৬. নল়মালিকাথেরীঅপদানং

৮৬. ‘‘চন্দভাগানদীতীরে, অহোসিং কিন্নরী তদা;

অদ্দসং ৰিরজং বুদ্ধং, সযম্ভুং অপরাজিতং.

৮৭. ‘‘পসন্নচিত্তা সুমনা, ৰেদজাতা কতঞ্জলী;

নল়মালং গহেত্ৰান, সযম্ভুং অভিপূজযিং.

৮৮. ‘‘তেন কম্মেন সুকতেন, চেতনাপণিধীহি চ;

জহিত্ৰা কিন্নরীদেহং [মানসং দেহং (সী. পী. ক.) সুমেধাৰগ্গেপি], তাৰতিংসমগচ্ছহং.

৮৯. ‘‘ছত্তিংসদেৰরাজূনং, মহেসিত্তমকারযিং;

মনসা পত্থিতং ময্হং, নিব্বত্ততি যথিচ্ছিতং.

৯০. ‘‘দসন্নং চক্কৰত্তীনং, মহেসিত্তমকারযিং;

ওচিতত্তাৰ [সুচিতত্তাৰ (পী.)] হুত্ৰান, সংসরামি ভৰেস্ৰহং.

৯১. ‘‘কুসলং ৰিজ্জতে ময্হং, পব্বজিং অনগারিযং;

পূজারহা অহং অজ্জ, সক্যপুত্তস্স সাসনে.

৯২. ‘‘ৰিসুদ্ধমনসা অজ্জ, অপেতমনপাপিকা;

সব্বাসৰপরিক্খীণা, নত্থি দানি পুনব্ভৰো.

৯৩. ‘‘চতুন্নৰুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, নল়মালাযিদং ফলং.

৯৪. ‘‘কিলেসা ঝাপিতা ময্হং…পে… ৰিহরামি অনাসৰা.

৯৫. ‘‘স্ৰাগতং ৰত মে আসি…পে… কতং বুদ্ধস্স সাসনং.

৯৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং নল়মালিকা ভিক্খুনী ইমা গাথাযো অভাসিত্থাতি.

নল়মালিকাথেরিযাপদানং ছট্ঠং.