৮. সোণাথেরীগাথা

১০২. ‘‘দস পুত্তে ৰিজাযিত্ৰা, অস্মিং রূপসমুস্সযে;

ততোহং দুব্বলা জিণ্ণা, ভিক্খুনিং উপসঙ্কমিং.

১০৩. ‘‘সা মে ধম্মমদেসেসি, খন্ধাযতনধাতুযো;

তস্সা ধম্মং সুণিত্ৰান, কেসে ছেত্ৰান পব্বজিং.

১০৪. ‘‘তস্সা মে সিক্খমানায, দিব্বচক্খু ৰিসোধিতং;

পুব্বেনিৰাসং জানামি, যত্থ মে ৰুসিতং পুরে.

১০৫. ‘‘অনিমিত্তঞ্চ ভাৰেমি, একগ্গা সুসমাহিতা;

অনন্তরাৰিমোক্খাসিং, অনুপাদায নিব্বুতা.

১০৬. ‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

ধি তৰত্থু জরে জম্মে, নত্থি দানি পুনব্ভৰো’’তি.

… সোণা থেরী….