১০. পেসলাথেরীঅপদানং

২২০. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

২২১. ‘‘সাৰত্থিযং পুরে ৰরে, উপাসককুলে অহং;

পসূতা তং [নং (স্যা.)] জিনৰরং, দিস্ৰা সুত্ৰা চ দেসনং.

২২২. ‘‘তং ৰীরং সরণং গন্ত্ৰা, সীলানি চ সমাদিযিং;

কদাচি সো মহাৰীরো, মহাজনসমাগমে.

২২৩. ‘‘অত্তনো অভিসম্বোধিং, পকাসেসি নরাসভো;

অননুস্সুতধম্মেসু, পুব্বে দুক্খাদিকেসু চ.

২২৪. ‘‘চক্খু ঞাণঞ্চ পঞ্ঞা চ, ৰিজ্জালোকো চ আসি মে;

তং সুত্ৰা উগ্গহেত্ৰান, পরিপুচ্ছিঞ্চ ভিক্খৰো.

২২৫. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

২২৬. ‘‘পচ্ছিমে চ ভৰে দানি, জাতা সেট্ঠিমহাকুলে;

উপেচ্চ বুদ্ধং সদ্ধম্মং, সুত্ৰা সচ্চূপসংহিতং.

২২৭. ‘‘পব্বজিত্ৰাচিরেনেৰ, সচ্চত্থানি [সব্বত্থানি (স্যা. ক.)] ৰিচিন্তযং;

খেপেত্ৰা আসৰে সব্বে, অরহত্তমপাপুণিং.

২২৮. ‘‘ইদ্ধীসু চ ৰসী হোমি, দিব্বায সোতধাতুযা;

চেতোপরিযঞাণস্স, ৰসী হোমি মহামুনে.

২২৯. ‘‘পুব্বেনিৰাসং জানামি, দিব্বচক্খু ৰিসোধিতং;

সব্বাসৰপরিক্খীণা, নত্থি দানি পুনব্ভৰো.

২৩০. ‘‘অত্থধম্মনিরুত্তীসু, পটিভানে তথেৰ চ;

ঞাণং মে ৰিমলং সুদ্ধং, বুদ্ধসেট্ঠস্স ৰাহসা.

২৩১. ‘‘কিলেসা ঝাপিতা ময্হং, ভৰা সব্বে সমূহতা;

নাগীৰ বন্ধনং ছেত্ৰা, ৰিহরামি অনাসৰা.

২৩২. ‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

২৩৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং পেসলা [সেলা (স্যা. পী.)] ভিক্খুনী ইমা গাথাযো অভাসিত্থাতি.

পেসলাথেরিযাপদানং দসমং.

খত্তিযাৰগ্গো চতুত্থো.