৯. ৰিসালক্খিৰিমানৰত্থু

৬৬৬. ‘‘কা নাম ত্ৰং ৰিসালক্খি [ৰিসালক্খী (স্যা.)], রম্মে চিত্তলতাৰনে;

সমন্তা অনুপরিযাসি, নারীগণপুরক্খতা [পুরক্খিতা (স্যা. ক.)].

৬৬৭. ‘‘যদা দেৰা তাৰতিংসা, পৰিসন্তি ইমং ৰনং;

সযোগ্গা সরথা সব্বে, চিত্রা হোন্তি ইধাগতা.

৬৬৮. ‘‘তুয্হঞ্চ ইধ পত্তায, উয্যানে ৰিচরন্তিযা;

কাযে ন দিস্সতী চিত্তং, কেন রূপং তৰেদিসং;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৬৬৯. ‘‘যেন কম্মেন দেৰিন্দ, রূপং ময্হং গতী চ মে;

ইদ্ধি চ আনুভাৰো চ, তং সুণোহি পুরিন্দদ.

৬৭০. ‘‘অহং রাজগহে রম্মে, সুনন্দা নামুপাসিকা;

সদ্ধা সীলেন সম্পন্না, সংৰিভাগরতা সদা.

৬৭১. ‘‘অচ্ছাদনঞ্চ ভত্তঞ্চ, সেনাসনং পদীপিযং;

অদাসিং উজুভূতেসু, ৰিপ্পসন্নেন চেতসা.

৬৭২. ‘‘চাতুদ্দসিং [চতুদ্দসিং (পী. ক.)] পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং.

৬৭৩. ‘‘উপোসথং উপৰসিস্সং, সদা সীলেসু সংৰুতা;

সঞ্ঞমা সংৰিভাগা চ, ৰিমানং আৰসামহং.

৬৭৪. ‘‘পাণাতিপাতা ৰিরতা, মুসাৰাদা চ সঞ্ঞতা;

থেয্যা চ অতিচারা চ, মজ্জপানা চ আরকা.

৬৭৫. ‘‘পঞ্চসিক্খাপদে রতা, অরিযসচ্চান কোৰিদা;

উপাসিকা চক্খুমতো, গোতমস্স যসস্সিনো.

৬৭৬. ‘‘তস্সা মে ঞাতিকুলা দাসী [ঞাতিকুলং আসী (স্যা. ক.)], সদা মালাভিহারতি;

তাহং ভগৰতো থূপে, সব্বমেৰাভিরোপযিং.

৬৭৭. ‘‘উপোসথে চহং গন্ত্ৰা, মালাগন্ধৰিলেপনং;

থূপস্মিং অভিরোপেসিং, পসন্না সেহি পাণিভি.

৬৭৮. ‘‘তেন কম্মেন দেৰিন্দ, রূপং ময্হং গতী চ মে;

ইদ্ধী চ আনুভাৰো চ, যং মালং অভিরোপযিং.

৬৭৯. ‘‘যঞ্চ সীলৰতী আসিং, ন তং তাৰ ৰিপচ্চতি;

আসা চ পন মে দেৰিন্দ, সকদাগামিনী সিয’’ন্তি.

ৰিসালক্খিৰিমানং নৰমং.