২. ৰিমলাথেরীগাথা

৭২. ‘‘মত্তা ৰণ্ণেন রূপেন, সোভগ্গেন যসেন চ;

যোব্বনেন চুপত্থদ্ধা, অঞ্ঞাসমতিমঞ্ঞিহং.

৭৩. ‘‘ৰিভূসেত্ৰা ইমং কাযং, সুচিত্তং বাললাপনং;

অট্ঠাসিং ৰেসিদ্ৰারম্হি, লুদ্দো পাসমিৰোড্ডিয.

৭৪. ‘‘পিলন্ধনং ৰিদংসেন্তী, গুয্হং পকাসিকং বহুং;

অকাসিং ৰিৰিধং মাযং, উজ্জগ্ঘন্তী বহুং জনং.

৭৫. ‘‘সাজ্জ পিণ্ডং চরিত্ৰান, মুণ্ডা সঙ্ঘাটিপারুতা;

নিসিন্না রুক্খমূলম্হি, অৰিতক্কস্স লাভিনী.

৭৬. ‘‘সব্বে যোগা সমুচ্ছিন্না, যে দিব্বা যে চ মানুসা;

খেপেত্ৰা আসৰে সব্বে, সীতিভূতাম্হি নিব্বুতা’’তি.

… ৰিমলা পুরাণগণিকা থেরী….