৪. চতুকনিপাতো

১. নাগসমালত্থেরগাথা

২৬৭. ‘‘অলঙ্কতা সুৰসনা, মালিনী চন্দনুস্সদা;

মজ্ঝে মহাপথে নারী, তুরিযে নচ্চতি নট্টকী.

২৬৮. ‘‘পিণ্ডিকায পৰিট্ঠোহং, গচ্ছন্তো নং উদিক্খিসং;

অলঙ্কতং সুৰসনং, মচ্চুপাসংৰ ওড্ডিতং.

২৬৯. ‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ [সম্পতিট্ঠথ (ক.)].

২৭০. ‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… নাগসমালো থেরো….

২. ভগুত্থেরগাথা

২৭১. ‘‘অহং মিদ্ধেন পকতো, ৰিহারা উপনিক্খমিং;

চঙ্কমং অভিরুহন্তো, তত্থেৰ পপতিং ছমা.

২৭২. ‘‘গত্তানি পরিমজ্জিত্ৰা, পুনপারুয্হ চঙ্কমং;

চঙ্কমে চঙ্কমিং সোহং, অজ্ঝত্তং সুসমাহিতো.

২৭৩. ‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

২৭৪. ‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… ভগুত্থেরো….

৩. সভিযত্থেরগাথা

২৭৫. [ধ. প. ৬ ধম্মপদেপি] ‘‘পরে চ ন ৰিজানন্তি, মযমেত্থ যমামসে;

যে চ তত্থ ৰিজানন্তি, ততো সম্মন্তি মেধগা.

২৭৬. ‘‘যদা চ অৰিজানন্তা, ইরিযন্ত্যমরা ৰিয;

ৰিজানন্তি চ যে ধম্মং, আতুরেসু অনাতুরা.

২৭৭. ‘‘যং কিঞ্চি সিথিলং কম্মং, সংকিলিট্ঠঞ্চ যং ৰতং;

সঙ্কস্সরং ব্রহ্মচরিযং, ন তং হোতি মহপ্ফলং.

২৭৮. ‘‘যস্স সব্রহ্মচারীসু, গারৰো নূপলব্ভতি;

আরকা হোতি সদ্ধম্মা, নভং পুথৰিযা যথা’’তি.

… সভিযো থেরো….

৪. নন্দকত্থেরগাথা

২৭৯. ‘‘ধিরত্থু পূরে দুগ্গন্ধে, মারপক্খে অৰস্সুতে;

নৰসোতানি তে কাযে, যানি সন্দন্তি সব্বদা.

২৮০. ‘‘মা পুরাণং অমঞ্ঞিত্থো, মাসাদেসি তথাগতে;

সগ্গেপি তে ন রজ্জন্তি, কিমঙ্গং পন [কিমঙ্গ পন (সী.)] মানুসে.

২৮১. ‘‘যে চ খো বালা দুম্মেধা, দুম্মন্তী মোহপারুতা;

তাদিসা তত্থ রজ্জন্তি, মারখিত্তম্হি বন্ধনে.

২৮২. ‘‘যেসং রাগো চ দোসো চ, অৰিজ্জা চ ৰিরাজিতা;

তাদী তত্থ ন রজ্জন্তি, ছিন্নসুত্তা অবন্ধনা’’তি.

… নন্দকো থেরো….

৫. জম্বুকত্থেরগাথা

২৮৩. ‘‘পঞ্চপঞ্ঞাসৰস্সানি, রজোজল্লমধারযিং;

ভুঞ্জন্তো মাসিকং ভত্তং, কেসমস্সুং অলোচযিং.

২৮৪. ‘‘একপাদেন অট্ঠাসিং, আসনং পরিৰজ্জযিং;

সুক্খগূথানি চ খাদিং, উদ্দেসঞ্চ ন সাদিযিং.

২৮৫. ‘‘এতাদিসং করিত্ৰান, বহুং দুগ্গতিগামিনং;

ৰুয্হমানো মহোঘেন, বুদ্ধং সরণমাগমং.

২৮৬. ‘‘সরণগমনং পস্স, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… জম্বুকো থেরো….

৬. সেনকত্থেরগাথা

২৮৭. ‘‘স্ৰাগতং ৰত মে আসি, গযাযং গযফগ্গুযা;

যং অদ্দসাসিং সম্বুদ্ধং, দেসেন্তং ধম্মমুত্তমং.

২৮৮. ‘‘মহপ্পভং গণাচরিযং, অগ্গপত্তং ৰিনাযকং;

সদেৰকস্স লোকস্স, জিনং অতুলদস্সনং.

২৮৯. ‘‘মহানাগং মহাৰীরং, মহাজুতিমনাসৰং;

সব্বাসৰপরিক্খীণং, সত্থারমকুতোভযং.

২৯০. ‘‘চিরসংকিলিট্ঠং ৰত মং, দিট্ঠিসন্দানবন্ধিতং [সন্ধিতং (সী. স্যা.), সন্দিতং (পী. সী. অট্ঠ.)];

ৰিমোচযি সো ভগৰা, সব্বগন্থেহি সেনক’’ন্তি.

… সেনকো থেরো….

৭. সম্ভূতত্থেরগাথা

২৯১. ‘‘যো দন্ধকালে তরতি, তরণীযে চ দন্ধযে;

অযোনি [অযোনিসো (স্যা.)] সংৰিধানেন, বালো দুক্খং নিগচ্ছতি.

২৯২. ‘‘তস্সত্থা পরিহাযন্তি, কাল়পক্খেৰ চন্দিমা;

আযসক্যঞ্চ [আযসস্যঞ্চ (সী.)] পপ্পোতি, মিত্তেহি চ ৰিরুজ্ঝতি.

২৯৩. ‘‘যো দন্ধকালে দন্ধেতি, তরণীযে চ তারযে;

যোনিসো সংৰিধানেন, সুখং পপ্পোতি পণ্ডিতো.

২৯৪. ‘‘তস্সত্থা পরিপূরেন্তি, সুক্কপক্খেৰ চন্দিমা;

যসো কিত্তিঞ্চ পপ্পোতি, মিত্তেহি ন ৰিরুজ্ঝতী’’তি.

… সম্ভূতো থেরো….

৮. রাহুলত্থেরগাথা

২৯৫. ‘‘উভযেনেৰ সম্পন্নো, রাহুলভদ্দোতি মং ৰিদূ;

যঞ্চম্হি পুত্তো বুদ্ধস্স, যঞ্চ ধম্মেসু চক্খুমা.

২৯৬. ‘‘যঞ্চ মে আসৰা খীণা, যঞ্চ নত্থি পুনব্ভৰো;

অরহা দক্খিণেয্যোম্হি, তেৰিজ্জো অমতদ্দসো.

২৯৭. ‘‘কামন্ধা জালপচ্ছন্না, তণ্হাছাদনছাদিতা;

পমত্তবন্ধুনা বদ্ধা, মচ্ছাৰ কুমিনামুখে.

২৯৮. ‘‘তং কামং অহমুজ্ঝিত্ৰা, ছেত্ৰা মারস্স বন্ধনং;

সমূলং তণ্হমব্বুয্হ, সীতিভূতোস্মি নিব্বুতো’’তি.

… রাহুলো থেরো….

৯. চন্দনত্থেরগাথা

২৯৯. ‘‘জাতরূপেন সঞ্ছন্না [পচ্ছন্না (সী.)], দাসীগণপুরক্খতা;

অঙ্কেন পুত্তমাদায, ভরিযা মং উপাগমি.

৩০০. ‘‘তঞ্চ দিস্ৰান আযন্তিং, সকপুত্তস্স মাতরং;

অলঙ্কতং সুৰসনং, মচ্চুপাসংৰ ওড্ডিতং.

৩০১. ‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

৩০২. ‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… চন্দনো থেরো….

১০. ধম্মিকত্থেরগাথা

৩০৩. [জা. ১.১০.১০২ জাতকেপি] ‘‘ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

৩০৪. [জা. ১.১৫.৩৮৫] ‘‘নহি ধম্মো অধম্মো চ, উভো সমৰিপাকিনো;

অধম্মো নিরযং নেতি, ধম্মো পাপেতি সুগ্গতিং.

৩০৫. ‘‘তস্মা হি ধম্মেসু করেয্য ছন্দং, ইতি মোদমানো সুগতেন তাদিনা;

ধম্মে ঠিতা সুগতৰরস্স সাৰকা, নীযন্তি ধীরা সরণৰরগ্গগামিনো.

৩০৬. ‘‘ৰিপ্ফোটিতো গণ্ডমূলো, তণ্হাজালো সমূহতো;

সো খীণসংসারো ন চত্থি কিঞ্চনং,

চন্দো যথা দোসিনা পুণ্ণমাসিয’’ন্তি.

… ধম্মিকো থেরো….

১১. সপ্পকত্থেরগাথা

৩০৭. ‘‘যদা বলাকা সুচিপণ্ডরচ্ছদা, কাল়স্স মেঘস্স ভযেন তজ্জিতা;

পলেহিতি আলযমালযেসিনী, তদা নদী অজকরণী রমেতি মং.

৩০৮. ‘‘যদা বলাকা সুৰিসুদ্ধপণ্ডরা, কাল়স্স মেঘস্স ভযেন তজ্জিতা;

পরিযেসতি লেণমলেণদস্সিনী, তদা নদী অজকরণী রমেতি মং.

৩০৯. ‘‘কং নু তত্থ ন রমেন্তি, জম্বুযো উভতো তহিং;

সোভেন্তি আপগাকূলং, মম লেণস্স [মহালেণস্স (স্যা. ক.)] পচ্ছতো.

৩১০. ‘‘তা মতমদসঙ্ঘসুপ্পহীনা,

ভেকা মন্দৰতী পনাদযন্তি;

‘নাজ্জ গিরিনদীহি ৰিপ্পৰাসসমযো,

খেমা অজকরণী সিৰা সুরম্মা’’’তি.

… সপ্পকো থেরো….

১২. মুদিতত্থেরগাথা

৩১১. ‘‘পব্বজিং জীৰিকত্থোহং, লদ্ধান উপসম্পদং;

ততো সদ্ধং পটিলভিং, দল়্হৰীরিযো পরক্কমিং.

৩১২. ‘‘কামং ভিজ্জতুযং কাযো, মংসপেসী ৰিসীযরুং [ৰিসিযন্তু (ক.)];

উভো জণ্ণুকসন্ধীহি, জঙ্ঘাযো পপতন্তু মে.

৩১৩. ‘‘নাসিস্সং ন পিৰিস্সামি, ৰিহারা চ ন নিক্খমে;

নপি পস্সং নিপাতেস্সং, তণ্হাসল্লে অনূহতে.

৩১৪. ‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… মুদিতো থেরো….

চতুক্কনিপাতো নিট্ঠিতো.