৮. অম্বৰিমানৰত্থু

৭৮৩. ‘‘দিব্বং তে অম্বৰনং রম্মং, পাসাদেত্থ মহল্লকো;

নানাতুরিযসঙ্ঘুট্ঠো, অচ্ছরাগণঘোসিতো.

৭৮৪. ‘‘পদীপো চেত্থ জলতি, নিচ্চং সোৰণ্ণযো মহা;

দুস্সফলেহি রুক্খেহি, সমন্তা পরিৰারিতো.

৭৮৫. ‘‘কেন তেতাদিসো ৰণ্ণো…পে…ৰণ্ণো চ তে সব্বদিসা পভাসতী’’তি;

৭৮৭. সা দেৰতা অত্তমনা…পে… যস্স কম্মস্সিদং ফলং.

৭৮৮. ‘‘অহং মনুস্সেসু মনুস্সভূতা, পুরিমায জাতিযা মনুস্সলোকে;

ৰিহারং সঙ্ঘস্স কারেসিং, অম্বেহি পরিৰারিতং.

৭৮৯. ‘‘পরিযোসিতে ৰিহারে, কারেন্তে নিট্ঠিতে মহে;

অম্বেহি ছাদযিত্ৰান [অম্বে অচ্ছাদযিত্ৰান (সী. স্যা.), অম্বেহচ্ছাদযিত্ৰান (পী. ক.)], কত্ৰা দুস্সমযে ফলে.

৭৯০. ‘‘পদীপং তত্থ জালেত্ৰা, ভোজযিত্ৰা গণুত্তমং;

নিয্যাদেসিং তং সঙ্ঘস্স, পসন্না সেহি পাণিভি.

৭৯১. ‘‘তেন মে অম্বৰনং রম্মং, পাসাদেত্থ মহল্লকো;

নানাতুরিযসঙ্ঘুট্ঠো, অচ্ছরাগণঘোসিতো.

৭৯২. ‘‘পদীপো চেত্থ জলতি, নিচ্চং সোৰণ্ণযো মহা;

দুস্সফলেহি রুক্খেহি, সমন্তা পরিৰারিতো.

৭৯৩. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি.

অম্বৰিমানং অট্ঠমং.