৭. সকুলাথেরীগাথা

৯৭. ‘‘অগারস্মিং ৰসন্তীহং, ধম্মং সুত্ৰান ভিক্খুনো;

অদ্দসং ৰিরজং ধম্মং, নিব্বানং পদমচ্চুতং.

৯৮. ‘‘সাহং পুত্তং ধীতরঞ্চ, ধনধঞ্ঞঞ্চ ছড্ডিয;

কেসে ছেদাপযিত্ৰান, পব্বজিং অনগারিযং.

৯৯. ‘‘সিক্খমানা অহং সন্তী, ভাৰেন্তী মগ্গমঞ্জসং;

পহাসিং রাগদোসঞ্চ, তদেকট্ঠে চ আসৰে.

১০০. ‘‘ভিক্খুনী উপসম্পজ্জ, পুব্বজাতিমনুস্সরিং;

দিব্বচক্খু ৰিসোধিতং [ৰিসোধিতং দিব্বচক্খু (সী.)], ৰিমলং সাধুভাৰিতং.

১০১. ‘‘সঙ্খারে পরতো দিস্ৰা, হেতুজাতে পলোকিতে [পলোকিনে (ক.)];

পহাসিং আসৰে সব্বে, সীতিভূতাম্হি নিব্বুতা’’তি.

… সকুলা থেরী….