১০. যসোধরাপমুখঅট্ঠারসভিক্খুনীসহস্সঅপদানং

৪২৬. ‘‘অট্ঠারসসহস্সানি, ভিক্খুনী সক্যসম্ভৰা;

যসোধরাপমুখানি, সম্বুদ্ধং উপসঙ্কমুং.

৪২৭. ‘‘অট্ঠারসসহস্সানি, সব্বা হোন্তি মহিদ্ধিকা;

ৰন্দন্তী মুনিনো পাদে, আরোচেন্তি যথাবলং.

৪২৮. ‘‘‘জাতি খীণা জরা ব্যাধি, মরণঞ্চ মহামুনি;

অনাসৰং পদং সন্তং, অমতং যাম নাযক.

৪২৯. ‘‘‘খলিতঞ্চে পুরে অত্থি, সব্বাসম্পি মহামুনি;

অপরাধমজানন্তী, খম অম্হং ৰিনাযক.

৪৩০. ‘‘‘ইদ্ধিঞ্চাপি নিদস্সেথ, মম সাসনকারিকা;

পরিসানঞ্চ সব্বাসং, কঙ্খং ছিন্দথ যাৰতা.

৪৩১. ‘‘‘যসোধরা মহাৰীর, মনাপা পিযদস্সনা;

সব্বা তুয্হং মহাৰীর, অগারস্মিং পজাপতি.

৪৩২. ‘‘‘থীনং সতসহস্সানং, নৰুতীনং ছদুত্তরি;

অগারে তে মযং ৰীর, পামোক্খা সব্বা ইস্সরা.

৪৩৩. ‘‘‘রূপাচারগুণূপেতা, যোব্বনট্ঠা পিযংৰদা;

সব্বা নো অপচাযন্তি, দেৰতা ৰিয মানুসা.

৪৩৪. ‘‘‘অট্ঠারসসহস্সানি, সব্বা সাকিযসম্ভৰা;

যসোধরাসহস্সানি, পামোক্খা ইস্সরা তদা.

৪৩৫. ‘‘‘কামধাতুমতিক্কম্ম, সণ্ঠিতা রূপধাতুযা;

রূপেন সদিসা নত্থি, সহস্সানং মহামুনি.

৪৩৬. ‘‘‘সম্বুদ্ধং অভিৰাদেত্ৰা, ইদ্ধিং দস্সংসু সত্থুনো;

নেকা নানাৰিধাকারা, মহাইদ্ধীপি দস্সযুং.

৪৩৭. ‘‘‘চক্কৰাল়সমং কাযং, সীসং উত্তরতো কুরু;

উভো পক্খা দুৰে দীপা, জম্বুদীপং সরীরতো.

৪৩৮. ‘‘‘দক্খিণঞ্চ সরং পিঞ্ছং, নানাসাখা তু পত্তকা;

চন্দঞ্চ সূরিযঞ্চক্খি, মেরুপব্বততো সিখং.

৪৩৯. ‘‘‘চক্কৰাল়গিরিং তুণ্ডং, জম্বুরুক্খং সমূলকং;

বীজমানা উপাগন্ত্ৰা, ৰন্দন্তী লোকনাযকং.

৪৪০. ‘‘‘হত্থিৰণ্ণং তথেৰস্সং, পব্বতং জলধিং তথা;

চন্দঞ্চ সূরিযং মেরুং, সক্কৰণ্ণঞ্চ দস্সযুং.

৪৪১. ‘‘‘যসোধরা মযং ৰীর, পাদে ৰন্দাম চক্খুম;

তৰ চিরপভাৰেন, নিপ্ফন্না নরনাযক.

৪৪২. ‘‘‘ইদ্ধীসু চ ৰসী হোম, দিব্বায সোতধাতুযা;

চেতোপরিযঞাণস্স, ৰসী হোম মহামুনে.

৪৪৩. ‘‘‘পুব্বেনিৰাসং জানাম, দিব্বচক্খু ৰিসোধিতং;

সব্বাসৰপরিক্খীণা, নত্থি দানি পুনব্ভৰো.

৪৪৪. ‘‘‘অত্থধম্মনিরুত্তীসু, পটিভানে তথেৰ চ;

ঞাণং অম্হং মহাৰীর, উপ্পন্নং তৰ সন্তিকে.

৪৪৫. ‘‘‘পুব্বানং লোকনাথানং, সঙ্গমং নো নিদস্সিতং;

অধিকারা বহূ অম্হং, তুয্হত্থায মহামুনে.

৪৪৬. ‘‘‘যং অম্হং পূরিতং কম্মং, কুসলং সরসে মুনে;

তুয্হত্থায মহাৰীর, পুঞ্ঞানুপচিতানি নো.

৪৪৭. ‘‘‘অভব্বট্ঠানে ৰজ্জেত্ৰা, ৰারযিম্হ অনাচরং;

তুয্হত্থায মহাৰীর, চত্তানি জীৰিতানি নো [সঞ্চত্তং জীৰিতম্পি নো (স্যা.)].

৪৪৮. ‘‘‘নেককোটিসহস্সানি, ভরিযত্থাযদাসি নো;

ন তত্থ ৰিমনা হোম, তুয্হত্থায মহামুনে.

৪৪৯. ‘‘‘নেককোটিসহস্সানি, উপকারাযদাসি নো;

ন তত্থ ৰিমনা হোম, তুয্হত্থায মহামুনে.

৪৫০. ‘‘‘নেককোটিসহস্সানি, ভোজনত্থাযদাসি নো;

ন তত্থ ৰিমনা হোম, তুয্হত্থায মহামুনে.

৪৫১. ‘‘‘নেককোটিসহস্সানি, জীৰিতানি চজিম্হসে [চজিম্হ নো (পী. ক.)];

ভযমোক্খং করিস্সাম, জীৰিতানি চজিম্হসে.

৪৫২. ‘‘‘অঙ্গগতে অলঙ্কারে, ৰত্থে নানাৰিধে বহূ;

ইত্থিভণ্ডে ন গূহাম, তুয্হত্থায মহামুনে.

৪৫৩. ‘‘‘ধনধঞ্ঞপরিচ্চাগং, গামানি নিগমানি চ;

খেত্তং পুত্তা চ ধীতা চ, পরিচ্চত্তা মহামুনে.

৪৫৪. ‘‘‘হত্থী অস্সা গৰা চাপি, দাসিযো পরিচারিকা;

তুয্হত্থায মহাৰীর, পরিচ্চত্তং অসঙ্খিযং.

৪৫৫. ‘‘‘যং অম্হে পটিমন্তেসি, দানং দস্সাম যাচকে;

ৰিমনং নো ন পস্সাম, দদতো দানমুত্তমং.

৪৫৬. ‘‘‘নানাৰিধং বহুং দুক্খং, সংসারে চ বহুব্বিধে;

তুয্হত্থায মহাৰীর, অনুভুত্তং অসঙ্খিযং.

৪৫৭. ‘‘‘সুখপ্পত্তানুমোদাম, ন চ দুক্খেসু দুম্মনা;

সব্বত্থ তুলিতা হোম, তুয্হত্থায মহামুনে.

৪৫৮. ‘‘‘অনুমগ্গেন সম্বুদ্ধো, যং ধম্মং অভিনীহরি;

অনুভোত্ৰা সুখং দুক্খং, পত্তো বোধিং মহামুনে.

৪৫৯. ‘‘‘ব্রহ্মদেৰঞ্চ সম্বুদ্ধং, গোতমং লোকনাযকং;

অঞ্ঞেসং লোকনাথানং, সঙ্গমং তেহি নো বহূ.

৪৬০. ‘‘‘অধিকারং বহুং অম্হে, তুয্হত্থায মহামুনে;

গৰেসতো বুদ্ধধম্মে, মযং তে পরিচারিকা.

৪৬১. ‘‘‘কপ্পে চ সতসহস্সে, চতুরো চ অসঙ্খিযে;

দীপঙ্করো মহাৰীরো, উপ্পজ্জি লোকনাযকো.

৪৬২. ‘‘‘পচ্চন্তদেসৰিসযে, নিমন্তেত্ৰা তথাগতং;

তস্স আগমনং মগ্গং, সোধেন্তি তুট্ঠমানসা.

৪৬৩. ‘‘‘তেন কালেন সো আসি, সুমেধো নাম ব্রাহ্মণো;

মগ্গঞ্চ পটিযাদেসি, আযতো সব্বদস্সিনো.

৪৬৪. ‘‘‘তেন কালেন অহুম্হ, সব্বা ব্রাহ্মণসম্ভৰা;

থলূদজানি পুপ্ফানি, আহরিম্হ সমাগমং.

৪৬৫. ‘‘‘তস্মিং সো সমযে বুদ্ধো, দীপঙ্করো মহাযসো;

ৰিযাকাসি মহাৰীরো, ইসিমুগ্গতমানসং.

৪৬৬. ‘‘‘চলতী রৰতী পুথৰী, সঙ্কম্পতি সদেৰকে;

তস্স কম্মং পকিত্তেন্তে, ইসিমুগ্গতমানসং.

৪৬৭. ‘‘‘দেৰকঞ্ঞা মনুস্সা চ, মযঞ্চাপি সদেৰকা;

নানাপূজনীযং ভণ্ডং, পূজযিত্ৰান পত্থযুং.

৪৬৮. ‘‘‘তেসং বুদ্ধো ৰিযাকাসি, জোতিদীপ সনামকো;

অজ্জ যে পত্থিতা অত্থি, তে ভৰিস্সন্তি সম্মুখা.

৪৬৯. ‘‘‘অপরিমেয্যে ইতো কপ্পে, যং নো বুদ্ধো ৰিযাকরি;

তং ৰাচমনুমোদেন্তা, এৰংকারী অহুম্হ নো.

৪৭০. ‘‘‘তস্স কম্মস্স সুকতস্স, তস্স চিত্তং পসাদযুং;

দেৰমানুসিকং যোনিং, অনুভোত্ৰা অসঙ্খিযং.

৪৭১. ‘‘‘সুখদুক্খেনুভোত্ৰান, দেৰেসু মানুসেসু চ;

পচ্ছিমে ভৰে সম্পত্তে, জাতাম্হ সাকিযে কুলে.

৪৭২. ‘‘‘রূপৰতী ভোগৰতী, যসসীলৰতী ততো;

সব্বঙ্গসম্পদা হোম, কুলেসু অভিসক্কতা.

৪৭৩. ‘‘‘লাভং সিলোকং সক্কারং, লোকধম্মসমাগমং;

চিত্তঞ্চ দুক্খিতং নত্থি, ৰসাম অকুতোভযা.

৪৭৪. ‘‘‘ৰুত্তঞ্হেতং ভগৰতা, রঞ্ঞো অন্তেপুরে তদা;

খত্তিযানং পুরে ৰীর [তাসং (স্যা.)], উপকারঞ্চ নিদ্দিসি.

৪৭৫. ‘‘‘উপকারা চ যা নারী, যা চ নারী সুখে দুখে;

অত্থক্খাযী চ যা নারী, যা চ নারীনুকম্পিকা.

৪৭৬. ‘‘‘ধম্মং চরে সুচরিতং, ন নং দুচ্চরিতং চরে;

ধম্মচারী সুখং সেতি, অস্মিং লোকে পরম্হি চ.

৪৭৭. ‘‘‘অগারং ৰিজহিত্ৰান, পব্বজিম্হনগারিযং;

অড্ঢমাসে অসম্পত্তে, চতুসচ্চং ফুসিম্হ নো.

৪৭৮. ‘‘‘চীৰরং পিণ্ডপাতঞ্চ, পচ্চযং সযনাসনং;

উপনেন্তি বহূ অম্হে, সাগরস্সেৰ ঊমিযো.

৪৭৯. ‘‘‘কিলেসা ঝাপিতা অম্হং [ময্হং (স্যা.), অম্হাকং (ক.)], ভৰা সব্বে সমূহতা;

নাগীৰ বন্ধনং ছেত্ৰা, ৰিহরাম অনাসৰা.

৪৮০. ‘‘‘স্ৰাগতং ৰত নো আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৪৮১. ‘‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’.

৪৮২. ‘‘এৰং বহুৰিধং দুক্খং, সম্পত্তী চ বহুব্বিধা;

ৰিসুদ্ধভাৰং সম্পত্তা, লভাম সব্বসম্পদা.

৪৮৩. ‘‘যা দদন্তি সকত্তানং, পুঞ্ঞত্থায মহেসিনো;

সহাযসম্পদা হোন্তি, নিব্বানপদমসঙ্খতং.

৪৮৪. ‘‘পরিক্খীণং অতীতঞ্চ, পচ্চুপ্পন্নং অনাগতং;

সব্বকম্মম্পি নো খীণং, পাদে ৰন্দাম চক্খুম.

৪৮৫. ‘‘নিব্বানায ৰদন্তীনং, কিং ৰো ৰক্খাম উত্তরি;

সন্তসঙ্খতদোসঞ্হি, পপ্পোথ [সন্তসঙ্খতদোসো যো, পজ্জোতং (স্যা. পী. ক.)] অমতং পদং’’.

ইত্থং সুদং যসোধরাপমুখানি অট্ঠারসভিক্খুনীসহস্সানি ভগৰতো সম্মুখা ইমা গাথাযো অভাসিত্থাতি.

যসোধরাপমুখঅট্ঠারসভিক্খুনীসহস্সাপদানং দসমং.

কুণ্ডলকেসীৰগ্গো ততিযো.