৯. ভদ্দাকুণ্ডলকেসাথেরীগাথা

১০৭. ‘‘লূনকেসী পঙ্কধরী, একসাটী পুরে চরিং;

অৰজ্জে ৰজ্জমতিনী, ৰজ্জে চাৰজ্জদস্সিনী.

১০৮. ‘‘দিৰাৰিহারা নিক্খম্ম, গিজ্ঝকূটম্হি পব্বতে;

অদ্দসং ৰিরজং বুদ্ধং, ভিক্খুসঙ্ঘপুরক্খতং.

১০৯. ‘‘নিহচ্চ জাণুং ৰন্দিত্ৰা, সম্মুখা অঞ্জলিং অকং;

‘এহি ভদ্দে’তি মং অৰচ, সা মে আসূপসম্পদা.

১১০. ‘‘চিণ্ণা অঙ্গা চ মগধা, ৰজ্জী কাসী চ কোসলা;

অনণা পণ্ণাসৰস্সানি, রট্ঠপিণ্ডং অভুঞ্জহং.

১১১. ‘‘পুঞ্ঞং ৰত পসৰি বহুং, সপ্পঞ্ঞো ৰতাযং উপাসকো;

যো ভদ্দায চীৰরং অদাসি, ৰিপ্পমুত্তায সব্বগন্থেহী’’তি.

… ভদ্দা কুণ্ডলকেসা থেরী….