৫. নিৰাপসুত্তং

২৬১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ন, ভিক্খৰে, নেৰাপিকো নিৰাপং নিৰপতি মিগজাতানং – ‘ইমং মে নিৰাপং নিৰুত্তং মিগজাতা পরিভুঞ্জন্তা দীঘাযুকা ৰণ্ণৰন্তো চিরং দীঘমদ্ধানং যাপেন্তূ’তি. এৰঞ্চ খো, ভিক্খৰে, নেৰাপিকো নিৰাপং নিৰপতি মিগজাতানং – ‘ইমং মে নিৰাপং নিৰুত্তং মিগজাতা অনুপখজ্জ মুচ্ছিতা ভোজনানি ভুঞ্জিস্সন্তি, অনুপখজ্জ মুচ্ছিতা ভোজনানি ভুঞ্জমানা মদং আপজ্জিস্সন্তি, মত্তা সমানা পমাদং আপজ্জিস্সন্তি, পমত্তা সমানা যথাকামকরণীযা ভৰিস্সন্তি ইমস্মিং নিৰাপে’তি.

২৬২. ‘‘তত্র, ভিক্খৰে, পঠমা মিগজাতা অমুং নিৰাপং নিৰুত্তং নেৰাপিকস্স অনুপখজ্জ মুচ্ছিতা ভোজনানি ভুঞ্জিংসু, তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং নেৰাপিকস্স অমুস্মিং নিৰাপে. এৰঞ্হি তে, ভিক্খৰে, পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা.

২৬৩. ‘‘তত্র, ভিক্খৰে, দুতিযা মিগজাতা এৰং সমচিন্তেসুং – ‘যে খো তে পঠমা মিগজাতা অমুং নিৰাপং নিৰুত্তং নেৰাপিকস্স অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং নেৰাপিকস্স অমুস্মিং নিৰাপে. এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং সব্বসো নিৰাপভোজনা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা পটিৰিরমিংসু, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরিংসু. তেসং গিম্হানং পচ্ছিমে মাসে, তিণোদকসঙ্খযে, অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৰীরিযং পরিহাযি. বলৰীরিযে পরিহীনে তমেৰ নিৰাপং নিৰুত্তং নেৰাপিকস্স পচ্চাগমিংসু. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং নেৰাপিকস্স অমুস্মিং নিৰাপে. এৰঞ্হি তে, ভিক্খৰে, দুতিযাপি মিগজাতা ন পরিমুচ্চিংসু নেৰাপিকস্স ইদ্ধানুভাৰা.

২৬৪. ‘‘তত্র, ভিক্খৰে, ততিযা মিগজাতা এৰং সমচিন্তেসুং – ‘যে খো তে পঠমা মিগজাতা অমুং নিৰাপং নিৰুত্তং নেৰাপিকস্স…পে… এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যেপি তে দুতিযা মিগজাতা এৰং সমচিন্তেসুং – যে খো তে পঠমা মিগজাতা অমুং নিৰাপং নিৰুত্তং নেৰাপিকস্স…পে… এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং সব্বসো নিৰাপভোজনা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামাতি. তে সব্বসো নিৰাপভোজনা পটিৰিরমিংসু, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরিংসু. তেসং গিম্হানং পচ্ছিমে মাসে তিণোদকসঙ্খযে অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৰীরিযং পরিহাযি. বলৰীরিযে পরিহীনে তমেৰ নিৰাপং নিৰুত্তং নেৰাপিকস্স পচ্চাগমিংসু. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং নেৰাপিকস্স অমুস্মিং নিৰাপে. এৰঞ্হি তে দুতিযাপি মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং অমুং নিৰাপং নিৰুত্তং নেৰাপিকস্স উপনিস্সায আসযং কপ্পেয্যাম. তত্রাসযং কপ্পেত্ৰা অমুং নিৰাপং নিৰুত্তং নেৰাপিকস্স অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকরণীযা ভৰিস্সাম নেৰাপিকস্স অমুস্মিং নিৰাপে’তি. তে অমুং নিৰাপং নিৰুত্তং নেৰাপিকস্স উপনিস্সায আসযং কপ্পযিংসু. তত্রাসযং কপ্পেত্ৰা অমুং নিৰাপং নিৰুত্তং নেৰাপিকস্স অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকরণীযা অহেসুং নেৰাপিকস্স অমুস্মিং নিৰাপে.

‘‘তত্র, ভিক্খৰে, নেৰাপিকস্স চ নেৰাপিকপরিসায চ এতদহোসি – ‘সঠাস্সুনামিমে ততিযা মিগজাতা কেতবিনো, ইদ্ধিমন্তাস্সুনামিমে ততিযা মিগজাতা পরজনা; ইমঞ্চ নাম নিৰাপং নিৰুত্তং পরিভুঞ্জন্তি, ন চ নেসং জানাম আগতিং ৰা গতিং ৰা. যংনূন মযং ইমং নিৰাপং নিৰুত্তং মহতীহি দণ্ডৰাকরাহি [দণ্ডৰাগুরাহি (স্যা.)] সমন্তা সপ্পদেসং অনুপরিৰারেয্যাম – অপ্পেৰ নাম ততিযানং মিগজাতানং আসযং পস্সেয্যাম, যত্থ তে গাহং গচ্ছেয্যু’ন্তি. তে অমুং নিৰাপং নিৰুত্তং মহতীহি দণ্ডৰাকরাহি সমন্তা সপ্পদেসং অনুপরিৰারেসুং. অদ্দসংসু খো, ভিক্খৰে, নেৰাপিকো চ নেৰাপিকপরিসা চ ততিযানং মিগজাতানং আসযং, যত্থ তে গাহং অগমংসু. এৰঞ্হি তে, ভিক্খৰে, ততিযাপি মিগজাতা ন পরিমুচ্চিংসু নেৰাপিকস্স ইদ্ধানুভাৰা.

২৬৫. ‘‘তত্র, ভিক্খৰে, চতুত্থা মিগজাতা এৰং সমচিন্তেসুং – ‘যে খো তে পঠমা মিগজাতা…পে… এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যেপি তে দুতিযা মিগজাতা এৰং সমচিন্তেসুং ‘যে খো তে পঠমা মিগজাতা…পে… এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং সব্বসো নিৰাপভোজনা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা পটিৰিরমিংসু…পে… এৰঞ্হি তে দুতিযাপি মিগজাতা ন পরিমুচ্চিংসু নেৰাপিকস্স ইদ্ধানুভাৰা. যেপি তে ততিযা মিগজাতা এৰং সমচিন্তেসুং ‘যে খো তে পঠমা মিগজাতা…পে… এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যেপি তে দুতিযা মিগজাতা এৰং সমচিন্তেসুং ‘যে খো তে পঠমা মিগজাতা…পে… এৰঞ্হি তে পঠমা মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং সব্বসো নিৰাপভোজনা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা পটিৰিরমিংসু…পে… এৰঞ্হি তে দুতিযাপি মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং অমুং নিৰাপং নিৰুত্তং নেৰাপিকস্স উপনিস্সায আসযং কপ্পেয্যাম, তত্রাসযং কপ্পেত্ৰা অমুং নিৰাপং নিৰুত্তং নেৰাপিকস্স অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকরণীযা ভৰিস্সাম নেৰাপিকস্স অমুস্মিং নিৰাপে’তি. তে অমুং নিৰাপং নিৰুত্তং নেৰাপিকস্স উপনিস্সায আসযং কপ্পযিংসু, তত্রাসযং কপ্পেত্ৰা অমুং নিৰাপং নিৰুত্তং নেৰাপিকস্স অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকরণীযা অহেসুং নেৰাপিকস্স অমুস্মিং নিৰাপে.

‘‘তত্র নেৰাপিকস্স চ নেৰাপিকপরিসায চ এতদহোসি – ‘সঠাস্সুনামিমে ততিযা মিগজাতা কেতবিনো, ইদ্ধিমন্তাস্সুনামিমে ততিযা মিগজাতা পরজনা, ইমঞ্চ নাম নিৰাপং নিৰুত্তং পরিভুঞ্জন্তি. ন চ নেসং জানাম আগতিং ৰা গতিং ৰা. যংনূন মযং ইমং নিৰাপং নিৰুত্তং মহতীতি দণ্ডৰাকরাহি সমন্তা সপ্পদেসং অনুপরিৰারেয্যাম, অপ্পেৰ নাম ততিযানং মিগজাতানং আসযং পস্সেয্যাম, যত্থ তে গাহং গচ্ছেয্যু’ন্তি. তে অমুং নিৰাপং নিৰুত্তং মহতীতি দণ্ডৰাকরাহি সমন্তা সপ্পদেসং অনুপরিৰারেসুং. অদ্দসংসু খো নেৰাপিকো চ নেৰাপিকপরিসা চ ততিযানং মিগজাতানং আসযং, যত্থ তে গাহং অগমংসু. এৰঞ্হি তে ততিযাপি মিগজাতা ন পরিমুচ্চিংসু নেৰাপিকস্স ইদ্ধানুভাৰা. যংনূন মযং যত্থ অগতি নেৰাপিকস্স চ নেৰাপিকপরিসায চ তত্রাসযং কপ্পেয্যাম, তত্রাসযং কপ্পেত্ৰা অমুং নিৰাপং নিৰুত্তং নেৰাপিকস্স অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকরণীযা ভৰিস্সাম নেৰাপিকস্স অমুস্মিং নিৰাপে’তি. তে যত্থ অগতি নেৰাপিকস্স চ নেৰাপিকপরিসায চ তত্রাসযং কপ্পযিংসু. তত্রাসযং কপ্পেত্ৰা অমুং নিৰাপং নিৰুত্তং নেৰাপিকস্স অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকরণীযা অহেসুং নেৰাপিকস্স অমুস্মিং নিৰাপে.

‘‘তত্র, ভিক্খৰে, নেৰাপিকস্স চ নেৰাপিকপরিসায চ এতদহোসি – ‘সঠাস্সুনামিমে চতুত্থা মিগজাতা কেতবিনো, ইদ্ধিমন্তাস্সুনামিমে চতুত্থা মিগজাতা পরজনা. ইমঞ্চ নাম নিৰাপং নিৰুত্তং পরিভুঞ্জন্তি, ন চ নেসং জানাম আগতিং ৰা গতিং ৰা. যংনূন মযং ইমং নিৰাপং নিৰুত্তং মহতীহি দণ্ডৰাকরাহি সমন্তা সপ্পদেসং অনুপরিৰারেয্যাম, অপ্পেৰ নাম চতুত্থানং মিগজাতানং আসযং পস্সেয্যাম যত্থ তে গাহং গচ্ছেয্যু’ন্তি. তে অমুং নিৰাপং নিৰুত্তং মহতীহি দণ্ডৰাকরাহি সমন্তা সপ্পদেসং অনুপরিৰারেসুং. নেৰ খো, ভিক্খৰে, অদ্দসংসু নেৰাপিকো চ নেৰাপিকপরিসা চ চতুত্থানং মিগজাতানং আসযং, যত্থ তে গাহং গচ্ছেয্যুং. তত্র, ভিক্খৰে, নেৰাপিকস্স চ নেৰাপিকপরিসায চ এতদহোসি – ‘সচে খো মযং চতুত্থে মিগজাতে ঘট্টেস্সাম, তে ঘট্টিতা অঞ্ঞে ঘট্টিস্সন্তি তে ঘট্টিতা অঞ্ঞে ঘট্টিস্সন্তি. এৰং ইমং নিৰাপং নিৰুত্তং সব্বসো মিগজাতা পরিমুঞ্চিস্সন্তি. যংনূন মযং চতুত্থে মিগজাতে অজ্ঝুপেক্খেয্যামা’তি. অজ্ঝুপেক্খিংসু খো, ভিক্খৰে, নেৰাপিকো চ নেৰাপিকপরিসা চ চতুত্থে মিগজাতে. এৰঞ্হি তে, ভিক্খৰে, চতুত্থা মিগজাতা পরিমুচ্চিংসু নেৰাপিকস্স ইদ্ধানুভাৰা.

২৬৬. ‘‘উপমা খো মে অযং, ভিক্খৰে, কতা অত্থস্স ৰিঞ্ঞাপনায. অযং চেৰেত্থ অত্থো – নিৰাপোতি খো, ভিক্খৰে, পঞ্চন্নেতং কামগুণানং অধিৰচনং. নেৰাপিকোতি খো, ভিক্খৰে, মারস্সেতং পাপিমতো অধিৰচনং. নেৰাপিকপরিসাতি খো, ভিক্খৰে, মারপরিসাযেতং অধিৰচনং. মিগজাতাতি খো, ভিক্খৰে, সমণব্রাহ্মণানমেতং অধিৰচনং.

২৬৭. ‘‘তত্র, ভিক্খৰে, পঠমা সমণব্রাহ্মণা অমুং নিৰাপং নিৰুত্তং মারস্স অমূনি চ লোকামিসানি অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. এৰঞ্হি তে, ভিক্খৰে, পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. সেয্যথাপি তে, ভিক্খৰে, পঠমা মিগজাতা তথূপমে অহং ইমে পঠমে সমণব্রাহ্মণে ৰদামি.

২৬৮. ‘‘তত্র, ভিক্খৰে, দুতিযা সমণব্রাহ্মণা এৰং সমচিন্তেসুং – ‘যে খো তে পঠমা সমণব্রাহ্মণা অমুং নিৰাপং নিৰুত্তং মারস্স অমূনি চ লোকামিসানি অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং সব্বসো নিৰাপভোজনা লোকামিসা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা লোকামিসা পটিৰিরমিংসু, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামাতি. তে সব্বসো নিৰাপভোজনা লোকামিসা পটিৰিরমিংসু, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরিংসু. তে তত্থ সাকভক্খাপি অহেসুং, সামাকভক্খাপি অহেসুং, নীৰারভক্খাপি অহেসুং, দদ্দুলভক্খাপি অহেসুং, হটভক্খাপি অহেসুং, কণভক্খাপি অহেসুং, আচামভক্খাপি অহেসুং, পিঞ্ঞাকভক্খাপি অহেসুং, তিণভক্খাপি অহেসুং, গোমযভক্খাপি অহেসুং, ৰনমূলফলাহারা যাপেসুং পৰত্তফলভোজী.

‘‘তেসং গিম্হানং পচ্ছিমে মাসে, তিণোদকসঙ্খযে, অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৰীরিযং পরিহাযি. বলৰীরিযে পরিহীনে চেতোৰিমুত্তি পরিহাযি. চেতোৰিমুত্তিযা পরিহীনায তমেৰ নিৰাপং নিৰুত্তং মারস্স পচ্চাগমিংসু তানি চ লোকামিসানি. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. এৰঞ্হি তে, ভিক্খৰে, দুতিযাপি সমণব্রাহ্মণা ন পরিমুচ্চিংসু মারস্স ইদ্ধানুভাৰা. সেয্যথাপি তে, ভিক্খৰে, দুতিযা মিগজাতা তথূপমে অহং ইমে দুতিযে সমণব্রাহ্মণে ৰদামি.

২৬৯. ‘‘তত্র, ভিক্খৰে, ততিযা সমণব্রাহ্মণা এৰং সমচিন্তেসুং – ‘যে খো তে পঠমা সমণব্রাহ্মণা অমুং নিৰাপং নিৰুত্তং মারস্স অমূনি চ লোকামিসানি…পে…. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যেপি তে দুতিযা সমণব্রাহ্মণা এৰং সমচিন্তেসুং – ‘যে খো তে পঠমা সমণব্রাহ্মণা অমুং নিৰাপং নিৰুত্তং মারস্স অমূনি চ লোকামিসানি…পে…. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং সব্বসো নিৰাপভোজনা লোকামিসা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা লোকামিসা পটিৰিরমিংসু. ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরিংসু. তে তত্থ সাকভক্খাপি অহেসুং…পে… পৰত্তফলভোজী. তেসং গিম্হানং পচ্ছিমে মাসে তিণোদকসঙ্খযে অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৰীরিযং পরিহাযি, বলৰীরিযে পরিহীনে চেতোৰিমুত্তি পরিহাযি, চেতোৰিমুত্তিযা পরিহীনায তমেৰ নিৰাপং নিৰুত্তং মারস্স পচ্চাগমিংসু তানি চ লোকামিসানি. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. এৰঞ্হি তে দুতিযাপি সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং অমুং নিৰাপং নিৰুত্তং মারস্স অমূনি চ লোকামিসানি উপনিস্সায আসযং কপ্পেয্যাম, তত্রাসযং কপ্পেত্ৰা অমুং নিৰাপং নিৰুত্তং মারস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকরণীযা ভৰিস্সাম মারস্স অমুস্মিং নিৰাপে অমুস্মিঞ্চ লোকামিসে’’তি.

‘‘তে অমুং নিৰাপং নিৰুত্তং মারস্স অমূনি চ লোকামিসানি উপনিস্সায আসযং কপ্পযিংসু. তত্রাসযং কপ্পেত্ৰা অমুং নিৰাপং নিৰুত্তং মারস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিংসু. তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. অপি চ খো এৰংদিট্ঠিকা অহেসুং – সস্সতো লোকো ইতিপি, অসস্সতো লোকো ইতিপি; অন্তৰা লোকো ইতিপি, অনন্তৰা লোকো ইতিপি; তং জীৰং তং সরীরং ইতিপি, অঞ্ঞং জীৰং অঞ্ঞং সরীরং ইতিপি; হোতি তথাগতো পরং মরণা ইতিপি, ন হোতি তথাগতো পরং মরণা ইতিপি, হোতি চ ন চ হোতি তথাগতো পরং মরণা ইতিপি, নেৰ হোতি ন ন হোতি তথাগতো পরং মরণা ইতিপি. এৰঞ্হি তে, ভিক্খৰে, ততিযাপি সমণব্রাহ্মণা ন পরিমুচ্চিংসু মারস্স ইদ্ধানুভাৰা. সেয্যথাপি তে, ভিক্খৰে, ততিযা মিগজাতা তথূপমে অহং ইমে ততিযে সমণব্রাহ্মণে ৰদামি.

২৭০. ‘‘তত্র, ভিক্খৰে, চতুত্থা সমণব্রাহ্মণা এৰং সমচিন্তেসুং – ‘যে খো তে পঠমা সমণব্রাহ্মণা অমুং নিৰাপং নিৰুত্তং মারস্স…পে…. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যেপি তে দুতিযা সমণব্রাহ্মণা এৰং সমচিন্তেসুং – ‘যে খো তে পঠমা সমণব্রাহ্মণা…পে…. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং সব্বসো নিৰাপভোজনা লোকামিসা পটিৰিরমেয্যাম ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা লোকামিসা পটিৰিরমিংসু…পে…. এৰঞ্হি তে দুতিযাপি সমণব্রাহ্মণা ন পরিমুচ্চিংসু মারস্স ইদ্ধানুভাৰা. যেপি তে ততিযা সমণব্রাহ্মণা এৰং সমচিন্তেসুং যে খো তে পঠমা সমণব্রাহ্মণা …পে…. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যেপি তে দুতিযা সমণব্রাহ্মণা এৰং সমচিন্তেসুং যে খো তে পঠমা সমণব্রাহ্মণা…পে…. এৰঞ্হি তে পঠমা সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং সব্বসো নিৰাপভোজনা লোকামিসা পটিৰিরমেয্যাম, ভযভোগা পটিৰিরতা অরঞ্ঞাযতনানি অজ্ঝোগাহেত্ৰা ৰিহরেয্যামা’তি. তে সব্বসো নিৰাপভোজনা লোকামিসা পটিৰিরমিংসু…পে…. এৰঞ্হি তে দুতিযাপি সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং অমুং নিৰাপং নিৰুত্তং মারস্স অমূনি চ লোকামিসানি উপনিস্সায আসযং কপ্পেয্যাম. তত্রাসযং কপ্পেত্ৰা অমুং নিৰাপং নিৰুত্তং মারস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকরণীযা ভৰিস্সাম মারস্স অমুস্মিং নিৰাপে অমুস্মিঞ্চ লোকামিসেতি.

‘‘তে অমুং নিৰাপং নিৰুত্তং মারস্স অমূনি চ লোকামিসানি উপনিস্সায আসযং কপ্পযিংসু. তত্রাসযং কপ্পেত্ৰা অমুং নিৰাপং নিৰুত্তং মারস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিংসু. তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু. অমত্তা সমানা ন পমাদং আপজ্জিংসু. অপ্পমত্তা সমানা ন যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. অপি চ খো এৰংদিট্ঠিকা অহেসুং সস্সতো লোকো ইতিপি…পে… নেৰ হোতি ন ন হোতি তথাগতো পরং মরণা ইতিপি. এৰঞ্হি তে ততিযাপি সমণব্রাহ্মণা ন পরিমুচ্চিংসু মারস্স ইদ্ধানুভাৰা. যংনূন মযং যত্থ অগতি মারস্স চ মারপরিসায চ তত্রাসযং কপ্পেযাম. তত্রাসযং কপ্পেত্ৰা অমুং নিৰাপং নিৰুত্তং মারস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকরণীযা ভৰিস্সাম মারস্স অমুস্মিং নিৰাপে অমুস্মিঞ্চ লোকামিসেতি.

‘‘তে যত্থ অগতি মারস্স চ মারপরিসায চ তত্রাসযং কপ্পযিংসু. তত্রাসযং কপ্পেত্ৰা অমুং নিৰাপং নিৰুত্তং মারস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকরণীযা অহেসুং মারস্স অমুস্মিং নিৰাপে অমুস্মিঞ্চ লোকামিসে. এৰঞ্হি তে, ভিক্খৰে, চতুত্থা সমণব্রাহ্মণা পরিমুচ্চিংসু মারস্স ইদ্ধানুভাৰা. সেয্যথাপি তে, ভিক্খৰে, চতুত্থা মিগজাতা তথূপমে অহং ইমে চতুত্থে সমণব্রাহ্মণে ৰদামি.

২৭১. ‘‘কথঞ্চ, ভিক্খৰে, অগতি মারস্স চ মারপরিসায চ? ইধ, ভিক্খৰে, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো.

‘‘পুন চপরং, ভিক্খৰে, ভিক্খু ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু পীতিযা চ ৰিরাগা উপেক্খকো চ ৰিহরতি সতো চ সম্পজানো, সুখঞ্চ কাযেন পটিসংৰেদেতি যং তং অরিযা আচিক্খন্তি ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু সুখস্স চ পহানা দুক্খস্স চ পহানা, পুব্বেৰ সোমনস্সদোমনস্সানং অত্থঙ্গমা, অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. অযং ৰুচ্চতি, ভিক্খৰে…পে… পাপিমতো.

‘‘পুন চপরং, ভিক্খৰে, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি. পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি, ভিক্খৰে, ভিক্খু অন্ধমকাসি মারং, অপদং ৰধিত্ৰা মারচক্খুং অদস্সনং গতো পাপিমতো তিণ্ণো লোকে ৰিসত্তিক’’ন্তি.

ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

নিৰাপসুত্তং নিট্ঠিতং পঞ্চমং.