৩. তিকনিপাতো

১. অঙ্গণিকভারদ্ৰাজত্থেরগাথা

২১৯. ‘‘অযোনি সুদ্ধিমন্ৰেসং, অগ্গিং পরিচরিং ৰনে;

সুদ্ধিমগ্গং অজানন্তো, অকাসিং অমরং তপং [অকাসিং অপরং তপং (স্যা.), অকাসিং অমতং তপং (ক.)].

২২০. ‘‘তং সুখেন সুখং লদ্ধং, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

২২১. ‘‘ব্রহ্মবন্ধু পুরে আসিং, ইদানি খোম্হি ব্রাহ্মণো;

তেৰিজ্জো ন্হাতকো [নহাতকো (সী. অট্ঠ.)] চম্হি, সোত্তিযো চম্হি ৰেদগূ’’তি.

… অঙ্গণিকভারদ্ৰাজো থেরো….

২. পচ্চযত্থেরগাথা

২২২. ‘‘পঞ্চাহাহং পব্বজিতো, সেখো অপ্পত্তমানসো,

ৰিহারং মে পৰিট্ঠস্স, চেতসো পণিধী অহু.

২২৩. ‘‘নাসিস্সং ন পিৰিস্সামি, ৰিহারতো ন নিক্খমে;

নপি পস্সং নিপাতেস্সং, তণ্হাসল্লে অনূহতে.

২২৪. ‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

… পচ্চযো থেরো….

৩. বাকুলত্থেরগাথা

২২৫. ‘‘যো পুব্বে করণীযানি, পচ্ছা সো কাতুমিচ্ছতি;

সুখা সো ধংসতে ঠানা, পচ্ছা চ মনুতপ্পতি.

২২৬. ‘‘যঞ্হি কযিরা তঞ্হি ৰদে, যং ন কযিরা ন তং ৰদে;

অকরোন্তং ভাসমানং, পরিজানন্তি পণ্ডিতা.

২২৭. ‘‘সুসুখং ৰত নিব্বানং, সম্মাসম্বুদ্ধদেসিতং;

অসোকং ৰিরজং খেমং, যত্থ দুক্খং নিরুজ্ঝতী’’তি.

… বাকুলো [বাক্কুলো (সী.)] থেরো….

৪. ধনিযত্থেরগাথা

২২৮. ‘‘সুখং চে জীৰিতুং ইচ্ছে, সামঞ্ঞস্মিং অপেক্খৰা;

সঙ্ঘিকং নাতিমঞ্ঞেয্য, চীৰরং পানভোজনং.

২২৯. ‘‘সুখং চে জীৰিতুং ইচ্ছে, সামঞ্ঞস্মিং অপেক্খৰা;

অহি মূসিকসোব্ভংৰ, সেৰেথ সযনাসনং.

২৩০. ‘‘সুখং চে জীৰিতুং ইচ্ছে, সামঞ্ঞস্মিং অপেক্খৰা;

ইতরীতরেন তুস্সেয্য, একধম্মঞ্চ ভাৰযে’’তি.

… ধনিযো থেরো….

৫. মাতঙ্গপুত্তত্থেরগাথা

২৩১. ‘‘অতিসীতং অতিউণ্হং, অতিসাযমিদং অহু;

ইতি ৰিস্সট্ঠকম্মন্তে, খণা অচ্চেন্তি মাণৰে.

২৩২. ‘‘যো চ সীতঞ্চ উণ্হঞ্চ, তিণা ভিয্যো ন মঞ্ঞতি;

করং পুরিসকিচ্চানি, সো সুখা ন ৰিহাযতি.

২৩৩. ‘‘দব্বং কুসং পোটকিলং, উসীরং মুঞ্জপব্বজং;

উরসা পনুদিস্সামি, ৰিৰেকমনুব্রূহয’’ন্তি.

… মাতঙ্গপুত্তো থেরো….

৬. খুজ্জসোভিতত্থেরগাথা

২৩৪. ‘‘যে চিত্তকথী বহুস্সুতা, সমণা পাটলিপুত্তৰাসিনো;

তেসঞ্ঞতরোযমাযুৰা, দ্ৰারে তিট্ঠতি খুজ্জসোভিতো.

২৩৫. ‘‘যে চিত্তকথী বহুস্সুতা, সমণা পাটলিপুত্তৰাসিনো;

তেসঞ্ঞতরোযমাযুৰা, দ্ৰারে তিট্ঠতি মালুতেরিতো.

২৩৬. ‘‘সুযুদ্ধেন সুযিট্ঠেন, সঙ্গামৰিজযেন চ;

ব্রহ্মচরিযানুচিণ্ণেন, এৰাযং সুখমেধতী’’তি.

… খুজ্জসোভিতো থেরো….

৭. ৰারণত্থেরগাথা

২৩৭. ‘‘যোধ কোচি মনুস্সেসু, পরপাণানি হিংসতি;

অস্মা লোকা পরম্হা চ, উভযা ধংসতে নরো.

২৩৮. ‘‘যো চ মেত্তেন চিত্তেন, সব্বপাণানুকম্পতি;

বহুঞ্হি সো পসৰতি, পুঞ্ঞং তাদিসকো নরো.

২৩৯. ‘‘সুভাসিতস্স সিক্খেথ, সমণূপাসনস্স চ;

একাসনস্স চ রহো, চিত্তৰূপসমস্স চা’’তি.

… ৰারণো থেরো….

৮. ৰস্সিকত্থেরগাথা

২৪০. ‘‘একোপি সদ্ধো মেধাৰী, অস্সদ্ধানীধ ঞাতিনং;

ধম্মট্ঠো সীলসম্পন্নো, হোতি অত্থায বন্ধুনং.

২৪১. ‘‘নিগ্গয্হ অনুকম্পায, চোদিতা ঞাতযো মযা;

ঞাতিবন্ধৰপেমেন, কারং কত্ৰান ভিক্খুসু.

২৪২. ‘‘তে অব্ভতীতা কালঙ্কতা, পত্তা তে তিদিৰং সুখং;

ভাতরো ময্হং মাতা চ, মোদন্তি কামকামিনো’’তি.

… ৰস্সিকো [পস্সিকো (সী. স্যা. পী.)] থেরো….

৯. যসোজত্থেরগাথা

২৪৩. ‘‘কালপব্বঙ্গসঙ্কাসো, কিসো ধমনিসন্থতো;

মত্তঞ্ঞূ অন্নপানম্হি, অদীনমনসো নরো’’.

২৪৪. ‘‘ফুট্ঠো ডংসেহি মকসেহি, অরঞ্ঞস্মিং ব্রহাৰনে;

নাগো সঙ্গামসীসেৰ, সতো তত্রাধিৰাসযে.

২৪৫. ‘‘যথা ব্রহ্মা তথা একো, যথা দেৰো তথা দুৰে;

যথা গামো তথা তযো, কোলাহলং ততুত্তরি’’ন্তি.

… যসোজো থেরো….

১০. সাটিমত্তিযত্থেরগাথা

২৪৬. ‘‘অহু তুয্হং পুরে সদ্ধা, সা তে অজ্জ ন ৰিজ্জতি;

যং তুয্হং তুয্হমেৰেতং, নত্থি দুচ্চরিতং মম.

২৪৭. ‘‘অনিচ্চা হি চলা সদ্দা, এৰং দিট্ঠা হি সা মযা;

রজ্জন্তিপি ৰিরজ্জন্তি, তত্থ কিং জিয্যতে মুনি.

২৪৮. ‘‘পচ্চতি মুনিনো ভত্তং, থোকং থোকং কুলে কুলে;

পিণ্ডিকায চরিস্সামি, অত্থি জঙ্ঘবলং [জঙ্ঘাবলং (সী.)] মমা’’তি.

… সাটিমত্তিযো থেরো….

১১. উপালিত্থেরগাথা

২৪৯. ‘‘সদ্ধায অভিনিক্খম্ম, নৰপব্বজিতো নৰো;

মিত্তে ভজেয্য কল্যাণে, সুদ্ধাজীৰে অতন্দিতে.

২৫০. ‘‘সদ্ধায অভিনিক্খম্ম, নৰপব্বজিতো নৰো;

সঙ্ঘস্মিং ৰিহরং ভিক্খু, সিক্খেথ ৰিনযং বুধো.

২৫১. ‘‘সদ্ধায অভিনিক্খম্ম, নৰপব্বজিতো নৰো;

কপ্পাকপ্পেসু কুসলো, চরেয্য অপুরক্খতো’’তি.

… উপালিত্থেরো….

১২. উত্তরপালত্থেরগাথা

২৫২. ‘‘পণ্ডিতং ৰত মং সন্তং, অলমত্থৰিচিন্তকং;

পঞ্চ কামগুণা লোকে, সম্মোহা পাতযিংসু মং.

২৫৩. ‘‘পক্খন্দো মারৰিসযে, দল়্হসল্লসমপ্পিতো;

অসক্খিং মচ্চুরাজস্স, অহং পাসা পমুচ্চিতুং.

২৫৪. ‘‘সব্বে কামা পহীনা মে, ভৰা সব্বে পদালিতা [ৰিদালিতা (সী. পী. অট্ঠ.)];

ৰিক্খীণো জাতিসংসারো, নত্থি দানি পুনব্ভৰো’’তি.

… উত্তরপালো থেরো….

১৩. অভিভূতত্থেরগাথা

২৫৫. ‘‘সুণাথ ঞাতযো সব্বে, যাৰন্তেত্থ সমাগতা;

ধম্মং ৰো দেসযিস্সামি, দুক্খা জাতি পুনপ্পুনং.

২৫৬. [সং. নি. ১.১৮৫] ‘‘আরম্ভথ [আরভথ (সী. স্যা.), আরব্ভথ (ক.)] নিক্কমথ, যুঞ্জথ বুদ্ধসাসনে;

ধুনাথ মচ্চুনো সেনং, নল়াগারংৰ কুঞ্জরো.

২৫৭. ‘‘যো ইমস্মিং ধম্মৰিনযে, অপ্পমত্তো ৰিহস্সতি [ৰিহেস্সতি (স্যা. পী.)];

পহায জাতিসংসারং, দুক্খস্সন্তং করিস্সতী’’তি.

… অভিভূতো থেরো….

১৪. গোতমত্থেরগাথা

২৫৮. ‘‘সংসরং হি নিরযং অগচ্ছিস্সং, পেতলোকমগমং পুনপ্পুনং;

দুক্খমম্হিপি তিরচ্ছানযোনিযং, নেকধা হি ৰুসিতং চিরং মযা.

২৫৯. ‘‘মানুসোপি চ ভৰোভিরাধিতো, সগ্গকাযমগমং সকিং সকিং;

রূপধাতুসু অরূপধাতুসু, নেৰসঞ্ঞিসু অসঞ্ঞিসুট্ঠিতং.

২৬০. ‘‘সম্ভৰা সুৰিদিতা অসারকা, সঙ্খতা পচলিতা সদেরিতা;

তং ৰিদিত্ৰা মহমত্তসম্ভৰং, সন্তিমেৰ সতিমা সমজ্ঝগ’’ন্তি.

… গোতমো থেরো….

১৫. হারিতত্থেরগাথা

২৬১. ‘‘যো পুব্বে করণীযানি, পচ্ছা সো কাতুমিচ্ছতি;

সুখা সো ধংসতে ঠানা, পচ্ছা চ মনুতপ্পতি.

২৬২. ‘‘যঞ্হি কযিরা তঞ্হি ৰদে, যং ন কযিরা ন তং ৰদে;

অকরোন্তং ভাসমানং, পরিজানন্তি পণ্ডিতা.

২৬৩. ‘‘সুসুখং ৰত নিব্বানং, সম্মাসম্বুদ্ধদেসিতং;

অসোকং ৰিরজং খেমং, যত্থ দুক্খং নিরুজ্ঝতী’’তি.

… হারিতো থেরো….

১৬. ৰিমলত্থেরগাথা

২৬৪. ‘‘পাপমিত্তে ৰিৰজ্জেত্ৰা, ভজেয্যুত্তমপুগ্গলং;

ওৰাদে চস্স তিট্ঠেয্য, পত্থেন্তো অচলং সুখং.

২৬৫. ‘‘পরিত্তং দারুমারুয্হ, যথা সীদে মহণ্ণৰে;

এৰং কুসীতমাগম্ম, সাধুজীৰীপি সীদতি;

তস্মা তং পরিৰজ্জেয্য, কুসীতং হীনৰীরিযং.

২৬৬. ‘‘পৰিৰিত্তেহি অরিযেহি, পহিতত্তেহি ঝাযিভি;

নিচ্চং আরদ্ধৰীরিযেহি, পণ্ডিতেহি সহাৰসে’’তি.

… ৰিমলো থেরো….

তিকনিপাতো নিট্ঠিতো.