২. রাজসুত্তং

১২. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সম্বহুলানং ভিক্খূনং পচ্ছাভত্তং পিণ্ডপাতপটিক্কন্তানং উপট্ঠানসালাযং সন্নিসিন্নানং সন্নিপতিতানং অযমন্তরাকথা উদপাদি – ‘‘কো নু খো, আৰুসো, ইমেসং দ্ৰিন্নং রাজূনং মহদ্ধনতরো ৰা মহাভোগতরো ৰা মহাকোসতরো ৰা মহাৰিজিততরো ৰা মহাৰাহনতরো ৰা মহব্বলতরো ৰা মহিদ্ধিকতরো ৰা মহানুভাৰতরো ৰা রাজা ৰা মাগধো সেনিযো বিম্বিসারো, রাজা ৰা পসেনদি কোসলো’’তি? অযঞ্চরহি তেসং ভিক্খূনং অন্তরাকথা হোতি ৰিপ্পকতা.

অথ খো ভগৰা সাযন্হসমযং পটিসল্লানা ৰুট্ঠিতো যেনুপট্ঠানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা ভিক্খূ আমন্তেসি – ‘‘কায নুত্থ, ভিক্খৰে, এতরহি কথায সন্নিসিন্না সন্নিপতিতা, কা চ পন ৰো অন্তরাকথা ৰিপ্পকতা’’তি?

‘‘ইধ, ভন্তে, অম্হাকং পচ্ছাভত্তং পিণ্ডপাতপটিক্কন্তানং উপট্ঠানসালাযং সন্নিসিন্নানং সন্নিপতিতানং অযমন্তরাকথা উদপাদি – ‘কো নু খো, আৰুসো, ইমেসং দ্ৰিন্নং রাজূনং মহদ্ধনতরো ৰা মহাভোগতরো ৰা মহাকোসতরো ৰা মহাৰিজিততরো ৰা মহাৰাহনতরো ৰা মহব্বলতরো ৰা মহিদ্ধিকতরো ৰা মহানুভাৰতরো ৰা রাজা ৰা মাগধো সেনিযো বিম্বিসারো, রাজা ৰা পসেনদি কোসলো’তি? অযং খো নো, ভন্তে, অন্তরাকথা ৰিপ্পকতা, অথ ভগৰা অনুপ্পত্তো’’তি.

‘‘ন খ্ৰেতং, ভিক্খৰে, তুম্হাকং পতিরূপং কুলপুত্তানং সদ্ধা অগারস্মা অনগারিযং পব্বজিতানং যং তুম্হে এৰরূপিং কথং কথেয্যাথ. সন্নিপতিতানং ৰো, ভিক্খৰে, দ্ৰযং করণীযং – ধম্মী ৰা কথা অরিযো ৰা তুণ্হীভাৰো’’তি.

অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –

‘‘যঞ্চ কামসুখং লোকে, যঞ্চিদং দিৰিযং সুখং;

তণ্হক্খযসুখস্সেতে, কলং নাগ্ঘন্তি সোল়সি’’ন্তি. দুতিযং;