৮. মল্লিকাৰিমানৰত্থু

৬৫৮. ‘‘পীতৰত্থে পীতধজে, পীতালঙ্কারভূসিতে;

পীতন্তরাহি ৰগ্গূহি, অপিল়ন্ধাৰ সোভসি.

৬৫৯. ‘‘কা কম্বুকাযূরধরে [ককম্বুকাযুরধরে (স্যা.)], কঞ্চনাৰেল়ভূসিতে;

হেমজালকসঞ্ছন্নে [পচ্ছন্নে (সী.)], নানারতনমালিনী.

৬৬০. ‘‘সোৰণ্ণমযা লোহিতঙ্গমযা [লোহিতঙ্কমযা (সী. স্যা.)] চ, মুত্তামযা ৰেল়ুরিযমযা চ;

মসারগল্লা সহলোহিতঙ্গা [সহলোহিতঙ্কা (সী.), সহলোহিতকা (স্যা.)], পারেৰতক্খীহি মণীহি চিত্ততা.

৬৬১. ‘‘কোচি কোচি এত্থ মযূরসুস্সরো, হংসস্স রঞ্ঞো করৰীকসুস্সরো;

তেসং সরো সুয্যতি ৰগ্গুরূপো, পঞ্চঙ্গিকং তূরিযমিৰপ্পৰাদিতং.

৬৬২. ‘‘রথো চ তে সুভো ৰগ্গু [ৰগ্গূ (স্যা.)], নানারতনচিত্তিতো [নানারতনচিত্তঙ্গো (স্যা.)];

নানাৰণ্ণাহি ধাতূহি, সুৰিভত্তোৰ সোভতি.

৬৬৩. ‘‘তস্মিং রথে কঞ্চনবিম্বৰণ্ণে, যা ত্ৰং [যত্থ (ক. সী. স্যা. ক.)] ঠিতা ভাসসি মং পদেসং;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৬৬৪. ‘‘সোৰণ্ণজালং মণিসোণ্ণচিত্তিতং [ৰিচিত্তং (ক.), চিত্তং (সী. স্যা.)], মুত্তাচিতং হেমজালেন ছন্নং [সঞ্ছন্নং (ক.)];

পরিনিব্বুতে গোতমে অপ্পমেয্যে, পসন্নচিত্তা অহমাভিরোপযিং.

৬৬৫. ‘‘তাহং কম্মং করিত্ৰান, কুসলং বুদ্ধৰণ্ণিতং;

অপেতসোকা সুখিতা, সম্পমোদামনামযা’’তি.

মল্লিকাৰিমানং অট্ঠমং.