৩. উপচালাথেরীগাথা

১৮৯. ‘‘সতিমতী চক্খুমতী, ভিক্খুনী ভাৰিতিন্দ্রিযা;

পটিৰিজ্ঝিং পদং সন্তং, অকাপুরিসসেৰিতং’’.

১৯০. ‘‘কিং নু জাতিং ন রোচেসি, জাতো কামানি ভুঞ্জতি;

ভুঞ্জাহি কামরতিযো, মাহু পচ্ছানুতাপিনী’’.

১৯১. ‘‘জাতস্স মরণং হোতি, হত্থপাদান ছেদনং;

ৰধবন্ধপরিক্লেসং, জাতো দুক্খং নিগচ্ছতি.

১৯২. ‘‘অত্থি সক্যকুলে জাতো, সম্বুদ্ধো অপরাজিতো;

সো মে ধম্মমদেসেসি, জাতিযা সমতিক্কমং.

১৯৩. ‘‘দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

১৯৪. ‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৯৫. ‘‘সব্বত্থ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক’’.

… উপচালা থেরী….

সত্তকনিপাতো নিট্ঠিতো.