৭.কাতিযানত্থেরগাথা

৪১১. ‘‘উট্ঠেহি নিসীদ কাতিযান, মা নিদ্দাবহুলো অহু জাগরস্সু;

মা তং অলসং পমত্তবন্ধু, কূটেনেৰ জিনাতু মচ্চুরাজা.

৪১২. ‘‘সেয্যথাপি [সযথাপি (সী. পী.)] মহাসমুদ্দৰেগো, এৰং জাতিজরাতিৰত্ততে তং;

সো করোহি সুদীপমত্তনো ত্ৰং, ন হি তাণং তৰ ৰিজ্জতেৰ অঞ্ঞং.

৪১৩. ‘‘সত্থা হি ৰিজেসি মগ্গমেতং, সঙ্গা জাতিজরাভযা অতীতং;

পুব্বাপররত্তমপ্পমত্তো, অনুযুঞ্জস্সু দল়্হং করোহি যোগং.

৪১৪. ‘‘পুরিমানি পমুঞ্চ বন্ধনানি, সঙ্ঘাটিখুরমুণ্ডভিক্খভোজী;

মা খিড্ডারতিঞ্চ মা নিদ্দং, অনুযুঞ্জিত্থ ঝায কাতিযান.

৪১৫. ‘‘ঝাযাহি জিনাহি কাতিযান, যোগক্খেমপথেসু কোৰিদোসি;

পপ্পুয্য অনুত্তরং ৰিসুদ্ধিং, পরিনিব্বাহিসি ৰারিনাৰ জোতি.

৪১৬. ‘‘পজ্জোতকরো পরিত্তরংসো, ৰাতেন ৰিনম্যতে লতাৰ;

এৰম্পি তুৰং অনাদিযানো, মারং ইন্দসগোত্ত নিদ্ধুনাহি;

সো ৰেদযিতাসু ৰীতরাগো, কালং কঙ্খ ইধেৰ সীতিভূতো’’তি.

… কাতিযানো থেরো….