২. চালাথেরীগাথা

১৮২. ‘‘সতিং উপট্ঠপেত্ৰান, ভিক্খুনী ভাৰিতিন্দ্রিযা;

পটিৰিজ্ঝি পদং সন্তং, সঙ্খারূপসমং সুখং’’.

১৮৩. ‘‘কং নু উদ্দিস্স মুণ্ডাসি, সমণী ৰিয দিস্সসি;

ন চ রোচেসি পাসণ্ডে, কিমিদং চরসি মোমুহা’’.

১৮৪. ‘‘ইতো বহিদ্ধা পাসণ্ডা, দিট্ঠিযো উপনিস্সিতা;

ন তে ধম্মং ৰিজানন্তি, ন তে ধম্মস্স কোৰিদা.

১৮৫. ‘‘অত্থি সক্যকুলে জাতো, বুদ্ধো অপ্পটিপুগ্গলো;

সো মে ধম্মমদেসেসি, দিট্ঠীনং সমতিক্কমং.

১৮৬. ‘‘দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

১৮৭. ‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৮৮. ‘‘সব্বত্থ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক’’.

… চালা থেরী….