১. উরুৰেল়কস্সপত্থেরগাথা

৩৭৫. ‘‘দিস্ৰান পাটিহীরানি, গোতমস্স যসস্সিনো;

ন তাৰাহং পণিপতিং, ইস্সামানেন ৰঞ্চিতো.

৩৭৬. ‘‘মম সঙ্কপ্পমঞ্ঞায, চোদেসি নরসারথি;

ততো মে আসি সংৰেগো, অব্ভুতো লোমহংসনো.

৩৭৭. ‘‘পুব্বে জটিলভূতস্স, যা মে সিদ্ধি পরিত্তিকা;

তাহং তদা নিরাকত্ৰা [নিরংকত্ৰা (স্যা. ক.)], পব্বজিং জিনসাসনে.

৩৭৮. ‘‘পুব্বে যঞ্ঞেন সন্তুট্ঠো, কামধাতুপুরক্খতো;

পচ্ছা রাগঞ্চ দোসঞ্চ, মোহঞ্চাপি সমূহনিং.

৩৭৯. ‘‘পুব্বেনিৰাসং জানামি, দিব্বচক্খু ৰিসোধিতং;

ইদ্ধিমা পরচিত্তঞ্ঞূ, দিব্বসোতঞ্চ পাপুণিং.

৩৮০. ‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো’’তি.

… উরুৰেল়কস্সপো থেরো….