১০. মারতজ্জনীযসুত্তং

৫০৬. এৰং মে সুতং – একং সমযং আযস্মা মহামোগ্গল্লানো ভগ্গেসু ৰিহরতি সুসুমারগিরে ভেসকল়াৰনে মিগদাযে. তেন খো পন সমযেন আযস্মা মহামোগ্গল্লানো অব্ভোকাসে চঙ্কমতি. তেন খো পন সমযেন মারো পাপিমা আযস্মতো মহামোগ্গল্লানস্স কুচ্ছিগতো হোতি কোট্ঠমনুপৰিট্ঠো. অথ খো আযস্মতো মহামোগ্গল্লানস্স এতদহোসি – ‘‘কিং নু খো মে কুচ্ছি গরুগরো ৰিয [গরু গরু ৰিয (সী. পী. টীকাযং পাঠন্তরং)]? মাসাচিতং মঞ্ঞে’’তি. অথ খো আযস্মা মহামোগ্গল্লানো চঙ্কমা ওরোহিত্ৰা ৰিহারং পৰিসিত্ৰা পঞ্ঞত্তে আসনে নিসীদি. নিসজ্জ খো আযস্মা মহামোগ্গল্লানো পচ্চত্তং যোনিসো মনসাকাসি. অদ্দসা খো আযস্মা মহামোগ্গল্লানো মারং পাপিমন্তং কুচ্ছিগতং কোট্ঠমনুপৰিট্ঠং. দিস্ৰান মারং পাপিমন্তং এতদৰোচ – ‘‘নিক্খম, পাপিম; নিক্খম, পাপিম! মা তথাগতং ৰিহেসেসি, মা তথাগতসাৰকং. মা তে অহোসি দীঘরত্তং অহিতায দুক্খাযা’’তি. অথ খো মারস্স পাপিমতো এতদহোসি – ‘‘অজানমেৰ খো মং অযং সমণো অপস্সং এৰমাহ – ‘নিক্খম, পাপিম; নিক্খম, পাপিম! মা তথাগতং ৰিহেসেসি, মা তথাগতসাৰকং. মা তে অহোসি দীঘরত্তং অহিতায দুক্খাযা’তি. যোপিস্স সো সত্থা সোপি মং নেৰ খিপ্পং জানেয্য, কুতো পন [কুতো চ পন (স্যা.)] মং অযং সাৰকো জানিস্সতী’’তি? অথ খো আযস্মা মহামোগ্গল্লানো মারং পাপিমন্তং এতদৰোচ – ‘‘এৰম্পি খো তাহং, পাপিম, জানামি, মা ত্ৰং মঞ্ঞিত্থো – ‘ন মং জানাতী’তি. মারো ত্ৰমসি, পাপিম; তুয্হঞ্হি, পাপিম, এৰং হোতি – ‘অজানমেৰ খো মং অযং সমণো অপস্সং এৰমাহ – নিক্খম, পাপিম; নিক্খম, পাপিম! মা তথাগতং ৰিহেসেসি, মা তথাগতসাৰকং. মা তে অহোসি দীঘরত্তং অহিতায দুক্খাযাতি. যোপিস্স সো সত্থা সোপি মং নেৰ খিপ্পং জানেয্য, কুতো পন মং অযং সাৰকো জানিস্সতী’’’তি?

অথ খো মারস্স পাপিমতো এতদহোসি – ‘‘জানমে খো মং অযং সমণো পস্সং এৰমাহ – ‘নিক্খম, পাপিম; নিক্খম, পাপিম! মা তথাগতং ৰিহেসেসি, মা তথাগতসাৰকং. মা তে অহোসি দীঘরত্তং অহিতায দুক্খাযা’’’তি. অথ খো মারো পাপিমা আযস্মতো মহামোগ্গল্লানস্স মুখতো উগ্গন্ত্ৰা পচ্চগ্গল়ে অট্ঠাসি.

৫০৭. অদ্দসা খো আযস্মা মহামোগ্গল্লানো মারং পাপিমন্তং পচ্চগ্গল়ে ঠিতং; দিস্ৰান মারং পাপিমন্তং এতদৰোচ – ‘এত্থাপি খো তাহং, পাপিম, পস্সামি; মা ত্ৰং মঞ্ঞিত্থো ‘‘ন মং পস্সতী’’তি. এসো ত্ৰং, পাপিম, পচ্চগ্গল়ে ঠিতো. ভূতপুব্বাহং, পাপিম, দূসী নাম মারো অহোসিং, তস্স মে কাল়ী নাম ভগিনী. তস্সা ত্ৰং পুত্তো. সো মে ত্ৰং ভাগিনেয্যো অহোসি. তেন খো পন, পাপিম, সমযেন ককুসন্ধো ভগৰা অরহং সম্মাসম্বুদ্ধো লোকে উপ্পন্নো হোতি. ককুসন্ধস্স খো পন, পাপিম, ভগৰতো অরহতো সম্মাসম্বুদ্ধস্স ৰিধুরসঞ্জীৰং নাম সাৰকযুগং অহোসি অগ্গং ভদ্দযুগং. যাৰতা খো পন, পাপিম, ককুসন্ধস্স ভগৰতো অরহতো সম্মাসম্বুদ্ধস্স সাৰকা. তেসু ন চ কোচি আযস্মতা ৰিধুরেন সমসমো হোতি যদিদং ধম্মদেসনায. ইমিনা খো এৰং [এতং (সী. স্যা. পী.)], পাপিম, পরিযাযেন আযস্মতো ৰিধুরস্স ৰিধুরোতেৰ [ৰিধুরস্স ৰিধুরো ৰিধুরোত্ৰেৰ (সী. স্যা. কং. পী.)] সমঞ্ঞা উদপাদি.

‘‘আযস্মা পন, পাপিম, সঞ্জীৰো অরঞ্ঞগতোপি রুক্খমূলগতোপি সুঞ্ঞাগারগতোপি অপ্পকসিরেনেৰ সঞ্ঞাৰেদযিতনিরোধং সমাপজ্জতি. ভূতপুব্বং, পাপিম, আযস্মা সঞ্জীৰো অঞ্ঞতরস্মিং রুক্খমূলে সঞ্ঞাৰেদযিতনিরোধং সমাপন্নো নিসিন্নো হোতি. অদ্দসংসু খো, পাপিম, গোপালকা পসুপালকা কস্সকা পথাৰিনো আযস্মন্তং সঞ্জীৰং অঞ্ঞতরস্মিং রুক্খমূলে সঞ্ঞাৰেদযিতনিরোধং সমাপন্নং নিসিন্নং; দিস্ৰান তেসং এতদহোসি – ‘অচ্ছরিযং ৰত, ভো, অব্ভুতং ৰত, ভো! অযং সমণো নিসিন্নকোৰ কালঙ্কতো! হন্দ নং দহামা’তি. অথ খো তে, পাপিম, গোপালকা পসুপালকা কস্সকা পথাৰিনো তিণঞ্চ কট্ঠঞ্চ গোমযঞ্চ সংকড্ঢিত্ৰা আযস্মতো সঞ্জীৰস্স কাযে উপচিনিত্ৰা অগ্গিং দত্ৰা পক্কমিংসু. অথ খো, পাপিম, আযস্মা সঞ্জীৰো তস্সা রত্তিযা অচ্চযেন তায সমাপত্তিযা ৰুট্ঠহিত্ৰা চীৰরানি পপ্ফোটেত্ৰা পুব্বণ্হসমযং নিৰাসেত্ৰা পত্তচীৰরমাদায গামং পিণ্ডায পাৰিসি. অদ্দসংসু খো তে, পাপিম, গোপালকা পসুপালকা কস্সকা পথাৰিনো আযস্মন্তং সঞ্জীৰং পিণ্ডায চরন্তং; দিস্ৰান নেসং এতদহোসি – ‘অচ্ছরিযং ৰত, ভো, অব্ভুতং ৰত, ভো! অযং সমণো নিসিন্নকোৰ কালঙ্কতো, স্ৰাযং পটিসঞ্জীৰিতো’তি. ইমিনা খো এৰং, পাপিম, পরিযাযেন আযস্মতো সঞ্জীৰস্স সঞ্জীৰোতেৰ [সঞ্জীৰো সঞ্জীৰোত্ৰেৰ (সী. স্যা. কং. পী.)] সমঞ্ঞা উদপাদি.

৫০৮. ‘‘অথ খো, পাপিম, দূসিস্স মারস্স এতদহোসি – ‘ইমেসং খো অহং ভিক্খূনং সীলৰন্তানং কল্যাণধম্মানং নেৰ জানামি আগতিং ৰা গতিং ৰা. যংনূনাহং ব্রাহ্মণগহপতিকে অন্ৰাৰিসেয্যং – এথ, তুম্হে ভিক্খূ সীলৰন্তে কল্যাণধম্মে অক্কোসথ পরিভাসথ রোসেথ ৰিহেসেথ. অপ্পেৰ নাম তুম্হেহি অক্কোসিযমানানং পরিভাসিযমানানং রোসিযমানানং ৰিহেসিযমানানং সিযা চিত্তস্স অঞ্ঞথত্তং, যথা তং দূসী মারো লভেথ ওতার’ন্তি. অথ খো তে, পাপিম, দূসী মারো ব্রাহ্মণগহপতিকে অন্ৰাৰিসি – ‘এথ, তুম্হে ভিক্খূ সীলৰন্তে কল্যাণধম্মে অক্কোসথ পরিভাসথ রোসেথ ৰিহেসেথ. অপ্পেৰ নাম তুম্হেহি অক্কোসিযমানানং পরিভাসিযমানানং রোসিযমানানং ৰিহেসিযমানানং সিযা চিত্তস্স অঞ্ঞথত্তং, যথা তং দূসী মারো লভেথ ওতার’ন্তি.

‘‘অথ খো তে, পাপিম, ব্রাহ্মণগহপতিকা অন্ৰাৰিসিট্ঠা দূসিনা মারেন ভিক্খূ সীলৰন্তে কল্যাণধম্মে অক্কোসন্তি পরিভাসন্তি রোসেন্তি ৰিহেসেন্তি – ‘ইমে পন মুণ্ডকা সমণকা ইব্ভা কিণ্হা [কণ্হা (স্যা. কং. ক.)] বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুরকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম উলূকো রুক্খসাখাযং মূসিকং মগ্গযমানো ঝাযতি পজ্ঝাযতি নিজ্ঝাযতি অপজ্ঝাযতি; এৰমেৰিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুরকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম কোত্থু নদীতীরে মচ্ছে মগ্গযমানো ঝাযতি পজ্ঝাযতি নিজ্ঝাযতি অপজ্ঝাযতি; এৰমেৰিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুরকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম বিল়ারো সন্ধিসমলসঙ্কটীরে মূসিকং মগ্গযমানো ঝাযতি পজ্ঝাযতি নিজ্ঝাযতি অপজ্ঝাযতি; এৰমেৰিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুরকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম গদ্রভো ৰহচ্ছিন্নো সন্ধিসমলসঙ্কটীরে ঝাযতি পজ্ঝাযতি নিজ্ঝাযতি অপজ্ঝাযতি, এৰমেৰিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুরকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তী’’তি.

‘‘যে খো পন, পাপিম, তেন সমযেন মনুস্সা কালঙ্করোন্তি যেভুয্যেন কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি.

৫০৯. ‘‘অথ খো, পাপিম, ককুসন্ধো ভগৰা অরহং সম্মাসম্বুদ্ধো ভিক্খূ আমন্তেসি – ‘অন্ৰাৰিট্ঠা খো, ভিক্খৰে, ব্রাহ্মণগহপতিকা দূসিনা মারেন – এথ, তুম্হে ভিক্খূ সীলৰন্তে কল্যাণধম্মে অক্কোসথ পরিভাসথ রোসেথ ৰিহেসেথ, অপ্পেৰ নাম তুম্হেহি অক্কোসিযমানানং পরিভাসিযমানানং রোসিযমানানং ৰিহেসিযমানানং সিযা চিত্তস্স অঞ্ঞথত্তং, যথা তং দূসী মারো লভেথ ওতার’ন্তি. এথ, তুম্হে, ভিক্খৰে, মেত্তাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরথ. করুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফরিত্ৰা ৰিহরথ, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরথা’তি.

‘‘অথ খো তে, পাপিম, ভিক্খূ ককুসন্ধেন ভগৰতা অরহতা সম্মাসম্বুদ্ধেন এৰং ওৰদিযমানা এৰং অনুসাসিযমানা অরঞ্ঞগতাপি রুক্খমূলগতাপি সুঞ্ঞাগারগতাপি মেত্তাসহগতেন চেতসা একং দিসং ফরিত্ৰা ৰিহরিংসু, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরিংসু. করুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফরিত্ৰা ৰিহরিংসু, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাবজ্ঝেন ফরিত্ৰা ৰিহরিংসু.

৫১০. ‘‘অথ খো, পাপিম, দূসিস্স মারস্স এতদহোসি – ‘এৰম্পি খো অহং করোন্তো ইমেসং ভিক্খূনং সীলৰন্তানং কল্যাণধম্মানং নেৰ জানামি আগতিং ৰা গতিং ৰা, যংনূনাহং ব্রাহ্মণগহপতিকে অন্ৰাৰিসেয্যং – এথ, তুম্হে ভিক্খূ সীলৰন্তে কল্যাণধম্মে সক্করোথ গরুং করোথ মানেথ পূজেথ, অপ্পেৰ নাম তুম্হেহি সক্করিযমানানং গরুকরিযমানানং মানিযমানানং পূজিযমানানং সিযা চিত্তস্স অঞ্ঞথত্তং, যথা তং দূসী মারো লভেথ ওতার’ন্তি. অথ খো তে, পাপিম, দূসী মারো ব্রাহ্মণগহপতিকে অন্ৰাৰিসি – ‘এথ, তুম্হে ভিক্খূ সীলৰন্তে কল্যাণধম্মে সক্করোথ গরুং করোথ মানেথ পূজেথ, অপ্পেৰ নাম তুম্হেহি সক্করিযমানানং গরুকরিযমানানং মানিযমানানং পূজিযমানানং সিযা চিত্তস্স অঞ্ঞথত্তং, যথা তং দূসী মারো লভেথ ওতার’ন্তি. অথ খো তে, পাপিম, ব্রাহ্মণগহপতিকা অন্ৰাৰিট্ঠা দূসিনা মারেন ভিক্খূ সীলৰন্তে কল্যাণধম্মে সক্করোন্তি গরুং করোন্তি মানেন্তি পূজেন্তি.

‘‘যে খো পন, পাপিম, তেন সমযেন মনুস্সা কালঙ্করোন্তি যেভুয্যেন কাযস্স ভেদা পরং মরণা সুগতিং সগ্গং লোকং উপপজ্জন্তি.

৫১১. ‘‘অথ খো, পাপিম, ককুসন্ধো ভগৰা অরহং সম্মাসম্বুদ্ধো ভিক্খূ আমন্তেসি – ‘অন্ৰাৰিট্ঠা খো, ভিক্খৰে, ব্রাহ্মণগহপতিকা দূসিনা মারেন – এথ, তুম্হে ভিক্খূ সীলৰন্তে কল্যাণধম্মে সক্করোথ গরুং করোথ মানেথ পূজেথ, অপ্পেৰ নাম তুম্হেহি সক্করিযমানানং গরুকরিযমানানং মানিযমানানং পূজিযমানানং সিযা চিত্তস্স অঞ্ঞথত্তং, যথা তং দূসী মারো লভেথ ওতারন্তি. এথ, তুম্হে, ভিক্খৰে, অসুভানুপস্সিনো কাযে ৰিহরথ, আহারে পটিকূলসঞ্ঞিনো, সব্বলোকে অনভিরতিসঞ্ঞিনো [অনভিরতসঞ্ঞীনো (সী. স্যা. কং. পী.)], সব্বসঙ্খারেসু অনিচ্চানুপস্সিনো’তি.

‘‘অথ খো তে, পাপিম, ভিক্খূ ককুসন্ধেন ভগৰতা অরহতা সম্মাসম্বুদ্ধেন এৰং ওৰদিযমানা এৰং অনুসাসিযমানা অরঞ্ঞগতাপি রুক্খমূলগতাপি সুঞ্ঞাগারগতাপি অসুভানুপস্সিনো কাযে ৰিহরিংসু, আহারে পটিকূলসঞ্ঞিনো, সব্বলোকে অনভিরতিসঞ্ঞিনো, সব্বসঙ্খারেসু অনিচ্চানুপস্সিনো.

৫১২. ‘‘অথ খো, পাপিম, ককুসন্ধো ভগৰা অরহং সম্মাসম্বুদ্ধো পুব্বণ্হসমযং নিৰাসেত্ৰা পত্তচীৰরমাদায আযস্মতা ৰিধুরেন পচ্ছাসমণেন গামং পিণ্ডায পাৰিসি. অথ খো, পাপিম, দূসী মারো অঞ্ঞতরং কুমারকং [কুমারং (সী. পী.)] অন্ৰাৰিসিত্ৰা সক্খরং গহেত্ৰা আযস্মতো ৰিধুরস্স সীসে পহারমদাসি; সীসং ৰোভিন্দি [সীসং তে ভিন্দিস্সামীতি (ক.)]. অথ খো, পাপিম, আযস্মা ৰিধুরো ভিন্নেন সীসেন লোহিতেন গল়ন্তেন ককুসন্ধংযেৰ ভগৰন্তং অরহন্তং সম্মাসম্বুদ্ধং পিট্ঠিতো পিট্ঠিতো অনুবন্ধি. অথ খো, পাপিম, ককুসন্ধো ভগৰা অরহং সম্মাসম্বুদ্ধো নাগাপলোকিতং অপলোকেসি – ‘ন ৰাযং দূসী মারো মত্তমঞ্ঞাসী’তি. সহাপলোকনায চ পন, পাপিম, দূসী মারো তম্হা চ ঠানা চৰি মহানিরযঞ্চ উপপজ্জি.

‘‘তস্স খো পন, পাপিম, মহানিরযস্স তযো নামধেয্যা হোন্তি – ছফস্সাযতনিকো ইতিপি, সঙ্কুসমাহতো ইতিপি, পচ্চত্তৰেদনিযো ইতিপি. অথ খো মং, পাপিম, নিরযপালা উপসঙ্কমিত্ৰা এতদৰোচুং – যদা খো তে [যতো তে (ক.)], মারিস, সঙ্কুনা সঙ্কু হদযে সমাগচ্ছেয্য. অথ নং ত্ৰং জানেয্যাসি – ‘ৰস্সসহস্সং মে নিরযে পচ্চমানস্সা’তি. সো খো অহং, পাপিম, বহূনি ৰস্সানি বহূনি ৰস্সসতানি বহূনি ৰস্সসহস্সানি তস্মিং মহানিরযে অপচ্চিং. দসৰস্সসহস্সানি তস্সেৰ মহানিরযস্স উস্সদে অপচ্চিং ৰুট্ঠানিমং নাম ৰেদনং ৰেদিযমানো. তস্স ময্হং, পাপিম, এৰরূপো কাযো হোতি, সেয্যথাপি মনুস্সস্স. এৰরূপং সীসং হোতি, সেয্যথাপি মচ্ছস্স.

৫১৩. ‘‘কীদিসো নিরযো আসি, যত্থ দূসী অপচ্চথ;

ৰিধুরং সাৰকমাসজ্জ, ককুসন্ধঞ্চ ব্রাহ্মণং.

‘‘সতং আসি অযোসঙ্কূ, সব্বে পচ্চত্তৰেদনা;

ঈদিসো নিরযো আসি, যত্থ দূসী অপচ্চথ;

ৰিধুরং সাৰকমাসজ্জ, ককুসন্ধঞ্চ ব্রাহ্মণং.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘মজ্ঝে সরস্স তিট্ঠন্তি, ৰিমানা কপ্পট্ঠাযিনো;

ৰেল়ুরিযৰণ্ণা রুচিরা, অচ্চিমন্তো পভস্সরা;

অচ্ছরা তত্থ নচ্চন্তি, পুথু নানত্তৰণ্ণিযো.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ৰে বুদ্ধেন চোদিতো, ভিক্খু সঙ্ঘস্স পেক্খতো;

মিগারমাতুপাসাদং, পাদঙ্গুট্ঠেন কম্পযি.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ৰেজযন্তং পাসাদং, পাদঙ্গুট্ঠেন কম্পযি;

ইদ্ধিবলেনুপত্থদ্ধো, সংৰেজেসি চ দেৰতা.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ৰেজযন্তপাসাদে, সক্কং সো পরিপুচ্ছতি;

অপি ৰাসৰ জানাসি, তণ্হাক্খযৰিমুত্তিযো;

তস্স সক্কো ৰিযাকাসি, পঞ্হং পুট্ঠো যথাতথং.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ব্রহ্মং পরিপুচ্ছতি, সুধম্মাযাভিতো সভং;

অজ্জাপি ত্যাৰুসো দিট্ঠি, যা তে দিট্ঠি পুরে অহু;

পস্সসি ৰীতিৰত্তন্তং, ব্রহ্মলোকে পভস্সরং.

‘‘তস্স ব্রহ্মা ৰিযাকাসি, অনুপুব্বং যথাতথং;

ন মে মারিস সা দিট্ঠি, যা মে দিট্ঠি পুরে অহু.

‘‘পস্সামি ৰীতিৰত্তন্তং, ব্রহ্মলোকে পভস্সরং;

সোহং অজ্জ কথং ৰজ্জং, অহং নিচ্চোম্হি সস্সতো.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো মহামেরুনো কূটং, ৰিমোক্খেন অফস্সযি;

ৰনং পুব্বৰিদেহানং, যে চ ভূমিসযা নরা.

‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘ন ৰে অগ্গি চেতযতি [ৰেঠযতি (সী.)], ‘অহং বালং ডহামী’তি;

বালো চ জলিতং অগ্গিং, আসজ্জ নং স ডয্হতি.

‘‘এৰমেৰ তুৰং মার, আসজ্জ নং তথাগতং;

সযং ডহিস্সসি অত্তানং, বালো অগ্গিংৰ সংফুসং.

‘‘অপুঞ্ঞং পসৰী মারো, আসজ্জ নং তথাগতং;

কিন্নু মঞ্ঞসি পাপিম, ন মে পাপং ৰিপচ্চতি.

‘‘করোতো চীযতি পাপং, চিররত্তায অন্তক;

মার নিব্বিন্দ বুদ্ধম্হা, আসং মাকাসি ভিক্খুসু.

‘‘ইতি মারং অতজ্জেসি, ভিক্খু ভেসকল়াৰনে;

ততো সো দুম্মনো যক্খো, নতত্থেৰন্তরধাযথা’’তি.

মারতজ্জনীযসুত্তং নিট্ঠিতং দসমং.

চূল়যমকৰগ্গো নিট্ঠিতো পঞ্চমো.

তস্সুদ্দানং –

সালেয্য ৰেরঞ্জদুৰে চ তুট্ঠি, চূল়মহাধম্মসমাদানঞ্চ;

ৰীমংসকা কোসম্বি চ ব্রাহ্মণো, দূসী চ মারো দসমো চ ৰগ্গো.

সালেয্যৰগ্গো নিট্ঠিতো পঞ্চমো.