১০. পারিচ্ছত্তকৰিমানৰত্থু

৬৮০. ‘‘পারিচ্ছত্তকে কোৰিল়ারে, রমণীযে মনোরমে;

দিব্বমালং গন্থমানা, গাযন্তী সম্পমোদসি.

৬৮১. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছরন্তি, সৰনীযা মনোরমা.

৬৮২. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৰাযন্তি, সুচিগন্ধা মনোরমা.

৬৮৩. ‘‘ৰিৰত্তমানা কাযেন, যা ৰেণীসু পিল়ন্ধনা.

তেসং সুয্যতি নিগ্ঘোসো, তূরিযে পঞ্চঙ্গিকে যথা.

৬৮৪. ‘‘ৰটংসকা ৰাতধুতা [ৰাতধূতা (সী. স্যা.)], ৰাতেন সম্পকম্পিতা;

তেসং সুয্যতি নিগ্ঘোসো, তূরিযে পঞ্চঙ্গিকে যথা.

৬৮৫. ‘‘যাপি তে সিরস্মিং মালা, সুচিগন্ধা মনোরমা;

ৰাতি গন্ধো দিসা সব্বা, রুক্খো মঞ্জূসকো যথা.

৬৮৬. ‘‘ঘাযসে তং সুচিগন্ধং [সুচিং গন্ধং (সী.)], রূপং পস্সসি অমানুসং [মানুসং (পী.)];

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৬৮৭. ‘‘পভস্সরং অচ্চিমন্তং, ৰণ্ণগন্ধেন সংযুতং;

অসোকপুপ্ফমালাহং, বুদ্ধস্স উপনামযিং.

৬৮৮. ‘‘তাহং কম্মং করিত্ৰান, কুসলং বুদ্ধৰণ্ণিতং;

অপেতসোকা সুখিতা, সম্পমোদামনামযা’’তি.

পারিচ্ছত্তকৰিমানং দসমং.

পারিচ্ছত্তকৰগ্গো ততিযো নিট্ঠিতো.

তস্সুদ্দানং –

উল়ারো উচ্ছু পল্লঙ্কো, লতা চ গুত্তিলেন চ;

দদ্দল্লপেসমল্লিকা, ৰিসালক্খি পারিচ্ছত্তকো;

ৰগ্গো তেন পৰুচ্চতীতি.