৬. দদ্দল্লৰিমানৰত্থু

৬১৯. ‘‘দদ্দল্লমানা [দদ্দল়্হমানা (ক.)] ৰণ্ণেন, যসসা চ যসস্সিনী;

সব্বে দেৰে তাৰতিংসে, ৰণ্ণেন অতিরোচসি.

৬২০. ‘‘দস্সনং নাভিজানামি, ইদং পঠমদস্সনং;

কস্মা কাযা নু আগম্ম, নামেন ভাসসে মম’’ন্তি.

৬২১. ‘‘অহং ভদ্দে সুভদ্দাসিং, পুব্বে মানুসকে ভৰে;

সহভরিযা চ তে আসিং, ভগিনী চ কনিট্ঠিকা.

৬২২. ‘‘সা অহং কাযস্স ভেদা, ৰিপ্পমুত্তা ততো চুতা;

নিম্মানরতীনং দেৰানং, উপপন্না সহব্যত’’ন্তি.

৬২৩. ‘‘পহূতকতকল্যাণা, তে দেৰে যন্তি পাণিনো;

যেসং ত্ৰং কিত্তযিস্সসি, সুভদ্দে জাতিমত্তনো.

৬২৪. ‘‘অথ [কথং (সী. স্যা.)] ত্ৰং কেন ৰণ্ণেন, কেন ৰা অনুসাসিতা;

কীদিসেনেৰ দানেন, সুব্বতেন যসস্সিনী.

৬২৫. ‘‘যসং এতাদিসং পত্তা, ৰিসেসং ৰিপুলমজ্ঝগা;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৬২৬. ‘‘অট্ঠেৰ পিণ্ডপাতানি, যং দানং অদদং পুরে;

দক্খিণেয্যস্স সঙ্ঘস্স, পসন্না সেহি পাণিভি.

৬২৭. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি.

৬২৯. ‘‘অহং তযা বহুতরে ভিক্খূ, সঞ্ঞতে ব্রহ্মচারযো [ব্রহ্মচরিনো (স্যা.), ব্রহ্মচারিযে (পী. ক.)];

তপ্পেসিং অন্নপানেন, পসন্না সেহি পাণিভি.

৬৩০. ‘‘তযা বহুতরং দত্ৰা, হীনকাযূপগা অহং [অহুং (ক. সী.)];

কথং ত্ৰং অপ্পতরং দত্ৰা, ৰিসেসং ৰিপুলমজ্ঝগা;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৬৩১. ‘‘মনোভাৰনীযো ভিক্খু, সন্দিট্ঠো মে পুরে অহু;

তাহং ভত্তেন [ভদ্দে (ক.)] নিমন্তেসিং, রেৰতং অত্তনট্ঠমং.

৬৩২. ‘‘সো মে অত্থপুরেক্খারো, অনুকম্পায রেৰতো;

সঙ্ঘে দেহীতি মংৰোচ, তস্সাহং ৰচনং করিং.

৬৩৩. ‘‘সা দক্খিণা সঙ্ঘগতা, অপ্পমেয্যে পতিট্ঠিতা;

পুগ্গলেসু তযা দিন্নং, ন তং তৰ মহপ্ফল’’ন্তি.

৬৩৪. ‘‘ইদানেৰাহং জানামি, সঙ্ঘে দিন্নং মহপ্ফলং;

সাহং গন্ত্ৰা মনুস্সত্তং, ৰদঞ্ঞূ ৰীতমচ্ছরা;

সঙ্ঘে দানানি দস্সামি [সঙ্ঘে দানং দস্সামিহং (স্যা.)], অপ্পমত্তা পুনপ্পুন’’ন্তি.

৬৩৫. ‘‘কা এসা দেৰতা ভদ্দে, তযা মন্তযতে সহ;

সব্বে দেৰে তাৰতিংসে, ৰণ্ণেন অতিরোচতী’’তি.

৬৩৬. ‘‘মনুস্সভূতা দেৰিন্দ, পুব্বে মানুসকে ভৰে;

সহভরিযা চ মে আসি, ভগিনী চ কনিট্ঠিকা;

সঙ্ঘে দানানি দত্ৰান, কতপুঞ্ঞা ৰিরোচতী’’তি.

৬৩৭. ‘‘ধম্মেন পুব্বে ভগিনী, তযা ভদ্দে ৰিরোচতি;

যং সঙ্ঘম্হি অপ্পমেয্যে, পতিট্ঠাপেসি দক্খিণং.

৬৩৮. ‘‘পুচ্ছিতো হি মযা বুদ্ধো, গিজ্ঝকূটম্হি পব্বতে;

ৰিপাকং সংৰিভাগস্স, যত্থ দিন্নং মহপ্ফলং.

৬৩৯. ‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, যত্থ দিন্নং মহপ্ফলং.

৬৪০. ‘‘তং মে বুদ্ধো ৰিযাকাসি, জানং কম্মফলং সকং;

ৰিপাকং সংৰিভাগস্স, যত্থ দিন্নং মহপ্ফলং.

৬৪১. [ৰি. ৰ. ৭৫০; কথা. ৭৯৮] ‘‘চত্তারো চ পটিপন্না, চত্তারো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

৬৪২. [ৰি. ৰ. ৭৫১; কথা. ৭৯৮] ‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, সঙ্ঘে দিন্নং মহপ্ফলং.

৬৪৩. [ৰি. ৰ. ৭৫২; কথা. ৭৯৮] ‘‘এসো হি সঙ্ঘো ৰিপুলো মহগ্গতো, এসপ্পমেয্যো উদধীৰ সাগরো;

এতে হি সেট্ঠা নরৰীরসাৰকা, পভঙ্করা ধম্মমুদীরযন্তি [ধম্মকথং উদীরযন্তি (স্যা.)].

৬৪৪. [ৰি. ৰ. ৭৫৩; কথা. ৭৯৮] ‘‘তেসং সুদিন্নং সুহুতং সুযিট্ঠং, যে সঙ্ঘমুদ্দিস্স দদন্তি দানং;

সা দক্খিণা সঙ্ঘগতা পতিট্ঠিতা, মহপ্ফলা লোকৰিদূন [লোকৰিদূহি (স্যা. ক.)] ৰণ্ণিতা.

৬৪৫. [ৰি. ৰ. ৭৫৪; কথা. ৭৯৮] ‘‘এতাদিসং যঞ্ঞমনুস্সরন্তা [পুঞ্ঞমনুস্সরন্তা (স্যা. ক.)], যে ৰেদজাতা ৰিচরন্তি লোকে;

ৰিনেয্য মচ্ছেরমলং সমূলং, অনিন্দিতা সগ্গমুপেন্তি ঠান’’ন্তি.

দদ্দল্লৰিমানং [দদ্দল়্হৰিমানং (ক.)] ছট্ঠং.