপসংহিতেহি রজনীযেহি. সো অপরেন সমযেন কামানংযেৰ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা কামতণ্হং পহায কামপরিল়াহং পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহরামি. সো অঞ্ঞে সত্তে পস্সামি কামেসু অৰীতরাগে কামতণ্হাহি খজ্জমানে কামপরিল়াহেন পরিডয্হমানে কামে পটিসেৰন্তে. সো তেসং ন পিহেমি, ন তত্থ অভিরমামি. তং কিস্স হেতু? যাহযং, মাগণ্ডিয, রতি, অঞ্ঞত্রেৰ কামেহি অঞ্ঞত্র অকুসলেহি ধম্মেহি – অপি দিব্বং সুখং সমধিগয্হ তিট্ঠতি – তায রতিযা রমমানো হীনস্স ন পিহেমি, ন তত্থ অভিরমামি.

২১৪. ‘‘সেয্যথাপি, মাগণ্ডিয, কুট্ঠী পুরিসো অরুগত্তো পক্কগত্তো কিমীহি খজ্জমানো নখেহি ৰণমুখানি ৰিপ্পতচ্ছমানো অঙ্গারকাসুযা কাযং পরিতাপেয্য. তস্স মিত্তামচ্চা ঞাতিসালোহিতা ভিসক্কং সল্লকত্তং উপট্ঠাপেয্যুং. তস্স সো ভিসক্কো সল্লকত্তো ভেসজ্জং করেয্য. সো তং ভেসজ্জং আগম্ম কুট্ঠেহি পরিমুচ্চেয্য, অরোগো অস্স সুখী সেরী সযংৰসী যেন কামং গমো. তমেনং দ্ৰে বলৰন্তো পুরিসা নানাবাহাসু গহেত্ৰা অঙ্গারকাসুং উপকড্ঢেয্যুং.

‘‘তং কিং মঞ্ঞসি, মাগণ্ডিয, অপি নু সো পুরিসো ইতি চিতিচেৰ কাযং সন্নামেয্যা’’তি? ‘‘এৰং, ভো গোতম’’. ‘‘তং কিস্স হেতু’’? ‘‘অসু হি, ভো গোতম, অগ্গি দুক্খসম্ফস্সো চেৰ মহাভিতাপো চ মহাপরিল়াহো চা’’তি. ‘‘তং কিং মঞ্ঞসি, মাগণ্ডিয, ইদানেৰ নু খো সো অগ্গি দুক্খসম্ফস্সো চেৰ মহাভিতাপো চ মহাপরিল়াহো চ উদাহু পুব্বেপি সো অগ্গি দুক্খসম্ফস্সো চেৰ মহাভিতাপো চ মহাপরিল়াহো চা’’তি? ‘‘ইদানি চেৰ, ভো গোতম, সো অগ্গি দুক্খসম্ফস্সো চেৰ মহাভিতাপো চ মহাপরিল়াহো চ, পুব্বেপি সো অগ্গি দুক্খসম্ফস্সো চেৰ মহাভিতাপো চ মহাপরিল়াহো চ. অসু চ [অসু হি চ (সী. পী.)], ভো গোতম, কুট্ঠী পুরিসো অরুগত্তো পক্কগত্তো কিমীহি খজ্জমানো নখেহি ৰণমুখানি ৰিপ্পতচ্ছমানো উপহতিন্দ্রিযো দুক্খসম্ফস্সেযেৰ অগ্গিস্মিং সুখমিতি ৰিপরীতসঞ্ঞং পচ্চলত্থা’’তি. ‘‘এৰমেৰ খো, মাগণ্ডিয, অতীতম্পি অদ্ধানং কামা দুক্খসম্ফস্সা চেৰ মহাভিতাপা চ মহাপরিল়াহা চ, অনাগতম্পি অদ্ধানং কামা দুক্খসম্ফস্সা চেৰ মহাভিতাপা চ মহাপরিল়াহা চ, এতরহিপি পচ্চুপ্পন্নং অদ্ধানং কামা দুক্খসম্ফস্সা চেৰ মহাভিতাপা চ মহাপরিল়াহা চ. ইমে চ, মাগণ্ডিয, সত্তা কামেসু অৰীতরাগা কামতণ্হাহি খজ্জমানা কামপরিল়াহেন পরিডয্হমানা উপহতিন্দ্রিযা দুক্খসম্ফস্সেসুযেৰ কামেসু সুখমিতি ৰিপরীতসঞ্ঞং পচ্চলত্থুং.

২১৫. ‘‘সেয্যথাপি, মাগণ্ডিয, কুট্ঠী পুরিসো অরুগত্তো পক্কগত্তো কিমীহি খজ্জমানো নখেহি ৰণমুখানি ৰিপ্পতচ্ছমানো অঙ্গারকাসুযা কাযং পরিতাপেতি. যথা যথা খো, মাগণ্ডিয, অসু কুট্ঠী পুরিসো অরুগত্তো পক্কগত্তো কিমীহি খজ্জমানো নখেহি ৰণমুখানি ৰিপ্পতচ্ছমানো অঙ্গারকাসুযা কাযং পরিতাপেতি তথা তথা’স্স [তথা তথা তস্সেৰ (স্যা. কং. ক.)] তানি ৰণমুখানি অসুচিতরানি চেৰ হোন্তি দুগ্গন্ধতরানি চ পূতিকতরানি চ, হোতি চেৰ কাচি সাতমত্তা অস্সাদমত্তা – যদিদং ৰণমুখানং কণ্ডূৰনহেতু; এৰমেৰ খো, মাগণ্ডিয, সত্তা কামেসু অৰীতরাগা কামতণ্হাহি খজ্জমানা কামপরিল়াহেন চ পরিডয্হমানা কামে পটিসেৰন্তি. যথা যথা খো, মাগণ্ডিয, সত্তা কামেসু অৰীতরাগা কামতণ্হাহি খজ্জমানা কামপরিল়াহেন চ পরিডয্হমানা কামে পটিসেৰন্তি তথা তথা তেসং তেসং সত্তানং কামতণ্হা চেৰ পৰড্ঢতি, কামপরিল়াহেন চ পরিডয্হন্তি, হোতি চেৰ সাতমত্তা অস্সাদমত্তা – যদিদং পঞ্চকামগুণে পটিচ্চ.

‘‘তং কিং মঞ্ঞসি, মাগণ্ডিয, অপি নু তে দিট্ঠো ৰা সুতো ৰা রাজা ৰা রাজমহামত্তো ৰা পঞ্চহি কামগুণেহি সমপ্পিতো সমঙ্গীভূতো পরিচারযমানো কামতণ্হং অপ্পহায কামপরিল়াহং অপ্পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহাসি ৰা ৰিহরতি ৰা ৰিহরিস্সতি ৰা’’তি? ‘‘নো হিদং, ভো গোতম’’. ‘‘সাধু, মাগণ্ডিয! মযাপি খো এতং, মাগণ্ডিয, নেৰ দিট্ঠং ন সুতং রাজা ৰা রাজমহামত্তো ৰা পঞ্চহি কামগুণেহি সমপ্পিতো সমঙ্গীভূতো পরিচারযমানো কামতণ্হং অপ্পহায কামপরিল়াহং অপ্পটিৰিনোদেত্ৰা ৰিগতপিপাসো অজ্ঝত্তং ৰূপসন্তচিত্তো ৰিহাসি ৰা ৰিহরতি ৰা ৰিহরিস্সতি ৰা. অথ খো, মাগণ্ডিয, যে হি কেচি সমণা ৰা ব্রাহ্মণা ৰা ৰিগতপিপাসা অজ্ঝত্তং ৰূপসন্তচিত্তা ৰিহাসুং ৰা ৰিহরন্তি ৰা ৰিহরিস্সন্তি ৰা সব্বে তে কামানংযেৰ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা কামতণ্হং পহায কামপরিল়াহং পটিৰিনোদেত্ৰা ৰিগতপিপাসা অজ্ঝত্তং ৰূপসন্তচিত্তা ৰিহাসুং ৰা ৰিহরন্তি ৰা ৰিহরিস্সন্তি ৰা’’তি. অথ খো ভগৰা তাযং ৰেলাযং ইমং উদানং উদানেসি –

‘‘আরোগ্যপরমা লাভা, নিব্বানং পরমং সুখং;

অট্ঠঙ্গিকো চ মগ্গানং, খেমং অমতগামিন’’ন্তি.

২১৬. এৰং ৰুত্তে, মাগণ্ডিযো পরিব্বাজকো ভগৰন্তং এতদৰোচ – ‘‘অচ্ছরিযং, ভো গোতম, অব্ভুতং, ভো গোতম! যাৰ সুভাসিতং চিদং ভোতা গোতমেন – ‘আরোগ্যপরমা লাভা, নিব্বানং পরমং সুখ’ন্তি. মযাপি খো এতং, ভো গোতম, সুতং পুব্বকানং পরিব্বাজকানং আচরিযপাচরিযানং ভাসমানানং – ‘আরোগ্যপরমা লাভা, নিব্বানং পরমং সুখ’ন্তি; তযিদং, ভো গোতম, সমেতী’’তি. ‘‘যং পন তে এতং, মাগণ্ডিয, সুতং পুব্বকানং পরিব্বাজকানং আচরিযপাচরিযানং ভাসমানানং – ‘আরোগ্যপরমা লাভা, নিব্বানং পরমং সুখ’ন্তি, কতমং তং আরোগ্যং, কতমং তং নিব্বান’’ন্তি? এৰং ৰুত্তে, মাগণ্ডিযো পরিব্বাজকো সকানেৰ সুদং গত্তানি পাণিনা অনোমজ্জতি – ‘‘ইদন্তং, ভো গোতম, আরোগ্যং, ইদন্তং নিব্বানং. অহঞ্হি, ভো গোতম, এতরহি অরোগো সুখী, ন মং কিঞ্চি আবাধতী’’তি.

২১৭. ‘‘সেয্যথাপি, মাগণ্ডিয, জচ্চন্ধো পুরিসো; সো ন পস্সেয্য কণ্হসুক্কানি রূপানি, ন পস্সেয্য নীলকানি রূপানি, ন পস্সেয্য পীতকানি রূপানি, ন পস্সেয্য লোহিতকানি রূপানি, ন পস্সেয্য মঞ্জিট্ঠকানি [মঞ্জেট্ঠিকানি (সী. স্যা. কং. পী.), মঞ্জেট্ঠকানি (ক.)] রূপানি, ন পস্সেয্য সমৰিসমং, ন পস্সেয্য তারকরূপানি, ন পস্সেয্য চন্দিমসূরিযে. সো সুণেয্য চক্খুমতো ভাসমানস্স – ‘ছেকং ৰত, ভো, ওদাতং ৰত্থং অভিরূপং নিম্মলং সুচী’তি! সো ওদাতপরিযেসনং চরেয্য. তমেনং অঞ্ঞতরো পুরিসো তেলমলিকতেন সাহুল়িচীরেন [তেলমসিকতেন সাহুল়চীৰরেন (সী. স্যা. কং. পী.)] ৰঞ্চেয্য – ‘ইদং তে, অম্ভো পুরিস, ওদাতং ৰত্থং অভিরূপং নিম্মলং সুচী’তি. সো তং পটিগ্গণ্হেয্য, পটিগ্গহেত্ৰা পারুপেয্য, পারুপেত্ৰা অত্তমনো অত্তমনৰাচং নিচ্ছারেয্য – ‘ছেকং ৰত, ভো, ওদাতং ৰত্থং অভিরূপং নিম্মলং সুচী’তি!

‘‘তং কিং মঞ্ঞসি, মাগণ্ডিয, অপি নু সো জচ্চন্ধো পুরিসো জানন্তো পস্সন্তো অমুং তেলমলিকতং সাহুল়িচীরং পটিগ্গণ্হেয্য, পটিগ্গহেত্ৰা পারুপেয্য, পারুপেত্ৰা অত্তমনো অত্তমনৰাচং নিচ্ছারেয্য – ‘ছেকং ৰত, ভো, ওদাতং ৰত্থং অভিরূপং নিম্মলং সুচী’তি উদাহু চক্খুমতো সদ্ধাযা’’তি? ‘‘অজানন্তো হি, ভো গোতম, অপস্সন্তো সো জচ্চন্ধো পুরিসো অমুং তেলমলিকতং সাহুল়িচীরং পটিগ্গণ্হেয্য, পটিগ্গহেত্ৰা পারুপেয্য, পারুপেত্ৰা অত্তমনো অত্তমনৰাচং নিচ্ছারেয্য – ‘ছেকং ৰত, ভো, ওদাতং ৰত্থং অভিরূপং নিম্মলং সুচী’তি, চক্খুমতো সদ্ধাযা’’তি. ‘‘এৰমেৰ খো, মাগণ্ডিয, অঞ্ঞতিত্থিযা পরিব্বাজকা অন্ধা অচক্খুকা অজানন্তা আরোগ্যং, অপস্সন্তা নিব্বানং, অথ চ পনিমং গাথং ভাসন্তি – ‘আরোগ্যপরমা লাভা, নিব্বানং পরমং সুখ’ন্তি. পুব্বকেহেসা, মাগণ্ডিয, অরহন্তেহি সম্মাসম্বুদ্ধেহি গাথা ভাসিতা –

‘আরোগ্যপরমা লাভা, নিব্বানং পরমং সুখং;

অট্ঠঙ্গিকো চ মগ্গানং, খেমং অমতগামিন’ন্তি.

২১৮. ‘‘সা এতরহি অনুপুব্বেন পুথুজ্জনগাথা [পুথুজ্জনগতা (সী. পী.)]. অযং খো পন, মাগণ্ডিয, কাযো রোগভূতো গণ্ডভূতো সল্লভূতো অঘভূতো আবাধভূতো, সো ত্ৰং ইমং কাযং রোগভূতং গণ্ডভূতং সল্লভূতং অঘভূতং আবাধভূতং – ‘ইদন্তং, ভো গোতম, আরোগ্যং, ইদন্তং নিব্বান’ন্তি ৰদেসি. তঞ্হি তে, মাগণ্ডিয, অরিযং চক্খুং নত্থি যেন ত্ৰং অরিযেন চক্খুনা আরোগ্যং জানেয্যাসি, নিব্বানং পস্সেয্যাসী’’তি. ‘‘এৰং পসন্নো অহং ভোতো গোতমস্স! পহোতি মে ভৰং গোতমো তথা ধম্মং দেসেতুং যথাহং আরোগ্যং জানেয্যং, নিব্বানং পস্সেয্য’’ন্তি.

২১৯. ‘‘সেয্যথাপি, মাগণ্ডিয, জচ্চন্ধো পুরিসো; সো ন পস্সেয্য কণ্হসুক্কানি রূপানি, ন পস্সেয্য নীলকানি রূপানি, ন পস্সেয্য পীতকানি রূপানি, ন পস্সেয্য লোহিতকানি রূপানি, ন পস্সেয্য মঞ্জিট্ঠকানি রূপানি, ন পস্সেয্য সমৰিসমং, ন পস্সেয্য তারকরূপানি, ন পস্সেয্য চন্দিমসূরিযে. তস্স মিত্তামচ্চা ঞাতিসালোহিতা ভিসক্কং সল্লকত্তং উপট্ঠাপেয্যুং. তস্স সো ভিসক্কো সল্লকত্তো ভেসজ্জং করেয্য. সো তং ভেসজ্জং আগম্ম ন চক্খূনি উপ্পাদেয্য, ন চক্খূনি ৰিসোধেয্য. তং কিং মঞ্ঞসি, মাগণ্ডিয, ননু সো ৰেজ্জো যাৰদেৰ কিলমথস্স ৰিঘাতস্স ভাগী অস্সা’’তি? ‘‘এৰং, ভো গোতম’’. ‘‘এৰমেৰ খো, মাগণ্ডিয, অহঞ্চে তে ধম্মং দেসেয্যং – ‘ইদন্তং আরোগ্যং, ইদন্তং নিব্বান’ন্তি, সো ত্ৰং আরোগ্যং ন জানেয্যাসি, নিব্বানং ন পস্সেয্যাসি. সো মমস্স কিলমথো, সা মমস্স ৰিহেসা’’তি. ‘‘এৰং পসন্নো অহং ভোতো গোতমস্স. পহোতি মে ভৰং গোতমো তথা ধম্মং দেসেতুং যথাহং আরোগ্যং জানেয্যং, নিব্বানং পস্সেয্য’’ন্তি.

২২০. ‘‘সেয্যথাপি, মাগণ্ডিয, জচ্চন্ধো পুরিসো; সো ন পস্সেয্য কণ্হসুক্কানি রূপানি, ন পস্সেয্য নীলকানি রূপানি, ন পস্সেয্য পীতকানি রূপানি, ন পস্সেয্য লোহিতকানি রূপানি, ন পস্সেয্য মঞ্জিট্ঠকানি রূপানি, ন পস্সেয্য সমৰিসমং, ন পস্সেয্য তারকরূপানি, ন পস্সেয্য চন্দিমসূরিযে. সো সুণেয্য চক্খুমতো ভাসমানস্স – ‘ছেকং ৰত, ভো, ওদাতং ৰত্থং অভিরূপং নিম্মলং সুচী’তি! সো ওদাতপরিযেসনং চরেয্য. তমেনং অঞ্ঞতরো পুরিসো তেলমলিকতেন সাহুল়িচীরেন ৰঞ্চেয্য – ‘ইদং তে, অম্ভো পুরিস, ওদাতং ৰত্থং অভিরূপং নিম্মলং সুচী’তি. সো তং পটিগ্গণ্হেয্য, পটিগ্গহেত্ৰা পারুপেয্য. তস্স মিত্তামচ্চা ঞাতিসালোহিতা ভিসক্কং সল্লকত্তং উপট্ঠাপেয্যুং. তস্স সো ভিসক্কো সল্লকত্তো ভেসজ্জং করেয্য – উদ্ধংৰিরেচনং অধোৰিরেচনং অঞ্জনং পচ্চঞ্জনং নত্থুকম্মং. সো তং ভেসজ্জং আগম্ম চক্খূনি উপ্পাদেয্য, চক্খূনি ৰিসোধেয্য. তস্স সহ চক্খুপ্পাদা যো অমুস্মিং তেলমলিকতে সাহুল়িচীরে ছন্দরাগো সো পহীযেথ. তঞ্চ নং পুরিসং অমিত্ততোপি দহেয্য, পচ্চত্থিকতোপি দহেয্য, অপি চ জীৰিতা ৰোরোপেতব্বং মঞ্ঞেয্য – ‘দীঘরত্তং ৰত, ভো, অহং ইমিনা পুরিসেন তেলমলিকতেন সাহুল়িচীরেন নিকতো ৰঞ্চিতো পলুদ্ধো – ইদং তে, অম্ভো পুরিস, ওদাতং ৰত্থং অভিরূপং নিম্মলং সুচী’তি. এৰমেৰ খো, মাগণ্ডিয, অহঞ্চে তে ধম্মং দেসেয্যং – ‘ইদন্তং আরোগ্যং, ইদন্তং নিব্বান’ন্তি. সো ত্ৰং আরোগ্যং জানেয্যাসি, নিব্বানং পস্সেয্যাসি. তস্স তে সহ চক্খুপ্পাদা যো পঞ্চসুপাদানক্খন্ধেসু ছন্দরাগো সো পহীযেথ; অপি চ তে এৰমস্স – ‘দীঘরত্তং ৰত, ভো, অহং ইমিনা চিত্তেন নিকতো ৰঞ্চিতো পলুদ্ধো [পলদ্ধো (সী. পী.)]. অহঞ্হি রূপংযেৰ উপাদিযমানো উপাদিযিং, ৰেদনংযেৰ উপাদিযমানো উপাদিযিং, সঞ্ঞংযেৰ উপাদিযমানো উপাদিযিং, সঙ্খারেযেৰ উপাদিযমানো উপাদিযিং, ৰিঞ্ঞাণংযেৰ উপাদিযমানো উপাদিযিং. তস্স মে উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি; এৰমেতস্স কেৰলস্স দুক্খক্খন্ধস্স সমুদযো হোতী’’’তি. ‘‘এৰং পসন্নো অহং ভোতো গোতমস্স! পহোতি মে ভৰং গোতমো তথা ধম্মং দেসেতুং যথাহং ইমম্হা আসনা অনন্ধো ৰুট্ঠহেয্য’’ন্তি.

২২১. ‘‘তেন হি ত্ৰং, মাগণ্ডিয, সপ্পুরিসে ভজেয্যাসি. যতো খো ত্ৰং, মাগণ্ডিয, সপ্পুরিসে ভজিস্সসি ততো ত্ৰং, মাগণ্ডিয, সদ্ধম্মং সোস্সসি; যতো খো ত্ৰং, মাগণ্ডিয, সদ্ধম্মং সোস্সসি ততো ত্ৰং, মাগণ্ডিয, ধম্মানুধম্মং পটিপজ্জিস্সসি; যতো খো ত্ৰং, মাগণ্ডিয, ধম্মানুধম্মং পটিপজ্জিস্সসি ততো ত্ৰং, মাগণ্ডিয, সামংযেৰ ঞস্সসি, সামং দক্খিস্সসি – ইমে রোগা গণ্ডা সল্লা; ইধ রোগা গণ্ডা সল্লা অপরিসেসা নিরুজ্ঝন্তি. তস্স মে উপাদাননিরোধা ভৰনিরোধো, ভৰনিরোধা জাতিনিরোধো, জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি; এৰমেতস্স কেৰলস্স দুক্খক্খন্ধস্স নিরোধো হোতী’’তি.

২২২. এৰং ৰুত্তে, মাগণ্ডিযো পরিব্বাজকো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি; এৰমেৰং ভোতা গোতমেন অনেকপরিযাযেন ধম্মো পকাসিতো. এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ. লভেয্যাহং ভোতো গোতমস্স সন্তিকে পব্বজ্জং, লভেয্যং উপসম্পদ’’ন্তি. ‘‘যো খো, মাগণ্ডিয, অঞ্ঞতিত্থিযপুব্বো ইমস্মিং ধম্মৰিনযে আকঙ্খতি পব্বজ্জং, আকঙ্খতি উপসম্পদং, সো চত্তারো মাসে পরিৰসতি; চতুন্নং মাসানং অচ্চযেন আরদ্ধচিত্তা ভিক্খূ পব্বাজেন্তি, উপসম্পাদেন্তি ভিক্খুভাৰায. অপি চ মেত্থ পুগ্গলৰেমত্ততা ৰিদিতা’’তি. ‘‘সচে, ভন্তে, অঞ্ঞতিত্থিযপুব্বা ইমস্মিং ধম্মৰিনযে আকঙ্খন্তা পব্বজ্জং, আকঙ্খন্তা উপসম্পদং চত্তারো মাসে পরিৰসন্তি, চতুন্নং মাসানং অচ্চযেন আরদ্ধচিত্তা ভিক্খূ পব্বাজেন্তি উপসম্পাদেন্তি ভিক্খুভাৰায; অহং চত্তারি ৰস্সানি পরিৰসিস্সামি, চতুন্নং ৰস্সানং অচ্চযেন আরদ্ধচিত্তা ভিক্খূ পব্বাজেন্তু, উপসম্পাদেন্তু ভিক্খুভাৰাযা’’তি. অলত্থ খো মাগণ্ডিযো পরিব্বাজকো ভগৰতো সন্তিকে পব্বজ্জং, অলত্থ উপসম্পদং. অচিরূপসম্পন্নো খো পনাযস্মা মাগণ্ডিযো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞাসি. অঞ্ঞতরো খো পনাযস্মা মাগণ্ডিযো অরহতং অহোসীতি.

মাগণ্ডিযসুত্তং নিট্ঠিতং পঞ্চমং.

৬. সন্দকসুত্তং

২২৩. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে. তেন খো পন সমযেন সন্দকো পরিব্বাজকো পিলক্খগুহাযং পটিৰসতি মহতিযা পরিব্বাজকপরিসায সদ্ধিং পঞ্চমত্তেহি পরিব্বাজকসতেহি. অথ খো আযস্মা আনন্দো সাযন্হসমযং পটিসল্লানা ৰুট্ঠিতো ভিক্খূ আমন্তেসি – ‘‘আযামাৰুসো, যেন দেৰকতসোব্ভো তেনুপসঙ্কমিস্সাম গুহাদস্সনাযা’’তি. ‘‘এৰমাৰুসো’’তি খো তে ভিক্খূ আযস্মতো আনন্দস্স পচ্চস্সোসুং. অথ খো আযস্মা আনন্দো সম্বহুলেহি ভিক্খূহি সদ্ধিং যেন দেৰকতসোব্ভো তেনুপসঙ্কমি. তেন খো পন সমযেন সন্দকো পরিব্বাজকো মহতিযা পরিব্বাজকপরিসায সদ্ধিং নিসিন্নো হোতি উন্নাদিনিযা উচ্চাসদ্দমহাসদ্দায অনেকৰিহিতং তিরচ্ছানকথং কথেন্তিযা, সেয্যথিদং – রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং সযনকথং মালাকথং গন্ধকথং ঞাতিকথং যানকথং গামকথং নিগমকথং নগরকথং জনপদকথং ইত্থিকথং সূরকথং ৰিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতিভৰাভৰকথং ইতি ৰা. অদ্দসা খো সন্দকো পরিব্বাজকো আযস্মন্তং আনন্দং দূরতোৰ আগচ্ছন্তং. দিস্ৰান সকং পরিসং সণ্ঠাপেসি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ; অযং সমণস্স গোতমস্স সাৰকো আগচ্ছতি সমণো আনন্দো. যাৰতা খো পন সমণস্স গোতমস্স সাৰকা কোসম্বিযং পটিৰসন্তি, অযং তেসং অঞ্ঞতরো সমণো আনন্দো. অপ্পসদ্দকামা খো পন তে আযস্মন্তো অপ্পসদ্দৰিনীতা অপ্পসদ্দস্স ৰণ্ণৰাদিনো; অপ্পেৰ নাম অপ্পসদ্দং পরিসং ৰিদিত্ৰা উপসঙ্কমিতব্বং মঞ্ঞেয্যা’’তি. অথ খো তে পরিব্বাজকা তুণ্হী অহেসুং.

২২৪. অথ খো আযস্মা আনন্দো যেন সন্দকো পরিব্বাজকো তেনুপসঙ্কমি. অথ খো সন্দকো পরিব্বাজকো আযস্মন্তং আনন্দং এতদৰোচ – ‘‘এতু খো ভৰং আনন্দো, স্ৰাগতং ভোতো আনন্দস্স. চিরস্সং খো ভৰং আনন্দো ইমং পরিযাযমকাসি যদিদং ইধাগমনায. নিসীদতু ভৰং আনন্দো, ইদমাসনং পঞ্ঞত্ত’’ন্তি. নিসীদি খো আযস্মা আনন্দো পঞ্ঞত্তে আসনে. সন্দকোপি খো পরিব্বাজকো অঞ্ঞতরং নীচং আসনং গহেত্ৰা একমন্তং নিসীদি. একমন্তং নিসিন্নং খো সন্দকং পরিব্বাজকং আযস্মা আনন্দো এতদৰোচ – ‘‘কাযনুত্থ, সন্দক, এতরহি কথায সন্নিসিন্না, কা চ পন ৰো অন্তরাকথা ৰিপ্পকতা’’তি? ‘‘তিট্ঠতেসা, ভো আনন্দ, কথা যায মযং এতরহি কথায সন্নিসিন্না. নেসা ভোতো আনন্দস্স কথা দুল্লভা ভৰিস্সতি পচ্ছাপি সৰনায. সাধু ৰত ভৰন্তংযেৰ আনন্দং পটিভাতু সকে আচরিযকে ধম্মীকথা’’তি. ‘‘তেন হি, সন্দক, সুণাহি, সাধুকং মনসি করোহি, ভাসিস্সামী’’তি. ‘‘এৰং ভো’’তি খো সন্দকো পরিব্বাজকো আযস্মতো আনন্দস্স পচ্চস্সোসি. আযস্মা আনন্দো এতদৰোচ – ‘‘চত্তারোমে, সন্দক, তেন ভগৰতা জানতা পস্সতা অরহতা সম্মাসম্বুদ্ধেন অব্রহ্মচরিযৰাসা অক্খাতা চত্তারি চ অনস্সাসিকানি ব্রহ্মচরিযানি অক্খাতানি, যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ [ৰসন্তো ৰা (সী. পী.) এৰমুপরিপি অনারাধনপক্খে] নারাধেয্য ঞাযং ধম্মং কুসল’’ন্তি. ‘‘কতমে পন তে, ভো আনন্দ, তেন ভগৰতা জানতা পস্সতা অরহতা সম্মাসম্বুদ্ধেন চত্তারো অব্রহ্মচরিযৰাসা অক্খাতা, যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসল’’ন্তি?

২২৫. ‘‘ইধ, সন্দক, একচ্চো সত্থা এৰংৰাদী হোতি এৰংদিট্ঠি – ‘নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরোলোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তি. চাতুমহাভূতিকো অযং পুরিসো যদা কালঙ্করোতি, পথৰী পথৰীকাযং অনুপেতি অনুপগচ্ছতি, আপো আপোকাযং অনুপেতি অনুপগচ্ছতি, তেজো তেজোকাযং অনুপেতি অনুপগচ্ছতি, ৰাযো ৰাযোকাযং অনুপেতি অনুপগচ্ছতি, আকাসং ইন্দ্রিযানি সঙ্কমন্তি. আসন্দিপঞ্চমা পুরিসা মতং আদায গচ্ছন্তি, যাৰাল়াহনা পদানি পঞ্ঞাযন্তি. কাপোতকানি অট্ঠীনি ভৰন্তি. ভস্সন্তা আহুতিযো; দত্তুপঞ্ঞত্তং যদিদং দানং. তেসং তুচ্ছা মুসা ৰিলাপো যে কেচি অত্থিকৰাদং ৰদন্তি. বালে চ পণ্ডিতে চ কাযস্স ভেদা উচ্ছিজ্জন্তি ৰিনস্সন্তি ন হোন্তি পরং মরণা’তি.

‘‘তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা এৰংৰাদী এৰংদিট্ঠি – নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরোলোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তি. চাতুমহাভূতিকো অযং পুরিসো যদা কালঙ্করোতি, পথৰী পথৰীকাযং অনুপেতি অনুপগচ্ছতি, আপো আপোকাযং অনুপেতি অনুপগচ্ছতি, তেজো তেজোকাযং অনুপেতি অনুপগচ্ছতি, ৰাযো ৰাযোকাযং অনুপেতি অনুপগচ্ছতি, আকাসং ইন্দ্রিযানি সঙ্কমন্তি. আসন্দিপঞ্চমা পুরিসা মতং আদায গচ্ছন্তি, যাৰাল়াহনা পদানি পঞ্ঞাযন্তি. কাপোতকানি অট্ঠীনি ভৰন্তি. ভস্সন্তা আহুতিযো; দত্তুপঞ্ঞত্তং যদিদং দানং. তেসং তুচ্ছা মুসা ৰিলাপো যে কেচি অত্থিকৰাদং ৰদন্তি. বালে চ পণ্ডিতে চ কাযস্স ভেদা উচ্ছিজ্জন্তি ৰিনস্সন্তি ন হোন্তি পরং মরণা’তি. সচে ইমস্স ভোতো সত্থুনো সচ্চং ৰচনং, অকতেন মে এত্থ কতং, অৰুসিতেন মে এত্থ ৰুসিতং. উভোপি মযং এত্থ সমসমা সামঞ্ঞং পত্তা, যো চাহং ন ৰদামি ‘উভো কাযস্স ভেদা উচ্ছিজ্জিস্সাম, ৰিনস্সিস্সাম, ন ভৰিস্সাম পরং মরণা’তি. অতিরেকং খো পনিমস্স ভোতো সত্থুনো নগ্গিযং মুণ্ডিযং উক্কুটিকপ্পধানং কেসমস্সুলোচনং যোহং পুত্তসম্বাধসযনং [পুত্তসম্বাধৰসনং (সী.)] অজ্ঝাৰসন্তো কাসিকচন্দনং পচ্চনুভোন্তো মালাগন্ধৰিলেপনং ধারেন্তো জাতরূপরজতং সাদিযন্তো ইমিনা ভোতা সত্থারা সমসমগতিকো ভৰিস্সামি. অভিসম্পরাযং সোহং কিং জানন্তো কিং পস্সন্তো ইমস্মিং সত্থরি ব্রহ্মচরিযং চরিস্সামি? ‘সো অব্রহ্মচরিযৰাসো অয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি [নিব্বিজ্জাপক্কমতি (সী.)]. অযং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন পঠমো অব্রহ্মচরিযৰাসো অক্খাতো যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

২২৬. ‘‘পুন চপরং, সন্দক, ইধেকচ্চো সত্থা এৰংৰাদী হোতি এৰংদিট্ঠি – ‘করোতো কারযতো ছিন্দতো ছেদাপযতো পচতো পাচাপযতো সোচযতো সোচাপযতো কিলমতো কিলমাপযতো ফন্দতো ফন্দাপযতো পাণমতিপাতযতো অদিন্নং আদিযতো সন্ধিং ছিন্দতো নিল্লোপং হরতো একাগারিকং করোতো পরিপন্থে তিট্ঠতো পরদারং গচ্ছতো মুসা ভণতো করোতো ন করীযতি পাপং. খুরপরিযন্তেন চেপি চক্কেন যো ইমিস্সা পথৰিযা পাণে একং মংসখলং একং মংসপুঞ্জং করেয্য, নত্থি ততোনিদানং পাপং, নত্থি পাপস্স আগমো. দক্খিণঞ্চেপি গঙ্গায তীরং গচ্ছেয্য হনন্তো ঘাতেন্তো ছিন্দন্তো ছেদাপেন্তো পচন্তো পচাপেন্তো, নত্থি ততোনিদানং পাপং, নত্থি পাপস্স আগমো. উত্তরঞ্চেপি গঙ্গায তীরং গচ্ছেয্য দদন্তো দাপেন্তো যজন্তো যজাপেন্তো, নত্থি ততোনিদানং পুঞ্ঞং, নত্থি পুঞ্ঞস্স আগমো. দানেন দমেন সংযমেন সচ্চৰজ্জেন নত্থি পুঞ্ঞং, নত্থি পুঞ্ঞস্স আগমো’তি.

‘‘তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা এৰংৰাদী এৰংদিট্ঠি – করোতো কারযতো ছিন্দতো ছেদাপযতো পচতো পাচাপযতো সোচতো সোচাপযতো কিলমতো কিলমাপযতো ফন্দতো ফন্দাপযতো পাণমতিপাতযতো অদিন্নং আদিযতো সন্ধিং ছিন্দতো নিল্লোপং হরতো একাগারিকং করোতো পরিপন্থে তিট্ঠতো পরদারং গচ্ছতো মুসা ভণতো করোতো ন করীযতি পাপং খুরপরিযন্তেন চেপি চক্কেন যো ইমিস্সা পথৰিযা পাণে একং মংসখলং একং মংসপুঞ্জং করেয্য, নত্থি ততোনিদানং পাপং, নত্থি পাপস্স আগমো. দক্খিণঞ্চেপি গঙ্গায তীরং গচ্ছেয্য হনন্তো ঘাতেন্তো ছিন্দন্তো ছেদাপেন্তো পচন্তো পচাপেন্তো, নত্থি ততোনিদানং পাপং, নত্থি পাপস্স আগমো. উত্তরঞ্চেপি গঙ্গায তীরং গচ্ছেয্য দদন্তো দাপেন্তো যজন্তো যজাপেন্তো, নত্থি ততোনিদানং পুঞ্ঞং, নত্থি পুঞ্ঞস্স আগমো. দানেন দমেন সংযমেন সচ্চৰজ্জেন নত্থি পুঞ্ঞং, নত্থি পুঞ্ঞস্স আগমো’তি. সচে ইমস্স ভোতো সত্থুনো সচ্চং ৰচনং, অকতেন মে এত্থ কতং, অৰুসিতেন মে এত্থ ৰুসিতং. উভোপি মযং এত্থ সমসমা সামঞ্ঞং পত্তা, যো চাহং ন ৰদামি ‘উভিন্নং কুরুতং ন করীযতি পাপ’ন্তি. অতিরেকং খো পনিমস্স ভোতো সত্থুনো নগ্গিযং মুণ্ডিযং উক্কুটিকপ্পধানং কেসমস্সুলোচনং যোহং পুত্তসম্বাধসযনং অজ্ঝাৰসন্তো কাসিকচন্দনং পচ্চনুভোন্তো মালাগন্ধৰিলেপনং ধারেন্তো জাতরূপরজতং সাদিযন্তো ইমিনা ভোতা সত্থারা সমসমগতিকো ভৰিস্সামি. অভিসম্পরাযং সোহং কিং জানন্তো কিং পস্সন্তো ইমস্মিং সত্থরি ব্রহ্মচরিযং চরিস্সামি? ‘সো অব্রহ্মচরিযৰাসো অয’ন্তি ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. অযং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন দুতিযো অব্রহ্মচরিযৰাসো অক্খাতো যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

২২৭. ‘‘পুন চপরং, সন্দক, ইধেকচ্চো সত্থা এৰংৰাদী হোতি এৰংদিট্ঠি – ‘নত্থি হেতু, নত্থি পচ্চযো সত্তানং সংকিলেসায; অহেতূ অপ্পচ্চযা সত্তা সংকিলিস্সন্তি; নত্থি হেতু, নত্থি পচ্চযো সত্তানং ৰিসুদ্ধিযা; অহেতূ অপ্পচ্চযা সত্তা ৰিসুজ্ঝন্তি; নত্থি বলং, নত্থি ৰীরিযং, নত্থি পুরিসথামো, নত্থি পুরিসপরক্কমো; সব্বে সত্তা সব্বে পাণা সব্বে ভূতা সব্বে জীৰা অৰসা অবলা অৰীরিযা নিযতিসঙ্গতিভাৰপরিণতা ছস্ৰেৰাভিজাতীসু সুখদুক্খং পটিসংৰেদেন্তী’তি.

‘‘তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা এৰংৰাদী এৰংদিট্ঠি – নত্থি হেতু, নত্থি পচ্চযো সত্তানং সংকিলেসায, অহেতূ অপ্পচ্চযা সত্তা সংকিলিস্সন্তি. নত্থি হেতু নত্থি পচ্চযো সত্তানং ৰিসুদ্ধিযা, অহেতূ অপ্পচ্চযা সত্তা ৰিসুজ্ঝন্তি. নত্থি বলং, নত্থি ৰীরিযং, নত্থি পুরিসথামো, নত্থি পুরিসপরক্কমো, সব্বে সত্তা সব্বে পাণা সব্বে ভূতা সব্বে জীৰা অৰসা অবলা অৰীরিযা নিযতিসঙ্গতিভাৰপরিণতা ছস্ৰেৰাভিজাতীসু সুখদুক্খং পটিসংৰেদেন্তী’তি. সচে ইমস্স ভোতো সত্থুনো সচ্চং ৰচনং, অকতেন মে এত্থ কতং, অৰুসিতেন মে এত্থ ৰুসিতং. উভোপি মযং এত্থ সমসমা সামঞ্ঞং পত্তা, যো চাহং ন ৰদামি ‘উভো অহেতূ অপ্পচ্চযা ৰিসুজ্ঝিস্সামা’তি. অতিরেকং খো পনিমস্স ভোতো সত্থুনো নগ্গিযং মুণ্ডিযং উক্কুটিকপ্পধানং কেসমস্সুলোচনং যোহং পুত্তসম্বাধসযনং অজ্ঝাৰসন্তো কাসিকচন্দনং পচ্চনুভোন্তো মালাগন্ধৰিলেপনং ধারেন্তো জাতরূপরজতং সাদিযন্তো ইমিনা ভোতা সত্থারা সমসমগতিকো ভৰিস্সামি. অভিসম্পরাযং সোহং কিং জানন্তো কিং পস্সন্তো ইমস্মিং সত্থরি ব্রহ্মচরিযং চরিস্সামি? ‘সো অব্রহ্মচরিযৰাসো অয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. অযং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন ততিযো অব্রহ্মচরিযৰাসো অক্খাতো যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

২২৮. ‘‘পুন চপরং, সন্দক, ইধেকচ্চো সত্থা এৰংৰাদী হোতি এৰংদিট্ঠি – ‘সত্তিমে কাযা অকটা অকটৰিধা অনিম্মিতা অনিম্মাতা ৰঞ্ঝা কূটট্ঠা এসিকট্ঠাযিট্ঠিতা, তে ন ইঞ্জন্তি ন ৰিপরিণমন্তি ন অঞ্ঞমঞ্ঞং ব্যাবাধেন্তি নালং অঞ্ঞমঞ্ঞস্স সুখায ৰা দুক্খায ৰা সুখদুক্খায ৰা. কতমে সত্ত? পথৰীকাযো আপোকাযো তেজোকাযো ৰাযোকাযো সুখে দুক্খে জীৰে সত্তমে – ইমে সত্তকাযা অকটা অকটৰিধা অনিম্মিতা অনিম্মাতা ৰঞ্ঝা কূটট্ঠা এসিকট্ঠাযিট্ঠিতা. তে ন ইঞ্জন্তি ন ৰিপরিণমন্তি ন অঞ্ঞমঞ্ঞং ব্যাবাধেন্তি. নালং অঞ্ঞমঞ্ঞস্স সুখায ৰা দুক্খায ৰা সুখদুক্খায ৰা. তত্থ নত্থি হন্তা ৰা ঘাতেতা ৰা সোতা ৰা সাৰেতা ৰা ৰিঞ্ঞাতা ৰা ৰিঞ্ঞাপেতা ৰা. যোপি তিণ্হেন সত্থেন সীসং ছিন্দতি, ন কোচি কঞ্চি [কিঞ্চি (ক.)] জীৰিতা ৰোরোপেতি. সত্তন্নংত্ৰেৰ কাযানমন্তরেন সত্থং ৰিৰরমনুপততি. চুদ্দস খো পনিমানি যোনিপমুখসতসহস্সানি সট্ঠি চ সতানি ছ চ সতানি পঞ্চ চ কম্মুনো সতানি পঞ্চ চ কম্মানি তীণি চ কম্মানি, কম্মে চ অড্ঢকম্মে চ, দ্ৰট্ঠিপটিপদা, দ্ৰট্ঠন্তরকপ্পা, ছল়াভিজাতিযো, অট্ঠ পুরিসভূমিযো, একূনপঞ্ঞাস আজীৰকসতে, একূনপঞ্ঞাস পরিব্বাজকসতে, একূনপঞ্ঞাস নাগাৰাসসতে, ৰীসে ইন্দ্রিযসতে, তিংসে নিরযসতে, ছত্তিংস রজোধাতুযো, সত্ত সঞ্ঞীগব্ভা, সত্ত অসঞ্ঞীগব্ভা, সত্ত নিগণ্ঠিগব্ভা, সত্ত দেৰা, সত্ত মানুসা, সত্ত পেসাচা, সত্ত সরা, সত্ত পৰুটা, সত্ত পপাতা, সত্ত পপাতসতানি, সত্ত সুপিনা, সত্ত সুপিনসতানি, চুল্লাসীতি [চূল়াসীতি (সী. স্যা. কং. পী.)] মহাকপ্পিনো [মহাকপ্পুনো (সী. পী.)] সতসহস্সানি, যানি বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তি. তত্থ নত্থি ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা অপরিপক্কং ৰা কম্মং পরিপাচেস্সামি, পরিপক্কং ৰা কম্মং ফুস্স ফুস্স ব্যন্তিং করিস্সামীতি. হেৰং নত্থি দোণমিতে সুখদুক্খে পরিযন্তকতে সংসারে, নত্থি হাযনৰড্ঢনে, নত্থি উক্কংসাৰকংসে. সেয্যথাপি নাম সুত্তগুল়ে খিত্তে নিব্বেঠিযমানমেৰ পলেতি, এৰমেৰ বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তী’তি.

‘‘তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা এৰংৰাদী এৰংদিট্ঠি – সত্তিমে কাযা অকটা অকটৰিধা অনিম্মিতা অনিম্মাতা ৰঞ্ঝা কূটট্ঠা এসিকট্ঠাযিট্ঠিতা. তে ন ইঞ্জন্তি ন ৰিপরিণমন্তি ন অঞ্ঞমঞ্ঞং ব্যাবাধেন্তি. নালং অঞ্ঞমঞ্ঞস্স সুখায ৰা দুক্খায ৰা সুখদুক্খায ৰা. কতমে সত্ত? পথৰীকাযো আপোকাযো তেজোকাযো ৰাযোকাযো সুখে দুক্খে জীৰে সত্তমে – ইমে সত্ত কাযা অকটা অকটৰিধা অনিম্মিতা অনিম্মাতা ৰঞ্ঝা কূটট্ঠা এসিকট্ঠাযিট্ঠিতা. তে ন ইঞ্জন্তি ন ৰিপরিণমন্তি ন অঞ্ঞমঞ্ঞং ব্যাবাধেন্তি. নালং অঞ্ঞমঞ্ঞস্স সুখায ৰা দুক্খায ৰা সুখদুক্খায ৰা. তত্থ নত্থি হন্তা ৰা ঘাতেতা ৰা সোতা ৰা সাৰেতা ৰা ৰিঞ্ঞাতা ৰা ৰিঞ্ঞাপেতা ৰা. যোপি তিণ্হেন সত্থেন সীসং ছিন্দতি, ন কোচি কঞ্চি জীৰিতা ৰোরোপেতি. সত্তন্নংত্ৰেৰ কাযানমন্তরেন সত্থং ৰিৰরমনুপততি. চুদ্দস খো পনিমানি যোনিপমুখসতসহস্সানি সট্ঠি চ সতানি ছ চ সতানি পঞ্চ চ কম্মুনো সতানি পঞ্চ চ কম্মানি তীণি চ কম্মানি, কম্মে চ অড্ঢকম্মে চ, দ্ৰট্ঠিপটিপদা, দ্ৰট্ঠন্তরকপ্পা, ছল়াভিজাতিযো, অট্ঠ পুরিসভূমিযো, একূনপঞ্ঞাস আজীৰকসতে, একূনপঞ্ঞাস পরিব্বাজকসতে, একূনপঞ্ঞাস নাগাৰাসসতে, ৰীসে ইন্দ্রিযসতে, তিংসে নিরযসতে, ছত্তিংস রজোধাতুযো, সত্ত সঞ্ঞীগব্ভা, সত্ত অসঞ্ঞীগব্ভা, সত্ত নিগণ্ঠিগব্ভা, সত্ত দেৰা, সত্ত মানুসা, সত্ত পেসাচা, সত্ত সরা, সত্ত পৰুটা, সত্ত পপাতা, সত্ত পপাতসতানি, সত্ত সুপিনা, সত্ত সুপিনসতানি, চুল্লাসীতি মহাকপ্পিনো সতসহস্সানি, যানি বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তি. তত্থ নত্থি ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা অপরিপক্কং ৰা কম্মং পরিপাচেস্সামি, পরিপক্কং ৰা কম্মং ফুস্স ফুস্স ব্যন্তিং করিস্সামীতি, হেৰং নত্থি দোণমিতে সুখদুক্খে পরিযন্তকতে সংসারে, নত্থি হাযনৰড্ঢনে, নত্থি উক্কংসাৰকংসে. সেয্যথাপি নাম সুত্তগুল়ে খিত্তে নিব্বেঠিযমানমেৰ পলেতি, এৰমেৰ বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তী’তি. সচে পন ইমস্স ভোতো সত্থুনো সচ্চং ৰচনং, অকতেন মে এত্থ কতং, অৰুসিতেন মে এত্থ ৰুসিতং. উভোপি মযং এত্থ সমসমা সামঞ্ঞং পত্তা, যো চাহং ন ৰদামি. ‘উভো সন্ধাৰিত্ৰা সংসরিত্ৰা দুক্খস্সন্তং করিস্সামা’তি. অতিরেকং খো পনিমস্স ভোতো সত্থুনো নগ্গিযং মুণ্ডিযং উক্কুটিকপ্পধানং কেসমস্সুলোচনং যোহং পুত্তসম্বাধসযনং অজ্ঝাৰসন্তো কাসিকচন্দনং পচ্চনুভোন্তো মালাগন্ধৰিলেপনং ধারেন্তো জাতরূপরজতং সাদিযন্তো ইমিনা ভোতা সত্থারা সমসমগতিকো ভৰিস্সামি. অভিসম্পরাযং সোহং কিং জানন্তো কিং পস্সন্তো ইমস্মিং সত্থরি ব্রহ্মচরিযং চরিস্সামি? ‘সো অব্রহ্মচরিযৰাসো অয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. অযং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন চতুত্থো অব্রহ্মচরিযৰাসো অক্খাতো যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

‘‘ইমে খো তে, সন্দক, তেন ভগৰতা জানতা পস্সতা অরহতা সম্মাসম্বুদ্ধেন চত্তারো অব্রহ্মচরিযৰাসা অক্খাতা যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসল’’ন্তি.

‘‘অচ্ছরিযং, ভো আনন্দ, অব্ভুতং, ভো আনন্দ! যাৰঞ্চিদং তেন ভগৰতা জানতা পস্সতা অরহতা সম্মাসম্বুদ্ধেন চত্তারো অব্রহ্মচরিযৰাসাৰ সমানা ‘অব্রহ্মচরিযৰাসা’তি অক্খাতা যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলন্তি. কতমানি পন তানি, ভো আনন্দ, তেন ভগৰতা জানতা পস্সতা অরহতা সম্মাসম্বুদ্ধেন চত্তারি অনস্সাসিকানি ব্রহ্মচরিযানি অক্খাতানি যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসল’’ন্তি?

২২৯. ‘‘ইধ, সন্দক, একচ্চো সত্থা সব্বঞ্ঞূ সব্বদস্সাৰী অপরিসেসং ঞাণদস্সনং পটিজানাতি – ‘চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি. সো সুঞ্ঞম্পি অগারং পৰিসতি, পিণ্ডম্পি ন লভতি, কুক্কুরোপি ডংসতি, চণ্ডেনপি হত্থিনা সমাগচ্ছতি, চণ্ডেনপি অস্সেন সমাগচ্ছতি, চণ্ডেনপি গোণেন সমাগচ্ছতি, ইত্থিযাপি পুরিসস্সপি নামম্পি গোত্তম্পি পুচ্ছতি, গামস্সপি নিগমস্সপি নামম্পি মগ্গম্পি পুচ্ছতি. সো ‘কিমিদ’ন্তি পুট্ঠো সমানো ‘সুঞ্ঞং মে অগারং পৰিসিতব্বং অহোসি’, তেন পাৰিসিং; ‘পিণ্ডম্পি অলদ্ধব্বং অহোসি’, তেন নালত্থং; ‘কুক্কুরেন ডংসিতব্বং অহোসি’, তেনম্হি [তেন (ক.), তেনাসিং (?)] দট্ঠো; ‘চণ্ডেন হত্থিনা সমাগন্তব্বং অহোসি’, তেন সমাগমিং; ‘চণ্ডেন অস্সেন সমাগন্তব্বং অহোসি’, তেন সমাগমিং; ‘চণ্ডেন গোণেন সমাগন্তব্বং অহোসি’, তেন সমাগমিং; ‘ইত্থিযাপি পুরিসস্সপি নামম্পি গোত্তম্পি পুচ্ছিতব্বং অহোসি’, তেন পুচ্ছিং; ‘গামস্সপি নিগমস্সপি নামম্পি মগ্গম্পি পুচ্ছিতব্বং অহোসি’, তেন পুচ্ছিন্তি. তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা সব্বঞ্ঞূ সব্বদস্সাৰী অপরিসেসং ঞাণদস্সনং পটিজানাতি…পে… ‘গামস্সপি নিগমস্সপি নামম্পি মগ্গম্পি পুচ্ছিতব্বং অহোসি, তেন পুচ্ছি’ন্তি. সো ‘অনস্সাসিকং ইদং ব্রহ্মচরিয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. ইদং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন পঠমং অনস্সাসিকং ব্রহ্মচরিযং অক্খাতং যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

২৩০. ‘‘পুন চপরং, সন্দক, ইধেকচ্চো সত্থা অনুস্সৰিকো হোতি অনুস্সৰসচ্চো. সো অনুস্সৰেন ইতিহিতিহপরম্পরায পিটকসম্পদায ধম্মং দেসেতি. অনুস্সৰিকস্স খো পন, সন্দক, সত্থুনো অনুস্সৰসচ্চস্স সুস্সুতম্পি হোতি দুস্সুতম্পি হোতি তথাপি হোতি অঞ্ঞথাপি হোতি. তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা অনুস্সৰিকো অনুস্সৰসচ্চো সো অনুস্সৰেন ইতিহিতিহপরম্পরায পিটকসম্পদায ধম্মং দেসেতি. অনুস্সৰিকস্স খো পন সত্থুনো অনুস্সৰসচ্চস্স সুস্সুতম্পি হোতি দুস্সুতম্পি হোতি তথাপি হোতি অঞ্ঞথাপি হোতি’. সো ‘অনস্সাসিকং ইদং ব্রহ্মচরিয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. ইদং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন দুতিযং অনস্সাসিকং ব্রহ্মচরিযং অক্খাতং যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

২৩১. ‘‘পুন চপরং, সন্দক, ইধেকচ্চো সত্থা তক্কী হোতি ৰীমংসী. সো তক্কপরিযাহতং ৰীমংসানুচরিতং সযংপটিভানং ধম্মং দেসেতি. তক্কিস্স খো পন, সন্দক, সত্থুনো ৰীমংসিস্স সুতক্কিতম্পি হোতি দুত্তক্কিতম্পি হোতি তথাপি হোতি অঞ্ঞথাপি হোতি. তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা তক্কী ৰীমংসী. সো তক্কপরিযাহতং ৰীমংসানুচরিতং সযংপটিভানং ধম্মং দেসেতি. তক্কিস্স খো পন সত্থুনো ৰীমংসিস্স সুতক্কিতম্পি হোতি দুত্তক্কিতম্পি হোতি তথাপি হোতি অঞ্ঞথাপি হোতি’. সো ‘অনস্সাসিকং ইদং ব্রহ্মচরিয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. ইদং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন ততিযং অনস্সাসিকং ব্রহ্মচরিযং অক্খাতং যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

২৩২. ‘‘পুন চপরং, সন্দক, ইধেকচ্চো সত্থা মন্দো হোতি মোমূহো. সো মন্দত্তা মোমূহত্তা তত্থ তত্থ [তথা তথা (সী. স্যা. কং. পী.)] পঞ্হং পুট্ঠো সমানো ৰাচাৰিক্খেপং আপজ্জতি অমরাৰিক্খেপং – ‘এৰন্তিপি [এৰম্পি (সী. পী.)] মে নো, তথাতিপি [তথাপি (সী. পী.)] মে নো, অঞ্ঞথাতিপি [অঞ্ঞথাপি (সী. পী.) ( ) সব্বত্থ নত্থি] মে নো, নোতিপি মে নো, নো নোতিপি মে নো’তি. তত্র, সন্দক, ৰিঞ্ঞূ পুরিসো ইতি পটিসঞ্চিক্খতি – ‘অযং খো ভৰং সত্থা মন্দো মোমূহো. সো মন্দত্তা মোমূহত্তা তত্থ তত্থ পঞ্হং পুট্ঠো সমানো ৰাচাৰিক্খেপং আপজ্জতি অমরাৰিক্খেপং – এৰন্তিপি মে নো, তথাতিপি মে নো, অঞ্ঞথাতিপি মে নো, নোতিপি মে নো, নো নোতিপি মে নো’তি. সো ‘অনস্সাসিকং ইদং ব্রহ্মচরিয’ন্তি – ইতি ৰিদিত্ৰা তস্মা ব্রহ্মচরিযা নিব্বিজ্জ পক্কমতি. ইদং খো, সন্দক, তেন ভগৰতা জানতা পস্সতা অরহতা সম্মাসম্বুদ্ধেন চতুত্থং অনস্সাসিকং ব্রহ্মচরিযং অক্খাতং যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং.

‘‘ইমানি খো, (তানি সন্দক, তেন ভগৰতা জানতা পস্সতা অরহতা সম্মাসম্বুদ্ধেন চত্তারি অনস্সাসিকানি ব্রহ্মচরিযানি অক্খাতানি যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসল’’ন্তি.

‘‘অচ্ছরিযং, ভো আনন্দ, অব্ভুতং, ভো আনন্দ! যাৰঞ্চিদং তেন ভগৰতা জানতা পস্সতা অরহতা সম্মাসম্বুদ্ধেন চত্তারি অনস্সাসিকানেৰ ব্রহ্মচরিযানি অনস্সাসিকানি ব্রহ্মচরিযানীতি অক্খাতানি যত্থ ৰিঞ্ঞূ পুরিসো সসক্কং ব্রহ্মচরিযং ন ৰসেয্য, ৰসন্তো চ নারাধেয্য ঞাযং ধম্মং কুসলং. সো পন, ভো আনন্দ, সত্থা কিং ৰাদী কিং অক্খাযী যত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসল’’ন্তি.

২৩৩. ‘‘ইধ, সন্দক, তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা…পে… [ৰিত্থারো ম. নি. ২.৯-১০ কন্দরকসুত্তে] সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. যস্মিং খো [যস্মিং খো পন (স্যা. কং. ক.)], সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসলং.

‘‘পুন চপরং, সন্দক, ভিক্খু ৰিতক্কৰিচারানং ৰূপসমা…পে... দুতিযং ঝানং উপসম্পজ্জ ৰিহরতি. যস্মিং খো, সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসলং.

‘‘পুন চপরং, সন্দক, ভিক্খু পীতিযা চ ৰিরাগা উপেক্খকো চ ৰিহরতি…পে… ততিযং ঝানং উপসম্পজ্জ ৰিহরতি. যস্মিং খো, সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসলং.

‘‘পুন চপরং, সন্দক, ভিক্খু সুখস্স চ পহানা…পে… চতুত্থং ঝানং উপসম্পজ্জ ৰিহরতি. যস্মিং খো, সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসলং.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি. সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি. যস্মিং খো, সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসলং.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি. সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে…পে… যথাকম্মূপগে সত্তে পজানাতি. যস্মিং খো, সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসলং.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি; ‘ইমে আসৰা’তি যথাভূতং পজানাতি, ‘অযং আসৰসমুদযো’তি যথাভূতং পজানাতি, ‘অযং আসৰনিরোধো’তি যথাভূতং পজানাতি, ‘অযং আসৰনিরোধগামিনী পটিপদা’তি যথাভূতং পজানাতি. তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি. ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. যস্মিং খো, সন্দক, সত্থরি সাৰকো এৰরূপং উল়ারৰিসেসং অধিগচ্ছতি তত্থ ৰিঞ্ঞূ পুরিসো সসক্কং ব্রহ্মচরিযং ৰসেয্য, ৰসন্তো চ আরাধেয্য ঞাযং ধম্মং কুসল’’ন্তি.

২৩৪. ‘‘যো পন সো, ভো আনন্দ, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো পরিভুঞ্জেয্য সো কামে’’তি? ‘‘যো সো, সন্দক, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো অভব্বো সো পঞ্চট্ঠানানি অজ্ঝাচরিতুং. অভব্বো খীণাসৰো ভিক্খু সঞ্চিচ্চ পাণং জীৰিতা ৰোরোপেতুং, অভব্বো খীণাসৰো ভিক্খু অদিন্নং থেয্যসঙ্খাতং আদাতুং, অভব্বো খীণাসৰো ভিক্খু মেথুনং ধম্মং পটিসেৰেতুং, অভব্বো খীণাসৰো ভিক্খু সম্পজানমুসা ভাসিতুং, অভব্বো খীণাসৰো ভিক্খু সন্নিধিকারকং কামে পরিভুঞ্জিতুং, সেয্যথাপি পুব্বে অগারিযভূতো. যো সো, সন্দক, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো অভব্বো সো ইমানি পঞ্চট্ঠানানি অজ্ঝাচরিতু’’ন্তি.

২৩৫. ‘‘যো পন সো, ভো আনন্দ, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো তস্স চরতো চেৰ তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিতং – ‘খীণা মে আসৰা’’’তি? ‘‘তেন হি, সন্দক, উপমং তে করিস্সামি; উপমাযপিধেকচ্চে ৰিঞ্ঞূ পুরিসা ভাসিতস্স অত্থং আজানন্তি. সেয্যথাপি, সন্দক, পুরিসস্স হত্থপাদা ছিন্না; তস্স চরতো চেৰ তিট্ঠতো চ সুত্তস্স চ জাগরস্স চ সততং সমিতং (জানাতি – ‘ছিন্না মে হত্থপাদা’তি, উদাহু পচ্চৰেক্খমানো জানাতি – ‘ছিন্না মে হত্থপাদা’’’তি? ‘‘ন খো, ভো আনন্দ, সো পুরিসো সততং সমিতং জানাতি – ‘ছিন্না মে হত্থপাদা’ তি.) [(ছিন্নাৰ হত্থপাদা,) (সী. স্যা. কং. পী.)] অপি চ খো পন নং পচ্চৰেক্খমানো জানাতি – ‘ছিন্না মে হত্থপাদা’’’তি. ‘‘এৰমেৰ খো, সন্দক, যো সো ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞা ৰিমুত্তো তস্স চরতো চেৰ তিট্ঠতো চ সুত্তস্স চ জাগরস্স চ সততং সমিতং (ঞাণদস্সনং ন পচ্চুপট্ঠিতং – ‘খীণা মে আসৰা’তি;) [(খীণাৰ আসৰা,) (সী. স্যা. কং. পী.)] অপি চ খো পন নং পচ্চৰেক্খমানো জানাতি – ‘খীণা মে আসৰা’’’তি.

২৩৬. ‘‘কীৰবহুকা পন, ভো আনন্দ, ইমস্মিং ধম্মৰিনযে নিয্যাতারো’’তি? ‘‘ন খো, সন্দক, একংযেৰ সতং ন দ্ৰে সতানি ন তীণি সতানি ন চত্তারি সতানি ন পঞ্চ সতানি, অথ খো ভিয্যোৰ যে ইমস্মিং ধম্মৰিনযে নিয্যাতারো’’তি. ‘‘অচ্ছরিযং, ভো আনন্দ, অব্ভুতং, ভো আনন্দ! ন চ নাম সধম্মোক্কংসনা ভৰিস্সতি, ন পরধম্মৰম্ভনা, আযতনে চ ধম্মদেসনা তাৰ বহুকা চ নিয্যাতারো পঞ্ঞাযিস্সন্তি. ইমে পনাজীৰকা পুত্তমতায পুত্তা অত্তানঞ্চেৰ উক্কংসেন্তি, পরে চ ৰম্ভেন্তি তযো চেৰ নিয্যাতারো পঞ্ঞপেন্তি, সেয্যথিদং – নন্দং ৰচ্ছং, কিসং সংকিচ্চং, মক্খলিং গোসাল’’ন্তি. অথ খো সন্দকো পরিব্বাজকো সকং পরিসং আমন্তেসি – ‘‘চরন্তু ভোন্তো সমণে গোতমে ব্রহ্মচরিযৰাসো. ন দানি সুকরং অম্হেহি লাভসক্কারসিলোকে পরিচ্চজিতু’’ন্তি. ইতি হিদং সন্দকো পরিব্বাজকো সকং পরিসং উয্যোজেসি ভগৰতি ব্রহ্মচরিযেতি.

সন্দকসুত্তং নিট্ঠিতং ছট্ঠং.

৭. মহাসকুলুদাযিসুত্তং

২৩৭. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন সম্বহুলা অভিঞ্ঞাতা অভিঞ্ঞাতা পরিব্বাজকা মোরনিৰাপে পরিব্বাজকারামে পটিৰসন্তি, সেয্যথিদং – অন্নভারো ৰরধরো সকুলুদাযী চ পরিব্বাজকো অঞ্ঞে চ অভিঞ্ঞাতা অভিঞ্ঞাতা পরিব্বাজকা. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি. অথ খো ভগৰতো এতদহোসি – ‘‘অতিপ্পগো খো তাৰ রাজগহে পিণ্ডায চরিতুং. যংনূনাহং যেন মোরনিৰাপো পরিব্বাজকারামো যেন সকুলুদাযী পরিব্বাজকো তেনুপসঙ্কমেয্য’’ন্তি. অথ খো ভগৰা যেন মোরনিৰাপো পরিব্বাজকারামো তেনুপসঙ্কমি. তেন খো পন সমযেন সকুলুদাযী পরিব্বাজকো মহতিযা পরিব্বাজকপরিসায সদ্ধিং নিসিন্নো হোতি উন্নাদিনিযা উচ্চাসদ্দমহাসদ্দায অনেকৰিহিতং তিরচ্ছানকথং কথেন্তিযা, সেয্যথিদং – রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং সযনকথং মালাকথং গন্ধকথং ঞাতিকথং যানকথং গামকথং নিগমকথং নগরকথং জনপদকথং ইত্থিকথং সূরকথং ৰিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতিভৰাভৰকথং ইতি ৰা. অদ্দসা খো সকুলুদাযী পরিব্বাজকো ভগৰন্তং দূরতোৰ আগচ্ছন্তং. দিস্ৰান সকং পরিসং সণ্ঠাপেতি – ‘‘অপ্পসদ্দা ভোন্তো হোন্তু; মা ভোন্তো সদ্দমকত্থ. অযং সমণো গোতমো আগচ্ছতি; অপ্পসদ্দকামো খো পন সো আযস্মা অপ্পসদ্দস্স ৰণ্ণৰাদী. অপ্পেৰ নাম অপ্পসদ্দং পরিসং ৰিদিত্ৰা উপসঙ্কমিতব্বং মঞ্ঞেয্যা’’তি. অথ খো তে পরিব্বাজকা তুণ্হী অহেসুং. অথ খো ভগৰা যেন সকুলুদাযী পরিব্বাজকো তেনুপসঙ্কমি. অথ খো সকুলুদাযী পরিব্বাজকো ভগৰন্তং এতদৰোচ – ‘‘এতু খো, ভন্তে, ভগৰা. স্ৰাগতং, ভন্তে, ভগৰতো. চিরস্সং খো, ভন্তে, ভগৰা ইমং পরিযাযমকাসি যদিদং ইধাগমনায. নিসীদতু, ভন্তে, ভগৰা; ইদমাসনং পঞ্ঞত্ত’’ন্তি. নিসীদি ভগৰা পঞ্ঞত্তে আসনে. সকুলুদাযীপি খো পরিব্বাজকো অঞ্ঞতরং নীচং আসনং গহেত্ৰা একমন্তং নিসীদি. একমন্তং নিসিন্নং খো সকুলুদাযিং পরিব্বাজকং ভগৰা এতদৰোচ –

২৩৮. ‘‘কাযনুত্থ, উদাযি, এতরহি কথায সন্নিসিন্না, কা চ পন ৰো অন্তরাকথা ৰিপ্পকতা’’তি? ‘‘তিট্ঠতেসা, ভন্তে, কথা যায মযং এতরহি কথায সন্নিসিন্না. নেসা, ভন্তে, কথা ভগৰতো দুল্লভা ভৰিস্সতি পচ্ছাপি সৰনায. পুরিমানি, ভন্তে, দিৰসানি পুরিমতরানি নানাতিত্থিযানং সমণব্রাহ্মণানং কুতূহলসালাযং সন্নিসিন্নানং সন্নিপতিতানং অযমন্তরাকথা উদপাদি – ‘লাভা ৰত, ভো, অঙ্গমগধানং, সুলদ্ধলাভা ৰত, ভো, অঙ্গমগধানং! তত্রিমে [যত্থিমে (সী.)] সমণব্রাহ্মণা সঙ্ঘিনো গণিনো গণাচরিযা ঞাতা যসস্সিনো তিত্থকরা সাধুসম্মতা বহুজনস্স রাজগহং ৰস্সাৰাসং ওসটা. অযম্পি খো পূরণো কস্সপো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স; সোপি রাজগহং ৰস্সাৰাসং ওসটো. অযম্পি খো মক্খলি গোসালো…পে… অজিতো কেসকম্বলো… পকুধো কচ্চাযনো… সঞ্জযো বেলট্ঠপুত্তো… নিগণ্ঠো নাটপুত্তো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স; সোপি রাজগহং ৰস্সাৰাসং ওসটো. অযম্পি খো সমণো গোতমো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স; সোপি রাজগহং ৰস্সাৰাসং ওসটো. কো নু খো ইমেসং ভৰতং সমণব্রাহ্মণানং সঙ্ঘীনং গণীনং গণাচরিযানং ঞাতানং যসস্সীনং তিত্থকরানং সাধুসম্মতানং বহুজনস্স সাৰকানং সক্কতো গরুকতো মানিতো পূজিতো, কঞ্চ পন সাৰকা সক্কত্ৰা গরুং কত্ৰা [গরুকত্ৰা (সী. স্যা. কং. পী.)] উপনিস্সায ৰিহরন্তী’’’তি?

২৩৯. ‘‘তত্রেকচ্চে এৰমাহংসু – ‘অযং খো পূরণো কস্সপো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স; সো চ খো সাৰকানং ন সক্কতো ন গরুকতো ন মানিতো ন পূজিতো, ন চ পন পূরণং কস্সপং সাৰকা সক্কত্ৰা গরুং কত্ৰা উপনিস্সায ৰিহরন্তি. ভূতপুব্বং পূরণো কস্সপো অনেকসতায পরিসায ধম্মং দেসেতি. তত্রঞ্ঞতরো পূরণস্স কস্সপস্স সাৰকো সদ্দমকাসি – ‘‘মা ভোন্তো পূরণং কস্সপং এতমত্থং পুচ্ছিত্থ; নেসো এতং জানাতি; মযমেতং জানাম, অম্হে এতমত্থং পুচ্ছথ; মযমেতং ভৰন্তানং ব্যাকরিস্সামা’’তি. ভূতপুব্বং পূরণো কস্সপো বাহা পগ্গয্হ কন্দন্তো ন লভতি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ. নেতে, ভৰন্তে, পুচ্ছন্তি, অম্হে এতে পুচ্ছন্তি; মযমেতেসং ব্যাকরিস্সামা’’তি. বহূ খো পন পূরণস্স কস্সপস্স সাৰকা ৰাদং আরোপেত্ৰা অপক্কন্তা – ‘‘ন ত্ৰং ইমং ধম্মৰিনযং আজানাসি, অহং ইমং ধম্মৰিনযং আজানামি, কিং ত্ৰং ইমং ধম্মৰিনযং আজানিস্সসি? মিচ্ছাপটিপন্নো ত্ৰমসি, অহমস্মি সম্মাপটিপন্নো, সহিতং মে, অসহিতং তে, পুরেৰচনীযং পচ্ছা অৰচ, পচ্ছাৰচনীযং পুরে অৰচ, অধিচিণ্ণং তে ৰিপরাৰত্তং, আরোপিতো তে ৰাদো, নিগ্গহিতোসি, চর ৰাদপ্পমোক্খায, নিব্বেঠেহি ৰা সচে পহোসী’’তি. ইতি পূরণো কস্সপো সাৰকানং ন সক্কতো ন গরুকতো ন মানিতো ন পূজিতো, ন চ পন পূরণং কস্সপং সাৰকা সক্কত্ৰা গরুং কত্ৰা উপনিস্সায ৰিহরন্তি. অক্কুট্ঠো চ পন পূরণো কস্সপো ধম্মক্কোসেনা’’’তি.

‘‘একচ্চে এৰমাহংসু – ‘অযম্পি খো মক্খলি গোসালো…পে… অজিতো কেসকম্বলো… পকুধো কচ্চাযনো… সঞ্জযো বেলট্ঠপুত্তো… নিগণ্ঠো নাটপুত্তো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স; সো চ খো সাৰকানং ন সক্কতো ন গরুকতো ন মানিতো ন পূজিতো, ন চ পন নিগণ্ঠং নাটপুত্তং সাৰকা সক্কত্ৰা গরুং কত্ৰা উপনিস্সায ৰিহরন্তি. ভূতপুব্বং নিগণ্ঠো নাটপুত্তো অনেকসতায পরিসায ধম্মং দেসেতি. তত্রঞ্ঞতরো নিগণ্ঠস্স নাটপুত্তস্স সাৰকো সদ্দমকাসি – মা ভোন্তো নিগণ্ঠং নাটপুত্তং এতমত্থং পুচ্ছিত্থ; নেসো এতং জানাতি; মযমেতং জানাম, অম্হে এতমত্থং পুচ্ছথ; মযমেতং ভৰন্তানং ব্যাকরিস্সামাতি. ভূতপুব্বং নিগণ্ঠো নাটপুত্তো বাহা পগ্গয্হ কন্দন্তো ন লভতি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ. নেতে ভৰন্তে পুচ্ছন্তি, অম্হে এতে পুচ্ছন্তি; মযমেতেসং ব্যাকরিস্সামা’’তি. বহূ খো পন নিগণ্ঠস্স নাটপুত্তস্স সাৰকা ৰাদং আরোপেত্ৰা অপক্কন্তা – ‘‘ন ত্ৰং ইমং ধম্মৰিনযং আজানাসি, অহং ইমং ধম্মৰিনযং আজানামি. কিং ত্ৰং ইমং ধম্মৰিনযং আজানিস্সসি? মিচ্ছাপটিপন্নো ত্ৰমসি. অহমস্মি সম্মাপটিপন্নো. সহিতং মে অসহিতং তে, পুরেৰচনীযং পচ্ছা অৰচ, পচ্ছাৰচনীযং পুরে অৰচ, অধিচিণ্ণং তে ৰিপরাৰত্তং, আরোপিতো তে ৰাদো, নিগ্গহিতোসি, চর ৰাদপ্পমোক্খায, নিব্বেঠেহি ৰা সচে পহোসী’’তি. ইতি নিগণ্ঠো নাটপুত্তো সাৰকানং ন সক্কতো ন গরুকতো ন মানিতো ন পূজিতো, ন চ পন নিগণ্ঠং নাটপুত্তং সাৰকা সক্কত্ৰা গরুং কত্ৰা উপনিস্সায ৰিহরন্তি. অক্কুট্ঠো চ পন নিগণ্ঠো নাটপুত্তো ধম্মক্কোসেনা’’’তি.

২৪০. ‘‘একচ্চে এৰমাহংসু – ‘অযম্পি খো সমণো গোতমো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স; সো চ খো সাৰকানং সক্কতো গরুকতো মানিতো পূজিতো, সমণঞ্চ পন গোতমং সাৰকা সক্কত্ৰা গরুং কত্ৰা উপনিস্সায ৰিহরন্তি. ভূতপুব্বং সমণো গোতমো অনেকসতায পরিসায ধম্মং দেসেসি. তত্রঞ্ঞতরো সমণস্স গোতমস্স সাৰকো উক্কাসি. তমেনাঞ্ঞতরো সব্রহ্মচারী জণ্ণুকেন [জণ্ণুকে (সী.)] ঘট্টেসি – ‘‘অপ্পসদ্দো আযস্মা হোতু, মাযস্মা সদ্দমকাসি, সত্থা নো ভগৰা ধম্মং দেসেসী’’তি. যস্মিং সমযে সমণো গোতমো অনেকসতায পরিসায ধম্মং দেসেতি, নেৰ তস্মিং সমযে সমণস্স গোতমস্স সাৰকানং খিপিতসদ্দো ৰা হোতি উক্কাসিতসদ্দো ৰা. তমেনং মহাজনকাযো পচ্চাসীসমানরূপো [পচ্চাসিং সমানরূপো (সী. স্যা. কং. পী.)] পচ্চুপট্ঠিতো হোতি – ‘‘যং নো ভগৰা ধম্মং ভাসিস্সতি তং নো সোস্সামা’’তি. সেয্যথাপি নাম পুরিসো চাতুম্মহাপথে খুদ্দমধুং [খুদ্দং মধুং (সী. স্যা. কং. পী.)] অনেলকং পীল়েয্য [উপ্পীল়েয্য (সী.)]. তমেনং মহাজনকাযো পচ্চাসীসমানরূপো পচ্চুপট্ঠিতো অস্স. এৰমেৰ যস্মিং সমযে সমণো গোতমো অনেকসতায পরিসায ধম্মং দেসেতি, নেৰ তস্মিং সমযে সমণস্স গোতমস্স সাৰকানং খিপিতসদ্দো ৰা হোতি উক্কাসিতসদ্দো ৰা. তমেনং মহাজনকাযো পচ্চাসীসমানরূপো পচ্চুপট্ঠিতো হোতি – ‘‘যং নো ভগৰা ধম্মং ভাসিস্সতি তং নো সোস্সামা’’তি. যেপি সমণস্স গোতমস্স সাৰকা সব্রহ্মচারীহি সম্পযোজেত্ৰা সিক্খং পচ্চক্খায হীনাযাৰত্তন্তি তেপি সত্থু চেৰ ৰণ্ণৰাদিনো হোন্তি, ধম্মস্স চ ৰণ্ণৰাদিনো হোন্তি, সঙ্ঘস্স চ ৰণ্ণৰাদিনো হোন্তি, অত্তগরহিনোযেৰ হোন্তি অনঞ্ঞগরহিনো, ‘‘মযমেৰম্হা অলক্খিকা মযং অপ্পপুঞ্ঞা তে মযং এৰং স্ৰাক্খাতে ধম্মৰিনযে পব্বজিত্ৰা নাসক্খিম্হা যাৰজীৰং পরিপুণ্ণং পরিসুদ্ধং ব্রহ্মচরিযং চরিতু’’ন্তি. তে আরামিকভূতা ৰা উপাসকভূতা ৰা পঞ্চসিক্খাপদে সমাদায ৰত্তন্তি. ইতি সমণো গোতমো সাৰকানং সক্কতো গরুকতো মানিতো পূজিতো, সমণঞ্চ পন গোতমং সাৰকা সক্কত্ৰা গরুং কত্ৰা উপনিস্সায ৰিহরন্তী’’’তি.

২৪১. ‘‘কতি পন ত্ৰং, উদাযি, মযি ধম্মে সমনুপস্সসি, যেহি মমং [মম (সব্বত্থ)] সাৰকা সক্করোন্তি গরুং করোন্তি [গরুকরোন্তি (সী. স্যা. কং. পী.)] মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তী’’তি? ‘‘পঞ্চ খো অহং, ভন্তে, ভগৰতি ধম্মে সমনুপস্সামি যেহি ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তি. কতমে পঞ্চ? ভগৰা হি, ভন্তে, অপ্পাহারো, অপ্পাহারতায চ ৰণ্ণৰাদী. যম্পি, ভন্তে, ভগৰা অপ্পাহারো, অপ্পাহারতায চ ৰণ্ণৰাদী ইমং খো অহং, ভন্তে, ভগৰতি পঠমং ধম্মং সমনুপস্সামি যেন ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তি.

‘‘পুন চপরং, ভন্তে, ভগৰা সন্তুট্ঠো ইতরীতরেন চীৰরেন, ইতরীতরচীৰরসন্তুট্ঠিযা চ ৰণ্ণৰাদী. যম্পি, ভন্তে, ভগৰা সন্তুট্ঠো ইতরীতরেন চীৰরেন, ইতরীতরচীৰরসন্তুট্ঠিযা চ ৰণ্ণৰাদী, ইমং খো অহং, ভন্তে, ভগৰতি দুতিযং ধম্মং সমনুপস্সামি যেন ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তি.

‘‘পুন চপরং, ভন্তে, ভগৰা সন্তুট্ঠো ইতরীতরেন পিণ্ডপাতেন, ইতরীতরপিণ্ডপাতসন্তুট্ঠিযা চ ৰণ্ণৰাদী. যম্পি, ভন্তে, ভগৰা সন্তুট্ঠো ইতরীতরেন পিণ্ডপাতেন, ইতরীতরপিণ্ডপাতসন্তুট্ঠিযা চ ৰণ্ণৰাদী, ইমং খো অহং, ভন্তে, ভগৰতি ততিযং ধম্মং সমনুপস্সামি যেন ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তি.

‘‘পুন চপরং, ভন্তে, ভগৰা সন্তুট্ঠো ইতরীতরেন সেনাসনেন, ইতরীতরসেনাসনসন্তুট্ঠিযা চ ৰণ্ণৰাদী. যম্পি, ভন্তে, ভগৰা সন্তুট্ঠো ইতরীতরেন সেনাসনেন, ইতরীতরসেনাসনসন্তুট্ঠিযা চ ৰণ্ণৰাদী, ইমং খো অহং, ভন্তে, ভগৰতি চতুত্থং ধম্মং সমনুপস্সামি যেন ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তি.

‘‘পুন চপরং, ভন্তে, ভগৰা পৰিৰিত্তো, পৰিৰেকস্স চ ৰণ্ণৰাদী. যম্পি, ভন্তে, ভগৰা পৰিৰিত্তো, পৰিৰেকস্স চ ৰণ্ণৰাদী, ইমং খো অহং, ভন্তে, ভগৰতি পঞ্চমং ধম্মং সমনুপস্সামি যেন ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তি.

‘‘ইমে খো অহং, ভন্তে, ভগৰতি পঞ্চ ধম্মে সমনুপস্সামি যেহি ভগৰন্তং সাৰকা সক্করোন্তি গরুং করোন্তি মানেন্তি পূজেন্তি, সক্কত্ৰা গরুং কত্ৰা উপনিস্সায ৰিহরন্তী’’তি.

২৪২. ‘‘‘অপ্পাহারো সমণো গোতমো, অপ্পাহারতায চ ৰণ্ণৰাদী’তি, ইতি চে মং, উদাযি, সাৰকা সক্করেয্যুং গরুং করেয্যুং মানেয্যুং পূজেয্যুং, সক্কত্ৰা গরুং কত্ৰা উপনিস্সায ৰিহরেয্যুং, সন্তি খো পন মে, উদাযি, সাৰকা কোসকাহারাপি অড্ঢকোসকাহারাপি বেলুৰাহারাপি অড্ঢবেলুৰাহারাপি. অহং খো পন, উদাযি, অপ্পেকদা ইমিনা পত্তেন সমতিত্তিকম্পি ভুঞ্জামি ভিয্যোপি ভুঞ্জামি. ‘অপ্পাহারো সমণো গোতমো, অপ্পাহারতায চ ৰণ্ণৰাদী’তি, ইতি চে মং, উদাযি, সাৰকা সক্করেয্যুং গরুং করেয্যুং মানেয্যুং পূজেয্যুং, সক্কত্ৰা গরুং কত্ৰা উপনিস্সায ৰিহরেয্যুং, যে তে, উদাযি, মম সাৰকা কোসকাহারাপি অড্ঢকোসকাহারাপি বেলুৰাহারাপি অড্ঢবেলুৰাহারাপি ন মং তে ইমিনা ধম্মেন সক্করেয্যুং গরুং করেয্যুং মানেয্যুং পূজেয্যুং, সক্কত্ৰা গরুং কত্ৰা উপনিস্সায ৰিহরেয্যুং.