৪. কক্কটকরসদাযকৰিমানৰত্থু

৯১০. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা [রুচিরত্থতা (স্যা. ক.) ৬৪৬ গাথাযং ‘‘রুচকুপকিণ্ণং’’তি পদস্স সংৰণ্ণনা পস্সিতব্বা] সুভা.

৯১১. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং [ৰগ্গু (সী. ক.), ৰগ্গূ (স্যা.)];

দিব্বা রসা কামগুণেত্থ পঞ্চ, নারিযো চ নচ্চন্তি সুৰণ্ণছন্না.

৯১২. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৯১৩. ‘‘পুচ্ছামি তং দেৰ মহানুভাৰ, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

৯১৪. সো দেৰপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৰিযাকাসি, যস্স কম্মস্সিদং ফলং.

৯১৫. ‘‘সতিসমুপ্পাদকরো, দ্ৰারে কক্কটকো ঠিতো;

নিট্ঠিতো জাতরূপস্স, সোভতি দসপাদকো.

৯১৬. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৯১৭. ‘‘অক্খামি তে ভিক্খু মহানুভাৰ, মনুস্সভূতো যমকাসি পুঞ্ঞং;

তেনম্হি এৰং জলিতানুভাৰো, ৰণ্ণো চ মে সব্বদিসা পভাসতী’’তি.

কক্কটকরসদাযকৰিমানং চতুত্থং.

(অনন্তরং পঞ্চৰিমানং যথা কক্কটকরসদাযকৰিমানং তথা ৰিত্থারেতব্বং)