৪. চণ্ডালিৰিমানৰত্থু

১৯৫. ‘‘চণ্ডালি ৰন্দ পাদানি, গোতমস্স যসস্সিনো;

তমেৰ [তৰেৰ (সী.)] অনুকম্পায, অট্ঠাসি ইসিসত্তমো [ইসিসুত্তমো (সী.)].

১৯৬. ‘‘অভিপ্পসাদেহি মনং, অরহন্তম্হি তাদিনি [তাদিনে (স্যা. ক.)];

খিপ্পং পঞ্জলিকা ৰন্দ, পরিত্তং তৰ জীৰিত’’ন্তি.

১৯৭. চোদিতা ভাৰিতত্তেন, সরীরন্তিমধারিনা;

চণ্ডালী ৰন্দি পাদানি, গোতমস্স যসস্সিনো.

১৯৮. তমেনং অৰধী গাৰী, চণ্ডালিং পঞ্জলিং ঠিতং;

নমস্সমানং সম্বুদ্ধং, অন্ধকারে পভঙ্করন্তি.

১৯৯. ‘‘খীণাসৰং ৰিগতরজং অনেজং, একং অরঞ্ঞম্হি রহো নিসিন্নং;

দেৰিদ্ধিপত্তা উপসঙ্কমিত্ৰা, ৰন্দামি তং ৰীর মহানুভাৰ’’ন্তি.

২০০. ‘‘সুৰণ্ণৰণ্ণা জলিতা মহাযসা, ৰিমানমোরুয্হ অনেকচিত্তা;

পরিৰারিতা অচ্ছরাসঙ্গণেন [অচ্ছরানং গণেন (সী.)], কা ত্ৰং সুভে দেৰতে ৰন্দসে মম’’ন্তি.

২০১. ‘‘অহং ভদ্দন্তে চণ্ডালী, তযা ৰীরেন [থেরেন (ক.)] পেসিতা;

ৰন্দিং অরহতো পাদে, গোতমস্স যসস্সিনো.

২০২. ‘‘সাহং ৰন্দিত্ৰা [ৰন্দিত্ৰ (সী.)] পাদানি, চুতা চণ্ডালযোনিযা;

ৰিমানং সব্বতো ভদ্দং, উপপন্নম্হি নন্দনে.

২০৩. ‘‘অচ্ছরানং সতসহস্সং, পুরক্খত্ৰান [পুরক্খিত্ৰা মং (স্যা. ক.)] তিট্ঠতি;

তাসাহং পৰরা সেট্ঠা, ৰণ্ণেন যসসাযুনা.

২০৪. ‘‘পহূতকতকল্যাণা, সম্পজানা পটিস্সতা [পতিস্সতা (সী. স্যা.)];

মুনিং কারুণিকং লোকে, তং ভন্তে ৰন্দিতুমাগতা’’তি.

২০৫. ইদং ৰত্ৰান চণ্ডালী, কতঞ্ঞূ কতৰেদিনী;

ৰন্দিত্ৰা অরহতো পাদে, তত্থেৰন্তরধাযথাতি [তত্থেৰন্তরধাযতীতি (স্যা. ক.)].

চণ্ডালিৰিমানং চতুত্থং.