১. পঠমৰগ্গো

১. উত্তরত্থেরগাথা

১২১. ‘‘নত্থি কোচি ভৰো নিচ্চো, সঙ্খারা ৰাপি সস্সতা;

উপ্পজ্জন্তি চ তে খন্ধা, চৰন্তি অপরাপরং.

১২২. ‘‘এতমাদীনং ঞত্ৰা, ভৰেনম্হি অনত্থিকো;

নিস্সটো সব্বকামেহি, পত্তো মে আসৰক্খযো’’তি.

ইত্থং সুদং আযস্মা উত্তরো থেরো গাথাযো অভাসিত্থাতি.

২. পিণ্ডোলভারদ্ৰাজত্থেরগাথা

১২৩. ‘‘নযিদং অনযেন জীৰিতং, নাহারো হদযস্স সন্তিকো;

আহারট্ঠিতিকো সমুস্সযো, ইতি দিস্ৰান চরামি এসনং.

১২৪. ‘‘পঙ্কোতি হি নং পৰেদযুং, যাযং ৰন্দনপূজনা কুলেসু;

সুখুমং সল্লং দুরুব্বহং, সক্কারো কাপুরিসেন দুজ্জহো’’তি.

ইত্থং সুদং আযস্মা পিণ্ডোলভারদ্ৰাজো থেরো গাথাযো অভাসিত্থাতি.

৩. ৰল্লিযত্থেরগাথা

১২৫. ‘‘মক্কটো পঞ্চদ্ৰারাযং, কুটিকাযং পসক্কিয;

দ্ৰারেন অনুপরিযেতি, ঘট্টযন্তো মুহুং মুহুং.

১২৬. ‘‘তিট্ঠ মক্কট মা ধাৰি, ন হি তে তং যথা পুরে;

নিগ্গহীতোসি পঞ্ঞায, নেৰ দূরং গমিস্সতী’’তি.

… ৰল্লিযো থেরো….

৪. গঙ্গাতীরিযত্থেরগাথা

১২৭. ‘‘তিণ্ণং মে তালপত্তানং, গঙ্গাতীরে কুটী কতা;

ছৰসিত্তোৰ মে পত্তো, পংসুকূলঞ্চ চীৰরং.

১২৮. ‘‘দ্ৰিন্নং অন্তরৰস্সানং, একা ৰাচা মে ভাসিতা;

ততিযে অন্তরৰস্সম্হি, তমোখন্ধো [তমোক্খন্ধো (সী. স্যা.)] পদালিতো’’তি.

… গঙ্গাতীরিযো থেরো….

৫. অজিনত্থেরগাথা

১২৯. ‘‘অপি চে হোতি তেৰিজ্জো, মচ্চুহাযী অনাসৰো;

অপ্পঞ্ঞাতোতি নং বালা, অৰজানন্তি অজানতা.

১৩০. ‘‘যো চ খো অন্নপানস্স, লাভী হোতীধ পুগ্গলো;

পাপধম্মোপি চে হোতি, সো নেসং হোতি সক্কতো’’তি.

… অজিনো থেরো….

৬. মেল়জিনত্থেরগাথা

১৩১. ‘‘যদাহং ধম্মমস্সোসিং, ভাসমানস্স সত্থুনো;

ন কঙ্খমভিজানামি, সব্বঞ্ঞূঅপরাজিতে.

১৩২. ‘‘সত্থৰাহে মহাৰীরে, সারথীনং ৰরুত্তমে;

মগ্গে পটিপদাযং ৰা, কঙ্খা ময্হং ন ৰিজ্জতী’’তি.

… মেল়জিনো থেরো….

৭. রাধত্থেরগাথা

১৩৩. [ধ. প. ১৩ ধম্মপদে] ‘‘যথা অগারং দুচ্ছন্নং, ৰুট্ঠী সমতিৰিজ্ঝতি;

এৰং অভাৰিতং চিত্তং, রাগো সমতিৰিজ্ঝতি.

১৩৪. [ধ. প. ১৪ ধম্মপদে] ‘‘যথা অগারং সুচ্ছন্নং, ৰুড্ঢী ন সমতিৰিজ্ঝতি;

এৰং সুভাৰিতং চিত্তং, রাগো ন সমতিৰিজ্ঝতী’’তি.

… রাধো থেরো….

৮. সুরাধত্থেরগাথা

১৩৫. ‘‘খীণা হি ময্হং জাতি, ৰুসিতং জিনসাসনং;

পহীনো জালসঙ্খাতো, ভৰনেত্তি সমূহতা.

১৩৬. ‘‘যস্সত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো’’তি.

… সুরাধো থেরো….

৯. গোতমত্থেরগাথা

১৩৭. ‘‘সুখং সুপন্তি মুনযো, যে ইত্থীসু ন বজ্ঝরে;

সদা ৰে রক্খিতব্বাসু, যাসু সচ্চং সুদুল্লভং.

১৩৮. ‘‘ৰধং চরিম্হ তে কাম, অনণা দানি তে মযং;

গচ্ছাম দানি নিব্বানং, যত্থ গন্ত্ৰা ন সোচতী’’তি.

… গোতমো থেরো….

১০. ৰসভত্থেরগাথা

১৩৯. ‘‘পুব্বে হনতি অত্তানং, পচ্ছা হনতি সো পরে;

সুহতং হন্তি অত্তানং, ৰীতংসেনেৰ পক্খিমা.

১৪০. ‘‘ন ব্রাহ্মণো বহিৰণ্ণো, অন্তো ৰণ্ণো হি ব্রাহ্মণো;

যস্মিং পাপানি কম্মানি, স ৰে কণ্হো সুজম্পতী’’তি.

… ৰসভো থেরো….

ৰগ্গো পঠমো নিট্ঠিতো.

তস্সুদ্দানং –

উত্তরো চেৰ পিণ্ডোলো, ৰল্লিযো তীরিযো ইসি;

অজিনো চ মেল়জিনো, রাধো সুরাধো গোতমো;

ৰসভেন ইমে হোন্তি, দস থেরা মহিদ্ধিকাতি.