৭. পেসৰতীৰিমানৰত্থু

৬৪৬. ‘‘ফলিকরজতহেমজালছন্নং, ৰিৰিধচিত্রতলমদ্দসং সুরম্মং;

ব্যম্হং সুনিম্মিতং তোরণূপপন্নং, রুচকুপকিণ্ণমিদং সুভং ৰিমানং.

৬৪৭. ‘‘ভাতি চ দস দিসা নভেৰ সুরিযো, সরদে তমোনুদো সহস্সরংসী;

তথা তপতিমিদং তৰ ৰিমানং, জলমিৰ ধূমসিখো নিসে নভগ্গে.

৬৪৮. ‘‘মুসতীৰ নযনং সতেরতাৰ [সতেরিতাৰ (স্যা. ক.)], আকাসে ঠপিতমিদং মনুঞ্ঞং;

ৰীণামুরজসম্মতাল়ঘুট্ঠং, ইদ্ধং ইন্দপুরং যথা তৰেদং.

৬৪৯. ‘‘পদুমকুমুদুপ্পলকুৰলযং, যোধিক [যূধিক (সী.)] বন্ধুকনোজকা [যোথিকা ভণ্ডিকা নোজকা (স্যা.)] চ সন্তি;

সালকুসুমিতপুপ্ফিতা অসোকা, ৰিৰিধদুমগ্গসুগন্ধসেৰিতমিদং.

৬৫০. ‘‘সল়ললবুজভুজক [সুজক (সী. স্যা.)] সংযুত্তা [সঞ্ঞতা (সী.)], কুসকসুফুল্লিতলতাৰলম্বিনীহি;

মণিজালসদিসা যসস্সিনী, রম্মা পোক্খরণী উপট্ঠিতা তে.

৬৫১. ‘‘উদকরুহা চ যেত্থি পুপ্ফজাতা, থলজা যে চ সন্তি রুক্খজাতা;

মানুসকামানুস্সকা চ দিব্বা, সব্বে তুয্হং নিৰেসনম্হি জাতা.

৬৫২. ‘‘কিস্স সংযমদমস্সযং ৰিপাকো, কেনাসি কম্মফলেনিধূপপন্না;

যথা চ তে অধিগতমিদং ৰিমানং, তদনুপদং অৰচাসিল়ারপম্হে’’তি [পখুমেতি (সী.)].

৬৫৩. ‘‘যথা চ মে অধিগতমিদং ৰিমানং, কোঞ্চমযূরচকোর [চঙ্কোর (ক.)] সঙ্ঘচরিতং;

দিব্য [দিব্ব (সী. পী.)] পিলৰহংসরাজচিণ্ণং, দিজকারণ্ডৰকোকিলাভিনদিতং.

৬৫৪. ‘‘নানাসন্তানকপুপ্ফরুক্খৰিৰিধা, পাটলিজম্বুঅসোকরুক্খৰন্তং;

যথা চ মে অধিগতমিদং ৰিমানং, তং তে পৰেদযামি [পৰদিস্সামি (সী.), পৰেদিস্সামি (পী.)] সুণোহি ভন্তে.

৬৫৫. ‘‘মগধৰরপুরত্থিমেন, নাল়কগামো নাম অত্থি ভন্তে;

তত্থ অহোসিং পুরে সুণিসা, পেসৰতীতি [সেসৰতীতি (সী. স্যা.)] তত্থ জানিংসু মমং.

৬৫৬. ‘‘সাহমপচিতত্থধম্মকুসলং, দেৰমনুস্সপূজিতং মহন্তং;

উপতিস্সং নিব্বুতমপ্পমেয্যং, মুদিতমনা কুসুমেহি অব্ভুকিরিং [অব্ভোকিরিং (সী. স্যা. পী. ক.)].

৬৫৭. ‘‘পরমগতিগতঞ্চ পূজযিত্ৰা, অন্তিমদেহধরং ইসিং উল়ারং;

পহায মানুসকং সমুস্সযং, তিদসগতা ইধ মাৰসামি ঠান’’ন্তি.

পেসৰতীৰিমানং সত্তমং.