৩. আচামদাযিকাৰিমানৰত্থু

১৮৫. ‘‘পিণ্ডায তে চরন্তস্স, তুণ্হীভূতস্স তিট্ঠতো;

দলিদ্দা কপণা নারী, পরাগারং অপস্সিতা [অৰস্সিতা (সী.)].

১৮৬. ‘‘যা তে অদাসি আচামং, পসন্না সেহি পাণিভি;

সা হিত্ৰা মানুসং দেহং, কং নু সা দিসতং গতা’’তি.

১৮৭. ‘‘পিণ্ডায মে চরন্তস্স, তুণ্হীভূতস্স তিট্ঠতো;

দলিদ্দা কপণা নারী, পরাগারং অপস্সিতা.

১৮৮. ‘‘যা মে অদাসি আচামং, পসন্না সেহি পাণিভি;

সা হিত্ৰা মানুসং দেহং, ৰিপ্পমুত্তা ইতো চুতা.

১৮৯. ‘‘নিম্মানরতিনো নাম, সন্তি দেৰা মহিদ্ধিকা;

তত্থ সা সুখিতা নারী, মোদতাচামদাযিকা’’তি.

১৯০. ‘‘অহো দানং ৰরাকিযা, কস্সপে সুপ্পতিট্ঠিতং;

পরাভতেন দানেন, ইজ্ঝিত্থ ৰত দক্খিণা.

১৯১. ‘‘যা মহেসিত্তং কারেয্য, চক্কৰত্তিস্স রাজিনো;

নারী সব্বঙ্গকল্যাণী, ভত্তু চানোমদস্সিকা;

এতস্সাচামদানস্স, কলং নাগ্ঘতি সোল়সিং.

১৯২. ‘‘সতং নিক্খা সতং অস্সা, সতং অস্সতরীরথা;

সতং কঞ্ঞাসহস্সানি, আমুত্তমণিকুণ্ডলা;

এতস্সাচামদানস্স, কলং নাগ্ঘন্তি সোল়সিং.

১৯৩. ‘‘সতং হেমৰতা নাগা, ঈসাদন্তা উরূল়্হৰা;

সুৰণ্ণকচ্ছা মাতঙ্গা, হেমকপ্পনৰাসসা [হেমকপ্পনিৰাসসা (স্যা. ক.)];

এতস্সাচামদানস্স, কলং নাগ্ঘতি সোল়সিং.

১৯৪. ‘‘চতুন্নমপি দীপানং, ইস্সরং যোধ কারযে;

এতস্সাচামদানস্স, কলং নাগ্ঘতি সোল়সি’’ন্তি.

আচামদাযিকাৰিমানং ততিযং.