১২. রজ্জুমালাৰিমানৰত্থু

৮২৬. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

হত্থপাদে চ ৰিগ্গয্হ, নচ্চসি সুপ্পৰাদিতে.

৮২৭. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছরন্তি, সৰনীযা মনোরমা.

৮২৮. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৰাযন্তি, সুচিগন্ধা মনোরমা.

৮২৯. ‘‘ৰিৰত্তমানা কাযেন, যা ৰেণীসু পিল়ন্ধনা;

তেসং সুয্যতি নিগ্ঘোসো, তুরিযে পঞ্চঙ্গিকে যথা.

৮৩০. ‘‘ৰটংসকা ৰাতধুতা, ৰাতেন সম্পকম্পিতা;

তেসং সুয্যতি নিগ্ঘোসো, তুরিযে পঞ্চঙ্গিকে যথা.

৮৩১. ‘‘যাপি তে সিরস্মিং মালা, সুচিগন্ধা মনোরমা;

ৰাতি গন্ধো দিসা সব্বা, রুক্খো মঞ্জূসকো যথা.

৮৩২. ‘‘ঘাযসে তং সুচিগন্ধং, রূপং পস্সসি অমানুসং;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৮৩৩. ‘‘দাসী অহং পুরে আসিং, গযাযং ব্রাহ্মণস্সহং;

অপ্পপুঞ্ঞা অলক্খিকা, রজ্জুমালাতি মং ৰিদুং [ৰিদূ (স্যা. পী. ক.)].

৮৩৪. ‘‘অক্কোসানং ৰধানঞ্চ, তজ্জনায চ উগ্গতা [উক্কতা (সী. স্যা.)];

কুটং গহেত্ৰা নিক্খম্ম, অগঞ্ছিং [আগচ্ছিং (স্যা. ক.), অগচ্ছিং (পী.), গচ্ছিং (সী.)] উদহারিযা [উদকহারিযা (সী.)].

৮৩৫. ‘‘ৰিপথে কুটং নিক্খিপিত্ৰা, ৰনসণ্ডং উপাগমিং;

ইধেৰাহং মরিস্সামি, কো অত্থো [ক্ৰত্থোসি (ক.), কীৰত্থোপি (স্যা.)] জীৰিতেন মে.

৮৩৬. ‘‘দল়্হং পাসং করিত্ৰান, আসুম্ভিত্ৰান পাদপে;

ততো দিসা ৰিলোকেসিং,কো নু খো ৰনমস্সিতো.

৮৩৭. ‘‘তত্থদ্দসাসিং সম্বুদ্ধং, সব্বলোকহিতং মুনিং;

নিসিন্নং রুক্খমূলস্মিং, ঝাযন্তং অকুতোভযং.

৮৩৮. ‘‘তস্সা মে অহু সংৰেগো, অব্ভুতো লোমহংসনো;

কো নু খো ৰনমস্সিতো, মনুস্সো উদাহু দেৰতা.

৮৩৯. ‘‘পাসাদিকং পসাদনীযং, ৰনা নিব্বনমাগতং;

দিস্ৰা মনো মে পসীদি, নাযং যাদিসকীদিসো.

৮৪০. ‘‘গুত্তিন্দ্রিযো ঝানরতো, অবহিগ্গতমানসো;

হিতো সব্বস্স লোকস্স, বুদ্ধো অযং [সোযং (সী.)] ভৰিস্সতি.

৮৪১. ‘‘ভযভেরৰো দুরাসদো, সীহোৰ গুহমস্সিতো;

দুল্লভাযং দস্সনায, পুপ্ফং ওদুম্বরং যথা.

৮৪২. ‘‘সো মং মুদূহি ৰাচাহি, আলপিত্ৰা তথাগতো;

রজ্জুমালেতি মংৰোচ, সরণং গচ্ছ তথাগতং.

৮৪৩. ‘‘তাহং গিরং সুণিত্ৰান, নেলং অত্থৰতিং সুচিং;

সণ্হং মুদুঞ্চ ৰগ্গুঞ্চ, সব্বসোকাপনূদনং.

৮৪৪. ‘‘কল্লচিত্তঞ্চ মং ঞত্ৰা, পসন্নং সুদ্ধমানসং;

হিতো সব্বস্স লোকস্স, অনুসাসি তথাগতো.

৮৪৫. ‘‘ইদং দুক্খন্তি মংৰোচ, অযং দুক্খস্স সম্ভৰো;

দুক্খ [অযং (সী. স্যা. পী.)] নিরোধো মগ্গো চ [দুক্খনিরোধো চ (স্যা.)], অঞ্জসো অমতোগধো.

৮৪৬. ‘‘অনুকম্পকস্স কুসলস্স, ওৰাদম্হি অহং ঠিতা;

অজ্ঝগা অমতং সন্তিং, নিব্বানং পদমচ্চুতং.

৮৪৭. ‘‘সাহং অৰট্ঠিতাপেমা, দস্সনে অৰিকম্পিনী;

মূলজাতায সদ্ধায, ধীতা বুদ্ধস্স ওরসা.

৮৪৮. ‘‘সাহং রমামি কীল়ামি, মোদামি অকুতোভযা;

দিব্বমালং ধারযামি, পিৰামি মধুমদ্দৰং.

৮৪৯. ‘‘সট্ঠিতুরিযসহস্সানি, পটিবোধং করোন্তি মে;

আল়ম্বো গগ্গরো ভীমো, সাধুৰাদী চ সংসযো.

৮৫০. ‘‘পোক্খরো চ সুফস্সো চ, ৰীণামোক্খা চ নারিযো;

নন্দা চেৰ সুনন্দা চ, সোণদিন্না সুচিম্হিতা.

৮৫১. ‘‘অলম্বুসা মিস্সকেসী চ, পুণ্ডরীকাতিদারুণী [… তিচারুণী (সী.)];

এণীফস্সা সুফস্সা [সুপস্সা (স্যা. পী. ক.)] চ, সুভদ্দা [সংভদ্দা (ক.)] মুদুৰাদিনী.

৮৫২. ‘‘এতা চঞ্ঞা চ সেয্যাসে, অচ্ছরানং পবোধিকা;

তা মং কালেনুপাগন্ত্ৰা, অভিভাসন্তি দেৰতা.

৮৫৩. ‘‘হন্দ নচ্চাম গাযাম, হন্দ তং রমযামসে;

নযিদং অকতপুঞ্ঞানং, কতপুঞ্ঞানমেৰিদং.

৮৫৪. ‘‘অসোকং নন্দনং রম্মং, তিদসানং মহাৰনং;

সুখং অকতপুঞ্ঞানং, ইধ নত্থি পরত্থ চ.

৮৫৫. ‘‘সুখঞ্চ কতপুঞ্ঞানং, ইধ চেৰ পরত্থ চ;

তেসং সহব্যকামানং, কত্তব্বং কুসলং বহুং;

কতপুঞ্ঞা হি মোদন্তি, সগ্গে ভোগসমঙ্গিনো.

৮৫৬. ‘‘বহূনং ৰত অত্থায, উপ্পজ্জন্তি তথাগতা;

দক্খিণেয্যা মনুস্সানং, পুঞ্ঞখেত্তানমাকরা;

যত্থ কারং করিত্ৰান, সগ্গে মোদন্তি দাযকা’’তি.

রজ্জুমালাৰিমানং দ্ৰাদসমং.

মঞ্জিট্ঠকৰগ্গো চতুত্থো নিট্ঠিতো.

তস্সুদ্দানং –

মঞ্জিট্ঠা পভস্সরা নাগা, অলোমাকঞ্জিকদাযিকা;

ৰিহারচতুরিত্থম্বা, পীতা উচ্ছুৰন্দনরজ্জুমালা চ;

ৰগ্গো তেন পৰুচ্চতীতি.

ইত্থিৰিমানং সমত্তং.