৫. পঞ্চদীপদাযিকাথেরীঅপদানং

৬১. ‘‘নগরে হংসৰতিযা, চারিকী [চারিকা (সী. স্যা.)] আসহং তদা;

আরামেন চ আরামং [আরামেন ৰিহারেন (স্যা. পী.)], চরামি কুসলত্থিকা.

৬২. ‘‘কাল়পক্খম্হি দিৰসে, অদ্দসং বোধিমুত্তমং;

তত্থ চিত্তং পসাদেত্ৰা, বোধিমূলে নিসীদহং.

৬৩. ‘‘গরুচিত্তং উপট্ঠেত্ৰা, সিরে কত্ৰান অঞ্জলিং;

সোমনস্সং পৰেদেত্ৰা, এৰং চিন্তেসি তাৰদে.

৬৪. ‘‘‘যদি বুদ্ধো অমিতগুণো, অসমপ্পটিপুগ্গলো;

দস্সেতু পাটিহীরং মে, বোধি ওভাসতু অযং’.

৬৫. ‘‘সহ আৰজ্জিতে ময্হং, বোধি পজ্জলি তাৰদে;

সব্বসোণ্ণমযা আসি, দিসা সব্বা ৰিরোচতি.

৬৬. ‘‘সত্তরত্তিন্দিৰং তত্থ, বোধিমূলে নিসীদহং;

সত্তমে দিৰসে পত্তে, দীপপূজং অকাসহং.

৬৭. ‘‘আসনং পরিৰারেত্ৰা, পঞ্চ দীপানি পজ্জলুং;

যাৰ উদেতি সূরিযো, দীপা মে পজ্জলুং তদা.

৬৮. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৬৯. ‘‘তত্থ মে সুকতং ব্যম্হং, পঞ্চদীপাতি ৰুচ্চতি;

সট্ঠিযোজনমুব্বেধং, তিংসযোজনৰিত্থতং.

৭০. ‘‘অসঙ্খিযানি দীপানি, পরিৰারে জলিংসু মে;

যাৰতা দেৰভৰনং, দীপালোকেন জোততি.

৭১. ‘‘পরম্মুখা [পুব্বমুখা (স্যা.)] নিসীদিত্ৰা, যদি ইচ্ছামি পস্সিতুং;

উদ্ধং অধো চ তিরিযং, সব্বং পস্সামি চক্খুনা.

৭২. ‘‘যাৰতা অভিকঙ্খামি, দট্ঠুং সুগতদুগ্গতে [সুকতদুক্কটে (পী.)];

তত্থ আৰরণং নত্থি, রুক্খেসু পব্বতেসু ৰা.

৭৩. ‘‘অসীতি দেৰরাজূনং, মহেসিত্তমকারযিং;

সতানং চক্কৰত্তীনং, মহেসিত্তমকারযিং.

৭৪. ‘‘যং যং যোনুপপজ্জামি, দেৰত্তং অথ মানুসং;

দীপসতসহস্সানি, পরিৰারে জলন্তি মে.

৭৫. ‘‘দেৰলোকা চৰিত্ৰান, উপ্পজ্জিং মাতুকুচ্ছিযং;

মাতুকুচ্ছিগতা সন্তী, অক্খি মে ন নিমীলতি.

৭৬. ‘‘দীপসতসহস্সানি, পুঞ্ঞকম্মসমঙ্গিতা;

জলন্তি সূতিকাগেহে, পঞ্চদীপানিদং ফলং.

৭৭. ‘‘পচ্ছিমে ভৰে সম্পত্তে, মানসং ৰিনিৰত্তযিং;

অজরামতং সীতিভাৰং, নিব্বানং ফস্সযিং অহং.

৭৮. ‘‘জাতিযা সত্তৰস্সাহং, অরহত্তমপাপুণিং;

উপসম্পাদযী বুদ্ধো, গুণমঞ্ঞায গোতমো.

৭৯. ‘‘মণ্ডপে রুক্খমূলে ৰা, সুঞ্ঞাগারে ৰসন্তিযা;

সদা পজ্জলতে দীপং, পঞ্চদীপানিদং ফলং.

৮০. ‘‘দিব্বচক্খু ৰিসুদ্ধং মে, সমাধিকুসলা অহং;

অভিঞ্ঞাপারমিপ্পত্তা, পঞ্চদীপানিদং ফলং.

৮১. ‘‘সব্বৰোসিতৰোসানা, কতকিচ্চা অনাসৰা;

পঞ্চদীপা মহাৰীর, পাদে ৰন্দামি চক্খুম.

৮২. ‘‘সতসহস্সিতো কপ্পে, যং দীপমদদিং তদা;

দুগ্গতিং নাভিজানামি, পঞ্চদীপানিদং ফলং.

৮৩. ‘‘কিলেসা ঝাপিতা ময্হং…পে… ৰিহরামি অনাসৰা.

৮৪. ‘‘স্ৰাগতং ৰত মে আসি…পে… কতং বুদ্ধস্স সাসনং.

৮৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং পঞ্চদীপদাযিকা ভিক্খুনী ইমা গাথাযো অভাসিত্থাতি.

পঞ্চদীপদাযিকাথেরিযাপদানং পঞ্চমং.