৯. উদপানসুত্তং

৬৯. এৰং মে সুতং – একং সমযং ভগৰা মল্লেসু চারিকং চরমানো মহতা ভিক্খুসঙ্ঘেন সদ্ধিং যেন থূণং [থূনং (সী. স্যা. পী.)] নাম মল্লানং ব্রাহ্মণগামো তদৰসরি. অস্সোসুং খো থূণেয্যকা ব্রাহ্মণগহপতিকা – ‘‘সমণো খলু, ভো, গোতমো সক্যপুত্তো সক্যকুলা পব্বজিতো মল্লেসু চারিকং চরমানো মহতা ভিক্খুসঙ্ঘেন সদ্ধিং থূণং অনুপ্পত্তো’’তি.( ) [(অথ খো তে থূণেয্যকা ব্রাহ্মণগহপতিকা) (?)] উদপানং তিণস্স চ ভুসস্স চ যাৰ মুখতো পূরেসুং – ‘‘মা তে মুণ্ডকা সমণকা পানীযং অপংসূ’’তি.

অথ খো ভগৰা মগ্গা ওক্কম্ম যেন রুক্খমূলং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা আযস্মন্তং আনন্দং আমন্তেসি – ‘‘ইঙ্ঘ মে ত্ৰং, আনন্দ, এতম্হা উদপানা পানীযং আহরা’’তি.

এৰং ৰুত্তে, আযস্মা আনন্দো ভগৰন্তং এতদৰোচ – ‘‘ইদানি সো, ভন্তে, উদপানো থূণেয্যকেহি ব্রাহ্মণগহপতিকেহি তিণস্স চ ভুসস্স চ যাৰ মুখতো পূরিতো – ‘মা তে মুণ্ডকা সমণকা পানীযং অপংসূ’’’তি.

দুতিযম্পি খো…পে… ততিযম্পি খো ভগৰা আযস্মন্তং আনন্দং আমন্তেসি – ‘‘ইঙ্ঘ মে ত্ৰং, আনন্দ, এতম্হা উদপানা পানীযং আহরা’’তি. ‘‘এৰং, ভন্তে’’তি খো আযস্মা আনন্দো ভগৰতো পটিস্সুত্ৰা পত্তং গহেত্ৰা যেন সো উদপানো তেনুপসঙ্কমি. অথ খো সো উদপানো আযস্মন্তে আনন্দে উপসঙ্কমন্তে সব্বং তং তিণঞ্চ ভুসঞ্চ মুখতো ওৰমিত্ৰা অচ্ছস্স উদকস্স অনাৰিলস্স ৰিপ্পসন্নস্স যাৰ মুখতো পূরিতো ৰিস্সন্দন্তো [ৰিস্সন্দো (ক.)] মঞ্ঞে অট্ঠাসি.

অথ খো আযস্মতো আনন্দস্স এতদহোসি – ‘‘অচ্ছরিযং ৰত, ভো, অব্ভুতং ৰত, ভো, তথাগতস্স মহিদ্ধিকতা মহানুভাৰতা! অযঞ্হি সো উদপানো মযি উপসঙ্কমন্তে সব্বং তং তিণঞ্চ ভুসঞ্চ মুখতো ওৰমিত্ৰা অচ্ছস্স উদকস্স অনাৰিলস্স ৰিপ্পসন্নস্স যাৰ মুখতো পূরিতো ৰিস্সন্দন্তো মঞ্ঞে ঠিতো’’তি!! পত্তেন পানীযং আদায যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘অচ্ছরিযং, ভন্তে, অব্ভুতং, ভন্তে, তথাগতস্স মহিদ্ধিকতা মহানুভাৰতা! অযঞ্হি সো, ভন্তে, উদপানো মযি উপসঙ্কমন্তে সব্বং তং তিণঞ্চ ভুসঞ্চ মুখতো ওৰমিত্ৰা অচ্ছস্স উদকস্স অনাৰিলস্স ৰিপ্পসন্নস্স যাৰ মুখতো পূরিতো ৰিস্সন্দন্তো মঞ্ঞে অট্ঠাসি!! পিৰতু ভগৰা পানীযং, পিৰতু সুগতো পানীয’’ন্তি.

অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –

‘‘কিং কযিরা উদপানেন,

আপা চে সব্বদা সিযুং;

তণ্হায মূলতো ছেত্ৰা,

কিস্স পরিযেসনং চরে’’তি. নৰমং;