২. দুতিযৰগ্গো

১. মহাচুন্দত্থেরগাথা

১৪১. ‘‘সুস্সূসা সুতৰদ্ধনী, সুতং পঞ্ঞায ৰদ্ধনং;

পঞ্ঞায অত্থং জানাতি, ঞাতো অত্থো সুখাৰহো.

১৪২. ‘‘সেৰেথ পন্তানি সেনাসনানি, চরেয্য সংযোজনৰিপ্পমোক্খং;

সচে রতিং নাধিগচ্ছেয্য তত্থ, সঙ্ঘে ৰসে রক্খিতত্তো সতিমা’’তি.

… মহাচুন্দো থেরো….

২. জোতিদাসত্থেরগাথা

১৪৩. ‘‘যে খো তে ৰেঠমিস্সেন [ৰেঘমিস্সেন (সী. স্যা.), ৰে গমিস্সেন, ৰেখমিস্সেন (ক.)], নানত্তেন চ কম্মুনা;

মনুস্সে উপরুন্ধন্তি, ফরুসূপক্কমা জনা;

তেপি তত্থেৰ কীরন্তি, ন হি কম্মং পনস্সতি.

১৪৪. ‘‘যং করোতি নরো কম্মং, কল্যাণং যদি পাপকং;

তস্স তস্সেৰ দাযাদো, যং যং কম্মং পকুব্বতী’’তি.

… জোতিদাসো থেরো….

৩. হেরঞ্ঞকানিত্থেরগাথা

১৪৫. ‘‘অচ্চযন্তি অহোরত্তা, জীৰিতং উপরুজ্ঝতি;

আযু খীযতি মচ্চানং, কুন্নদীনংৰ ওদকং.

১৪৬. ‘‘অথ পাপানি কম্মানি, করং বালো ন বুজ্ঝতি;

পচ্ছাস্স কটুকং হোতি, ৰিপাকো হিস্স পাপকো’’তি.

… হেরঞ্ঞকানিত্থেরো….

৪. সোমমিত্তত্থেরগাথা

১৪৭. ‘‘পরিত্তং দারুমারুয্হ, যথা সীদে মহণ্ণৰে;

এৰং কুসীতমাগম্ম, সাধুজীৰীপি সীদতি;

তস্মা তং পরিৰজ্জেয্য, কুসীতং হীনৰীরিযং.

১৪৮. ‘‘পৰিৰিত্তেহি অরিযেহি, পহিতত্তেহি ঝাযিভি;

নিচ্চং আরদ্ধৰীরিযেহি, পণ্ডিতেহি সহাৰসে’’তি.

… সোমমিত্তো থেরো….

৫. সব্বমিত্তত্থেরগাথা

১৪৯. ‘‘জনো জনম্হি সম্বদ্ধো [সম্বদ্ধো (স্যা. ক.)], জনমেৰস্সিতো জনো;

জনো জনেন হেঠীযতি, হেঠেতি চ [বোধিযতি, বাধেতি চ (ক.)] জনো জনং.

১৫০. ‘‘কো হি তস্স জনেনত্থো, জনেন জনিতেন ৰা;

জনং ওহায গচ্ছং তং, হেঠযিত্ৰা [বাধযিত্ৰা (ক.)] বহুং জন’’ন্তি.

… সব্বমিত্তো থেরো….

৬. মহাকাল়ত্থেরগাথা

১৫১. ‘‘কাল়ী ইত্থী ব্রহতী ধঙ্করূপা, সত্থিঞ্চ ভেত্ৰা অপরঞ্চ সত্থিং;

বাহঞ্চ ভেত্ৰা অপরঞ্চ বাহং, সীসঞ্চ ভেত্ৰা দধিথালকংৰ;

এসা নিসিন্না অভিসন্দহিত্ৰা.

১৫২. ‘‘যো ৰে অৰিদ্ৰা উপধিং করোতি, পুনপ্পুনং দুক্খমুপেতি মন্দো;

তস্মা পজানং উপধিং ন কযিরা, মাহং পুন ভিন্নসিরো সযিস্স’’ন্তি [পস্সিস্সন্তি (ক.)].

… মহাকাল়ো থেরো….

৭. তিস্সত্থেরগাথা

১৫৩. ‘‘বহূ সপত্তে লভতি, মুণ্ডো সঙ্ঘাটিপারুতো;

লাভী অন্নস্স পানস্স, ৰত্থস্স সযনস্স চ.

১৫৪. ‘‘এতমাদীনৰং ঞত্ৰা, সক্কারেসু মহব্ভযং;

অপ্পলাভো অনৰস্সুতো, সতো ভিক্খু পরিব্বজে’’তি.

… তিস্সো থেরো….

৮. কিমিলত্থেরগাথা

১৫৫. ‘‘পাচীনৰংসদাযম্হি, সক্যপুত্তা সহাযকা;

পহাযানপ্পকে ভোগে, উঞ্ছাপত্তাগতে রতা.

১৫৬. ‘‘আরদ্ধৰীরিযা পহিতত্তা, নিচ্চং দল়্হপরক্কমা;

রমন্তি ধম্মরতিযা, হিত্ৰান লোকিযং রতি’’ন্তি.

… কিমিলো [কিম্বিলো (সী. স্যা. পী.)] থেরো….

৯. নন্দত্থেরগাথা

১৫৭. ‘‘অযোনিসো মনসিকারা, মণ্ডনং অনুযুঞ্জিসং;

উদ্ধতো চপলো চাসিং, কামরাগেন অট্টিতো.

১৫৮. ‘‘উপাযকুসলেনাহং, বুদ্ধেনাদিচ্চবন্ধুনা;

যোনিসো পটিপজ্জিত্ৰা, ভৰে চিত্তং উদব্বহি’’ন্তি.

… নন্দো থেরো….

১০. সিরিমত্থেরগাথা

১৫৯. ‘‘পরে চ নং পসংসন্তি, অত্তা চে অসমাহিতো;

মোঘং পরে পসংসন্তি, অত্তা হি অসমাহিতো.

১৬০. ‘‘পরে চ নং গরহন্তি, অত্তা চে সুসমাহিতো;

মোঘং পরে গরহন্তি, অত্তা হি সুসমাহিতো’’তি.

… সিরিমা থেরো….

ৰগ্গো দুতিযো নিট্ঠিতো.

তস্সুদ্দানং –

চুন্দো চ জোতিদাসো চ, থেরো হেরঞ্ঞকানি চ;

সোমমিত্তো সব্বমিত্তো, কালো তিস্সো চ কিমিলো [কিম্বিলো (সী. স্যা. পী.), ছন্দলক্খণানুলোমং];

নন্দো চ সিরিমা চেৰ, দস থেরা মহিদ্ধিকাতি.