৭. কণ্ডকৰিমানৰত্থু

১১৭১. ‘‘পুণ্ণমাসে যথা চন্দো, নক্খত্তপরিৰারিতো;

সমন্তা অনুপরিযাতি, তারকাধিপতী সসী.

১১৭২. ‘‘তথূপমং ইদং ব্যম্হং, দিব্বং দেৰপুরম্হি চ;

অতিরোচতি ৰণ্ণেন, উদযন্তোৰ রংসিমা.

১১৭৩. ‘‘ৰেল়ুরিযসুৰণ্ণস্স, ফলিকা রূপিযস্স চ;

মসারগল্লমুত্তাহি, লোহিতঙ্গমণীহি চ.

১১৭৪. ‘‘চিত্রা মনোরমা ভূমি, ৰেল়ূরিযস্স সন্থতা;

কূটাগারা সুভা রম্মা, পাসাদো তে সুমাপিতো.

১১৭৫. ‘‘রম্মা চ তে পোক্খরণী, পুথুলোমনিসেৰিতা;

অচ্ছোদকা ৰিপ্পসন্না, সোৰণ্ণৰালুকসন্থতা.

১১৭৬. ‘‘নানাপদুমসঞ্ছন্না, পুণ্ডরীকসমোততা [সমোত্থতা (ক.), সমোগতা (স্যা.)];

সুরভিং সম্পৰাযন্তি, মনুঞ্ঞা মালুতেরিতা.

১১৭৭. ‘‘তস্সা তে উভতো পস্সে, ৰনগুম্বা সুমাপিতা;

উপেতা পুপ্ফরুক্খেহি, ফলরুক্খেহি চূভযং.

১১৭৮. ‘‘সোৰণ্ণপাদে পল্লঙ্কে, মুদুকে গোণকত্থতে [চোলসন্থতে (সী.)];

নিসিন্নং দেৰরাজংৰ, উপতিট্ঠন্তি অচ্ছরা.

১১৭৯. ‘‘সব্বাভরণসঞ্ছন্না, নানামালাৰিভূসিতা;

রমেন্তি তং মহিদ্ধিকং, ৰসৰত্তীৰ মোদসি.

১১৮০. ‘‘ভেরিসঙ্খমুদিঙ্গাহি, ৰীণাহি পণৰেহি চ;

রমসি রতিসম্পন্নো, নচ্চগীতে সুৰাদিতে.

১১৮১. ‘‘দিব্বা তে ৰিৰিধা রূপা, দিব্বা সদ্দা অথো রসা;

গন্ধা চ তে অধিপ্পেতা, ফোট্ঠব্বা চ মনোরমা.

১১৮২. ‘‘তস্মিং ৰিমানে পৰরে, দেৰপুত্ত মহপ্পভো;

অতিরোচসি ৰণ্ণেন, উদযন্তোৰ ভাণুমা.

১১৮৩. ‘‘দানস্স তে ইদং ফলং, অথো সীলস্স ৰা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৮৪. সো দেৰপুত্তো অত্তমনো…পে… যস্স কম্মস্সিদং ফলং.

১১৮৫. ‘‘অহং কপিলৰত্থুস্মিং, সাকিযানং পুরুত্তমে;

সুদ্ধোদনস্স পুত্তস্স, কণ্ডকো সহজো অহং.

১১৮৬. ‘‘যদা সো অড্ঢরত্তাযং, বোধায মভিনিক্খমি;

সো মং মুদূহি পাণীহি, জালি [জাল (সী.)] তম্বনখেহি চ.

১১৮৭. ‘‘সত্থিং আকোটযিত্ৰান, ৰহ সম্মাতি চব্রৰি;

অহং লোকং তারযিস্সং, পত্তো সম্বোধিমুত্তমং.

১১৮৮. ‘‘তং মে গিরং সুণন্তস্স, হাসো মে ৰিপুলো অহু;

উদগ্গচিত্তো সুমনো, অভিসীসিং [অভিসিংসিং (সী.), অভিসীসি (পী.)] তদা অহং.

১১৮৯. ‘‘অভিরূল়্হঞ্চ মং ঞত্ৰা, সক্যপুত্তং মহাযসং;

উদগ্গচিত্তো মুদিতো, ৰহিস্সং পুরিসুত্তমং.

১১৯০. ‘‘পরেসং ৰিজিতং গন্ত্ৰা, উগ্গতস্মিং দিৰাকরে [দিৰঙ্করে (স্যা. ক.)];

মমং ছন্নঞ্চ ওহায, অনপেক্খো সো অপক্কমি.

১১৯১. ‘‘তস্স তম্বনখে পাদে, জিৰ্হায পরিলেহিসং;

গচ্ছন্তঞ্চ মহাৰীরং, রুদমানো উদিক্খিসং.

১১৯২. ‘‘অদস্সনেনহং তস্স, সক্যপুত্তস্স সিরীমতো;

অলত্থং গরুকাবাধং, খিপ্পং মে মরণং অহু.

১১৯৩. ‘‘তস্সেৰ আনুভাৰেন, ৰিমানং আৰসামিদং;

সব্বকামগুণোপেতং, দিব্বং দেৰপুরম্হি চ.

১১৯৪. ‘‘যঞ্চ মে অহুৰা হাসো, সদ্দং সুত্ৰান বোধিযা;

তেনেৰ কুসলমূলেন, ফুসিস্সং আসৰক্খযং.

১১৯৫. ‘‘সচে হি ভন্তে গচ্ছেয্যাসি, সত্থু বুদ্ধস্স সন্তিকে;

মমাপি নং ৰচনেন, সিরসা ৰজ্জাসি ৰন্দনং.

১১৯৬. ‘‘অহম্পি দট্ঠুং গচ্ছিস্সং, জিনং অপ্পটিপুগ্গলং;

দুল্লভং দস্সনং হোতি, লোকনাথান তাদিন’’ন্তি.

১১৯৭. সো কতঞ্ঞূ কতৰেদী, সত্থারং উপসঙ্কমি;

সুত্ৰা গিরং চক্খুমতো, ধম্মচক্খুং ৰিসোধযি.

১১৯৮. ৰিসোধেত্ৰা দিট্ঠিগতং, ৰিচিকিচ্ছং ৰতানি চ;

ৰন্দিত্ৰা সত্থুনো পাদে, তত্থেৰন্তরধাযথাতি [তত্থেৰন্তরধাযতীতি (ক.)].

কণ্ডকৰিমানং সত্তমং.