১০. পটাচারাথেরীঅপদানং

৪৬৮. ‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

৪৬৯. ‘‘তদাহং হংসৰতিযং, জাতা সেট্ঠিকুলে অহুং;

নানারতনপজ্জোতে, মহাসুখসমপ্পিতা.

৪৭০. ‘‘উপেত্ৰা তং মহাৰীরং, অস্সোসিং ধম্মদেসনং;

ততো জাতপসাদাহং, উপেসিং সরণং জিনং.

৪৭১. ‘‘ততো ৰিনযধারীনং, অগ্গং ৰণ্ণেসি নাযকো;

ভিক্খুনিং লজ্জিনিং তাদিং, কপ্পাকপ্পৰিসারদং.

৪৭২. ‘‘তদা মুদিতচিত্তাহং, তং ঠানমভিকঙ্খিনী;

নিমন্তেত্ৰা দসবলং, সসঙ্ঘং লোকনাযকং.

৪৭৩. ‘‘ভোজযিত্ৰান সত্তাহং, দদিত্ৰাৰ তিচীৰরং [দদিত্ৰা পত্তচীৰরং (স্যা.)];

নিপচ্চ সিরসা পাদে, ইদং ৰচনমব্রৰিং.

৪৭৪. ‘‘‘যা তযা ৰণ্ণিতা ৰীর, ইতো অট্ঠমকে মুনি;

তাদিসাহং ভৰিস্সামি, যদি সিজ্ঝতি নাযক’.

৪৭৫. ‘‘তদা অৰোচ মং সত্থা, ‘ভদ্দে মা ভাযি অস্সস;

অনাগতম্হি অদ্ধানে, লচ্ছসে তং মনোরথং.

৪৭৬. ‘‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৪৭৭. ‘‘‘তস্স ধম্মেসু দাযাদা, ওরসা ধম্মনিম্মিতা;

পটাচারাতি নামেন, হেস্সতি সত্থু সাৰিকা’.

৪৭৮. ‘‘তদাহং মুদিতা [পমুদী (ক.)] হুত্ৰা, যাৰজীৰং তদা জিনং;

মেত্তচিত্তা পরিচরিং, সসঙ্ঘং লোকনাযকং.

৪৭৯. ‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৪৮০. ‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

৪৮১. ‘‘উপট্ঠাকো মহেসিস্স, তদা আসি নরিস্সরো;

কাসিরাজা কিকী নাম, বারাণসিপুরুত্তমে.

৪৮২. ‘‘তস্সাসিং ততিযা ধীতা, ভিক্খুনী ইতি ৰিস্সুতা;

ধম্মং সুত্ৰা জিনগ্গস্স, পব্বজ্জং সমরোচযিং.

৪৮৩. ‘‘অনুজানি ন নো তাতো, অগারেৰ তদা মযং;

ৰীসৰস্সসহস্সানি, ৰিচরিম্হ অতন্দিতা.

৪৮৪. ‘‘কোমারিব্রহ্মচরিযং, রাজকঞ্ঞা সুখেধিতা;

বুদ্ধোপট্ঠাননিরতা, মুদিতা সত্তধীতরো.

৪৮৫. ‘‘সমণী সমণগুত্তা চ, ভিক্খুনী ভিক্খুদাযিকা;

ধম্মা চেৰ সুধম্মা চ, সত্তমী সঙ্ঘদাযিকা.

৪৮৬. ‘‘অহং উপ্পলৰণ্ণা চ, খেমা ভদ্দা চ ভিক্খুনী;

কিসাগোতমী ধম্মদিন্না, ৰিসাখা হোতি সত্তমী.

৪৮৭. ‘‘তেহি কম্মেহি সুকতেহি, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

৪৮৮. ‘‘পচ্ছিমে চ ভৰে দানি, জাতা সেট্ঠিকুলে অহং;

সাৰত্থিযং পুরৰরে, ইদ্ধে ফীতে মহদ্ধনে.

৪৮৯. ‘‘যদা চ যোব্বনূপেতা, ৰিতক্কৰসগা অহং;

নরং জারপতিং দিস্ৰা, তেন সদ্ধিং অগচ্ছহং.

৪৯০. ‘‘একপুত্তপসূতাহং, দুতিযো কুচ্ছিযা মমং;

তদাহং মাতাপিতরো, ওক্খামীতি [ইক্খামীতি (স্যা.), দক্খামীতি (সী.)] সুনিচ্ছিতা.

৪৯১. ‘‘নারোচেসিং পতিং ময্হং, তদা তম্হি পৰাসিতে;

একিকা নিগ্গতা গেহা, গন্তুং সাৰত্থিমুত্তমং.

৪৯২. ‘‘ততো মে সামি আগন্ত্ৰা, সম্ভাৰেসি পথে মমং;

তদা মে কম্মজা ৰাতা, উপ্পন্না অতিদারুণা.

৪৯৩. ‘‘উট্ঠিতো চ মহামেঘো, পসূতিসমযে মম;

দব্বত্থায তদা গন্ত্ৰা, সামি সপ্পেন মারিতো.

৪৯৪. ‘‘তদা ৰিজাতদুক্খেন, অনাথা কপণা অহং;

কুন্নদিং পূরিতং দিস্ৰা, গচ্ছন্তী সকুলালযং.

৪৯৫. ‘‘বালং আদায অতরিং, পারকূলে চ এককং;

সাযেত্ৰা [পাযেত্ৰা (স্যা.), পাতেত্ৰা (ক.)] বালকং পুত্তং, ইতরং তরণাযহং.

৪৯৬. ‘‘নিৰত্তা উক্কুসো হাসি, তরুণং ৰিলপন্তকং;

ইতরঞ্চ ৰহী সোতো, সাহং সোকসমপ্পিতা.

৪৯৭. ‘‘সাৰত্থিনগরং গন্ত্ৰা, অস্সোসিং সজনে মতে;

তদা অৰোচং সোকট্টা, মহাসোকসমপ্পিতা.

৪৯৮. ‘‘উভো পুত্তা কালঙ্কতা, পন্থে ময্হং পতী মতো;

মাতা পিতা চ ভাতা চ, একচিতম্হি ডয্হরে.

৪৯৯. ‘‘তদা কিসা চ পণ্ডু চ, অনাথা দীনমানসা;

ইতো ততো ভমন্তীহং [গচ্ছন্তীহং (স্যা.), গমেন্তীহং (ক.)], অদ্দসং নরসারথিং.

৫০০. ‘‘ততো অৰোচ মং সত্থা, ‘পুত্তে মা সোচি অস্সস;

অত্তানং তে গৰেসস্সু, কিং নিরত্থং ৰিহঞ্ঞসি.

৫০১. ‘‘‘ন সন্তি পুত্তা তাণায, ন ঞাতী নপি বন্ধৰা;

অন্তকেনাধিপন্নস্স, নত্থি ঞাতীসু তাণতা’.

৫০২. ‘‘তং সুত্ৰা মুনিনো ৰাক্যং, পঠমং ফলমজ্ঝগং;

পব্বজিত্ৰান নচিরং, অরহত্তমপাপুণিং.

৫০৩. ‘‘ইদ্ধীসু চ ৰসী হোমি, দিব্বায সোতধাতুযা;

পরচিত্তানি জানামি, সত্থুসাসনকারিকা.

৫০৪. ‘‘পুব্বেনিৰাসং জানামি, দিব্বচক্খু ৰিসোধিতং;

খেপেত্ৰা আসৰে সব্বে, ৰিসুদ্ধাসিং সুনিম্মলা.

৫০৫. ‘‘ততোহং ৰিনযং সব্বং, সন্তিকে সব্বদস্সিনো;

উগ্গহিং সব্বৰিত্থারং, ব্যাহরিঞ্চ যথাতথং.

৫০৬. ‘‘জিনো তস্মিং গুণে তুট্ঠো, এতদগ্গে ঠপেসি মং;

অগ্গা ৰিনযধারীনং, পটাচারাৰ একিকা.

৫০৭. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৫০৮. ‘‘যস্সত্থায পব্বজিতা, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

৫০৯. ‘‘কিলেসা ঝাপিতা ময্হং…পে… ৰিহরামি অনাসৰা.

৫১০. ‘‘স্ৰাগতং ৰত মে আসি…পে… কতং বুদ্ধস্স সাসনং.

৫১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং পটাচারা ভিক্খুনী ইমা গাথাযো অভাসিত্থাতি.

পটাচারাথেরিযাপদানং দসমং.

একূপোসথিকৰগ্গো দুতিযো.