৯. পীতৰিমানৰত্থু

৭৯৫. ‘‘পীতৰত্থে পীতধজে, পীতালঙ্কারভূসিতে;

পীতচন্দনলিত্তঙ্গে, পীতউপ্পলমালিনী [পীতুপ্পলমধারিনী (স্যা. ক.), পীতুপ্পলমালিনী (পী.)].

৭৯৬. ‘‘পীতপাসাদসযনে, পীতাসনে পীতভাজনে;

পীতছত্তে পীতরথে, পীতস্সে পীতবীজনে.

৭৯৭. ‘‘কিং কম্মমকরী ভদ্দে, পুব্বে মানুসকে ভৰে;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৭৯৮. ‘‘কোসাতকী নাম লতত্থি ভন্তে, তিত্তিকা অনভিচ্ছিতা;

তস্সা চত্তারি পুপ্ফানি, থূপং অভিহরিং অহং.

৭৯৯. ‘‘সত্থু সরীরমুদ্দিস্স, ৰিপ্পসন্নেন চেতসা;

নাস্স মগ্গং অৰেক্খিস্সং, ন তগ্গমনসা [তদগ্গমনসা (সী.), তদঙ্গমনসা (স্যা.)] সতী.

৮০০. ‘‘ততো মং অৰধী গাৰী, থূপং অপত্তমানসং;

তঞ্চাহং অভিসঞ্চেয্যং, ভিয্যো [ভীযো (সী. অট্ঠ.)] নূন ইতো সিযা.

৮০১. ‘‘তেন কম্মেন দেৰিন্দ, মঘৰা দেৰকুঞ্জরো;

পহায মানুসং দেহং, তৰ সহব্য [সহব্যত (সী. স্যা.)] মাগতা’’তি.

৮০২. ইদং সুত্ৰা তিদসাধিপতি, মঘৰা দেৰকুঞ্জরো;

তাৰতিংসে পসাদেন্তো, মাতলিং এতদব্রৰি [এতদব্রূৰীতি (সী.)].

৮০৩. ‘‘পস্স মাতলি অচ্ছেরং, চিত্তং কম্মফলং ইদং;

অপ্পকম্পি কতং দেয্যং, পুঞ্ঞং হোতি মহপ্ফলং.

৮০৪. ‘‘নত্থি চিত্তে পসন্নম্হি, অপ্পকা নাম দক্খিণা;

তথাগতে ৰা সম্বুদ্ধে, অথ ৰা তস্স সাৰকে.

৮০৫. ‘‘এহি মাতলি অম্হেপি, ভিয্যো ভিয্যো মহেমসে;

তথাগতস্স ধাতুযো, সুখো পুঞ্ঞান মুচ্চযো.

৮০৬. ‘‘তিট্ঠন্তে নিব্বুতে চাপি, সমে চিত্তে সমং ফলং;

চেতোপণিধিহেতু হি, সত্তা গচ্ছন্তি সুগ্গতিং.

৮০৭. ‘‘বহূনং [বহুন্নং (সী. স্যা.)] ৰত অত্থায, উপ্পজ্জন্তি তথাগতা;

যত্থ কারং করিত্ৰান, সগ্গং গচ্ছন্তি দাযকা’’তি.

পীতৰিমানং নৰমং.