১১. ন্হাতকমুনিত্থেরগাথা

৪৩৫. ‘‘ৰাতরোগাভিনীতো ত্ৰং, ৰিহরং কাননে ৰনে;

পৰিদ্ধগোচরে লূখে, কথং ভিক্খু করিস্সসি’’.

৪৩৬. ‘‘পীতিসুখেন ৰিপুলেন, ফরিত্ৰান সমুস্সযং;

লূখম্পি অভিসম্ভোন্তো, ৰিহরিস্সামি কাননে.

৪৩৭. ‘‘ভাৰেন্তো সত্ত বোজ্ঝঙ্গে, ইন্দ্রিযানি বলানি চ;

ঝানসোখুম্মসম্পন্নো [ঝানসুখুমসম্পন্নো (স্যা. ক.)], ৰিহরিস্সং অনাসৰো.

৪৩৮. ‘‘ৰিপ্পমুত্তং কিলেসেহি, সুদ্ধচিত্তং অনাৰিলং;

অভিণ্হং পচ্চৰেক্খন্তো, ৰিহরিস্সং অনাসৰো.

৪৩৯. ‘‘অজ্ঝত্তঞ্চ বহিদ্ধা চ, যে মে ৰিজ্জিংসু আসৰা;

সব্বে অসেসা উচ্ছিন্না, ন চ উপ্পজ্জরে পুন.

৪৪০. ‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

দুক্খক্খযো অনুপ্পত্তো, নত্থি দানি পুনব্ভৰো’’তি.

… ন্হাতকমুনিত্থেরো….