১০. উতেনসুত্তং

৭০. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে. তেন খো পন সমযেন রঞ্ঞো উতেনস্স [উদেনস্স (সী. স্যা. পী.)] উয্যানগতস্স অন্তেপুরং দড্ঢং হোতি, পঞ্চ চ ইত্থিসতানি [পঞ্চ ইত্থিসতানি (সী. স্যা. পী.)] কালঙ্কতানি হোন্তি সামাৰতীপমুখানি.

অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায কোসম্বিং পিণ্ডায পাৰিসিংসু. কোসম্বিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, রঞ্ঞো উতেনস্স উয্যানগতস্স অন্তেপুরং দড্ঢং, পঞ্চ চ ইত্থিসতানি কালঙ্কতানি সামাৰতীপমুখানি. তাসং, ভন্তে, উপাসিকানং কা গতি কো অভিসম্পরাযো’’তি?

‘‘সন্তেত্থ, ভিক্খৰে, উপাসিকাযো সোতাপন্না, সন্তি সকদাগামিনিযো, সন্তি অনাগামিনিযো. সব্বা তা, ভিক্খৰে, উপাসিকাযো অনিপ্ফলা কালঙ্কতা’’তি.

অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –

‘‘মোহসম্বন্ধনো লোকো, ভব্বরূপোৰ দিস্সতি;

উপধিবন্ধনো [উপধিসম্বন্ধনো (ক. সী.)] বালো, তমসা পরিৰারিতো;

সস্সতোরিৰ [সস্সতি ৰিয (ক. সী.)] খাযতি, পস্সতো নত্থি কিঞ্চন’’ন্তি. দসমং;

তস্সুদ্দানং –

দ্ৰে ভদ্দিযা দ্ৰে চ সত্তা, লকুণ্ডকো তণ্হাখযো;

পপঞ্চখযো চ কচ্চানো, উদপানঞ্চ উতেনোতি.

চূল়ৰগ্গো [চুল্লৰগ্গো (সী.), চূলৰগ্গো (পী.)] সত্তমো নিট্ঠিতো.