৩. ভদ্দত্থেরগাথা

৪৭৩. ‘‘একপুত্তো অহং আসিং, পিযো মাতু পিযো পিতু;

বহূহি ৰতচরিযাহি, লদ্ধো আযাচনাহি চ.

৪৭৪. ‘‘তে চ মং অনুকম্পায, অত্থকামা হিতেসিনো;

উভো পিতা চ মাতা চ, বুদ্ধস্স উপনামযুং’’.

৪৭৫. ‘‘কিচ্ছা লদ্ধো অযং পুত্তো, সুখুমালো সুখেধিতো;

ইমং দদাম তে নাথ, জিনস্স পরিচারকং’’.

৪৭৬. ‘‘সত্থা চ মং পটিগ্গয্হ, আনন্দং এতদব্রৰি;

‘পব্বাজেহি ইমং খিপ্পং, হেস্সত্যাজানিযো অযং.

৪৭৭. ‘‘পব্বাজেত্ৰান মং সত্থা, ৰিহারং পাৰিসী জিনো;

অনোগ্গতস্মিং সূরিযস্মিং, ততো চিত্তং ৰিমুচ্চি মে.

৪৭৮. ‘‘ততো সত্থা নিরাকত্ৰা, পটিসল্লানৰুট্ঠিতো;

‘এহি ভদ্দা’তি মং আহ, সা মে আসূপসম্পদা.

৪৭৯. ‘‘জাতিযা সত্তৰস্সেন, লদ্ধা মে উপসম্পদা;

তিস্সো ৰিজ্জা অনুপ্পত্তা, অহো ধম্মসুধম্মতা’’তি.

… ভদ্দো থেরো….